“Right Bilong Pikinini for Garem Faith Long God”
LONG December 9, 2008, Swedish Academy for the Rights of the Child garem wanfala meeting wea theme bilong hem, “Right Bilong Pikinini for Garem Faith Long God.” Staka bigman from Church bilong Sweden, olketa nara religion wea sei olketa Christian, Islam, and olketa wea no bilivim God hem stap, olketa talemaot tingting bilong olketa abaotem datwan.
Wanfala bigman bilong wanfala church hem sei: “Hem hard lelebet for storyim wei wea olketa story long Bible savve barava helpem olketa pikinini for garem faith long God.” Long wanem wei nao olketa story long Bible helpem olketa pikinini for garem faith long God?
Datfala bigman bilong church sei: “Olketa scripture and story long Bible hem for helpem olketa pikinini for ting raonem samting.” Hem talem olketa story olsem “story bilong Adam and Eve, Cain and Abel, David and Goliath, taem Jesus born, Zacchaeus wea hem man for tekem tax, olobaot son, and kaenfala man bilong Samaria.” Olketa story hia savve “helpem pikinini for garem stretfala tingting abaotem wei for no laea, forgivim narawan, sei sorre, no heitim narawan, no ting daonem narawan, wei for fren bak moa, and for lovem narawan olsem brata.” Hem sei tu: “Man savve lanem samting from olketa story hia, and followim long laef bilong hem.”
Tru tumas, hem gud for encouragem olketa pikinini for readim Bible. Bat waswe, olketa pikinini savve “ting raonem” seleva wanem olketa readim long Bible and savve minim stret wanem olketa readim?
Olketa bigman tu bat needim narawan for minim olketa scripture long olketa. Bible story abaotem wanfala man wea no minim olketa scripture nomata hem “ting raonem” seleva wanem hem readim. Disfala man hem bigman bilong Ethiopia. Hem read abaotem profesi bilong Isaiah bat hem no minim wanem hem readim. Hem laek tumas for savve wanem nao profet Isaiah minim so hem hapi taem Philip minim datwan long hem. (Acts 8:26-40) Hem no bigman bilong Ethiopia nomoa wea needim help for minim olketa scripture. Iumi evriwan needim narawan for minim olketa scripture long iumi, wea main wan nao hem olketa pikinini.
Bible sei: “Krangge tingting hem stap long heart bilong pikinini.” (Prov. 22:15) Olketa pikinini needim narawan for helpem olketa and leadim olketa. Olketa dadi and mami mas iusim Bible and wanem olketa herem long olketa meeting for lanem olketa pikinini wanem nao hem stret and no stret and for helpem olketa fren gud witim God. Hem right bilong olketa pikinini for dadi and mami trainim olketa olsem. Start long taem wea olketa smol yet, olketa needim help from Bible for fren gud witim God, mekem olketa kamap “mature pipol . . . wea savve finis hao for luksavve long wanem hem stret and wanem hem no stret.”—Heb. 5:14.