Waswe, God Laekem Olketa Religion for Worship Tugeta?

BAT olketa wea sei hem gud for olketa religion worship tugeta, wea olketa savve kolem diswan interfaith, no agree witim olketa hia. Eboo Patel, wea startim wanfala organization, Interfaith Youth Core hem sei: “Evri religion laek for kaen long pipol . . . , laek for lukaftarem environment . . . , and welkamim olketa narawan.”

Samfala taem Buddhist, Catholic, Protestant, Hindu, Muslim, and olketa nara religion waka tugeta for trae finisim wei for poor, for mekhae long olketa raet wea pipol garem, or for waka tugeta for mekem pipol lukaftarem environment. Pipol from olketa difren religion savve hipap tugeta for story abaotem wei for encouragem and minim each other. Olketa laetem kandol, garem olketa festival, music, prea, and duim olketa nara samting for showimaot olketa acceptim olketa difren wei for worship.

Taem olketa difren religion worship tugeta, waswe, datwan savve mekem olketa stap gud tugeta long peace? Waswe, God laekem olketa religion for worship tugeta for mekem world kamap gud?

WASWE, OLKETA SAVVE AGREE LONG EVRI SAMTING?

Wanfala big interfaith organization sei hem garem olketa member from 200 difren religion and olketa kam from 76 difren kantri. Olketa laekem evri member for “mas waka hard for stap gud tugeta evriday.” Bat hem no isi for duim datwan. Olsem example, olketa bigman bilong datfala organization sei olketa mas tingting gud abaotem wanem for raetem insaed agreement witim olketa difren religion mekem evriwan hapi long datfala agreement. Why nao olsem? Wanfala samting nao, olketa no savve agree sapos olketa shud storyim God long datfala agreement. So olketa no talem eni samting abaotem God long agreement hia.

Sapos diskaen organization no laek storyim God, hu nao olketa followim? And tu, hao nao organization olsem difren from olketa nara organization wea helpem pipol? Organization hia sei olketa no wanfala religion, bat “olketa duim waka for helpem pipol.”

WASWE, HEM FITIM FOR SHOWIMAOT OLKETA GUDFALA WEI NOMOA?

Dalai Lama, bigman bilong Buddhist wea agree witim interfaith, hem sei: “Evri main religion bilivim olketa shud showimaot love, kaen long pipol, and forgivim narawan.” Hem sei tu: “Hem important for duim olketa samting hia evriday.”

Hem tru, hem important for showimaot love, kaen long pipol, and forgivim narawan. Jesus hem sei: “Samting wea iufala laekem pipol for duim long iufala, sem samting nao iufala mas duim long olketa.” (Matthew 7:12) Bat waswe, hem nomoa iumi shud duim?

Paul story olsem abaotem olketa wea sei olketa worshipim God: “Olketa laekem tumas for mekem God hapi, bat olketa no savve long tru samting abaotem hem.” Why nao olketa no worshipim God long stretfala wei? Paul sei hem bikos “olketa no savve long samting wea God sei hem mekem man raeteous.” So olketa “traem best nao for duim samting for showimaot olketa raeteous.” (Rome 10:2, 3) From olketa no savve long samting wea God laekem olketa for duim, wanem olketa duim no mekem God hapi.—Matthew 7:21-23.

WANEM BIBLE TALEM ABAOTEM WEI FOR OLKETA RELIGION WORSHIP TUGETA

Jesus sei: “Olketa wea no raoa and wea stap gud witim narawan bae hapi.” (Matthew 5:9) Jesus seleva duim datwan and hem teachim pipol for no raf and for garem peace. (Matthew 26:52) Olketa wea followim datwan savve stap gud tugeta witim olketa narawan. (Colossae 3:14) Bat waswe, hem nomoa Jesus laekem pipol for duim? Waswe, Jesus worship tugeta witim olketa long nara religion?

Olketa bigman long religion bilong olketa Pharisee and Sadducee barava againstim Jesus and laek for killim hem dae. Wanem nao Jesus duim? Jesus sei long olketa disaepol bilong hem: “No warim olketa. Nomata olketa blind, bat olketa trae for leadim olketa narawan.” (Matthew 15:14) Nomata olketa Pharisee and Sadducee sei olketa worshipim God, Jesus no acceptim olketa.

Samfala year bihaen datwan, olketa Christian startim wanfala kongregeson long Corinth, Greece, wanfala taon wea garem staka religion. Waswe, olketa Christian savve worship tugeta witim olketa religion hia? Aposol Paul sei long olketa: “Iufala mas no join witim olketa wea no biliv [olketa religion wea no followim teaching bilong Christ].” Why nao olsem? Paul sei: “Hem hard tumas for Christ hem wan mind witim Satan, or for man wea faithful hem wan mind witim man wea no biliv.” Then hem talem olketa Christian hia for “go aot from olketa and no stap witim olketa moa.”​—2 Corinth 6:14, 15, 17.

So Bible showimaot hem no stret for worship tugeta witim olketa nara religion. Bat maet iu laek for savve, ‘Sapos olsem, hao nao evriwan savve stap gud tugeta?’

WEI FOR EVRIWAN STAP GUD TUGETA

Olketa big construction company savve garem staka wakaman. Sapos olketa no agree for followim wanfala building plan, hard tumas for olketa wakem eni building.

Olketa religion wea laek for worship tugeta garem semkaen problem olsem. Olketa no savve agree long hao for duim datwan, nomata olketa tingse hem gud idea for waka tugeta and respectim each other. Dastawe olketa no savve agree tu long olketa teaching and samting wea stret.

Long Bible God talem iumi stretfala wei for worshipim hem, wea hem olsem wanfala building plan. Sapos iumi followim wanem Bible talem, bae iumi kasem gud samting. Olketa wea duim diswan lovem pipol nomata olketa from difren kantri and olketa stap gud tugeta and garem peace. God hem sei abaotem pipol bilong hem: “Mi bae lanem olketa tu for savve gud long wanfala niu languis wea klin, mekem olketa savve prea long nem bilong Jehovah and waka tugeta for worshipim hem.” Olketa hia stap gud tugeta bikos olketa iusim datfala “languis wea klin,” wea hem nao stretfala wei for worshipim God.​—Zephaniah 3:9; Isaiah 2:2-4.

Olketa Jehovah’s Witness invaetem iu for kam long wanfala Kingdom Hall klosap long ples wea iu stap for iu lukim wei wea olketa stap gud tugeta and garem peace.​—Psalm 133:1.