Acceptim Dat Jehovah Forgivim Iu

1-2. Taem iumi savve Jehovah forgivim iumi, datwan mekem iumi feel hao? (Lukim tu piksa.)

KING David hem feel guilty bikos lo olketa sin wea hem duim bifor, so hem barava understandim datfala feeling. (Ps. 40:12; 51:3; superscription) Hem bin duim samfala serious mistek lo laef blo hem. Nomata olsem, David hem barava repent, and Jehovah forgivim hem. (2 Sam. 12:13) Taem Jehovah forgivim David, hem feelim hao datfala hevi blo sin hem aot from hem nao, so David minim gud tu datfala feeling.—Ps. 32:1.

² Olsem David, taem Jehovah showim mercy lo iumi, iumi tu savve feelim dat hevi blo sin hem aot from iumi. Even if iumi duim wanfala serious sin, iumi kasem comfort bikos iumi savve dat Jehovah willing for forgivim iumi if iumi barava repent, confessim sin blo iumi, and traem best for no duim moa datfala sin! (Prov. 28:13; Acts 26:20; 1 John 1:9) And iumi kasem comfort tu for savve dat taem Jehovah forgivim iumi, hem barava forgive nao and bae hem no accusim iumi moa lo datfala sin!—Ezek. 33:16.

3-4. Hao nao feeling blo wanfala sista bihaen hem baptaes, and wat nao bae iumi storyim lo disfala article?

³ Bat samfala taem, samfala pipol faendem hem hard for acceptim dat Jehovah forgivim olketa. Tingim experience blo Jennifer, wea growap lo truth. Taem hem teenager, hem start for duim olketa rong samting and garem dabol laef. Staka year bihaen, hem disaed for kam bak lo Jehovah and gogo hem qualify for baptaes. Hem sei: “Bifor, mi laekem tumas olketa material samting, mi durong, ova tumas for drink, and mi savve kros tumas. Lo tingting blo mi, mi savve dat bihaen mi repent and ask for forgiveness, sakrifaes blo Christ hem mekem mi klin. Bat insaed lo heart blo mi, mi no bilivim dat Jehovah forgivim mi.”

⁴ Hao, samfala taem iu faendem hem hard for bilivim lo heart blo iu dat Jehovah forgivim iu for olketa mistek wea iu duim bifor? Jehovah laekem iumi for feel olsem David wea barava sure dat God hem showim mercy lo hem. Lo disfala article, bae iumi storyim why iumi need for acceptim dat Jehovah forgivim iumi and wat nao savve helpem iumi for acceptim datwan.

WHY NAO IUMI NEED FOR ACCEPTIM DAT JEHOVAH FORGIVIM IUMI?

5. Wat nao Satan laekem iumi for bilivim? Storyim example.

⁵ Taem iumi acceptim dat Jehovah forgivim iumi, bae iumi savve misstim wei for foldaon lo wanfala lo olketa trap blo Satan. Remember Satan bae duim eni samting for stopem iumi for servem Jehovah. For kasem datfala goal, Satan maet trae for mekem iumi bilivim dat God bae no forgivim olketa sin blo iumi. Tingim story blo datfala man lo Corinth wea olketa aotem from kongregeson bikos hem durong. (1 Cor. 5:​1, 5, 13) Bihaen datfala man repent, Satan laekem olketa insaed kongregeson for no forgivim hem, and no welkamim hem bak lo kongregeson. And lo semtaem, Satan laekem datfala man wea repent finis for feel dat God no savve forgivim hem, and from datwan bae hem “sorre tumas” and stop for servem Jehovah. Goal and olketa teknik blo Satan hem no change. Nomata olsem, iumi savve finis lo “olketa trik blo hem.”—2 Cor. 2:​5-11.

6. Wat nao savve helpem iumi for no gohed feel guilty?

⁶ Taem iumi acceptim dat Jehovah hem forgivim iumi, bae iumi no gohed feel guilty and datfala hevi blo sin bae aot from iumi. Taem iumi duim wanfala sin, hem normal for iumi feel guilty. (Ps. 51:17) Datwan hem gud samting, bikos konsens blo iumi savve muvim iumi for duim samting for stretem datfala rong. (2 Cor. 7:​10, 11) Bat, if iumi gohed feel guilty bihaen iumi repent finis, maet datwan bae mekem iumi for laek givap. Taem iumi acceptim dat Jehovah forgivim iumi, iumi savve putim datfala guilty feeling bihaen lo iumi. Taem olsem, bae iumi savve servem Jehovah witim hapi and klin konsens, wea datwan nao wat hem laekem iumi for duim. (Col. 1:​10, 11; 2 Tim. 1:3) Bat, hao nao bae iumi savve really bilivim insaed lo heart blo iumi dat God forgivim iumi?

WAT NAO SAVVE HELPEM IUMI FOR ACCEPTIM DAT JEHOVAH HEM FORGIVIM IUMI?

7-8. Hao nao Jehovah describem hemseleva lo Moses, and wat nao iumi savve sure lo hem? (Exodus 34:​6, 7)

⁷ Ting raonem hao Jehovah describem hemseleva. For example, tingim wat Jehovah talem Moses lo Maunt Sinai.a (Readim Exodus 34:​6, 7.) Nomata Jehovah garem staka naes quality and wei, hem chus for talem lo Moses dat hem “God wea garem bigfala mercy [and] hem tingim man.” Hao, God wea garem olketa wei olsem, bae les for forgivim samwan wea worshipim hem wea barava repent from sin blo hem? Hard for hem duim datwan! Sapos hem duim, datwan no showim mercy and hem no tingim man, and Jehovah hem no kaen God olsem.

⁸ Iumi savve sure Jehovah hard for laea abaotem hemseleva, bikos hem God blo truth. (Ps. 31:5) From datwan, iumi savve trustim wat hem talem. If iu faendem hem hard for let go lo guilty feeling bikos lo olketa sin wea iu duim bifor, askem iuseleva: ‘Hao, mi barava bilivim dat Jehovah hem garem bigfala mercy and tingim man and willing for forgivim eniwan wea repent from sin blo hem?’ Sapos olsem, iu savve sure dat hem forgivim iu finis.

9. Wat nao disfala toktok “forgivim” hem minim? (Psalm 32:5)

⁹ Ting raonem wat Jehovah talem insaed Bible abaotem forgiveness blo hem. For example, tingim hao David describem wei wea Jehovah forgive. (Readim Psalm 32:5.) David hem sei: “Iu forgivim mistek and olketa sin blo mi.” Hebrew word wea olketa transleitim “forgivim” hem savve minim for “liftimap,” “tekem away,” or “karem aot.” Taem Jehovah forgivim David, hem olsem Jehovah liftimap and karem aot olketa sin blo David. From datwan, David feelim hao datfala guilty feeling wea hevi lo hem, hem aot nao from hem. (Ps. 32:​2-4) Iumi tu savve feel olsem. Taem iumi barava repent from olketa sin blo iumi, iumi no need for gohed karem hevi blo datfala guilty feeling wea Jehovah hem liftimap and karem aot finis from iumi.

10-11. Wat nao disfala toktok “redi for forgive” teachim iumi abaotem Jehovah? (Psalm 86:5)

¹⁰ Readim Psalm 86:5. Lo disfala verse, David hem sei Jehovah hem “redi for forgive.” Wanfala Bible reference buk hem sei olsem abaotem datfala toktok wea describem Jehovah, hem sei: “[Hem] ‘man for forgive,’ datwan hem ‘wei blo hem.’” Why nao wei for forgive, hem wei blo Jehovah? Nara part lo verse hia hem explainim olsem: “Loyal love wea iu showim lo evriwan wea kol lo iu hem big tumas.” Olsem iumi lanem lo article bifor diswan, loyal love hem muvim Jehovah for barava lovem and no lusim olketa faithful worshiper blo hem. Loyal love blo Jehovah muvim hem for ‘willing for forgivim’ evriwan wea duim sin and repent. (Isa. 55:​7, ftn.) If hem no isi for iu acceptim dat God forgivim iu, iu savve askem iuseleva: ‘Hao, mi bilivim dat Jehovah hem man for forgive, and hem redi for forgivim evriwan wea repent and wea askem hem for mercy?’ Sapos olsem, iu savve sure dat taem iu askem hem for mercy hem savve forgivim iu tu.

¹¹ Hem comfortim iumi for savve dat Jehovah barava understandim dat iumi sin and no perfect. (Ps. 139:​1, 2) Iumi savve lukim diswan lo nara psalm wea David raetem, wea datwan tu savve helpem iumi for acceptim dat Jehovah hem forgivim iumi.

NO FORGETIM WAT JEHOVAH HEM TINGIM

12-13. Olsem Psalm 103:14 storyim, wat nao Jehovah tingim abaotem iumi, and wat nao datwan muvim hem for duim?

¹² Readim Psalm 103:14. David sei Jehovah hem “tingim dat iumi dust nomoa.” Toktok hia showim wanfala reason why Jehovah redi for forgivim olketa worshiper blo hem wea repent. Jehovah savve dat iumi inheritim sin. For minim gud diswan, iumi laek lukluk moa lo datfala toktok wea David talem.

¹³ David sei Jehovah “hem savve gud lo hao hem wakem iumi.” Jehovah wakem Adam “from dust blo graon” and hem savve gud dat perfect pipol garem olketa limit. For example, olketa needim samfala samting for gohed laef, olsem for kaikai, sleep, and for brith. (Gen. 2:7) Bat taem Adam and Eve sin, wei wea iumi dust hem garem nara mining. Hem minim from iumi evriwan inheritim sin, hem isi tumas for iumi duim olketa rong samting. Jehovah hem no luksavve nomoa dat iumi no perfect, bat David hem sei Jehovah hem evritaem “tingim” dat iumi no perfect. Datfala word “tingim” lo Hebrew languis savve minim positive samting wea samwan duim. So maet nara wei for talem toktok blo David, hem olsem: Jehovah luksavve dat samfala taem iumi bae fail for duim stret samting, bat if iumi duim samting wea no stret and iumi barava repent, datwan bae muvim hem for showim mercy and forgivim iumi.—Ps. 78:​38, 39.

14. (a) Wat nao nara samting wea David talem abaotem hao Jehovah hem forgive? (Psalm 103:12) (b) Hao nao example wea David storyim hem showim dat Jehovah hem savve barava forgive? (Lukim box “Hao Jehovah Savve Forgive and Forget.”)

¹⁴ Taem Jehovah forgivim iumi, hao farawe nao hem putim sin blo iumi? (Readim Psalm 103:12.) David sei taem Jehovah forgivim iumi Hem putim olketa sin wea iumi duim farawe, “lo sem wei wea sunrise [lo east] hem farawe from sunset [lo west].” Tingim, east hem evritaem barava farawe from west, and no enitaem tufala savve meet. Wat nao diswan teachim iumi abaotem hao Jehovah forgivim sin blo iumi? Wanfala reference buk sei: “If God putim sin blo iumi farawe olsem, then iumi sure dat hard tumas for eni smel or mark blo datfala sin, or even memory blo datfala sin bae stap.” Tingim, smel savve mekem man for rememberim samting wea happen bifor. Bat taem Jehovah hem forgive, hem olsem no eni smel blo datfala sin hem stap nao wea bae mekem hem for tingim bak datfala sin and accusim iumi lo datwan.—Ezek. 18:​21, 22; Acts 3:19.

15. Wat nao iumi savve duim if iumi gohed feel guilty bikos lo olketa sin wea iumi duim bifor?

¹⁵ Hao nao toktok blo David lo Psalm 103 helpem iumi for acceptim dat Jehovah hem forgivim iumi? If iumi gohed feel guilty bikos lo olketa sin wea iumi duim bifor, iumi savve askem iumiseleva olsem: ‘Hao, mi forgetim wat Jehovah hem tingim, dat hem rememberim hao mi no perfect and dat hem savve forgivim samwan olsem mi wea repent? Hao, mi gohed tingim wat Jehovah chus for forgetim, wea hem nao olketa sin blo mi wea hem forgivim finis and wea hem bae no accusim mi moa lo hem?’ Jehovah no focus lo olketa sin wea iumi duim bifor. And iumi tu shud no focus lo datwan. (Ps. 130:3) Taem iumi acceptim dat Jehovah forgivim iumi, bae iumi savve forgivim iumiseleva and no gohed feel guilty.

16. Storyim example wea showim hao hem danger for gohed feel guilty bikos lo olketa sin wea iumi duim bifor. (Lukim tu piksa.)

¹⁶ Tingim wanfala example. For gohed feel guilty bikos lo olketa sin wea iumi duim bifor, hem olsem taem samwan trae for draevem car go forward bat lo semtaem hem lukluk lo rear vision mirror for luk bihaen. Taem iu draev, samfala taem bae iu need for luk lo mirror for chek for lukim if eni danger bihaen lo iu. Bat for draev sef and go forward, iu mas focus lo road front lo iu. Lo sem wei tu, samfala taem hem gud for tingim bak olketa sin wea iumi duim bifor mekem iumi savve lane from olketa mistek blo iumi and strongim disison blo iumi for no duim moa olketa sem mistek. Bat if iumi gohed focus lo olketa sin wea iumi duim bifor, datfala wei for feel guilty savve stopem iumi for duim moa samting for God distaem. Instead for duim datwan, iumi need for gohed focus lo road front lo iumi. Iumi lo road wea lead go for laef olowe lo niu world wea God promisim, wea olketa bad memory “bae no kamap moa lo mind.”—Isa. 65:17; Prov. 4:25.

GOHED FOR CONVINCIM HEART BLO IU

17. Why nao iumi need for gohed duim samting for convincim heart blo iumi dat Jehovah lovem and forgivim iumi?

¹⁷ Iumi need for gohed duim samting for convincim heart blo iumi dat Jehovah lovem and forgivim iumi. (1 John 3:​19, ftn.) Why nao olsem? Bikos Satan bae no stop for trae for mekem iumi feel dat God no lovem iumi or savve forgivim iumi. Goal blo Satan hem for mekem iumi stop for servem Jehovah. Iumi expectim dat Satan bae duim staka samting moa for mekem iumi feel olsem, bikos hem savve dat taem blo hem, hem short. (Rev. 12:12) Iumi mas no letem hem for win!

18. Wat nao iu savve duim for convincim heart blo iu dat Jehovah lovem and forgivim iu?

¹⁸ For helpem iu barava bilivim dat Jehovah lovem iu, followim olketa idea wea iumi storyim lo article bifor diswan. For helpem iu convincim heart blo iu dat Jehovah forgivim iu, ting raonem hao Jehovah describem hemseleva. Ting raonem wat Bible talem abaotem hao Jehovah forgive. No forget, hem savve gud dat iu inheritim sin and hem bae showim mercy lo iu. And remember dat taem hem forgive, hem barava forgive nao. Then bae iu barava trustim mercy blo Jehovah and talem sem toktok olsem David, and sei, “Thankiu Jehovah, for ‘forgivim mistek and olketa sin blo mi’!”—Ps. 32:5.