God Judgem Pipol​—Waswe, Hem Pruvim God No Tingim Iumi?

FOR ansarem datfala kwestin, iumi bae storyim tufala example long Bible abaotem wei wea God judgem pipol. Hem nao Flood long taem bilong Noah and taem God finisim pipol long Canaan.

FLOOD LONG TAEM BILONG NOAH

WANEM SAMFALA PIPOL TALEM: “God hem no tingim olketa man taem hem mekem wanfala flood wea finisim evri pipol, and hem sevem nomoa famili bilong Noah.”

WANEM BIBLE TALEM: God sei: “Mi nating hapi taem nogud man hem dae, bat mi hapi taem hem lusim nogud wei bilong hem and gohed for laef.” (Ezekiel 33:11) So God nating hapi taem olketa nogud pipol dae long Flood long taem bilong Noah. Sapos olsem, why nao hem finisim olketa pipol hia?

Bible helpem iumi for minim datwan. Bible sei wei wea God judgem nogud pipol long bifor “hem showimaot samting wea bae kasem pipol wea no followim God.” (2 Peter 2:5, 6) Taem God judgem nogud pipol, wanem nao datwan showimaot abaotem God?

First samting, iumi savve God no hapi taem hem finisim olketa nogud pipol. Nomata olsem, God no ting nating long olketa wea raf and wea mekem pipol safa and olketa mas givim ansa long God for samting olketa duim. Gogo, God bae finisim evri nogud samting and wei for safa.

Mek-tu samting, wei wea God judgem nogud pipol long bifor showimaot hao evritaem God warnim pipol bifor hem duim samting. Noah talemaot warning long pipol bat staka no lisin long hem. Bible sei: “Olketa nating tinghae long samting wea Noah talemaot, gogo Flood hem kam nomoa and evriwan draon nao.”—Matthew 24:39.

Waswe, evritaem God followim sem wei taem hem judgem pipol? Ia. Olsem example, hem warnim pipol bilong hem long Israel for no followim nogud wei bilong olketa nation wea stap raonem olketa. Sapos olketa no lisin long warning, hem bae letem enemy for kam tekovarem land bilong olketa, finisim Jerusalem, and tekem olketa for prisoner. Olketa Israelite no lisin and duim olketa barava nogud samting, nomata olketa pikinini bilong olketa seleva tu bat olketa sakrifaesim. Waswe, Jehovah duim samting wea hem talem? Ia, bat bifor hem duim datwan, hem sendem olketa profet staka taem for warnim pipol bilong hem for changem wei bilong olketa. Bible sei: “Jehovah, bae no duim eni samting sapos hem no talem yet plan bilong hem long olketa profet bilong hem.”—Amos 3:7.

GOD HEM TINGIM IUMI: Taem iumi lukim hao Jehovah judgem nogud pipol long bifor, datwan mekem iumi garem hope. Iumi savve luk forward for taem wea God bae finisim olketa wea raf and mekem pipol safa. Bible sei: “Olketa wea duim nogud samting bae finis . . . Bat God bae givim earth long olketa wea hambol, and olketa bae hapi fogud bikos olketa stap gud.” (Psalm 37:9-11) Sapos God finisim nogud pipol wea mekem olketa man safa, waswe, datwan showimaot God tingim iumi or nomoa?

TAEM GOD FINISIM PIPOL LONG CAANAN

WANEM SAMFALA PIPOL TALEM: “Wei wea God finisim pipol long Canaan hem olsem tu nogud wei wea samfala tribe distaem trae for killim dae evriwan long nara tribe.”

WANEM BIBLE TALEM: Bible sei: “Evri samting wea [God] duim hem stret. Hem God wea keepim olketa promis bilong hem and hem no savve duim samting wea no stret.” (Deuteronomy 32:4) Wei wea God finisim pipol hem no semsem witim wei wea olketa man killim dae narawan. Why nao olsem? Bikos God savve wanem stap long heart bilong man bat olketa man no savve long datwan.

Olsem example, taem God judgem Sodom and Gomorrah and disaed for finisim pipol long tufala taon hia, Abraham hem askem God sapos datwan hem stret or nomoa. Hem tingse God wea evritaem duim stret samting bae hard for “finisim olketa wea raeteous witim olketa nogud pipol.” God talem Abraham sapos tenfala raeteous man stap bae hem sevem evriwan long Sodom. (Genesis 18:20-33) God savve wanem hem stap long heart bilong pipol hia and hem luksavve olketa no willing for change.—1 Chronicles 28:9.

God luksavve olketa long Canaan no willing for change tu, so hem stret for hem talem olketa Israelite for finisim olketa. Olketa long Canaan barava raf tumas and olketa sakrifaesim olketa pikinini wea laef yet long fire.a (2 Kings 16:3) Olketa long Canaan savve finis God talem olketa Israelite for tekovarem land bilong olketa. Olketa long Canaan wea disaed for stap and faet againstim olketa Israelite showimaot olketa againstim olketa Israelite and Jehovah tu, nomata olketa lukim olketa pruv wea showimaot God sapotim olketa Israelite.

God showimaot mercy long pipol long Canaan wea lusim nogud wei bilong olketa and followim olketa law bilong Jehovah. Olsem example, God sevem datfala jury woman Rahab and famili bilong hem. And tu, God sevem olketa wea kam from Gibeon, wanfala taon long Canaan, taem olketa askem olketa Israelite for showim mercy long olketa.—Joshua 6:25; 9:3, 24-26.

GOD HEM TINGIM IUMI: Iumi savve lanem important samting from wei wea God judgem pipol long Canaan. Iumi barava klosap long “taem wea God bae judgem and finisim pipol wea no obeyim hem.” (2 Peter 3:7) Sapos iumi lovem Jehovah and chus for duim stret samting, taem Jehovah finisim olketa wea no laek stap anda long rul bilong hem, iumi bae laef long wanfala world wea no eniwan bae safa.

Samting wea dadi and mami disaedem savve affectim pikinini. Bible sei Jehovah laekem iumi for ‘chusim laef mekem iumi and olketa pikinini bilong iumi for gohed laef, long wei for lovem hem, lisin long hem, and barava followim hem.’ (Deuteronomy 30:19, 20) Waswe, disfala toktok showimaot God no tingim iumi, or hem showimaot God lovem iumi and laekem iumi for disaedem stret samting?