Buk for Helpem Olketa Young Wan Tingim God

SAMTING olsem 3,000 year go finis, Solomon sei: “Taem iu young yet, tingim God bilong iu wea wakem iu.” (Eccl. 12:​1, Today’s English Version) Olketa young Christian kasem niufala buk for helpem olketa for duim datwan. Olketa kasem Questions Young People Ask​—⁠Answers That Work, Volume 2, long “Holy Spirit Leadim Iumi” Distrik Convention bilong Olketa Jehovah’s Witness long 2008.

Long first page hem garem leta from Governing Body for olketa young wan. Wanfala part long leta mifala transleitim olsem: “Mifala prea disfala buk bae helpem iufala young wan for winim olketa hevi and test wea kasem iufala and for helpem iufala disaedem olketa samting wea God laekem iufala for duim.”

Olketa dadi and mami waka hard for “trainim and lanem olketa [pikinini] long wei bilong Jehovah.” (Eph. 6:⁠4) Bat taem olketa teenager, staka young wan no savve wanem for duim and olketa laekem narawan for helpem olketa. Sapos pikinini bilong iu hem teenager, wanem nao iu savve duim mekem hem kasem barava gud samting from disfala buk? Dadi and mami savve followim samfala idea hia.

▪ Garem buk bilong iuseleva and savve gud long olketa subject insaed. Diswan no minim for readim nomoa disfala buk bat tingim wei wea olketa raetem. Buk hia no just talem olketa young wan wanem nao stret samting for duim and wanem nao no stret, bat hem helpem olketa for garem wei for “luksavve” tu. (Heb. 5:​14) Buk storyim tu olketa gudfala idea long hao for duim stret samting. Tingim Chapter 15 (“How Can I Resist Peer Pressure?”). Hem no just talem olketa young wan for sei no, bat hem helpem olketa for followim olketa Bible principle for stretem olketa problem and wanem olketa savve talem for “ansarem narawan.”​—⁠Col. 4:⁠6.

▪ Raetem tingting bilong iu long spes long buk wea askem kwestin. Nomata olketa spes hia hem for olketa young wan, hem gud for dadi and mami raetem tingting bilong olketa tu long buk.a Taem iu readim tufala kwestin long page 16 abaotem wei for frenim boy or gele, trae for tingim wanem nao tingting bilong iu long diswan taem iu young. Hem gud for iu raetem ansa bilong iu long spes wea olketa putim. Then tingim diswan: ‘Long olketa year wea go pas, waswe, tingting bilong mi abaotem diswan hem change? Wanem nao mi luksavve long hem distaem, and hao nao mi savve storyim gud diswan long pikinini bilong mi?’

▪ No readim buk bilong teenage pikinini bilong iu. Olketa sekson long buk wea garem spes for iumi raetem ansa hem for mekem pikinini bilong iu raetem tingting bilong hem abaotem subject wea hem readim or for ting raonem datfala subject. Iu shud trae for savve long tingting bilong pikinini bilong iu bat no readim buk bilong hem for savve long datwan. Long page 3 long sekson wea garem title “A Note to Parents,” hem talem diswan: “Encouragem teenage pikinini bilong iu for raetem trufala tingting bilong hem long buk, and no readim wanem hem raetem. Maet bihaen nao hem bae laek story long iu abaotem wanem hem raetem.”

Gudfala Buk for Iusim Long Famili Bible Study

Young People Ask, Volume 2, hem nambawan buk for iu iusim long Famili Worship. Bat from buk hia no garem olketa study kwestin for olketa paragraf, hao nao iu savve iusim? Hem gud for mekem wei wea iufala studyim hem barava helpem olketa pikinini bilong iu.

Maet samfala famili practice tugeta taem olketa duim disfala sekson, “Peer-Pressure Planner” long page 132 and 133. Firstfala kwestin long there savve helpem boy or gele bilong iu for luksavve wanem hard samting nao hem kasem. Mek-tu kwestin helpem hem for luksavve wea nao disfala test maet kamap. Then pikinini savve ting raonem samting wea savve kasem hem sapos narawan switim hem and samting wea savve kasem hem sapos hem winim datfala test. Pikinini mas planim tu wanem hem bae talem sapos hem kasem test olsem. Helpem boy or gele bilong iu for tingim seleva olketa idea and wanem for talem wea bae no mekem hem feel shame and wea bae no mekem hem fraet for talem.​—⁠Ps. 119:⁠46.

Buk Helpem Olketa for Story Witim Dadi and Mami

Young People Ask, Volume 2, encouragem olketa young wan for story witim dadi and mami. Olketa box “How Can I Talk to Dad or Mom About Sex?” (page 63-64) and “Talk to Your Parents!” (page 189) storyim samfala wei for startim story abaotem olketa kaen subject wea no isi for story abaotem. Wanfala gele wea 13 year hem sei: “Disfala buk helpem mi for no fraet for story witim dadi and mami bilong mi abaotem olketa samting wea mi wari abaotem, and abaotem olketa samting wea mi duim finis.”

Disfala buk helpem olketa for story abaotem olketa nara samting tu. Long end bilong evri chapter, hem garem box, “What Do You Think?” Hem no review nomoa, bat hem samfala kwestin wea famili savve storyim tugeta. Klosap long end bilong evri chapter, hem garem disfala box tu, “Action Plan!” Box hia hem for olketa young wan raetem samfala wei wea olketa savve followim wanem olketa lanem long datfala chapter. Lastfala kwestin long disfala box “Action Plan!” hem sei: “What I would like to ask my parent(s) about this subject is . . . ” Datwan savve helpem olketa young wan for askem gudfala advaes from dadi and mami bilong olketa.

Kasem Heart!

Goal bilong iu hem for kasem heart bilong pikinini bilong iu. Young People Ask, Volume 2, savve helpem iu for duim datwan. Tingim hao wanfala dadi iusim disfala buk for story gud witim dota bilong hem.

“Mi and Rebekah garem olketa naesfala ples wea mifala laek wakabaot long hem, raedem baesikol, or for draevem trak long hem. Taem mitufala go long olketa ples hia, diswan mekem gele bilong mi laek story long mi.

“Firstfala samting long buk wea mitufala storyim nao hem leta from Governing Body and ‘A Note to Parents.’ Olsem wanem buk talem long page 3, mi laekem gele bilong mi for savve hem shud raetem tingting bilong hem long buk bilong hem. Mi talem hem bae mi no readim wanem hem raetem.

“Mi letem Rebekah nao for chusim olketa chapter wea hem laekem for mitufala storyim and which wan nao hem laek for storyim firstaem. Wanfala chapter wea hem chusim firstaem hem ‘Should I Play Electronic Games?’ Mi nating ting hem bae chusim datfala chapter! Bat hem garem gudfala reason for chusim datwan. Samfala fren bilong hem pleim video game wea barava nogud. Mi nating savve game hia hem barava raf and staka long datfala game tok swear! Gele bilong mi talem evri samting hia taem mitufala storyim “Action Plan!” long page 251. Datfala box helpem Rebekah for planim wanem nao bae hem talem sapos eniwan laek forcem hem for pleim datfala game.

“Distaem Rebekah talem mi evri samting wea hem raetem long buk bilong hem. Mitufala storyim staka samting taem mitufala study tugeta. Mitufala evriwan readim olketa paragraf, and then Rebekah hem savve laek tumas for story abaotem evri samting. Hem laek storyim olketa piksa and box tu. Diswan mekem mi savve storyim long hem wanem nao gohed long world taem mi young, and then hem bae talem mi wanem nao happen distaem. Hem laek storyim evriting nao!”

Sapos iu dadi or mami, iu mas hapi tumas taem iumi kasem disfala buk. Iu garem chance for iusim gud datfala buk. Governing Body laekem tumas for disfala buk Questions Young People Ask​—⁠Answers That Work, Volume 2, for barava helpem famili bilong iu. Iumi laekem buk hia for helpem evriwan for ‘gohed followim holy spirit,’ wea main wan nao hem olketa young wan.​—⁠Gal. 5:​16.

[Footnote]

[Box long page 30]

Wanem Samfala Young Wan Talem

“Buk hia hem kaen buk wea iu mas sidaon long chair, holem pencil, and ting raonem wanem iu readim. Wei wea olketa wakem buk olsem diary hem helpem man for ting raonem wanem nao best samting for hem duim long laef.” —⁠Nicola.

“Pipol wea tingse hem gud for frenim narawan olketa tu talem mi for mas garem boyfren. Nomata narawan talem mi for garem boyfren, firstfala sekson long buk helpem mi for luksavve mi no redi yet for garem boyfren.”​—⁠Katrina.

“Datfala box ‘Are You Thinking of Getting Baptized?’ helpem mi for tingting strong abaotem wei wea mi baptaes finis. Hem mekem mi for lukluk gud long hao mi duim study seleva and wei bilong mi for prea.”​—⁠Ashley.

“Nomata dadi and mami lanem mi taem mi smol, disfala buk helpem mi for ting raonem wanem mi shud duim long laef bilong mi. Hem helpem mi tu for storyim enikaen samting nomoa witim dadi and mami bilong mi.” ​—⁠Zamira.

[Piksa long page 31]

Dadi and mami mas savve gud long wanem nao insaed long disfala buk

[Piksa long page 32]

Trae hard for kasem heart bilong pikinini bilong iu