Samting Olketa Pikinini Needim From Dadi and Mami
EVRI dadi and mami share insaed wanfala important samting wea no eni man savve barava minim gud. Dadi and mami givim samting from body bilong tufala. From diswan, samting wea grow insaed bele bilong mami kamap wanfala baby. Dastawe, iumi no sapraes hao taem wanfala baby born, pipol kolem diswan wanfala “mirakol.”
Bat, for garem pikinini hem start nomoa long waka bilong dadi and mami. Firstaem, olketa baby depend evribit long dadi and mami for lukaftarem olketa, bat taem olketa grow, olketa start for garem olketa nara need. Olketa needim help for grow long tingting, feeling, fasin, and long spiritual wei.
For olketa pikinini grow gud, olketa barava needim love bilong dadi and mami. Nomata hem important for dadi and mami talemaot tufala lovem olketa pikinini, samting olketa duim nao bae pruvim datwan. Tru nao, olketa pikinini needim gudfala example bilong dadi and mami. Olketa needim direction saed long gudfala fasin, and olketa principle for olketa savve followim. And olketa needim olketa samting hia taem olketa smol yet. Olketa barava nogud samting savve happen sapos olketa pikinini no kasem help long taem wea olketa needim.
Bible nomoa garem olketa nambawan principle. Instruction from Bible nao savve helpem man winim eni nara instruction. Thru long instruction olsem, olketa pikinini start for luksavve hao disfala instruction hem no kam from olketa man bat hem from wanem Creator, Dadi bilong olketa long heven, hem talem. Diswan nao mekem man respectim datfala kaonsel winim eni nara kaonsel.
Bible encouragem dadi and mami for waka hard for mekem olketa pikinini minim why olketa stretfala principle hem important, and why hem important tu for rememberim and followim olketa. Bat, taem olketa pikinini kakamap big, plande taem dadi and mami faendem hem hard for story witim olketa abaotem olketa barava important samting. Olketa wakem disfala buk, Lane From Datfala Nambawan Teacher, for help for stopem diskaen samting for kamap. Hem provaedem olketa spiritual information wea dadi and mami and olketa pikinini savve readim tugeta. And tu, hem shud encouragem olketa pikinini and olketa wea readim disfala buk witim olketa for story tugeta.
Iu bae lukim hao disfala buk givim chance for olketa pikinini talem tingting bilong olketa. Plande gudfala kwestin hem stap insaed disfala buk. Taem iu read kasem olketa kwestin hia, iu bae lukim disfala mark (—). Diswan hem remindim iu for stop lelebet and encouragem pikinini for talem tingting bilong hem. Olketa pikinini laek for tekpart. Sapos pikinini no savve tekpart, hem bae kwiktaem no interest.
Bat, important samting nao, olketa kwestin hia bae helpem iu for savve long tingting bilong pikinini. Hem tru, pikinini maet no talem stret ansa. Bat information wea kam bihaen each kwestin hem for helpem pikinini mekem grow olketa gudfala wei for tingting.
Wanfala spesol samting abaotem disfala buk nao hem garem winim 230 piksa. Plande garem toktok wea encouragem pikinini for talem tingting bilong hem from samting hem lukim and readim. So lukluk gud long olketa piksa witim pikinini. Hem nambawan wei for teach wea mekhae long olketa important samting wea each chapter teachim.
Taem pikinini lane for read, encouragem hem for readim big long iu and long hemseleva. Sapos hem readim plande taem, gudfala kaonsel savve go deep insaed mind and heart bilong hem. Bat for strongim wei for fren and respect midolwan iu and pikinini, iu shud readim buk tugeta and duim evritaem.
Distaem, world hem mekem olketa pikinini savve abaotem dirty fasin, spiritism, and olketa nara nogud fasin, wea no staka year bifor, bae hard for olketa pikinini savve abaotem olketa samting olsem. So olketa needim protection, wea disfala buk hem help for provaedem long wei wea showimaot respect and wea klia for minim. Bat, olketa pikinini barava needim samwan for directim olketa go long Datwan wea garem evri wisdom, Dadi bilong iumi long heven, Jehovah God. Hem nao wanem Jesus, datfala Nambawan Teacher duim evritaem. Mifala barava hope disfala buk bae helpem iu and famili bilong iu for followim wei wea bae mekem Jehovah hapi, and wea bae mekem iufala kasem olketa blessing for olowe.