Jehovah Savve Strongim and Protectim Marit Bilong Iu

1, 2. (a) Why nao 24,000 Israelite no kasem blessing for go long Promis Land? (b) Wanem important samting nao iumi lanem from datfala example?

NO LONGTAEM bifor olketa Israelite go insaed Promis Land, staka thousand man long Israel “durong witim olketa gele long Moab.” From datwan, Jehovah killim dae 24,000 Israelite. Tingim datwan, olketa Israelite weit for longtaem finis for go long Promis Land and olketa klosap nao for kasem! Bat sorre tumas, olketa lusim datfala nambawan blessing bikos olketa foldaon long wei for durong.—Num. 25:1-5, 9.

² Datfala example “hem stap long olketa Holy Raeting for warnim iumi wea stap long disfala taem wea world hem klosap for finis.” (1 Cor. 10:6-11) Iumi stap long barava end bilong “olketa last day,” and niu world hem klosap nao. (2 Tim. 3:1; 2 Pet. 3:13) Bat sorre tumas, samfala wea worshipim Jehovah no gohed for lukaot and olketa foldaon long trap for durong. Olketa kasem barava nogud samting from wanem olketa duim, and sapos olketa no repent, olketa bae lusim chance for laef olowe long Paradaes.

3. Why nao hem barava important for olketa hasband and waef for kasem advaes and help from Jehovah? (Lukim piksa long start bilong study.)

³ From staka pipol long world garem rong tingting abaotem sex, hem barava important for olketa hasband and waef for kasem advaes and help from Jehovah for protectim marit bilong olketa. (Readim Psalm 127:1.) Long disfala study iumi bae storyim samting wea olketa hasband and waef savve duim for protectim marit bilong olketa. Olketa mas protectim heart, gohed fren gud witim God, garem niufala wei, story gud tugeta, and givim wanem narawan fit for kasem insaed marit.

PROTECTIM HEART

4. Wanem nao savve mekem wanfala Christian for foldaon long wei for durong?

⁴ Wanem nao savve mekem wanfala Christian for foldaon long wei for durong? Staka taem eye nao savve leadim man for duim nogud samting. Jesus sei: “Eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” (Matt. 5:27, 28; 2 Pet. 2:14) Samfala samting wea leadim staka Christian for durong nao hem wei for lukluk long olketa rabis piksa, readim buk wea storyim pipol wea durong, or lukluk long olketa rabis video clip long Internet. Olketa narawan lukim olketa dirty movie, show, or TV program. Samfala narawan go long olketa naetclub, or ples wea pipol pei for lukim man or woman aotem kaleko, or olketa ples for duim kaen massage (pressim body) wea mekem man garem feeling for laek duim sex.

5. Why nao iumi mas protectim heart bilong iumi?

⁵ Samfala Christian durong bikos olketa start for interest long narawan wea hem no marit partner bilong olketa. Iumi stap long world wea pipol no savve kontrolem seleva and laekem tumas for duim dirty samting. And tu, from iumi no perfect and heart bilong iumi savve laea long iumi, maet iumi start for laekem samwan wea hem no marit partner bilong iumi. (Readim Jeremiah 17:9, 10.) Jesus sei olketa samting wea kamaot from heart hem “rabis tingting, wei for killim man dae, adultery, [and] wei for durong.”—Matt. 15:19.

6, 7. (a) Wanem nao savve happen sapos iumi start for interest long narawan wea hem no marit partner bilong iumi? (b) Wanem nao savve helpem iumi for no spoelem wei wea iumi fren witim Jehovah?

⁶ Taem wanfala man or woman start for garem feeling for laekem each other, maet tufala start for story abaotem olketa samting wea tufala shud storyim nomoa witim hasband or waef bilong tufala. Then tufala start for faendem reason for meet evritaem for storystory, and mekem for hem luk olsem tufala no planim datwan. Gogo taem feeling bilong tufala for laekem each other hem kamap strong, hem no isi nao for duim stret samting. Nomata tufala savve olketa samting hia wea tufala duim hem rong, bat from tufala garem strong feeling for each other, hem hard nao for stopem wei wea tufala interest long each other.—Prov. 7:21, 22.

⁷ Gogo tufala no tingim nao olketa law bilong Jehovah, and tufala start for hol hand, kisskiss, and tasim body bilong narawan, wea hem olketa samting wea fitim for olketa duim nomoa witim marit partner bilong olketa. Tufala duim samting wea body laekem, and taem datfala feeling hem kamap strong tumas, tufala durong nao. (Jas. 1:14, 15) Datwan hem sorre samting, bikos tufala spoelem nao wei wea tufala fren witim Jehovah! Tufala savve misstim datwan sapos tufala followim direction bilong Jehovah for tinghae long marit. Wanem nao savve helpem iumi for tinghae long marit?

GOHED FREN GUD WITIM GOD

8. Hao nao wei wea iumi fren gud witim Jehovah hem helpem iumi for stap klia long wei for durong?

⁸ Readim Psalm 97:10. Sapos iumi fren gud witim Jehovah, datwan savve protectim iumi and helpem iumi for stap klia long wei for durong. Taem iumi lane abaotem olketa nambawan wei bilong God, iumi traem best for “followim wei bilong hem” and for “mekem hem wei bilong [iumi] for showimaot love.” Wei for duim olsem hem strongim iumi for stap klia long “wei for durong” and “evri difren kaen wei for no klin.” (Eph. 5:1-4) Olketa hasband and waef wea savve “God bae judgem olketa wea durong and wea duim adultery,” gohed waka hard for faithful long each other.—Heb. 13:4.

9. (a) Wanem nao helpem Joseph for faithful long God and no durong? (b) Wanem nao iumi savve lanem from example bilong Joseph?

⁹ Samfala Christian spoelem gudfala wei bilong olketa taem olketa associate witim olketa wakfren wea no Witness bihaen long taem bilong waka. Olketa narawan kasem test for durong long taem bilong waka. Hem nao samting wea kasem Joseph. Taem hem long ples bilong waka, Joseph luksavve waef bilong boss bilong hem barava laekem hem. Evriday, hem trae switim Joseph for durong witim hem. Gogo wanday, “hem holem kaleko bilong Joseph, and sei: ‘Lei daon witim mi!’” Bat Joseph ranawe from hem. Wanem nao helpem Joseph for faithful long taem olsem? Joseph barava no laek for spoelem wei wea hem fren witim God. Nomata olketa sakem Joseph and putim hem long prison, bat hem kasem blessing from Jehovah. (Gen. 39:1-12; 41:38-43) Nomata iumi long waka or eni nara ples, iumi mas stap klia long eni samting wea savve switim iumi for durong.

GAREM NIUFALA WEI

10. Hao nao niufala wei savve protectim olketa wea marit?

¹⁰ Niufala wei wea Bible story abaotem “wea fitim wanem God hem laekem and wea . . . barava raeteous” savve protectim olketa wea marit for no durong. (Eph. 4:24) Olketa wea garem niufala wei mas “killim dae” feeling for “laek durong, for duim samting wea no klin, for ova tumas for laekem sex, for laekem tumas for duim nogud samting, and for greedy.” (Readim Colossae 3:5, 6.) Datfala toktok “killim dae” showimaot iumi mas barava waka hard for faet againstim feeling for laek durong. Iumi bae stap klia long eni samting wea maet mekem iumi for garem feeling for laek durong. (Job 31:1) Taem iumi evritaem duim wanem God laekem, iumi lane for “heitim olketa rabis samting and hol strong long samting wea hem stret.”—Rome 12:2, 9.

11. Hao nao niufala wei savve strongim marit?

¹¹ Taem iumi garem niufala wei, iumi followim olketa wei bilong Jehovah. (Col. 3:10) Taem hasband and waef ‘showimaot love, sorre long tufala, kaen long tufala, hambol, no raf, and patient,’ tufala bae garem gudfala marit and Jehovah bae blessim tufala. (Col. 3:12) And tu, taem tufala ‘letem datfala peace wea tufala kasem from tufala followim Christ hem rulim heart’ bilong tufala, bae tufala stap gud tugeta. (Col. 3:15) Hasband and waef wea lovem each other bae evritaem showimaot respect long narawan.—Rome 12:10.

12. Long tingting bilong iu, olketa wanem wei nao savve helpem hasband and waef for garem gudfala marit?

¹² Wanfala hasband and waef, wea nem bilong tufala Sid and Sonja, storyim olketa samting wea helpem tufala for garem gudfala marit. Sid hem sei: “Mifala traem best for showimaot love evritaem. And tu, hem barava important for tingim feeling bilong narawan.” Sonja agree witim hasband bilong hem, and sei: “Hem barava important for kaen long narawan. And mitufala evritaem trae for hambol, nomata samfala taem datwan hem no isi.”

STORY GUD TUGETA

13. Wanem nao savve barava strongim marit, and why nao olsem?

¹³ Wanfala samting wea savve barava strongim marit nao hem for hasband and waef tok kaen long each other. Sorre samting nao, samfala hasband and waef no tok kaen long each other, bat long nara pipol nao olketa savve tok kaen long olketa. Taem olketa hasband and waef “feel nogud” long narawan and “laek pei bak, . . . kros, singaot, [and] tok nogud” long narawan, datwan savve isisi spoelem marit. (Eph. 4:31) Wei for talem toktok wea spoelem and daonem narawan, savve barava spoelem marit. So hasband and waef shud kaen and tingim feeling bilong narawan, bikos datwan savve strongim marit bilong tufala.—Eph. 4:32.

14. Wanem nao iumi mas no duim insaed long marit?

¹⁴ Bible sei samfala taem hem “taem for stap kwaet.” (Eccl. 3:7) Diswan no minim taem iumi feel nogud witim marit partner bilong iumi, iumi stap kwaet and no story nao witim hem. Olketa wea marit mas story gud tugeta. Wanfala waef long Germany hem sei: “Long taem olsem, wei for stap kwaet and no story savve spoelem marit partner bilong iu.” Hem sei tu: “Taem iu kasem hevi hem no isi for kontrolem feeling bilong iu, bat hem nogud tu for aotem kros bilong iu just for iu feel gud nomoa. Sapos iu duim olsem, maet iu talem samting wea spoelem feeling bilong marit partner bilong iu, and datwan savve mekem evri samting worse go moa.” Hasband and waef bae no savve stretem problem bilong tufala sapos tufala singaot long narawan or les for story long narawan. Bat taem hasband and waef traem best for kwiktaem stretem problem bilong tufala and no raoa, datwan bae strongim marit bilong tufala.

15. Hao nao wei for story gud tugeta savve strongim marit?

¹⁵ Taem hasband and waef storyim tingting and feeling bilong tufala long each other, datwan savve strongim marit bilong tufala. Samting wea iu talem hem important, bat hao iu talem datwan hem barava important tu. So nomata iu feel nogud, traem best bilong iu for iusim gudfala toktok and story long kaenfala wei. Sapos iu duim olsem, hasband or waef bilong iu bae willing for lisin long iu. (Readim Colossae 4:6.) Taem hasband and waef story gud tugeta and iusim toktok wea encouragem and helpem narawan, datwan bae strongim marit bilong tufala.—Eph. 4:29.

GIVIM WANEM NARAWAN FIT FOR KASEM INSAED MARIT

16, 17. Why nao hem important for hasband and waef tingim feeling bilong each other and need bilong tufala saed long sex?

¹⁶ Taem hasband and waef evritaem tingim marit partner and no tingim olketa seleva nomoa, datwan bae helpem tufala for garem gudfala marit. (Phil. 2:3, 4) Olketa hasband and olketa waef tu mas tingim feeling bilong each other and need bilong tufala saed long sex.—Readim 1 Corinth 7:3, 4.

¹⁷ Sorre samting nao, samfala hasband and waef no showimaot love or klos long each other. And tu, samfala man tingse sapos olketa showimaot feeling long waef bilong olketa, datwan showimaot olketa no strong. Bat Bible sei: “Iufala olketa hasband mas gohed minim gud waef bilong iufala.” (1 Pet. 3:7) Olketa hasband mas luksavve, taem Bible sei for givim ‘wanem narawan fit for kasem’ insaed marit hem no story abaotem sex nomoa, bat hasband mas showimaot love and kaen long waef bilong hem evritaem. Sapos hasband duim olsem, datwan bae mekem waef laek for sleep witim hem. Taem tufala showimaot love and kaen long each other, tufala bae tingim feeling bilong each other and need bilong tufala saed long sex.

18. Wanem nao hasband and waef savve duim for strongim marit bilong tufala?

¹⁸ Hem rong for hasband or waef for no faithful long marit partner bilong hem. Nomata olsem, maet wanfala reason why samfala no faithful long marit partner hem bikos hasband or waef bilong olketa no showimaot love long olketa. (Prov. 5:18; Eccl. 9:9) Dastawe Bible sei: “Wanfala mas no stopem narawan for sleep witim hem. Bat sapos hasband and waef agree for no sleep tugeta for lelebet taem, . . . hem gud nomoa.” Why nao olsem? Bible sei reason hem for “Satan no gohed traem eniwan long iufala from iufala no savve kontrolem iufala seleva.” (1 Cor. 7:5) Hem bae barava nogud samting sapos wei wea wanfala hasband or waef ‘no savve kontrolem seleva’ hem kamap samting wea Satan iusim for traem eniwan long tufala for duim adultery! Taem hasband and waef givim wanem narawan fit for kasem insaed marit, datwan showimaot ‘tufala no tingim seleva nomoa, bat tingim narawan tu.’ Tufala duim olsem bikos tufala lovem each other, no bikos hem samting wea tufala mas duim nomoa. Wei wea tufala showimaot love and kaen long narawan hem strongim marit bilong tufala.—1 Cor. 10:24.

GOHED STRONGIM MARIT BILONG IU

19. Wanem nao iumi mas gohed for duim, and why nao olsem?

¹⁹ Niu world hem barava klosap nao! Hem bae wanfala barava sorre samting sapos iumi foldaon long sin, olsem 24,000 Israelite wea durong witim olketa gele long Moab. Bihaen Bible storyim datfala samting wea happen, hem sei: “Man wea tingse hem standap strong mas keakea nogud hem foldaon.” (1 Cor. 10:12) Dastawe for strongim marit bilong iumi, iumi mas gohed faithful long Jehovah and long marit partner bilong iumi. (Matt. 19:5, 6) Winim eni narataem bifor, distaem nao hem taem for ‘traem best bilong iumi for mekem God hem lukim iumi stap klin, no garem eni rabis wei, and for fren gud witim hem.’—2 Pet. 3:13, 14.