“Iufala Nao Olketa Witness Bilong Mi”

1, 2. (a) Wanem nao wanfala witness, and wanem nao olketa wea reportim nius no talem long pipol? (b) Why nao Jehovah no needim olketa wea reportim nius for talem pipol abaotem hem?

WANEM nao wanfala witness? Wanfala dictionary sei wanfala witness hem “samwan wea lukim wanfala samting wea happen and talem olketa narawan abaotem datwan.” Nem bilong wanfala niuspepa long South Africa, wea olketa printim for winim 160 year finis, hem The Witness. Datfala nem hem fitim bikos olketa niuspepa shud evritaem talem tru story abaotem olketa samting wea happen. Man wea startim datfala niuspepa sei The Witness bae evritaem talem “tru samting.”

² Sorre samting nao, olketa wea reportim nius no talem tru report abaotem staka samting wea happen raonem world. Olketa nating talem tru samting abaotem God and evri samting wea hem duim. God iusim profet Ezekiel for talem disfala toktok bilong hem: “Pipol long evri kantri mas savve mi nao Jehovah.” (Ezek. 39:7) Bat Jehovah, wea hem Olmaeti God, hem no needim olketa wea reportim nius for talem pipol abaotem hem. Hem garem samting olsem eit million Witness wea story abaotem hem long evri kantri long world. Olketa Witness hia talem pipol wanem God duim for pipol long bifor and wanem hem duim distaem. Olketa storyim tu olketa nambawan samting wea hem promis for duim long future. Isaiah 43:10 sei olsem: “Jehovah hem sei: ‘Iufala nao olketa witness bilong mi. Mi nao chusim iufala for kamap wakaman bilong mi.’” Taem preaching waka hem main waka long laef bilong iumi, datwan nao pruvim iumi olketa Witness bilong Jehovah.

3, 4. (a) Wanem year nao olketa Bible Student kasem datfala nem Olketa Jehovah’s Witness, and hao nao olketa ting long datfala niu nem? (Lukim piksa long start bilong study.) (b) Olketa wanem kwestin nao bae iumi storyim long disfala study?

³ Nem bilong Jehovah bae stap for olowe bikos hem nao “King for olowe.” Jehovah hem sei: “Diswan nao hem nem bilong mi for olowe, and disfala nem nao bae mekem pipol long evri genereson rememberim mi.” (1 Tim. 1:17; Ex. 3:15; comparem witim Ecclesiastes 2:16.) Hem nambawan privilege for iumi garem nem bilong Jehovah. Long 1931, olketa Bible Student hapi tumas for garem nem Olketa Jehovah’s Witness. Staka long olketa raetem leta for talemaot olketa barava tinghae long diswan. Wanfala kongregeson long Canada sei datfala niu nem hem strongim olketa for gohed duim samting wea bae mekem Jehovah kasem praise.

⁴ Hao nao iu savve showimaot iu luksavve hem privilege for garem nem bilong Jehovah and iu tinghae long datwan? And tu, waswe, iu savve why nao Jehovah sei iumi olketa Witness bilong hem, olsem Isaiah 43:10 hem talem?

OLKETA WITNESS BILONG GOD LONG BIFOR

5, 6. (a) Wanem nao olketa dadi and mami long Israel duim for witness abaotem Jehovah? (b) Wanem nao nara samting wea olketa dadi and mami long Israel mas duim, and why nao olketa dadi and mami distaem mas duim sem samting?

⁵ Jehovah chusim nation bilong Israel for kamap olketa witness bilong hem. Evri Israelite garem responsibility for story abaotem Jehovah long nara pipol. (Isa. 43:10) Olsem example, olketa dadi and mami long Israel duim diswan taem olketa story long pikinini bilong olketa abaotem wanem God duim finis for olketa Israelite. Jehovah talem olketa dadi and mami for mas teachim pikinini bilong olketa abaotem Pasova. Hem sei olsem long olketa: “Taem olketa pikinini bilong iufala askem iufala, ‘Why nao iumi duim disfala celebration?’ iufala mas sei, ‘Diswan hem sakrifaes wea iumi givim long Jehovah long taem bilong Pasova. Hem pas ovarem haos bilong olketa Israelite long Egypt taem hem mekem trabol for kasem pipol long Egypt, bat hem sevem mifala.’” (Ex. 12:26, 27) Maet dadi and mami storyim tu wei wea Pharaoh no laek for letem olketa Israelite go long wilderness for worshipim Jehovah. Pharaoh sei: “Jehovah hem hu ia, for mi mas obeyim toktok bilong hem for letem olketa Israelite for go?” (Ex. 5:2) Maet dadi and mami storyim long pikinini wanem Jehovah duim for ansarem disfala kwestin bilong Pharaoh, and wei wea Jehovah showimaot long evriwan Hem nao Olmaeti God. Hem mekem tenfala trabol kasem Egypt and hem sevem olketa Israelite long Red Sea from army bilong Egypt. Olketa Israelite lukim wei wea Jehovah nao hem trufala God and hem evritaem duim wanem hem promisim.

⁶ Olketa Israelite luksavve hem privilege for talem nara pipol abaotem Jehovah. Olketa story long pikinini bilong olketa, and long eni slave wea waka long haos bilong olketa, abaotem olketa nambawan samting wea Jehovah duim. And tu, olketa Israelite luksavve olketa mas evritaem followim olketa standard bilong God. Jehovah sei: “Iufala mas holy, bikos mi God bilong iufala Jehovah, mi holy.” So nara samting wea olketa dadi and mami long Israel mas duim hem for teachim pikinini bilong olketa for holy, wea minim for followim olketa standard bilong Jehovah long laef bilong olketa. (Lev. 19:2; Deut. 6:6, 7) Olketa dadi and mami distaem tu mas duim sem samting. Olketa mas teachim pikinini bilong olketa for duim samting wea bae mekem nem bilong God kasem praise.—Readim Proverbs 1:8; Ephesus 6:4.

7. (a) Taem olketa Israelite obeyim God, pipol long nara kantri luksavve long wanem samting? (b) Wanem nao olketa wea garem nem bilong Jehovah mas evritaem duim?

⁷ Taem olketa Israelite obeyim God, hem blessim olketa. Datwan mekem pipol long olketa nara kantri wea stap raonem olketa luksavve Jehovah protectim pipol bilong hem. (Deut. 28:10) Bat staka taem, datfala nation bilong Israel nating obeyim Jehovah. Olketa worshipim olketa idol, wea hem nao olketa god wea pipol long Canaan worshipim. Olketa Israelite kamap raf olsem olketa god hia. Olketa sakrifaesim olketa pikinini bilong olketa and spoelem pipol wea poor. Iumi no laek followim nogud example bilong olketa Israelite. Iumi mas evritaem traem best for holy olsem Jehovah, bikos iumi garem nem bilong hem!

“MI DUIM WANFALA NIU SAMTING”

8. Wanem nao Jehovah talem Isaiah for duim, and wanem nao Isaiah laek for savve?

⁸ Jehovah talem Isaiah for warnim olketa Israelite Hem bae distroem Jerusalem, wea hem kapitol taon bilong olketa, and olketa bae kamap prisoner. Jehovah talem tu, hem bae duim wanfala “niu samting” taem hem mekem pipol bilong hem kamap free long nambawan wei. (Isa. 43:19) Jehovah savve olketa Israelite bae no repent. Nomata olsem, hem talem Isaiah for gohed nomoa for warnim olketa. Chapter 1 go kasem chapter 6 long Bible buk Isaiah hem garem staka warning abaotem wei wea Jerusalem bae distroe. Isaiah laek for savve hao long nao datfala nation bae gohed for no obeyim Jehovah. God sei: “Go kasem taem olketa bigfala taon barava distroe and no eniwan stap long olketa, and no eniwan stap long olketa haos, and disfala ples hem distroe and barava emti.”—Readim Isaiah 6:8-11.

9. (a) Wanem taem nao profesi wea Isaiah talem abaotem Jerusalem hem kamap tru? (b) Wanem warning nao iumi herem distaem?

⁹ Isaiah gohed talemaot datfala warning long olketa Israelite for winim 45 year. Hem start for talemaot datfala profesi long lastfala year wea King Uzziah hem rul, wea datwan hem long 778 B.C.E., and hem gohed duim datwan go kasem 732 B.C.E., long taem wea King Hezekiah hem rul. Bihaen datwan, Jehovah gohed for talemaot warning long pipol bilong hem go kasem taem Jerusalem distroe long 607 B.C.E. So olketa Israelite kasem warning abaotem wei wea Jerusalem bae distroe staka year bifor datwan hem happen. Distaem, Jehovah iusim pipol bilong hem for talemaot warning abaotem samting wea bae happen long future. Staka year nao Wastaoa magasin talem long pipol hao klosap nao world bilong Satan bae finis and Christ bae start for rulim earth.—Rev. 20:1-3, 6.

10, 11. Long wanem wei nao profesi bilong Isaiah kamap tru, wea olketa Israelite long Babylon lukim?

¹⁰ Samfala Jew no dae taem Jerusalem hem distroe. Olketa obeyim instruction bilong Jehovah for sarenda, and olketa kamap prisoner long Babylon. (Jer. 27:11, 12) Seventi year bihaen, samfala long olketa hia lukim narafala profesi bilong Isaiah kamap tru, wea sei: “Diswan nao samting wea Jehovah, God bilong Israel wea holy, and wea baem bak iufala, hem talem: ‘Bae mi sendem olketa kam long Babylon for helpem iufala, and olketa bae aotem olketa gate bilong olketa wea garem iron bar.’”—Isa. 43:14.

¹¹ Wei wea Jehovah mekem datfala profesi kamap tru hem barava spesol. Long wanfala naet long October 539 B.C.E., king bilong Babylon and olketa bigman bilong hem mekem wanfala celebration for praisem olketa god bilong olketa. Olketa iusim tu olketa kap wea olketa stealim from temple bilong Jehovah. Bat long datfala sem naet, King Cyrus and army bilong hem kam and tekovarem Babylon. Long 538 or 537 B.C.E., Cyrus givim komand long olketa Jew for go bak long Jerusalem and buildim moa temple bilong God. And taem olketa Jew gogo bak, Jehovah protectim olketa. Evri samting wea Isaiah talem hem kamap tru. Taem pipol bilong God lukim temple wea olketa go bak for buildim hem finis, datwan pruvim Jehovah nao hem trufala God wea evritaem duim wanem hem promisim. God sei olketa Jew wea go bak long Jerusalem olketa nao “pipol wea mi chusim for talemaot olketa samting wea mi duim wea mekem mi kasem praise.”—Isa. 43:21; 44:26-28.

12, 13. (a) Taem olketa Israelite go bak for buildim moa temple, hu nao go witim olketa? (b) Wanem nao “olketa nara sheepsheep” mas duim distaem, and wanem nao olketa luk forward for duim long niu world?

¹² Taem olketa Israelite go bak for buildim moa temple, staka pipol from nara kantri tu go witim olketa for worshipim Jehovah. Bihaen, staka narawan wea no Jew kam for worshipim Jehovah tu. (Ezra 2:58, 64, 65; Esther 8:17) Distaem, olketa anointed Christian nao “Israel bilong God,” and “wanfala big crowd” bilong “olketa nara sheepsheep” kam for worshipim Jehovah witim olketa. (Rev. 7:9, 10; John 10:16; Gal. 6:16) Olketa anointed Christian and olketa nara sheepsheep garem privilege for garem disfala nem, Olketa Jehovah’s Witness.

¹³ Long niu world datfala big crowd bae hapi tumas for storyim long olketa wea laef bak wanem iumi Olketa Jehovah’s Witness duim long olketa last day. Sapos iumi laek for story witim olketa wea laef bak, iumi mas gohed for holy distaem. Nomata iumi traem best for evritaem followim olketa standard bilong Jehovah, iumi savve duim mistek evriday. So evriday iumi mas askem Jehovah for forgivim iumi. Sapos iumi gohed for holy, iumi showimaot iumi tinghae long privilege for garem nem bilong Jehovah.—Readim 1 John 1:8, 9.

MINING BILONG NEM BILONG GOD

14. Wanem nao datfala nem Jehovah hem minim?

¹⁴ For helpem iumi tinghae long privilege for garem nem bilong Jehovah, hem gud for iumi ting raonem mining bilong datfala nem. Datfala nem Jehovah hem kam from wanfala Hebrew word wea iumi savve transleitim “kamap,” and hem savve join witim wei for duim samting. So, staka sei nem bilong God hem minim “Hem Mekem Kamap.” Datfala nem Jehovah hem helpem iumi for minim wanem kaen God nao hem. Jehovah nao creatim evri samting long universe. And tu, taem Jehovah sei bae hem duim samting, no eniwan savve stopem hem for duim datwan, nomata Satan tu.

15. Wanem nao iumi savve lanem abaotem nem bilong Jehovah from samting wea hem talem long Moses? (Lukim box “Jehovah—Nem wea Garem Bigfala Mining.”)

¹⁵ Jehovah storyim samfala samting moa abaotem mining bilong nem bilong hem long Moses. Taem Jehovah sendem Moses for leadim pipol bilong Hem go aot from Egypt, hem sei olsem long Moses: “Mi Bae Kamap Wanem Mi Laek for Kamap.” Jehovah sei tu: “Iu mas sei olsem long olketa Israelite, ‘Mi Bae Kamap nao hem sendem mi kam long iufala.’” (Ex. 3:14; footnote.) So Jehovah bae kamap eni samting wea hem laek for kamap mekem hem duim wanem hem plan for duim. Jehovah kamap man for sevem, protectim, and leadim olketa Israelite, and hem givim olketa evri samting wea olketa needim.

SHOWIMAOT IUMI TINGHAE

16, 17. (a) Hao nao iumi savve showimaot iumi tinghae long privilege for garem nem bilong God? (b) Wanem nao bae iumi storyim long next study?

¹⁶ Distaem tu, Jehovah hem nating change. Nem bilong hem showimaot hem bae kamap eni samting wea hem laek for kamap mekem hem savve lukaftarem pipol bilong hem. Olsem example, evriday hem givim iumi evri samting wea iumi needim for laef and for gohed garem strongfala faith. Iumi lanem nara samting tu abaotem Jehovah from datfala nem. Wanem nao datwan? Jehovah savve mekem creation bilong hem for duim eni samting wea hem laekem, mekem plan bilong hem kamap tru. Olsem example, hem iusim olketa Witness bilong hem for duim waka bilong hem. From iumi savve long datwan, diswan mekem iumi barava tinghae long disfala waka wea iumi duim. Wanfala brata from Norway, wea hem 84 year, and nem bilong hem Kåre, hem duim preaching waka for 70 year finis. Hem sei: “Hem bigfala privilege for worshipim Jehovah, wea hem King bilong olowe, and for insaed long sekson wea garem nem bilong hem. Hem nambawan privilege for explainim olketa tru teaching insaed long Bible long pipol, and lukim pipol hapi taem olketa minim olketa teaching hia. Olsem example, mi barava hapi and satisfae taem mi teachim pipol abaotem wei wea ransom sakrifaes bilong Christ savve helpem olketa, and bikos long datfala sakrifaes olketa savve kasem laef olowe long wanfala niu world wea garem peace and evriwan raeteous.”

¹⁷ Long samfala ples long world staka pipol no interest for lane abaotem Jehovah. Bat taem iumi faendem wanfala wea laek for lane abaotem nem bilong Jehovah, datwan mekem iumi barava hapi olsem Kåre. Long disfala study iumi storyim wanem iumi duim for witness abaotem Jehovah. Bat long semtaem iumi mas witness abaotem Jesus tu. Bae iumi storyim datwan long next study.