Help for Olketa Woman wea Pipol Treatim Olketa Nogud
“PIPOL abusim staka million woman and gele evriwea lo world. Iu wanfala lo olketa hia? Faendaot why safety blo iu hem important lo God, and wat hem bae duim abaotem wei wea pipol treatim nogud olketa woman.”
Toktok hia hem from wanfala jw.org article wea title blo hem “Safety blo Olketa Woman—Samting wea Bible Talem.” Iu savve daonlodim PDF blo hem, then printim and foldim for kamap wanfala tract, iu savve iusim link lo end blo datfala article for duim datwan. Wanfala sista lo United States wea nem blo hem Stacy sei: “Mi printim samfala copy and then mi witim nara sista tekem go lo wanfala center lo territory blo kongregeson blo mifala wea hem sef ples for olketa woman.”
Wanfala woman wea waka lo datfala center ask for samfala copy moa for olketa narawan wea stap lo datfala center. From datwan, olketa givim moa nara 40 tract witim 30 jw.org contact card. Lo nara visit, manager blo datfala center talem dat hem laekem olketa sista hia for demonstratim lo olketa woman wea stap lo there hao for duim wanfala personal Bible study course.
Stacy and tufala nara sista go tu lo nara center and olketa givim faevfala copy blo datfala tract, then olketa lo there requestim samfala copy moa. Wanfala woman wea waka lo datfala ples sei: “Disfala pamphlet bae helpem olketa woman lo hia, mifala needim diswan.” Lo nara taem, staka wea stap lo there hipap for lukim taem olketa sista demonstratim hao for duim wanfala Bible study, and tufala lo olketa talem dat tufala interest for attendim meeting lo Kingdom Hall lo next weekend.
Stacy sei: “Mifala sapraes lo reaction blo olketa lo disfala naes article. If iu printim and foldim disfala tract, hem wanfala naes wei for sharem Kingdom message witim olketa woman wea pipol treatim nogud. Mifala hapi for lukim reaction blo olketa woman hia, and mifala excited for lukim wat Jehovah bae duim for blessim hard waka blo mifala for sharem gud nius witim olketa hia.”