Mek Redi Distaem for Laef Long Niu World

1, 2. (a) Olketa wanem gud samting nao iu luk forward long hem long Paradaes? (Lukim piksa long start bilong study.) (b) Wanem nao bae mekem iumi barava hapi long niu world?

IUMI barava luk forward for “laef olowe.” Aposol Paul sei datwan nao hem “datfala tru laef.” (Readim 1 Timothy 6:12, 19.) Staka long iumi bae laef olowe long Paradaes long earth. Laef long datfala taem bae hem barava gud. Taem iumi wekap evri morning bae iumi feel strong, hapi, and satisfae. (Isa. 35:5, 6) Bae iumi hapi for stap witim famili bilong iumi, olketa fren bilong iumi, and olketa wea bae laef bak tu. (John 5:28, 29; Acts 24:15) Iumi bae garem taem for lanem olketa niu samting and duim gud olketa samting wea iumi laek for duim. Olsem example, iumi savve lanem moa samting saed long science. Or iumi savve lanem hao for pleim music, or planim haos wea iumi laek wakem.

² Nomata iumi luk forward long olketa gud samting hia long niu world, samting wea bae mekem iumi barava hapi nao hem for worshipim Jehovah. Laef bae hem barava gud tumas taem evriwan mekhae long holy nem bilong Jehovah and stap anda long rul bilong hem. (Matt. 6:9, 10) Iumi bae hapi tumas for lukim evriwan wea stap long earth olketa perfect, wea hem nao plan bilong God for earth. And taem iumi isisi kamap perfect iumi bae gohed strongim wei wea iumi fren witim Jehovah!—Ps. 73:28; Jas. 4:8.

3. Wanem nao iumi mas mek redi for hem distaem?

³ Iumi sure Jehovah bae duim evri nambawan samting hia, bikos “God savve duim eni samting.” (Matt. 19:25, 26) Sapos iumi laek for laef olowe long niu world, distaem nao hem taem for iumi mas duim samting for “hol strong long datfala laef olowe.” Iumi savve end bilong disfala nogud world hem barava klosap, so samting wea iumi duim long laef shud showimaot iumi luksavve end savve kam long enitaem nomoa. Iumi mas mek redi distaem for laef long niu world. Hao nao iumi savve duim datwan?

WANEM IUMI SAVVE DUIM FOR MEK REDI FOR NIU WORLD

4. Wanem nao iumi savve duim distaem for mek redi for niu world? Storyim example.

⁴ Wanem nao iumi savve duim distaem for mek redi for niu world? Tingim sapos samwan hem plan for muv go and stap long nara kantri. Wanem nao bae hem duim for mek redi for datwan? Maet hem start for lanem languis wea pipol iusim long there, and olketa kastom bilong olketa tu. Maet hem traem kaikai wea pipol long datfala ples savve kaikaim. Olsem tu, iumi savve mek redi for laef long niu world taem iumi duim olketa samting distaem wea iumi bae duim long niu world. Bae iumi storyim samfala samting wea iumi savve duim distaem.

5, 6. Hao nao wei for obeyim wanem organization bilong Jehovah talem distaem savve helpem iumi for mek redi for niu world?

⁵ Satan mekem pipol long world tingse olketa savve duim nomoa eni samting wea olketa seleva laek for duim. Staka pipol laek for followim tingting bilong olketa seleva and no laek for obeyim God. Wanem nao kamaot from datwan? Staka pipol safa and olketa no hapi. (Jer. 10:23) Bat rul bilong Jehovah hem mekem pipol kasem gud samting. Laef bae hem gud tumas long niu world taem evriwan obeyim Jehovah!

⁶ Long niu world, bae iumi hapi for followim wanem organization bilong Jehovah talem for mekem disfala earth kamap paradaes, and for teachim olketa wea bae laef bak. Iumi bae garem staka waka for duim. Bat waswe sapos olketa wea leadim iumi askem iumi for duim wanfala samting wea iumi no mas laek for duim? Waswe, bae iumi obey? Waswe, bae iumi traem best for duim gud assignment bilong iumi and enjoyim datwan? Sapos iumi obeyim wanem organization bilong Jehovah talem iumi for duim distaem, datwan bae helpem iumi for mek redi for niu world.

7, 8. (a) Why nao iumi shud waka tugeta witim olketa wea leadim iumi? (b) Wanem niu assignment nao samfala brata and sista kasem? (c) Wanem nao bae mekem iumi hapi long niu world?

⁷ Sapos iumi redi for datfala laef long niu world, iumi mas lane for satisfae, obeyim wanem organization bilong Jehovah talem and wan mind witim olketa brata and sista bilong iumi. Olsem example, taem iumi kasem wanfala niu assignment, iumi willing for duim and iumi hapi and satisfae long datwan. Sapos iumi willing for waka tugeta witim olketa wea leadim iumi distaem, long niu world bae iumi duim sem samting tu. (Readim Hebrew 13:17.) Taem olketa Israelite kasem Promis Land, Jehovah markem nao ples wea each tribe bae stap long hem. (Num. 26:52-56; Josh. 14:1, 2) Long niu world, iumi no savve wea nao Jehovah bae markem for iumi wanwan stap. Bat sapos iumi lane for waka tugeta witim olketa wea leadim iumi distaem, iumi bae hapi for stap long eni ples wea Jehovah markem for iumi.

⁸ Hem bae wanfala privilege for stap anda long rul bilong Kingdom long niu world! Dastawe iumi hapi for waka tugeta witim organization bilong Jehovah distaem, and iumi willing for duim eni assignment wea iumi kasem. Bat samfala taem maet iumi kasem niu assignment. Olsem example, samfala Bethelite long United States kasem niu assignment for duim pioneer waka. And samfala traveling overseer wea maet olo or sik, olketa kasem assignment for kamap spesol pioneer. Olketa brata and sista hia hapi long niu assignment bilong olketa, and Jehovah blessim olketa. Sapos iumi prea long Jehovah for helpem iumi, duim best bilong iumi long assignment wea iumi kasem, and lane for satisfae long datwan, bae iumi hapi and Jehovah bae blessim iumi. (Readim Proverbs 10:22.) Waswe sapos long niu world iumi laek tumas for stap long wanfala ples bat iumi kasem assignment for go long difren ples? Long datfala taem, from iumi bae hapi tumas iumi stap long niu world, bae iumi no warim wea nao iumi stap or wanem assignment nao iumi garem.—Neh. 8:10.

9, 10. (a) Long niu world, wanem nao maet samfala samting wea iumi mas patient long hem? (b) Long distaem, hao nao iumi savve showimaot iumi patient?

⁹ Long niu world, maet iumi mas patient long samfala samting tu. Olsem example, maet iumi herem olketa narawan barava hapi bikos olketa relative and fren bilong olketa laef bak. Bat maet olketa relative bilong iumi no laef bak yet. Sapos datwan happen, waswe, bae iumi hapi witim olketa wea hapi, and patient for weit? (Rome 12:15) Sapos iumi lane for patient distaem and weitim taem wea Jehovah bae mekem olketa promis bilong hem kamap tru, datwan bae helpem iumi for patient long niu world tu.—Eccl. 7:8.

¹⁰ Nara samting wea savve helpem iumi for mek redi for niu world hem nao for iumi patient taem samfala change kamap long wei wea iumi minim samfala scripture. Waswe, iumi studyim gud datfala niu point, and iumi patient sapos iumi no minim gud yet? Sapos iumi duim olsem distaem, datwan bae helpem iumi for patient long niu world taem Jehovah talem iumi eni niu samting for duim.—Prov. 4:18; John 16:12.

11. Why nao hem important for iumi willing for forgivim narawan distaem, and hao nao datwan bae helpem iumi long niu world?

¹¹ Narafala wei for mek redi for laef long niu world hem for iumi willing for forgivim narawan distaem. Long wan thousand year rul bilong Christ, bae hem tek taem for pipol wea raeteous and pipol wea no raeteous for kamap perfect. (Acts 24:15) Waswe, bae iumi showimaot love and willing for forgivim narawan? Sapos iumi lane for forgivim narawan and stap gud witim olketa distaem, datwan bae helpem iumi for duim sem samting long niu world.—Readim Colossae 3:12-14.

12. Why nao hem important for iumi mek redi distaem for niu world?

¹² Long niu world, maet iumi no kasem evri samting wea iumi laekem, or maet iumi mas weit for kasem wanem iumi laekem. Iumi shud hapi and satisfae nomoa long wanem iumi garem long datfala taem. Olketa fasin wea Jehovah teachim iumi for garem distaem, hem tu olketa fasin wea iumi mas showimaot long niu world. So iumi shud traem best for garem olketa gudfala fasin hia distaem, bikos datwan bae showimaot iumi mek redi for laef olowe long datfala niu world. (Heb. 2:5; 11:1) And tu, datwan showimaot iumi barava laek for stap long world wea evriwan obeyim Jehovah.

OLKETA SPIRITUAL SAMTING MAS IMPORTANT LONG LAEF BILONG IU

13. Wanem nao bae barava important samting long laef bilong iumi long niu world?

¹³ Long niu world, iumi bae garem evri samting wea iumi needim for enjoyim laef. Bat samting wea bae mekem iumi barava hapi nao hem wei wea iumi fren gud witim Jehovah. (Matt. 5:3) Iumi bae busy long waka bilong Jehovah, and hapi for duim datwan. (Ps. 37:4) So sapos olketa spiritual samting hem important long laef bilong iumi distaem, iumi showimaot iumi mek redi for laef long niu world.—Readim Matthew 6:19-21.

14. Wanem nao samfala spiritual goal wea olketa young wan savve garem?

¹⁴ Wanem nao savve helpem iumi for hapi long waka bilong Jehovah distaem? Wanfala samting nao hem for markem olketa spiritual goal. Sapos iu young, waswe, iu laek for iusim laef bilong iu long waka bilong Jehovah? Ting raonem datwan and duim research abaotem olketa difren kaen full taem service. Then markem goal for duim wanfala long olketa.a Story witim samfala brata or sista wea duim full taem service for staka year finis. Sapos iu iusim laef bilong iu long waka bilong Jehovah, iu bae kasem nambawan training. Disfala training bae helpem iu for duim waka bilong Jehovah long niu world.

15. Wanem nao samfala nara spiritual goal wea iumi savve garem?

¹⁵ Staka spiritual goal stap wea iumi savve garem. Olsem example, iumi savve markem goal for kamap gud long samfala part long ministry. Or maet iumi savve trae for minim gud samfala Bible principle and hao for followim long laef bilong iumi. Maet iumi trae for kamap gud long hao iumi read long kongregeson or long ministry. Or maet iumi trae for kamap gud long hao iumi givim tok, and hao iumi givim ansa long olketa meeting. Main point nao diswan: Taem iu markem olketa spiritual goal, datwan bae helpem iu for gohed strong long waka bilong Jehovah, and helpem iu for mek redi for niu world.

BEST SAMTING FOR DUIM LONG LAEF DISTAEM!

16. Why nao wei for worshipim Jehovah hem best samting for duim long laef?

¹⁶ Waswe, iumi misstim staka gud samting long laef distaem from iumi iusim laef bilong iumi for mek redi for laef long niu world? Barava nomoa nao! Wei for worshipim Jehovah hem best samting for duim long laef distaem. Iumi no worshipim Jehovah bikos samwan nao forcem iumi, or bikos iumi no laek for dae long datfala big trabol nomoa. Iumi worshipim Jehovah bikos taem iumi fren gud witim hem iumi garem gudfala laef and iumi barava hapi. Jehovah wakem iumi for barava hapi taem iumi worshipim hem. Taem Jehovah leadim iumi and iumi savve hem lovem iumi, datwan hem barava spesol samting. (Readim Psalm 63:1-3.) Iumi evriwan savve barava hapi from wei for worshipim Jehovah long full heart. Samfala wea worshipim Jehovah for staka year finis olketa talem hao diswan nao hem best samting for duim long laef.—Ps. 1:1-3; Isa. 58:13, 14.

17. Long niu world, wanem tingting nao bae iumi garem abaotem hapitaem and samting wea iumiseleva laek for duim?

¹⁷ Long Paradaes bae iumi garem taem tu for duim samting wea iumiseleva laekem and duim samfala hapitaem. Jehovah wakem iumi witim feeling for laek duim samting wea iumi enjoyim, and hem promis for givim long evri samting wea laef, wanem olketa laekem. (Ps. 145:16; Eccl. 2:24) Hapitaem and rest hem samting wea iumi evriwan needim, bat iumi savve barava enjoyim olketa samting hia sapos wei wea iumi fren witim Jehovah nao hem main samting long laef bilong iumi. Long niu world bae hem olsem tu. Dastawe, Kingdom shud first samting long laef bilong iumi distaem, and iumi shud evritaem tingim olketa blessing wea iumi kasem from wei for worshipim Jehovah!—Matt. 6:33.

18. Wanem nao iumi savve duim for showimaot iumi mek redi for laef olowe long Paradaes?

¹⁸ Laef long niu world bae hem barava gud. Showimaot iu laek for stap long datfala taem long wei wea iu mek redi for “datfala tru laef” distaem. Iumi mas gohed for garem olketa gudfala fasin wea iumi lanem from Jehovah, and gohed strong for duim preaching waka. Kasem gud samting from wei wea iu putim worship bilong Jehovah hem first samting long laef bilong iu. Jehovah bae duim evri samting wea hem promis for duim long niu world. So iumi mas mek redi distaem for laef long niu world!