Waswe, Iu Tingim Yet?

Waswe, iu readim gud olketa Wastaoa magasin wea iumi kasem no longtaem go nomoa? Trae for ansarem olketa kwestin hia:

Waswe, hair bilong Samson nao mekem hem strong?

Samting wea mekem Samson for strong hem no datfala hair. Hair bilong hem stand for wei wea hem fren gud witim Jehovah olsem wanfala Nazarite. Taem Delilah talem wanfala man for katem hair bilong Samson, datwan spoelem datfala spesol wei wea Samson fren witim God.—4/15, page 9.

Wanem thrifala samting nao iumi savve duim for mekem tokpiksa heart bilong iumi healthy?

(1) Kaikai. Iumi mas kaikaim healthy kaikai mekem really heart bilong iumi hem healthy. Long sem wei iumi mas evritaem kaikaim plande spiritual kaikai mekem tokpiksa heart bilong iumi hem healthy. (2) Exercise. Wei for strong long ministry savve mekem tokpiksa heart bilong iumi healthy. (3) Pipol wea Iumi Stap Witim. Taem iumi hipap witim olketa spiritual brata and sista wea lovem iumi, datwan savve daonem hevi wea iumi kasem.—4/15, page 16.

Why nao hem no stret for brata wea duim funeral tok for sei Psalm 116:15 hem fitim man hia wea dae?

Datfala scripture hem sei: “Hem nogud samting long Jehovah for olketa wea faithful long hem for dae.” Diswan minim God bae no letem evri faithful wakaman bilong hem for dae bikos datwan bae nogud tumas long hem. Jehovah bae no letem eniwan for finisim evriwan wea faithful long hem.—5/15, page 22.

Hu nao olketa colporteur?

Bifor 1931, olketa iusim datfala nem “colporteur” for olketa wea distaem iumi kolem olketa pioneer.—5/15, page 31.

Hu nao “evri gavman hia” wea Daniel 2:44 storyim?

Disfala toktok hem storyim nomoa olketa gavman wea olketa difren part long datfala image wea olketa wakem from metal hem piksarem.—6/15, page 17.

Wanem taem nao datfala England and America World Paoa hem kamap mek-seven world paoa wea Bible storyim?

Disfala world paoa hem start for rul taem Britain and America barava fren gud and waka tugeta long World War I.—6/15, page 19.