Hao Creator Talem Iumi Olketa Promis blo Hem

From taem wea Creator wakem iumi olketa man, hem iusim olketa angel and olketa profet for story lo pipol for hem. And tu, hem iusim olketa profet for raetem message and olketa blessing wea hem promisim. Olketa promis hia blo God affectim future blo iu. So wea nao iu savve lukim olketa promis blo God distaem?

Message blo God for iumi hem stap lo olketa Holy Raeting. (2 Timothy 3:16) Hao nao God iusim olketa profet for raetem message blo hem? (2 Peter 1:21) God talem tingting blo hem lo olketa man hia, then olketa raetem. Olsem example, taem wanfala bisnisman talem secretary for raetem message blo hem for samwan, iumi savve sei message hia hem blo datfala bisnisman. Semsem tu, nomata God iusim olketa man for raetem message blo hem, olketa Holy Raeting kam from Hem.

MESSAGE BLO GOD STAP LO STAKA LANGUIS

Message blo God hem barava important dastawe hem laekem for evri pipol readim and minim. Distaem “pipol bilong evri kantri, tribe, and languis” savve herem “gud nius” blo hem wea “stap for olowe.” (Revelation 14:6) From God nao bihaenem diswan, pipol savve readim evri Holy Raeting or samfala part blo hem lo winim 3,000 languis. Datwan hem winim eni nara buk.