Hao, Mi Shud Stop Nao for Draev?

Hao, situation blo iu hem olsem tu? If olsem, wat nao savve helpem iu for luksavve if iu shud gohed for draev or nomoa?

Lo samfala kantri, taem olketa draeva wea winim wanfala certain age laek for renewim license blo olketa, olketa mas go firstaem lo wanfala doctor for chek if olketa fit yet for draev. Olketa Christian wea stap lo olketa kantri olsem mas obeyim olketa law hia and followim disison blo olketa wea gavman markem. (Rom. 13:1) Bat nomata wea nao iu stap, samfala idea hem stap wea savve helpem iu luksavve if draeving blo iu hem still sef yet.

CHEKIM HAO IU DRAEV

Lo website blo National Institute on Aging (NIA) lo United States, hem garem samfala kwestin wea hem gud for iu askem iuseleva:

• Hao, mi faendem hard for lukim olketa saen lo road or for lukluk klia lo naet?

• Hao, mi no flexible nao, and datwan mekem hem no isi for tanem hed for chekim olketa mirror blo vehicle and olketa ples wea mi no savve lukim?

• Hao, mi faendem hem no isi for react kwiktaem, olsem for kwiktaem aotem leg from speed and stepim brake?

• Hao, mi draev slow tumas and datwan affectim flow blo traffic?

• Hao, enitaem mi klosap accident, or vehicle blo mi garem olketa scratch or bend bikos mi bangam samfala samting?

• Hao, police stopem mi enitaem bikos lo hao mi draev?

• Hao, enitaem mi klosap sleep taem mi draev?

• Hao, mi tekem eni medicine wea savve affectim hao mi draev?

• Hao, olketa famili member or frens talem dat olketa wari abaotem hao mi draev?

If ansa blo iu yes lo wan or tufala lo olketa kwestin hia, maet hem gud for iu mekem samfala change. For example, maet iu need for katem daon haomas taem iu draev, especially lo naet. Evritaem chekim draeving blo iu. Iu savve askem wanfala famili member or fren for talem tingting blo olketa abaotem hao iu draev. Maet iu laek for tekem wanfala safety course for helpem draeving blo iu kamap moa sef. Bat, if ansa blo iu lo staka kwestin antap hem yes, maet hem gud for iu stop for draev.a

FOLLOWIM OLKETA BIBLE PRINCIPLE

Maet iumi no luksavve dat hao iumi draev hem no olsem bifor. And maet hem no isi for iumi acceptim dat iumi need for stop nao for draev. So, wat nao samfala Bible principle wea savve helpem iu for lukim klia situation blo iu and mekem wise disison? Bae iumi storyim tufala.

Gohed for hambol. (Prov. 11:2) Taem iumi gogo for olo, eye blo iumi, ear blo iumi, olketa masol blo iumi, and reaction blo iumi bae gogo daon. For example, staka taem pipol stop for pleim samfala sports taem olketa gogo for olo bikos olketa luksavve bae hem isi for olketa garekil. Sem idea hem fitim tu wei for draev. Samwan wea hambol bae gogo luksavve dat hem shud stop nao for draev for safety blo hem. (Prov. 22:3) And man wea hambol bae willing for lisin if olketa narawan talem dat olketa wari abaotem draeving blo hem.—Comparem 2 Samuel 21:​15-17.

No kamap bloodguilty. (Deut. 22:8) Car hem savve kamap wanfala dangerous weapon taem man no draev lo wei wea hem sef. Person wea gohed draev nomata draeving skill blo hem gogo daon hem savve riskim laef blo hem and olketa narawan tu. And if hem kosim wanfala accident and samwan dae, hem savve kamap bloodguilty.

Sapos iu need for disaed if iu bae stop for draev or nomoa, no tingse if iu stop for draev datwan minim iu iusles or iu no fit nao. Jehovah lovem iu bikos lo olketa naes quality blo iu, includim wei wea iu hambol, modest, and iu tingim safety blo olketa narawan. And hem promis for lukaftarem iu and comfortim iu. (Isa. 46:4) Hem bae no lusim iu. So askem hem for helpem iu garem wisdom and iusim olketa Bible principle for helpem iu disaed if iu shud stop for draev.