Iumi Savve Laef for Olowe

1. Taem iumi ting raonem promis blo Jehovah for iumi kasem laef olowe, hao nao datwan affectim iumi?

JEHOVAH promisim hao olketa wea obeyim hem bae kasem “laef olowe.” (Rome 6:23) Taem iumi ting raonem datfala promis for laef olowe, datwan strongim love blo iumi for Jehovah. Hem gud for tingim hao Dadi blo iumi lo heven hem lovem iumi tumas and laekem iumi for fren witim hem for olowe.

2. Hao nao promis blo God for iumi kasem laef olowe hem helpem iumi?

² Promis blo God for iumi kasem laef olowe helpem iumi for deal witim olketa hard taem. Nomata olketa enemy blo iumi sei bae olketa killim iumi dae, iumi bae no stop for worshipim Jehovah. Samting wea helpem iumi for gohed faithful lo Jehovah hem from iumi savve nomata iumi dae, hem bae mekem iumi laef bak and iumi savve laef for olowe. (John 5:28, 29; 1 Cor. 15:55-58; Heb. 2:15) Bat hao nao iumi savve sure iumi olketa man savve laef olowe? Bae iumi storyim samfala samting wea pruvim datwan.

JEHOVAH HEM LAEF OLOWE

3. Why nao iumi savve sure Jehovah savve mekem iumi for laef olowe? (Sams 102:12, 24, 27, SIPB)

³ Iumi sure Jehovah savve mekem iumi for laef olowe bikos hem givim iumi laef, and from hem laef olowe tu. (Sams 36:9, SIPB) Samfala Bible verse storyim hao Jehovah hem bin stap and bae hem gohed stap for olowe. Sams 90:2 (SIPB) sei Jehovah ‘bin stap olowe finis an bae gohed for stap olowe.’ Sams 102 (SIPB) storyim sem samting. (Readim Sams 102:12, 24, 27, SIPB.) And profet Habakkuk sei olsem abaotem Jehovah: “Longtaem bifoa evrisamting hemi stat ka-kam kasem tude, yu nao yu God. Yu nomoa yu Holi God blong mi, an bae yu stap fo evritaem olowe.”​—Habakuk 1:12, SIPB.

4. Waswe, iumi shud wari sapos iumi faendem hem hard for minim hao Jehovah hem stap for olowe? Explainim.

⁴ Waswe, iu faendem hem hard for minim hao Jehovah hem “stap for olowe”? (Isa. 40:28) Olketa narawan tu stragol for minim datwan, olsem Elihu wea sei abaotem God: “Yumi nating save kaontem olketa yia blong hem.” (Job 36:26, SIPB) Maet samfala tingse from olketa faendem hem hard for minim hao God hem stap for olowe, masbi datwan no tru. Bat tingim disfala example. Maet iumi no minim gud hao electricity hem waka, bat datwan no minim electricity hem no stap, iaman? So nomata maet iumi no fit for minim staka samting abaotem Jehovah, datwan no minim hem no stap for olowe. Bible sei hem hard for iumi minim evri samting abaotem Jehovah and olketa wei blo hem. (Rome 11:33-36) Jehovah nao wakem evri samting lo universe, so hem stap bifor evri samting hia. Bible sei Jehovah nao “Creator wea iusim paoa blo hem for wakem earth,” and hem stap bifor hem “spredim aot skae.” (Jer. 51:15; Acts 17:24) Wat nao nara samting wea mekem iumi sure iumi savve laef for olowe?

GOD WAKEM IUMI FOR LAEF OLOWE

5. Wanem hope nao Adam and Eve garem?

⁵ Klosap evri samting wea laef gogo bae olketa dae. Jehovah wakem olketa human being nomoa for laef olowe. Bat Jehovah warnim Adam: “Iu mas no kaikaim frut blo datfala tree blo savve lo gud samting and nogud samting bikos lo day wea iu kaikaim bae iu dae.” (Gen. 2:17) Sapos Adam and Eve obeyim Jehovah, bae tufala no dae. Luk olsem, sapos tufala gohed faithful lo Jehovah, bae gogo hem letem tufala kaikaim “frut blo datfala tree blo laef.” Datwan bae mekem tufala sure tufala savve “laef olowe.”b​—Gen. 3:22.

6-7. (a) Wat nao nara samting wea pruvim God wakem iumi olketa man for laef olowe? (b) Wat nao iu luk forward for duim lo future? (Lukim olketa piksa.)

⁶ Taem iumi laef iumi kasem staka information wea iumi stoarem insaed brain, bat samfala scientist faendem pruv hao brain hem fit for stoarem staka information winim datwan. Lo 2010 wanfala science buk storyim hao brain savve stoarem samting olsem 2.5 million gigabyte, wea hem olsem samwan hem recordim thri million hour blo olketa TV program lo olketa flash drive. And maet brain blo iumi fit for stoarem staka moa information winim datwan. Diswan showimaot Jehovah wakem brain blo iumi for stoarem staka information winim wanem iumi lanem insaed lo 70 or 80 year.​—Sams 90:10, SIPB.

⁷ Nara samting, Jehovah wakem iumi witim feeling for no laek dae. Bible sei hao God “putim feeling for laek laef olowe insaed heart” blo iumi. (Eccl. 3:11) Dastawe Bible sei dae hem enemy blo iumi. (1 Cor. 15:26) If iumi kasem big sik, hard for iumi no warim datwan and weit nomoa for dae. Bae iumi go lukim doctor and maet tekem medicine for treatim datfala sik. From iumi no laek dae iumi bae duim staka samting for helpem iumi kamap gud. And taem samwan wea iumi lovem hem dae, nomata hem young or olo, iumi savve sorre tumas, iaman? (John 11:32, 33) Sapos hem no plan blo God for iumi laef olowe, hard for hem wakem iumi witim feeling for no laek dae and for garem body and brain wea fit for gohed laef. Bat samfala nara samting savve helpem iumi for sure iumi savve laef olowe. Bae iumi storyim wanem Jehovah duim bifor and distaem wea pruvim hem no changem plan blo hem for iumi olketa man.

PLAN BLO JEHOVAH HEM NO CHANGE

8. Olsem Isaiah 55:11 storyim, hao nao iumi sure plan blo Jehovah no change?

⁸ Nomata Adam and Eve sin and datwan mekem evriwan lo laen blo tufala for sin and dae, Jehovah no changem plan blo hem for iumi olketa man. (Readim Isaiah 55:11.) And plan blo hem for olketa wea faithful for laef olowe, hem no change. Iumi savve lo datwan bikos lo olketa samting wea Jehovah talem and duim for mekem plan blo hem kamap tru.

9. Wat nao God promis for duim? (Daniel 12:2, 13)

⁹ Jehovah promis for resurrectim olketa wea dae finis and bae olketa garem chance for laef olowe. (Acts 24:15; Titus 1:1, 2) Datfala faithful man Job sei Jehovah laekem tumas for resurrectim olketa wea dae finis. (Job 14:14, 15, SIPB) Profet Daniel tu storyim hao pipol wea dae finis garem chance for resurrect and for laef olowe. (Sams 37:29, SIPB; readim Daniel 12:2, 13.) And olketa Jew lo taem blo Jesus savve hao Jehovah savve givim “laef olowe” lo olketa wea faithful. (Luke 10:25; 18:18) Staka taem Jesus storyim disfala promis, and Dadi blo hem resurrectim hem tu.​—Matt. 19:29; 22:31, 32; Luke 18:30; John 11:25.

10. Wat nao olketa resurrection wea Bible storyim pruvim? (Lukim piksa.)

¹⁰ Jehovah givim laef lo pipol and hem garem paoa for mekem pipol laef bak tu. Hem givim paoa lo Elijah for resurrectim son blo datfala widow blo Zarephath. (1 Ki. 17:21-23) God givim paoa lo profet Elisha tu for resurrectim son blo datfala Shunammite woman. (2 Ki. 4:18-20, 34-37) Olketa resurrection wea Bible storyim pruvim hao Jehovah garem paoa for mekem pipol laef bak. Taem Jesus stap lo earth, hem tu kasem paoa from Dadi blo hem for resurrectim pipol. (John 11:23-25, 43, 44) Distaem Jesus hem lo heven and “God givim paoa long [hem] ovarem evri samting long heven and earth.” So hem fit for fulfillim datfala promis wea sei “evriwan wea stap insaed long grev” bae laef bak and garem chance for kasem laef olowe.​—Matt. 28:18; John 5:25-29.

11. Hao nao datfala ransom mekem iumi fit for kasem laef olowe?

¹¹ Why nao Jehovah letem Son wea hem lovem tumas for safa and dae? Jesus storyim why hem duim datwan. Hem sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) From God givim Son blo hem olsem ransom for kavarem olketa sin blo iumi, datwan mekem iumi fit for kasem laef olowe. (Matt 20:28) Aposol Paul storyim disfala important part lo plan blo God taem hem sei: “Pipol dae bikos long wanfala man nomoa, and pipol laef bak tu bikos long wanfala man. Evriwan dae bikos long Adam, and tu, evriwan bae laef bak bikos long Christ.”​—1 Cor. 15:21, 22.

12. Wat nao Jehovah duim for mekem plan blo hem kamap tru?

¹² Jesus teachim olketa follower blo hem for prea for Kingdom blo God for kam and for God duim wanem hem laekem lo earth. (Matt. 6:9, 10) Wanfala samting wea God laekem, hem for pipol laef olowe lo earth. For datwan hem happen, God appointim Son blo hem for King lo Kingdom blo hem. God chusim 144,000 pipol from earth for rul witim Jesus for mekem plan blo God kamap tru.—Rev. 5:9, 10.

13. Wat nao Jehovah duim distaem, and wat nao iumi need for duim?

¹³ Distaem Jehovah hipimap “wanfala big crowd” blo pipol and hem trainim olketa for redi for laef anda lo rul blo Kingdom. (Rev. 7:9, 10; Jas. 2:8) Nomata staka pipol lo world distaem heitim narawan and datwan mekem war kamap, olketa lo big crowd waka hard for lovem evriwan nomata wea olketa kam, tribe blo olketa, or eni nara samting. Hem olsem olketa hamarem sword for kamap samting for digim graon. (Maeka 4:3, SIPB) Olketa no joinim war, bat olketa helpem pipol for luksavve lo “tru laef” and teachim olketa abaotem God and plan blo hem. (1 Tim. 6:19) Nomata olketa famili member againstim olketa or olketa no garem staka selen from olketa sapotim Kingdom blo God, Jehovah mek sure olketa garem wanem olketa needim. (Matt. 6:25, 30-33; Luke 18:29, 30) Olketa samting hia mekem iumi sure Kingdom blo God hem stap and Jehovah iusim Kingdom for mekem plan blo hem kamap tru.

IUMI GAREM NAMBAWAN FUTURE

14-15. Hao nao promis blo Jehovah for finisim dae bae kamap tru?

¹⁴ Distaem Jesus hem King lo Kingdom and bae hem mekem olketa promis blo God kamap tru. (2 Cor. 1:20) Start lo 1914, Jesus hem faet againstim olketa enemy blo hem. (Sams 110:1, 2, SIPB) Klosap nao Jesus and datfala 144,000 bae finisim olketa and evri nogud pipol.​—Rev. 6:2.

¹⁵ Lo taem wea Jesus rul for 1,000 year, bae hem resurrectim olketa wea dae and gogo evriwan bae kamap perfect. Bihaen lo datfala last test, olketa wea Jehovah sei olketa raeteous bae ‘onam lan wea hem bin promisim fo olketa, an bae olketa stap long hem olowe.’ (Sams 37:10, 11, 29, SIPB) And iumi bae hapi bikos “dae nao hem lastfala enemy wea bae hem finisim.”​—1 Cor. 15:26.

16. Wat nao shud main reason for iumi worshipim Jehovah?

¹⁶ Disfala article helpem iumi for trustim wanem Bible talem abaotem hope blo iumi for laef olowe. Datfala hope savve helpem iumi for gohed faithful lo olketa last day. Hem tru, iumi laek for laef olowe. Bat main reason iumi laek for gohed faithful lo Jehovah and Jesus, hem from iumi lovem tufala. (2 Cor. 5:14, 15) Datwan mekem iumi laek for followim example blo tufala and for sharem hope blo iumi lo olketa narawan. (Rome 10:13-15) Datwan bae helpem iumi for kaen and no tingim iumiseleva, and Jehovah bae laek for fren witim iumi for olowe.​—Heb. 13:16.

17. Wat nao each wan lo iumi mas duim? (Matthew 7:13, 14)

¹⁷ Waswe, bae iu kasem laef olowe lo niu world? Jehovah givim iumi evriwan datfala chance. Bat each wan lo iumi mas gohed for followim datfala road wea lead go lo laef olowe. (Readim Matthew 7:13, 14.) So laef bae hao taem iumi laef olowe? Iumi bae storyim datwan lo next article.