Tinghae lo Laef wea Hem Present From God

Iumi savve duim and enjoyim staka naes samting bikos iumi laef. Nomata iumi kasem olketa problem, iumi savve enjoyim olketa nara samting lo laef. Wat nao iumi savve duim for showim iumi tinghae lo laef? And wat nao barava important reason for iumi duim datwan?

1. Why nao iumi shud tinghae lo laef?

Iumi shud tinghae lo laef bikos hem present from Dadi blo iumi, Jehovah, wea lovem iumi. Hem nao “mekem evri laef samting.” (Sams 36:9) “Hem nao mekem olketa man laef and savve brith and hem givim evri samting long olketa.” (Acts 17:25, 28) Jehovah givim iumi olketa samting wea iumi needim for gohed laef. And tu, olketa samting wea hem givim hem mekem iumi enjoyim laef.​—Readim Acts 14:17.

2. Wat nao iumi savve duim for showim Jehovah iumi tinghae lo laef?

Start from taem wea iu form insaed bele blo mami, Jehovah kea abaotem iu. David wanfala man wea worshipim God bifor hem prea olsem lo God: “Taem mi no bon kam yet, yu lukim mi.” (Sams 139:16) Jehovah tinghae lo laef blo iu. (Readim Matthew 10:29-31.) Hem bae feel nogud tumas if samwan killim dae eniwan or killim hemseleva dae.a (Eksodas 20:13) Jehovah bae feel nogud tu if iumi putim laef blo iumi lo danger and no duim samting for protectim laef blo olketa narawan. Taem iumi lukaftarem gud laef blo iumi and respectim laef blo olketa narawan, iumi showim iumi tinghae lo laef wea hem best present from Jehovah.

DIG GO MOA

3. Lukaftarem gud health blo iu

Olketa Christian wea dedicate lo Jehovah, iusim full laef blo olketa for worshipim Hem. Hem olsem olketa givim body blo olketa olsem sakrifaes lo God. Readim Rome 12:1, 2, then discussim tugeta olketa kwestin hia:

• Wat nao shud encouragem iumi for lukaftarem gud health blo iumi?

• Wat nao samfala samting wea iumi savve duim for lukaftarem gud health blo iumi?

4. Tingim safety blo iuseleva and olketa narawan

Bible sei for iumi no duim samting wea bae mekem laef stap lo danger. Pleim VIDEO for lanem samfala samting wea iu savve duim for tingim safety blo iu and nara pipol.

VIDEO: Evritaem Tingim Safety (8:34)

Readim Provebs 22:3, then discussim tugeta wanem iu and olketa narawan savve duim for tingim safety . . .

• lo haos.

• lo waka ples.

• taem iu pleim sports.

• taem iu draevem trak or go insaed wanfala trak.

5. No spoelem laef blo baby wea no born yet

David explainim hao Jehovah interest lo evri samting wea happen taem baby gohed for grow insaed bele blo mami. Readim Sams 139:13-17, then discussim tugeta kwestin hia:

• Lo tingting blo Jehovah, hao, laef blo man hem start taem hem form insaed bele blo mami or taem hem born?

Olketa law blo Jehovah for pipol lo Israel bifor protectim olketa mami and baby blo olketa wea no born yet. Readim Exodus 21:22, 23 (NW), then discussim tugeta olketa kwestin hia:

• Hao nao tingting blo Jehovah abaotem eniwan wea duim eni samting and kosim baby insaed bele blo mami for dae, nomata hem no min for duim datwan?

• Hao nao bae Jehovah ting lo eniwan wea min for duim samting for killim dae baby wea no born yet?b

• Taem iu savve lo tingting blo God abaotem datwan, hao nao tingting blo iu?

Pleim VIDEO.

VIDEO: Garem Sem Tingting Olsem God Abaotem Laef (5:00)

Nomata woman wea luksavve laef hem important tumas, hem maet tingse only option wea stap, hem for duim abortion. Readim Aesaea 41:10, then discussim tugeta olketa kwestin hia:

• Sapos eni woman kasem pressure from olketa narawan for duim abortion, hu nao hem shud askem help lo hem? Why nao olsem?

MAIN POINT

Bible sei for iumi lovem, respectim, and protectim laef wea hem present from Jehovah. Diswan minim laef blo iumiseleva and laef blo nara pipol.

Review

• Why nao Jehovah tinghae lo laef blo iumi?

• Hao nao tingting blo Jehovah taem samwan min for killim dae eniwan?

• Hao, iu tinghae lo laef? Why nao olsem?

FAENDAOT MOA

Wat nao iumi savve duim for thankiu lo Jehovah for laef wea hem givim iumi?

Song 141​—Mirakol blo Laef (2:41)

Readim article hia for lukim ansa for kwestin hia, hao, God bae forgivim woman wea duim abortion?

“Wat Nao Bible Talem Abaotem Abortion?” (Article lo jw.org)

Readim article hia wea storyim tingting blo God abaotem laef wea shud helpem iumi for chusim sport wea bae no putim laef lo danger.

“Hao, Iu Shud Pleim ‘Olketa Danger Sports’?” (Awake!, October 8, 2000)

Hao sapos samwan tingting for suisaed? Read abaotem wanem Bible talem wea savve help.

“Mi Laek for Dae—Hao, Bible Savve Helpem Mi Taem Mi Tingting for Suisaed?” (Article lo jw.org)