Why Nao Pipol Prea?

Waswe, hem wei bilong iu for prea? Staka pipol prea, nomata samfala wea no biliv long God tu. Bat why nao pipol prea? Wanfala survey sei staka pipol long France prea for “mekem olketa feel gud.” Olketa hia olsem plande nara pipol long Europe wea prea bat no for worshipim God. Olketa prea nomoa for feel gud. Samfala nara pipol wea biliv long God prea nomoa taem olketa needim samting and olketa laekem God for ansarem prea bilong olketa stretawe.—Isaiah 26:16.

Waswe long iu, iu prea for ting raonem samting nomoa? Sapos iu biliv long God, waswe, iu tingse prea hem helpem iu, or iu tingse God no ansarem olketa prea bilong iu? Bible savve helpem iu for luksavve wei for prea hem no for feel gud nomoa bat hem wanfala spesol wei for fren gud witim God.