Gohed Hapi Taem Iu Lukaftarem Samwan wea Sik or Olo

1-2. If iu lukaftarem samwan, hao nao Jehovah feel abaotem iu? (Proverbs 19:17) (Lukim tu piksa.)

WANFALA brata from Korea wea nem blo hem Jin-yeol sei: “Mi and waef blo mi marit for winim 32 years. Lo faev years wea go pas, mi mas lukaftarem hem. Hem garem sik wea olketa kolem Parkinson’s disease and hem no isi for muvim body blo hem. Mi lovem tumas waef blo mi and mi hapi for lukaftarem hem. Lo haos, evri naet hem mas sleep lo wanfala bed wea olketa designim for olketa sikman. Mi sleep lo saed and mi holem hand blo hem.”

² Hao, iu lukaftarem samwan wea iu lovem, olsem parents, hasband or waef, pikinini, or fren blo iu? For sure iu barava hapi for helpem hem bikos hem wanfala spesol samting for duim. And taem iu lukaftarem samwan wea iu lovem, datwan showim iu lovem Jehovah. (1 Tim. 5:​4, 8; Jas. 1:27) Nomata olsem, iu feisim olketa challenge wea staka taem olketa narawan no lukim. Samfala taem, iu maet feel olsem iu nomoa iu safa tumas. Maet iu smile taem iu stap witim pipol, bat taem iu stap seleva, iu no holem bak nao tias blo iu. (Ps. 6:6) Maet olketa narawan no luksavve dat iu barava stragol, bat Jehovah evritaem lukim. (Comparem Exodus 3:7.) Olketa tias and sakrifaes blo iu hem spesol lo hem. (Ps. 56:8; 126:5) Hem lukim evriting wea iu duim for helpem samwan wea iu lovem. Jehovah hem ting lo datwan olsem hem kaon lo iu and hem promis for changem bak.—Readim Proverbs 19:17.

3. Taem Abraham and Sarah lukaftarem Terah, wat nao samfala challenge wea olketa maet feisim?

³ Bible garem staka story blo olketa man and woman wea lukaftarem samwan. Tingim example blo Abraham and Sarah. Taem olketa lusim Ur, Terah, dadi blo olketa hem samting olsem 200 years old. Nomata olsem, hem tu go witim olketa. Olketa travel samting olsem 960 kilometer for go lo Haran. (Gen. 11:​31, 32) For sure Abraham and Sarah lovem Terah, bat tingim, masbi hem challenging tumas for olketa lukaftarem hem, especially taem olketa travel. Luk olsem olketa travel lo olketa camel or donkey, wea datwan maet no isi for olo man olsem Terah. Masbi samfala taem olketa barava feel taed. Nomata olsem, iumi sure Jehovah givim strong wea olketa needim. Lo sem wei wea Jehovah helpem Abraham and Sarah, hem bae gohed helpem and strongim iu.—Ps. 55:22.

4. Wat nao bae iumi storyim lo disfala article?

⁴ Hapi savve helpem iu for no givap taem iu lukaftarem samwan. (Prov. 15:13) Taem man hapi, datwan savve helpem hem nomata hem mas deal witim eni hard situation. (Jas. 1:​2, 3) Hao nao iu savve garem hapi olsem? Wanfala wei hem for depend lo Jehovah lo prea and askem hem for helpem iu for gohed garem positive tingting. Lo disfala article, bae iumi storyim samfala nara samting wea olketa wea lukaftarem samwan savve duim for gohed hapi. And tu, bae iumi storyim hao olketa narawan savve help. Bat firstaem, bae iumi storyim why olketa wea lukaftarem samwan need for gohed hapi and olketa challenge wea savve stealim hapi blo olketa.

HAO WEI FOR LUKAFTAREM SAMWAN SAVVE AFFECTIM HAPI BLO IU

5. Why nao iumi need for gohed hapi taem iumi lukaftarem samwan?

⁵ If iumi lusim hapi blo iumi taem iumi lukaftarem samwan, hem isi tumas for iumi taed. (Prov. 24:10) And taem iumi taed, nomata iumi laek for duim samting for help, maet bae hem no isi for iumi kaen and givim help. Wat nao samfala challenge wea savve mekem iumi for lusim hapi blo iumi?

6. Why nao samfala wea lukaftarem samwan savve taed tumas?

⁶ Olketa wea lukaftarem samwan maet taed gogo olketa no garem strong nao. Wanfala sista wea nem blo hem Leah sei: “Nomata lo day wea evriting hem olraet, mi savve feel stress and taed tumas. Kasem end lo day, mi feel olsem mi hard nao. Samfala taem mi no garem energy, nomata for replyim wanfala text message.” Olketa narawan faendem hard for kasem inaf rest or for relax lelebet. Wanfala sista wea nem blo hem Inés sei: “Mi no garem inaf sleep. Lo naet, staka taem mi mas wekap evri tu hour for kea for mami-in-law blo mi. And for staka year, mi and hasband blo mi no go holiday tu.” Samfala wea lukaftarem samwan no even savve joinim eni hapitaem or duim olketa theocratic assignment bikos olketa mas lukaftarem loved wans blo olketa full-taem. From datwan, maet olketa feel lonely and feel olsem olketa no wei nao.

7. Taem iumi lukaftarem samwan, why nao samfala taem iumi maet feel guilty or sorre?

⁷ Olketa wea lukaftarem samwan maet barava feel guilty or sorre. Wanfala sista wea nem blo hem Jessica sei: “Mi savve feel nogud bikos mi no fit for duim samfala samting. Taem mi duim samfala samting for miseleva, mi feel guilty and feel olsem mi selfish.” Samfala savve feel guilty bikos samfala taem olketa feel nogud abaotem situation blo olketa. Samfala maet wari bikos olketa feel olsem olketa no duim inaf for helpem olketa loved wans. And samfala maet feel guilty bikos olketa kros lo person wea olketa lukaftarem and talem samting wea mekem hem feel nogud. (Jas. 3:2) And tu, samfala sorre tumas taem olketa lukim health blo person wea olketa lukaftarem hem gogo daon. Wanfala sista wea nem blo hem Barbara sei: “Wanfala samting wea hard tumas for mi, hem nao for lukim health blo samwan wea mi lovem hem worse each day.”

8. Hao nao samfala feel taem olketa narawan talem thankiu for help wea olketa givim?

⁸ Samfala wea lukaftarem samwan maet feel olsem no eniwan luksavve lo wat olketa duim. Why? Bikos staka taem no eniwan sei thankiu or praisem olketa for hard waka and sakrifaes wea olketa duim. Nomata smol toktok nomoa for sei thankiu savve barava encouragem man. (1 Thess. 5:18) Wanfala sista wea nem blo hem Melissa sei: “Samfala taem, mi krae bikos mi feel nogud. Bat taem olketa wea mi lukaftarem sei thankiu for evriting wea mi duim for olketa, datwan mekem mi hapi tumas! Wat olketa talem helpem mi for wekap and redi, and hapi for gohed kea for olketa moa lo next day.” Brata Ahmadu, storyim feeling blo hem taem person wea hem lukaftarem sei thankiu lo hem. Hem and waef blo hem lukaftarem young niece blo tufala wea garem sik epilepsy. Ahmadu sei: “Nomata hem no barava minim gud hao big nao olketa sakrifaes wea mitufala mekem for lukaftarem hem, mi hapi tumas taem hem talem thankiu or raetem smol note wea sei, ‘Mi lovem iutufala.’”

HAO FOR GOHED HAPI

9. Wat nao iu savve duim wea showim iu luksavve lo limit blo iu?

⁹ Luksavve lo limit blo iu. (Prov. 11:2) Taem and strong blo iumi evriwan hem garem limit. So iu mas markem nomoa wat iu savve duim and no duim, and samfala taem iu need for sei no. Taem iu duim datwan, hem showim iu hambol bikos iu luksavve lo limit blo iu. If olketa narawan laek for helpem iu, willing for acceptim datwan. Wanfala brata wea nem blo hem Jay sei: “Each day, iumi savve duim nomoa samting wea fitim taem and strong blo iumi. Taem iu luksavve lo limit blo iu and no winim datwan, bae iu gohed for hapi.”

10. Taem iu lukaftarem samwan, why nao hem important for minim gud wanfala situation? (Proverbs 19:11)

¹⁰ Garem wei for minim gud samting. (Readim Proverbs 19:11.) Taem iu minim gud situation blo samwan, bae iu no kwiktaem kros taem datfala person mekem iu feel nogud. Bat bae iu trae for understandim why hem duim wanfala samting. Iumi savve dat samfala sik savve mekem samwan for duim samting wea no mas stret. (Eccl. 7:7) For example, taem hem no sik hem kaen and tingim narawan, bat gogo hem savve argue or raoa. Or maet hem demandim samting, komplen, or no satisfae lo wat iu duim. If iu lukaftarem samwan wea garem serious sik, hem gud for iu lane abaotem datfala sik. Taem iu savve gud lo sik blo hem, hem bae moa isi for iu minim hao datfala sik affectim hem, and bae iu luksavve wat hem duim hem no really wei blo hem.—Prov. 14:29.

11. Wat nao olketa important samting wea iu shud faendem taem for duim each day? (Psalm 132:​4, 5)

¹¹ Faendem taem for strongim frenship blo iu witim Jehovah. Samfala taem, iu bae need for disaed for no duim samfala samting mekem iu garem taem for duim “samting wea moa important.” (Phil. 1:10) Wanfala lo olketa samting wea moa important hem nao for strongim frenship blo iu witim Jehovah. King David mekem worship blo Jehovah hem main samting lo laef blo hem. (Readim Psalm 132:​4, 5.) Iumi tu laek for mekem wei for readim Bible and for prea kamap main samting lo laef blo iumi evriday. Wanfala sista wea nem blo hem Elisha sei: “Samting wea helpem mi for gohed hapi hem nao for prea and ting raonem olketa psalms wea comfortim mi. Wei for prea nao barava helpem mi. Mi savve prea lo Jehovah staka taem lo day for hem helpem mi for no wari.”

12. Why nao olketa wea lukaftarem samwan need for lukaftarem health blo olketa seleva?

¹² Faendem taem for lukaftarem health blo iu. Taem iu busy for lukaftarem samwan iu maet faendem hem hard for garem healthy diet bikos iu no garem taem for go baem olketa healthy kaikai and for preparem. For garem gud diet and duim exercise savve barava helpem mind and body blo iu for healthy. So trae for iusim gud lelebet taem wea iu garem for kaikaim healthy kaikai and exercise evritaem. (Eph. 5:​15, 16) And tu, trae for garem inaf sleep. (Eccl. 4:6) Olketa expert faendem dat sleep savve helpem brain for repairim hemseleva. Wanfala article “How Sleep Can Affect Stress,” wea Banner Health hem pablisim, hem storyim hao inaf sleep savve helpem iumi for katem daon wari and deal witim stress. Iu need for markem samfala taem tu for duim recreation. (Eccl. 8:15) Wanfala sista wea lukaftarem samwan hem storyim wat helpem hem for gohed hapi. Hem sei: “Taem weather hem gud, mi trae go wakabaot aotsaed and enjoyim sun. Mi savve markem tu wan taem lo month for go wakabaot witim wanfala lo olketa fren blo mi.”

13. Why nao hem gud for laflaf? (Proverbs 17:22)

¹³ Hem gud for laflaf samfala taem. (Readim Proverbs 17:22; Eccl. 3:​1, 4) Taem iumi laf, datwan hem gud for mind and body blo iumi. Taem iu lukaftarem samwan, staka taem samting no happen followim wat iu planim. Taem wanfala situation kamap wea no isi, hem gud for laf abaotem and taem olsem bae hem moa isi for iu deal witim. And taem iu laflaf witim person wea iu lukaftarem, datwan strongim wei wea iutufala fren tugeta.

14. Hao nao wei for story lo wanfala fren wea iu trustim savve helpem iu?

¹⁴ Story lo wanfala fren wea iu trustim. Nomata iu traem best blo iu for gohed hapi, samfala taem bae iu still wari. Lo olketa taem olsem, hem gud for iu storyim feeling blo iu witim wanfala gud fren wea bae no judgem iu or feel nogud lo wat iu talem. (Prov. 17:17) Wei wea hem lisin and encouragem iu maet hem nao wat iu really needim for gohed hapi.—Prov. 12:25.

15. Hao nao wei for focus lo hope blo iu savve mekem iu hapi?

¹⁵ Imaginim wat iutufala bae duim tugeta lo Paradaes. Tingim, waka wea iu duim for lukaftarem samwan wea sik or olo hem for lelebet taem nomoa, and hem no insaed original plan blo Jehovah. (2 Cor. 4:​16-18) Really, “datfala tru laef” bae kam lo future. (1 Tim. 6:19) Iu bae hapi tumas taem iutufala story abaotem wat iutufala bae duim tugeta lo Paradaes. (Isa. 33:24; 65:21) Wanfala sista wea nem blo hem Heather sei: “Staka taem nao mi savve talem olketa wea mi lukaftarem dat klosap nao bae iumi soengim kaleko tugeta, ran tugeta, and raedem baesikol tugeta. Iumi bae beikem bred and kuki for olketa loved wans wea bae resurrect. Tugeta, bae iumi thankiu lo Jehovah for hope blo iumi.”

WAT OLKETA NARAWAN SAVVE DUIM FOR HELP

16. Lo kongregeson blo iumi, wat nao iumi savve duim for helpem olketa wea lukaftarem samwan? (Lukim tu piksa.)

¹⁶ Helpem olketa wea lukaftarem samwan mekem olketa garem taem for rest. Iumi lo kongregeson tu savve go help for lukaftarem samwan wea sik or olo, mekem samwan wea lukaftarem datfala person bae garem taem for rest lelebet or duim samting for hemseleva. (Gal. 6:2) Samfala pablisa mekem schedule for help evri week. Wanfala sista wea nem blo hem Natalya, wea lukaftarem hasband blo hem wea paralaes sei: “Wanfala brata lo kongregeson savve kam wan or tu taems lo week for spendem taem witim hasband blo mi. Tufala share lo ministry, story, and savve watch movie tugeta. Hasband blo mi enjoyim tumas olketa taem olsem and datwan givim taem for mi duim samfala samting for miseleva, olsem for go wakabaot.” Samtaems, maet iu savve stay ova naet for lukaftarem datfala olo or sik person mekem man wea lukaftarem hem savve sleep gud lo naet.

17. Lo olketa kongregeson meeting, wat nao iumi savve duim for helpem olketa wea lukaftarem samwan?

¹⁷ Helpem olketa wea lukaftarem samwan during lo meeting. Samfala taem, olketa wea lukaftarem samwan faendem hem hard for lisin lo kongregeson meeting, circuit assembly, and regional convention bikos olketa busy for lukaftarem olketa loved wans blo olketa. Olketa lo kongregeson savve help taem olketa sidaon witim olketa sik or olo hia lo full meeting or part lo datfala meeting. Sapos person wea sik no savve lusim haos blo hem, iu savve go stap witim hem lo haos and connect go lo meeting mekem man wea lukaftarem hem savve go lo meeting.

18. Wat moa iumi savve duim for helpem olketa wea lukaftarem samwan?

¹⁸ Encouragem and prea for olketa wea lukaftarem samwan. Olketa elder shud evritaem visitim olketa wea lukaftarem samwan wea sik or olo. (Prov. 27:23) And nomata wat nao situation blo iumi, iumi evriwan lo kongregeson savve kaen and evritaem encouragem olketa wea lukaftarem samwan. Iumi savve askem Jehovah tu for strongim and helpem olketa for gohed hapi.—2 Cor. 1:11

19. Wat nao iumi luk forward for hem?

¹⁹ Klosap nao, Jehovah bae draem evri tias blo pain from eye blo evriwan. Sik and dae bae nomoa tu. (Rev. 21:​3, 4) “Man wea kripol bae jamp olsem deer.” (Isa. 35:​5, 6) Olketa sorre samting wea kamaot from wei for olo and sorre feeling wea kamap taem iu lukaftarem olketa loved wan wea sik, hem part lo “olketa samting wea happen bifor [wea] bae no kamap moa lo mind.” (Isa. 65:17) Nomata taem iumi gohed for weitim nambawan hope blo iumi, Jehovah bae no lusim iumi. If iumi gohed depend lo hem for givim iumi strong, hem bae helpem iumi for ‘gohed stand strong and gohed for patient and hapi.’—Col. 1:11.