LESON 34
Wat Nao Iumi Savve Duim for Showim Iumi Lovem Jehovah?
Hao, iu klos go moa lo God start from taem wea iu studyim Bible? Hao, iu laek for gohed strongim frenship blo iu witim hem? Sapos olsem, tingim diswan: Taem Jehovah lukim iu barava lovem hem, hem tu bae lovem iu and lukaftarem iu. Wat nao iu savve duim for showim iu lovem hem?
1. Wat nao iumi savve duim for showim lo Jehovah iumi lovem hem?
Taem iumi obeyim Jehovah datwan showim iumi lovem hem. (Readim 1 John 5:3.) Hem no forcem eniwan for obeyim hem. Bat, hem letem iumi for chus sapos iumi bae obeyim hem or nomoa. Why nao olsem? Jehovah laekem iumi for “obeyim hem from heart.” (Rome 6:17) Datwan minim hem laekem iu for obeyim hem bikos iu lovem hem, no bikos hem samting wea iu mas duim. Sekson 3 and 4 blo disfala buk bae helpem iu for duim samting wea Jehovah hapi lo hem and no duim samting wea hem no hapi lo hem. Taem iu duim olsem, datwan showim iu lovem hem.
2. Why nao hem no isi for duim samting for showim iumi lovem Jehovah?
“Man wea hemi stret maet hemi safa long plande trabol.” (Sams 34:19) Iumi evriwan stragol witim olketa wik point blo iumiseleva. Iumi maet stragol tu witim olketa problem saed lo selen, olketa samting wea no followim justice, and olketa nara hard samting. Taem iumi kasem olketa hard taem, maet iumi faendem hard for duim samting wea Jehovah laekem iumi for duim. Datwan hem bikos maet isi samting for duim hem for no obeyim Jehovah. Bat taem iu faithful for duim samting wea Jehovah talem iu for duim, iu showim iu lovem hem winim eni nara samting. And iu pruvim iu loyal lo hem and hem bae loyal lo iu tu. Hem bae nating lusim iu.—Readim Psalm 4:3, NW.
DIG GO MOA
Bae iumi lanem why hem important for iu obeyim Jehovah and samting wea savve helpem iu for gohed faithful lo hem.
3. Satan accusim iu
Bible buk Job storyim Satan accusim Job and evriwan wea laek for worshipim Jehovah. Readim Job 1:1, 6–2:10, then discussim tugeta olketa kwestin hia:
Lo tingting blo Satan, why nao Job obeyim Jehovah?—Lukim Job 1:9-11.
Wat nao Satan talem abaotem iumi evriwan?—Lukim Job 2:4.
Readim Job 27:5b (NW), then discussim tugeta disfala kwestin:
Wat nao Job duim wea showim hem lovem Jehovah tumas?
Job showim hem lovem Jehovah taem hem gohed loyal lo hem
Iumi showim iumi lovem Jehovah taem iumi gohed loyal lo hem
4. Mekem heart blo Jehovah hapi
Readim Proverbs 27:11 (NW), then discussim tugeta olketa kwestin hia:
Hao nao tingting blo Jehovah taem iu duim samting wea wise and obeyim hem? Why nao olsem?
5. Iu savve loyal lo Jehovah
Taem iumi lovem Jehovah iumi bae laek for story abaotem hem lo narawan. From iumi loyal lo hem, iumi bae duim olsem nomata lo taem wea hem no isi. Pleim VIDEO, then discussim tugeta olketa kwestin hia.
Hao, iu faendem hard for story abaotem Jehovah lo olketa narawan?
Olsem iumi lukim lo video, wat nao helpem Grayson for no fraet?
Hem isi for loyal lo Jehovah taem iumi laekem samting wea hem laekem and heitim samting wea hem heitim. Readim Psalm 97:10 (NW), then discussim tugeta olketa kwestin hia:
Wat nao samfala samting wea iu lanem finis wea Jehovah laekem? Wat nao samfala samting wea hem heitim?
Wat nao iu savve duim for laekem olketa gud samting and heitim olketa nogud samting?
6. Taem iumi obeyim Jehovah bae iumi kasem gud samting
For obeyim Jehovah hem evritaem best samting for duim. Readim Aesaea 48:17, 18, then discussim tugeta olketa kwestin hia:
Hao, iu tingse iumi savve trustim hao Jehovah hem evritaem savve lo best samting for iumi? Why nao olsem?
Wat nao samfala gud samting wea iu kasem taem iu studyim Bible and lane abaotem tru God, Jehovah?
ENIWAN MAET ASK: “Hao, bae God hapi lo olketa samting wea mi duim tu?”
Iu tingim eni scripture wea iu savve iusim for showim hao olketa samting wea iumi duim, savve mekem Jehovah hapi or sorre?
MAIN POINT
Iumi showim iumi lovem Jehovah taem iumi obeyim hem and faithful for duim olketa samting wea hem talem iumi for duim nomata lo taem wea hem no isi.
Review
Wat nao iu lanem from example blo Job?
Wat nao bae iu duim for showim iu lovem Jehovah?
Wat nao bae helpem iu for gohed loyal lo Jehovah?
FAENDAOT MOA
Lukim samting wea iu savve duim for loyal lo Jehovah and lo kongregeson.
Read abaotem samfala samting moa wea Satan accusim lo iumi olketa man.
“Job Gohed for Faithful” (Bible—Wat Nao Message wea Stap Insaed? sekson 6)
Lukim hao olketa young wan tu savve duim samting for showim olketa lovem Jehovah.
Wat nao wanfala young wan savve duim for gohed loyal lo Jehovah taem hem kasem pressure from olketa nara young wan?