Waswe, Jesus promisim datfala criminal hem bae go long heven?

Datfala kwestin kamap bikos long promis wea Jesus talem datfala criminal wea hange saed long hem. Jesus sei: “Mi talem iu tru samting, Iu bae stap witim mi long Paradaes.” (Luke 23:43) Long disfala scripture, Jesus no talem wea nao datfala Paradaes hem stap. So waswe, Jesus minim datfala criminal bae stap witim hem long heven?

Firstaem, iumi bae storyim sapos datfala criminal fit for kasem laef long heven. Olketa wea garem hope for go long heven mas baptaes long wata and holy spirit mekem olketa kamap disaepol bilong Jesus and olketa son wea God adoptim. (John 3:3, 5) Nara samting, olketa mas followim olketa standard bilong God, and olketa mas kaen, honest, and duim stret samting. (1 Corinth 6:9-11) And tu, olketa mas gohed faithful long God and Christ go kasem taem olketa dae. (Luke 22:28-30; 2 Timothy 2:12) Olketa mas duim evri samting hia mekem olketa fit for kasem laef long heven and fit for kamap olketa priest and king wea bae rul witim Christ ovarem olketa man for wan thousand year.—Revelation 20:6.

Bat datfala man wea olketa hangem saed long Jesus hem wanfala criminal wea duim olketa nogud samting go kasem taem hem dae. (Luke 23:32, 39-41) Hem tru, datfala man hem showimaot respect taem hem sei long Jesus: “Plis, iu tingim mi taem iu King.” (Luke 23:42) Nomata olsem, hem no baptaes, so hem no wanfala disaepol bilong Jesus and son wea God adoptim. And tu, hem no duim olketa stret samting and hem no faithful. Hard for Jesus promisim datfala criminal for rul long heven witim olketa follower bilong hem wea faithful long God go kasem taem olketa dae.—Rome 2:6, 7.

Tingim disfala example: Sapos wanfala man stealim selen bilong iu then hem askem iu for forgivim hem, maet iu disaed for no tekem hem long kot. Bat bae hem hard for iu trustim datfala man for ranem bisnis bilong iu and for hem lukaftarem famili bilong iu. Bae iu askem nomoa olketa wea iu barava trustim for duim datwan. Olsem tu, God trustim olketa wea garem hope for go long heven. Olketa hia duim olketa samting wea showimaot olketa bae fit for gohed followim olketa raeteous standard bilong God taem olketa rul ovarem olketa man. (Revelation 2:10) Datfala criminal hem no duim olketa samting hia, nomata luk olsem hem askem Jesus for forgivim hem taem hem redi for dae.

Samfala tingse Jesus talem datfala criminal hem bae go stap long heven witim Jesus long day wea tufala dae. Bat hem no savve happen olsem bikos Jesus no go long heven long sem day wea hem dae. Hem “stap insaed long grev for thrifala day.” (Matthew 12:40; Mark 10:34) Nomata bihaen hem laef bak, hem stap long earth for 40-fala day bifor hem go ap long heven. (Acts 1:3, 9) So bae hem hard for datfala criminal go stap witim Jesus long heven long sem day wea tufala dae.

So long wea nao Paradaes wea datfala criminal bae go stap long hem? Bihaen hem laef bak, hem bae stap long Paradaes long earth, wea Jesus bae rul ovarem. (Acts 24:15; Revelation 21:3, 4) For savve moa abaotem datfala Paradaes and olketa samting God laekem iumi for duim, iu savve story witim Olketa Jehovah’s Witness.