KAVA SUBJECT | WANEM KAEN PIPOL NAO OLKETA JEHOVAH’S WITNESS?
Wanem Olketa Jehovah’s Witness Bilivim
Olketa Jehovah’s Witness bilivim “evri toktok insaed long olketa Holy Raeting hem kam from God.” (2 Timothy 3:16) Mifala readim Bible evritaem mekem mifala lane abaotem God and savve hao for garem gudfala laef.
Bible hem sei: “Mekem pipol savve, iu, wea nem bilong iu Jehovah, iu nomoa Barava Haefala God long full earth.” (Psalm 83:18) Dastawe mifala worshipim Jehovah God nomoa, and mifala waka hard for helpem pipol savve long nem bilong hem bikos mifala olketa Witness bilong hem.—Isaiah 43:10-12.
From mifala Christian, mifala bilivim Jesus hem “Son bilong God,”a hem kam long earth, and hem kamap Messiah. (John 1:34, 41; 4:25, 26) Bihaen Jesus hem dae and hem laef bak, hem go ap long heven. (1 Corinth 15:3, 4) Gogo hem kamap King long Kingdom bilong God. (Revelation 11:15) Datfala Kingdom hem wanfala gavman wea bae mekem earth kamap paradaes. (Daniel 2:44) Bible sei: “God bae givim earth long olketa wea hambol and olketa bae hapi fogud bikos evriwan bae garem peace.”—Psalm 37:11, 29.
“Taem olketa readim Bible, olketa bilivim wanem olketa readim hem kam from God. Taem olketa kasem hard taem, olketa lukaotem advaes long Bible for helpem olketa savve hao for deal witim datwan. . . . Olketa bilivim Bible hem garem paoa.”—Bigman bilong Catholic, Benjamin Cherayath, Münsterländische Volkszeitung newspaper, Germany
Olketa Jehovah’s Witness luksavve olketa Bible principle savve helpem pipol distaem. (Isaiah 48:17, 18) So mifala followim olketa Bible principle. Olsem example, from Bible warnim iumi for no duim olketa samting wea bae mekem tingting and body for no klin, mifala no smoke or iusim olketa drug. (2 Corinth 7:1) And tu, mifala no duim olketa samting wea Bible sei hem no stret, olsem wei for drunk, durong and steal.—1 Corinth 6:9-11.
a Bible storyim tu Jesus hem “spesol Son bilong God” bikos hem nao first wan wea Jehovah wakem and hem nomoa son wea hemseleva wakem.—John 3:18; Colossae 1:13-15.