Olketa Young Wan—Waswe, Iufala Muv Ahed Long Spiritual Wei?
“NOMATA mi attendim olketa Christian meeting, mi nating garem strong feeling for want for servem Jehovah,” Hideo sei taem hem ting go bak long olketa year wea hem insaed junior hae skul. “Planti taem mi laek for olketa skulfren tinghae long mi and mi savve enikaen tumas taem wakabaot long street witim girl fren bilong mi. Mi no markem eni goal, and mi no garem eni feeling for muv ahed long spiritual wei.” Olsem Hideo, planti young pipol no garem purpose long laef, olketa no garem strong feeling for kasem eni gudfala goal or for muv ahed.
Sapos iu wanfala young wan, maet iu barava hapi taem iu insaed sports or hapitaem. Bat maet iu no garem datfala sem feeling taem iu duim olketa spiritual samting. Waswe, man savve barava hapi witim olketa spiritual goal? Tingim olketa toktok hia bilong man for raetem psalm: “Man fit for trustim reminder bilong Jehovah, mekem man wea no garem savve kamap wise. . . . Komandment bilong Jehovah hem klin, mekem eye shaen.” (Psalm 19:7, 8) Word bilong God savve leadim “man wea no garem savve” for duim samting long wise wei, wea ‘mekem eye bilong hem shaen.’ Tru nao, olketa spiritual samting savve mekem iu hapi tumas. Bat wanem nao iu needim for mekem iu feel olsem? Wea nao iu shud start?
Samting Mas Muvim Iu for Servem God
Firstaem, samting nao mas muvim iu. Tingim samting wea happen long young King Josiah bilong Judah. Taem olketa faendem buk bilong Law bilong Jehovah insaed temple, Josiah talem olketa for readim long hem and samting wea hem herem barava muvim hem. From diswan, “Josiah aotem evri nogud samting from evri land bilong olketa son bilong Israel.” (2 Chronicles 34:14-21, 33) Wei for readim Word bilong God muvim Josiah for duim moa samting for apim klinfala worship.
Iu tu savve mekem grow strongfala feeling for servem Jehovah sapos iu readim Bible evritaem and ting raonem samting wea iu readim. Datwan nao samting wea muvim Hideo. Hem start for kaban long klos wei witim wanfala mature pioneer, wanfala full-taem minister bilong Olketa Jehovah’s Witness. Datfala pioneer barava waka hard long wei for studyim Bible evritaem and hem trae hard for followim teaching bilong Bible insaed laef bilong hem. From example bilong pioneer hia barava encouragem hem, Hideo start for duim sem samting and from diswan hem mekem grow strongfala feeling for servem God and nara pipol. Wei wea hem muv ahed long spiritual wei mekem hem for kasem laef wea garem purpose.
Wei for readim Bible evriday savve muvim young pipol. Takahiro hem sei: “Enitaem mi go for sleep bat tingim mi no duim yet Bible reading for datfala day, mi bae getap and duim. From diswan, mi feelim Jehovah leadim mi. Wei for readim Bible evriday barava helpem mi for muv ahed long spiritual wei. From mi disaed strong for share long bigfala wei moa insaed service bilong Jehovah, mi kamap regular pioneer no longtaem bihaen mi graduate from hae skul. And mi barava enjoyim diswan.”
Witim wei for readim Bible, wanem moa savve helpem iu for strongim samting wea muvim iu for praisem Jehovah? Mami bilong Tomohiro teachim hem truth from Bible. Hem sei: “Love bilong mi for Jehovah and ransom sakrifaes bilong Jesus barava muvim mi bihaen mi studyim gud datfala buk Life Does Have a Purpose taem mi 19. Feeling for tinghae long love bilong God hem muvim mi for duim moa samting insaed service bilong Jehovah.” (2 Corinthians 5:14, 15) Olsem Tomohiro, planti young pipol kasem encouragement for muv ahed long spiritual wei long wei for waka hard for duim study seleva long Bible.
Nomata olsem, waswe sapos iu still no garem feeling for servem Jehovah? Waswe, samwan stap wea iu savve tan go long hem for help? Aposol Paul raet olsem: “From God hem . . . waka insaed long iufala mekem iufala savve willing and duim samting.” (Philippians 2:13) Sapos iu prea long Jehovah for help, hem bae willing for givim iu holy spirit bilong hem, wea bae strongim iu no for “duim samting” nomoa bat for “willing” for duim tu. Diswan minim holy spirit bilong God nao bae strongim feeling bilong iu for want for duim best bilong iu insaed service bilong Jehovah and hem bae helpem iu for grow long spiritual wei. So, trust evribit long paoa bilong Jehovah and strongim heart bilong iu!
Markem Olketa Goal Bilong Iuseleva
Bihaen iu disaed finis for servem Jehovah evribit, iu need for markem olketa goal bilong iuseleva mekem iu muv ahed long spiritual wei. Mana, wanfala young Christian girl, hem sei: “Wei for markem olketa goal hem wanfala bigfala help for mi. Winim wei for muv bak, mi muv ahed witim strong. Mi tingim olketa goal bilong mi taem mi prea long Jehovah long honest wei for leadim mi, and mi fit for muv ahed and no eni samting stopem mi.”
Olketa goal bilong iu shud balance and iu savve kasem. Wei for readim wanfala chapter bilong Bible each day hem gudfala goal. Iu savve startim wanfala wei for duim research tu. For givim example long diswan witim olketa samting wea stap long English, iu maet studyim olketa fasin bilong Jehovah wea olketa listim anda datfala subheading “Qualities by Name” wea stap anda datfala main heding “Jehovah” insaed Watch Tower Publications Index. Samting olsem 40-fala main heding stap wea iu savve ting raonem, and for sure disfala wei for duim research bae mekem iu kam moa klos long Jehovah and muvim iu for duim moa samting for hem. Olketa narafala gud goal tu hem wei for givim koment nomata wantaem nomoa long each Christian meeting wea audience savve tekpart insaed, for savve gud moa long wanfala member bilong kongregeson long each meeting, and for prea evriday long Jehovah, and tu, for tok abaotem hem long nara pipol.
Sapos iu no join insaed Theocratic Ministry Skul yet, diswan hem wanfala gudfala goal for iu tu. Waswe, iu share finis long pablik ministry? Sapos nomoa, iu maet want for waka hard for kamap wanfala anbaptaes pablisa. Olketa nara goal hem wei for tingting strong long wei wea iu fren witim Jehovah and for dedicatem iuseleva long hem. Planti young wan trae hard for followim dedication bilong olketa long wei for reach aot for full-taem ministry.
Nomata hem gud for garem olketa goal long laef, stap klia long wei for mekem kamap feeling for laek winim narawan. Iu bae kasem moa hapi long samting wea iu duim sapos iu no markem iuseleva witim nara pipol.—Galatians 5:26; 6:4.
Maet iu feel olsem iu no garem inaf savve and iu faendem hard for markem olketa goal olsem. Then followim disfala kaonsel bilong Bible: “Tanem kam ear bilong iu and herem toktok bilong olketa wea wise.” (Proverbs 22:17) Luk aotem help bilong parents bilong iu or olketa nara mature Christian. Bat parents and olketa narawan need for balance and encouragem olketa long disfala samting. Wei wea olketa young wan feelim hevi taem olketa waka hard for kasem goal, wea nara pipol nao markem for olketa, savve mekem olketa for lusim hapi and diswan savve daonem tu purpose bilong wei for markem olketa goal. Diswan happen long wanfala girl, wea sei olsem: “Parents bilong mi markem staka goal for mi, olsem wei for tekpart long Theocratic Ministry Skul, share long field service, baptaes, and kamap wanfala pioneer. Mi barava waka hard for kasem each wan long olketa. Taem mi kasem wanfala goal, parents bilong mi nating praisem mi bat putim nara goal moa for mi waka hard for hem. Gogo, evritaem mi feel olsem olketa forcem mi for kasem olketa goal hia. Mi taed long diswan and mi no feel olsem mi win.” Wanem nao rong? Evri goal hia barava fitim, bat hem no goal bilong hemseleva. For win long diswan, iu nao mas markem goal for iuseleva!
Tingim Jesus Christ. Taem hem kam long earth, hem savve wanem nao Dadi bilong hem, Jehovah, expectim hem for duim. For duim will bilong Jehovah hem no just wanfala goal nomoa for Jesus, bat hem wanfala waka wea hem mas fulfillim. Hao nao Jesus ting long assignment bilong hem? Hem sei: “Kaikai bilong mi hem for duim will bilong dat wan wea sendem mi kam, and for finisim waka bilong hem.” (John 4:34) Jesus hapi for duim will bilong Jehovah and for duim samting wea Dadi bilong hem expectim hem for duim. Hem olsem kaikai long Jesus—hem hapi and satisfae for finisim waka wea Jehovah expectim hem for duim. (Hebrews 10:5-10) Iu tu savve hapi taem stretfala samting nao muvim iu for duim samting wea parents bilong iu encouragem iu for duim.
No Givap for Duim Gud Samting
Bihaen iu tingim finis wanfala goal, waka hard for kasem. Galatians 6:9 hem sei: “Iumi no givap for duim wanem hem gud, bikos long barava taem iumi bae harvestim samting sapos iumi no kamap taed.” No depend long savve and strong bilong iuseleva. Iu bae kasem samfala hard samting and samfala taem iu maet feel olsem iu fail. Bat Bible promisim iumi olsem: “Long evri samting iu duim, lisin long hem, and hemseleva nao bae stretem gogo bilong iu.” (Proverbs 3:6) Jehovah bae strongim iu taem iu waka hard for kasem olketa spiritual goal bilong iu.
Tru nao, taem iu mekem grow feeling for servem Jehovah and reach aot for kasem olketa spiritual goal, iu bae fit for mekem ‘wei wea iu muv ahed showaot klia long evriwan.’ (1 Timothy 4:15) Then iu bae garem laef wea garem purpose insaed service bilong God.
[Piksa long page 9]
Wei for readim Bible and ting raonem samting wea iu readim bae muvim iu for servem Jehovah
[Piksa long page 10]
Jesus duim samting wea Dadi bilong hem expectim hem for duim