Wat Nao Profesi?

Ansa from Bible

Profesi hem wanfala message from God, or wanfala toktok wea kam from hem. Bible sei olketa profet hem “olketa man wea holy spirit leadim olketa, olketa nao talemaot toktok wea kam from God.” (2 Peter 1:​20, 21) So wanfala profet hem man wea kasem message from God and hem pasim message hia lo others.​—Acts 3:​18.

Hao nao olketa profet kasem information from God?

God iusim samfala difren method for transmitim tingting blo hem lo olketa profet blo hem:

• Raeting. God iusim disfala method at least wan taem, taem hem raetem Ten Komandment and givim lo Moses.​—Exodus 31:18.

• Hem iusim olketa angel. For example, God iusim wanfala angel for talem Moses message wea hem bae go talem lo Pharaoh lo Egypt. (Exodus 3:​2-4, 10) Taem God laek talem wanfala important detail, hem instructim olketa angel for talem sem detail hia and no missim eni word lo datfala message, olsem hem duim taem hem sei olsem lo Moses: “Iu mas raetem olketa toktok hia bikos mi mekem covenant witim iu and witim Israel followim olketa toktok hia.”​—Exodus 34:27.a

• Vision. Samfala taem olketa profet lukim olketa vision taem olketa wekap nomoa and savve evriting wea gohed for happen. (Isaiah 1:1; Habakkuk 1:1) Samfala vision wea olketa lukim hem klia tumas and hem olsem olketa tu insaed lo datwan. (Luke 9:​28-​36; Revelation 1:​10-​17) Lo olketa nara taem, olketa profet lukim olketa vision taem olketa insaed wanfala trance.b (Acts 10:10, 11; 22:17-​21) God transmitim message blo hem tu lo olketa profet insaed lo olketa dream taem olketa sleep.​—Daniel 7:1; Acts 16:​9, 10.

• Leadim tingting. God leadim tingting blo olketa profet blo hem for pasim message blo hem. Hem nao why disfala scripture sei: “Evri Scripture hem kam from God.” Nara transleison transleitim datfala phrase “kam from God” olsem “God brith lo hem.” (2 Timothy 3:​16; The Emphasised Bible) God iusim holy spirit, or active force blo hem, for “brithim” olketa idea blo hem insaed mind blo olketa servant blo hem. Message hem blo God, bat profet nao talem lo own toktok blo hem.​—2 Samuel 23:​1, 2.

Hao, profesi hem evritaem abaotem future?

Nomoa, Bible profesi hem no only abaotem future. Nomata olsem, staka message from God storyim wat savve happen lo future, nomata maet hem no storyim evri detail. For example, staka taem nao olketa profet blo God gohed for warnim olketa Israelite bifor abaotem olketa wicked tings wea olketa duim. Olketa warning hia describem olketa future blessings wea pipol hia bae kasem if olketa obey, and tu, future calamity if olketa les for obey. (Jeremiah 25:​4-6) Outcome blo datwan hem depend lo wei wea olketa Israelite chus for obey or nomoa.​—Deuteronomy 30:19, 20.

Example blo olketa Bible profesi wea no storyim wat bae happen lo future

• Lo wanfala occasion, taem olketa Israelite askem God for helpem olketa, hem sendem wanfala profet for talem dat bikos olketa refuse for obeyim olketa komand blo God, dastawe Hem no helpem olketa.​—Judges 6:​6-​10.

• Taem Jesus story lo wanfala Samaritan woman, hem storyim past blo woman hia wea showim dat hem kasem datwan from God. Woman hia luksavve dat Jesus hem wanfala profet nomata hem nating talem eniting abaotem wat bae happen lo future.​—John 4:​17-​19.

• Lo kot case blo Jesus, olketa enemy blo hem kavarem feis blo hem, hitim hem, and then sei: “Talem profesi! Hu nao hitim iu ia?” Olketa no askem Jesus for talem wat bae happen lo future bat olketa laekem hem for iusim paoa wea kam from God for talem hu nao hitim hem.​—Luke 22:63, 64.