Hao, Iu Followim Olketa Warning?

1. Wat nao Jesus klosap for duim?

IUMI stap lo taem wea olketa big change bae kamap! Klosap nao, Jesus bae judgem evriwan. Taem Jesus storyim wanfala profesi lo olketa disaepol blo hem abaotem “saen” wea showimaot hem stap moa and “world hem gogo for finis,” hem describem olketa samting wea bae happen wea lead go lo taem blo judgment. (Matt. 24:3) Disfala profesi stap lo Matthew chapter 24 and 25 and sem story stap tu lo Mark chapter 13 and Luke chapter 21.

2. Wat nao bae iumi storyim lo disfala article, and why nao datwan bae helpem iumi?

² Jesus iusim thrifala parabol wea olsem warning for helpem iumi. Wanfala parabol hem abaotem olketa sheepsheep and goat, second, olketa virgin gele wea wise and no wise, and third, olketa talent. Each parabol helpem iumi for luksavve olketa samting wea each person duim bae affectim hao Jesus judgem hem. Taem iumi storyim olketa parabol hia, bae iumi lanem olketa leson and hao for followim. First parabol wea bae iumi storyim hem abaotem olketa sheepsheep and goat.

OLKETA SHEEPSHEEP AND GOAT

3. Wat taem nao Jesus bae judgem pipol?

³ Lo parabol abaotem olketa sheepsheep and goat, Jesus describem hao hem bae judgem pipol base lo hao olketa respond lo gud nius and if olketa sapotim olketa anointed brata blo hem. (Matt. 25:​31-46) During lo “bigfala trabol,” Jesus bae judgem olketa sheepsheep and goat just bifor Armageddon hem start. (Matt. 24:21) Olsem wanfala shepherd wea separatem olketa sheepsheep from goat, Jesus bae separatem olketa wea loyal for sapotim olketa anointed follower blo hem from olketa wea no duim datwan.

4. Olsem Isaiah 11:​3, 4 talem, why nao iumi sure Jesus bae judgem pipol lo raeteous wei? (Lukim tu piksa.)

⁴ Bible profesi showim dat from Jehovah nao chusim Jesus for Judge, bae evritaem judgment blo hem raeteous. (Readim Isaiah 11:​3, 4.) Bae hem lukluk lo wei, attitude, and toktok blo pipol, and datwan includim tu hao olketa treatim olketa anointed brata blo hem. (Matt. 12:​36, 37; 25:40) Jesus savve hu nao sapotim olketa anointed brata blo hem and waka wea olketa duim.a Wanfala main wei wea olketa sheepsheep sapotim olketa brata blo Christ, hem nao taem olketa help for duim preaching waka. Olketa wea duim diswan, Jesus bae judgem olsem olketa “raeteous” and olketa bae garem chance for “laef olowe” lo earth. (Matt. 25:46; Rev. 7:​16, 17) Datwan hem nambawan reward for olketa wea gohed for faithful! Taem olketa gohed faithful during lo big trabol and afta datwan, nem blo olketa bae stap insaed lo “buk bilong laef.”—Rev. 20:15.

5. Wat nao leson wea iumi lanem from olketa sheepsheep and goat, and datwan hem for hu?

⁵ Mas faithful and loyal. Parabol blo Jesus abaotem olketa sheepsheep and goat hem for olketa wea garem hope for stap lo earth. Olketa showimaot olketa garem faith taem olketa sapotim olketa brata blo Christ lo preaching waka, and taem olketa loyal for acceptim datfala faithful and wise slave wea Jesus markem. (Matt. 24:45) Nomata olsem, olketa wea garem hope for go lo heven mas followim tu warning message lo disfala parabol. Why? Bikos Jesus lukluk tu lo wei, attitude, and toktok blo olketa. Olketa tu mas faithful. And Jesus storyim nara tufala parabol wea garem olketa specific warning for olketa anointed Christian. Tufala parabol hia tu stap lo Matthew chapter 25. Distaem bae iumi storyim parabol abaotem olketa virgin gele wea wise and wea no wise.

OLKETA VIRGIN GELE WEA WISE AND WEA NO WISE

6. Wat nao faevfala virgin gele duim wea showim olketa wise? (Matthew 25:​6-10)

⁶ Lo parabol abaotem olketa virgin gele, Jesus storyim hao tenfala gele hia go for meetim man wea bae marit. (Matt. 25:​1-4) Evriwan lo olketa hope for go followim datfala groom lo marit feast blo hem. Jesus sei faevfala wise and faevfala no wise. Olketa wise virgin gele hia redi and gohed for lukaot. Olketa redi for weitim datfala groom nomata if hem arrive leit lo naet. Dastawe, olketa tekem kam olketa laet blo olketa. Olketa tekem kam tu extra oil incase groom hem delay. So olketa redi and mek sure laet blo olketa bae no dae. (Readim Matthew 25:​6-10.) Taem groom hem arrive, faevfala wise virgin gele hia fit for go witim hem insaed lo haos for datfala wedding feast. Lo sem wei tu, olketa anointed Christian wea showimaot olketa redi, olketa gohed for lukaot and faithful go kasem taem wea Christ hem kam. Then Jesus wea hem nao datfala groom, bae tekem olketa for go insaed Kingdom blo hem lo heven.b (Rev. 7:​1-3) Wat nao bae happen lo faevfala virgin gele wea no wise?

7. Wat nao happen lo faevfala virgin gele wea no wise, and why nao olsem?

⁷ Faevfala virgin gele wea no wise olketa no redi taem groom hem arrive. Laet blo olketa klosap for dae and olketa no tekem eni extra oil. Taem olketa luksavve groom hem klosap for arrive olketa just go for baem oil. Taem groom arrive, olketa hia no kam bak yet. Lo datfala taem, “olketa gele wea redi go witim [groom] insaed long haos wea marit feast hem gohed and olketa satem door nao.” (Matt. 25:10) Bihaen, taem olketa virgin gele wea no wise kam bak and laek for go insaed lo marit feast, datfala groom sei: “Mi nating savve long iufala.” (Matt. 25:​11, 12) Olketa no redi for weitim datfala groom nomata hem tek longtaem. Wat nao leson for olketa anointed Christian?

8-9. Wat nao leson wea olketa anointed Christian savve lanem from parabol blo olketa virgin gele? (Lukim tu piksa.)

⁸ Mas redi and gohed lukaot. Jesus no minim dat tufala grup blo olketa anointed Christian nao bae stap, wanfala grup hem redi and weit go kasem end blo disfala system and nara grup hem no redi. Bat really, Jesus hem explainim nomoa samting wea bae happen lo olketa anointed Christian if olketa no redi for gohed faithful go kasem end. If olketa no redi, bae olketa no kasem reward blo olketa. (John 14:​3, 4) Datwan hem serious samting! Nomata hope blo iumi hem for laef lo heven or lo earth, iumi evriwan shud followim warning wea iumi lanem from parabol abaotem olketa virgin gele. Each wan lo iumi mas gohed for lukaot and redi for gohed faithful go kasem end.—Matt. 24:13.

⁹ Afta Jesus story abaotem parabol blo olketa virgin wea strongim point abaotem wei for redi and lukaot, hem storyim nara parabol abaotem olketa talent. Datfala parabol hem strongim point abaotem wei for waka hard.

OLKETA TALENT

10. Wat nao tufala wakaman duim wea showim tufala faithful? (Matthew 25:​19-23)

¹⁰ Lo parabol abaotem olketa talent or silver selen, Jesus storyim tufala wakaman wea faithful lo boss blo olketa and narawan wea no faithful. (Matt. 25:​14-18) Tufala wakaman hia faithful bikos tufala waka hard for helpem boss blo olketa for kasem staka selen. Bifor boss hia travel go lo nara kantri, hem givim each wakaman olketa talent, wea datwan hem big amount lo selen. Tufala wakaman wea faithful barava waka hard and iusim wise lo datfala selen. Wat nao result? Taem boss kam bak, hem lukim tufala wakaman duim samting witim datfala selen wea mekem hem kasem dabol amount. Boss praisem tufala and sei hem “hapi” lo tufala. (Readim Matthew 25:​19-23.) Bat wat nao happen lo mek-thri wakaman? Wat nao hem duim lo selen wea boss givim hem?

11. Wat nao happen lo datfala wakaman wea “lesy,” and why nao olsem?

¹¹ Mek-thri wakaman hem kasem wanfala talent bat hem “lesy.” Boss blo hem expectim hem for iusim wise datfala talent wea hem kasem. Instead, hem berem datfala selen lo graon. Taem boss kam bak, disfala wakaman no garem eni extra selen for givim go lo boss. Datfala wakaman no garem gud attitude. Hem no sei sorre lo boss blo hem from hem fail for duim gud waka blo hem, and hem even kolem boss blo hem “wanfala hard man tumas.” Boss no hapi lo datfala wakaman. And from datwan, hem tekem datfala talent from hem and torowe hem aotsaed.—Matt. 25:​24, 26-30.

12. Tufala wakaman wea faithful hem representim hu distaem?

¹² Tufala wakaman wea faithful hem representim evri anointed Christian wea faithful. Datfala Boss, Jesus, invaetem olketa for kam “hapi” witim hem. Olketa bae kasem reward blo olketa lo heven, wea hem nao first resurrection. (Matt. 25:​21, 23; Rev. 20:5b) Bat, bad example blo datfala wakaman wea lesy hem warning for olketa anointed Christian. Wat nao datfala warning?

13-14. Wat nao leson wea olketa anointed Christian savve lanem from parabol blo olketa talent? (Lukim tu piksa.)

¹³ Mas waka hard and no lesy. Lo parabol abaotem olketa talent and olketa virgin gele, Jesus no minim olketa anointed Christian bae lesy. Bat, hem storyim wat bae happen if eniwan lo olketa no waka hard. If olketa no waka hard, bae olketa fail for mek sure lo hope wea God chusim olketa for kasem, and bae hem hard for olketa go insaed lo Kingdom lo heven.—2 Pet. 1:10.

¹⁴ Parabol blo Jesus abaotem olketa virgin gele and olketa talent, hem helpem evri anointed Christian for mas redi and lukaot and lo semtaem olketa mas waka hard and no lesy. Bat hao, Jesus talem eni nara samting moa wea hem olsem warning for olketa anointed Christian? Yes, hem talem! Wat Jesus talem lo Matthew 24:​40, 41 hem join tu witim final judgment blo olketa anointed Christian.

HU NAO “BAE GOD TEKEM”?

15-16. Wat nao Matthew 24:​40, 41 talem, wea showimaot olketa anointed Christian mas gohed for lukaot?

¹⁵ Bifor Jesus storyim thrifala parabol hia, hem story abaotem final judgment blo olketa anointed Christian and hem describem situation wea bae showimaot hu nao bae hem appruvim. Hem storyim tufala man wea waka lo garden and tufala woman wea hammerim wheat. Lo each case, luk olsem tufala duim sem waka, bat Jesus sei “narawan bae God tekem, narawan bae hem lusim.” (Readim Matthew 24:​40, 41.) Then hem sei olsem lo olketa follower blo hem: “Gohed for lukaot, bikos iufala no savve long wanem taem nao Lord bilong iufala bae kam.” (Matt. 24:42) Jesus talem tu samting wea klosap semsem bihaen hem storyim parabol blo olketa virgin. (Matt. 25:13) Hao, tufala toktok hia join tugeta? Luk olsem. Really, only olketa anointed Christian wea faithful nomoa bae Jesus “tekem” go insaed lo Kingdom blo hem lo heven.—John 14:3.

¹⁶ Mas gohed for lukaot. Taem eni anointed Christian no gohed for lukaot lo spiritual wei, bae olketa no insaed lo grup blo olketa chosen wan wea olketa angel bae hipimap. (Matt. 24:31) Evri pipol blo God nomata olketa garem hope for laef lo heven or lo earth, olketa shud tingim disfala warning wea Jesus talem for gohed for lukaot and gohed faithful.

17. Why nao iumi shud no wari if Jehovah chusim samfala niu faithful anointed wan distaem?

¹⁷ From iumi savve gud lo Jehovah, iumi savve trustim olketa judgment blo hem. So iumi no need for wari if Jehovah chusim samfala niu faithful anointed wan distaem.c Tingim tokpiksa wea Jesus talem abaotem olketa wakaman wea kam in for waka lo planteison lo mek-eleven hour. (Matt. 20:​1-16) Olketa wea kam waka lo planteison taem hem klosap lo end blo day, kasem sem pei olsem olketa wea start waka lo morning. Lo sem wei tu, nomata wat taem nao wanfala Christian hem kasem anointing, evri anointed Christian bae kasem sem reward lo heven if olketa gohed faithful.

FOLLOWIM OLKETA WARNING

18-19. Wat nao olketa leson and warning wea iumi lanem lo olketa parabol?

¹⁸ So, wat nao iumi lanem finis? Parabol abaotem olketa sheepsheep and goat showim hao olketa wea garem hope for laef olowe lo earth, mas gohed faithful and loyal lo Jehovah distaem and during lo big trabol wea klosap for happen. Lo datfala taem. Jesus bae judgem olketa faithful wan for kasem “laef olowe.”—Matt. 25:46.

¹⁹ Iumi storyim tu tufala parabol wea givim warning for olketa anointed Christian. Lo parabol blo Jesus abaotem olketa virgin gele, faevfala lo olketa nao showimaot olketa wise. Olketa redi and lukaot and weitim datfala groom nomata hem tek longtaem. Bat olketa nara virgin gele wea no wise olketa no redi. So datfala groom no letem olketa for go insaed lo haos wea marit feast hem gohed. Iumi tu mas redi and willing for weit nomata hao long nao hem tek bifor Jesus hem finisim disfala system. And tu, lo parabol blo Jesus abaotem olketa talent, iumi storyim tufala faithful wakaman wea waka hard and no lesy. Tufala waka hard on behalf lo boss blo tufala and hem hapi lo tufala. Bat, datfala wakaman wea lesy boss rejectim. Wat nao leson? Iumi mas gohed for busy lo service blo Jehovah go kasem end. And last samting, iumi lanem hao olketa anointed Christian mas gohed for lukaot mekem Jesus “tekem” olketa go insaed lo Kingdom lo heven. Olketa anointed Christian barava luk forward for “stap tugeta witim” Jesus lo heven. Bihaen lo war blo Armageddon, olketa bae kamap bride wea redi for maritim Jesus, datfala Pikinini Sheepsheep.—2 Thess. 2:1; Rev. 19:9.

20. Wat nao Jehovah bae duim for olketa wea followim warning blo hem?

²⁰ Taem for Jesus judgem pipol hem barava klosap, bat iumi no need for fraet. If iumi gohed faithful, loving Dadi blo iumi lo heven bae givim iumi “strong wea winim strong bilong man” mekem iumi “savve standap front long Son bilong man.” (2 Cor. 4:7; Luke 21:36) Nomata iumi garem hope for go lo heven or stap lo earth, iumi savve mekem Jehovah hapi if iumi followim warning lo olketa parabol blo Jesus. Bikos lo kaenfala fasin blo Jehovah, hem bae raetem nem blo iumi “insaed lo datfala buk” blo laef.—Dan. 12:1; Rev. 3:5.