رومیوں دے ناں خط
11 فیر کیہہ ایہدا مطلب ایہہ وے کہ خدا نے اپنی قوم نُوں چھڈ دِتا؟ بالکل نئیں! مَیں آپ اِک اِسرائیلی آں تے ابراہام دی نسل تے بِنیامین دے قبیلے چوں آں۔ 2 خدا نے اپنی اوس قوم نُوں نئیں چھڈیا جنہوں اوہنے پہلاں چُنیا سی۔ کیہہ توانوں یاد نئیں کہ پاک کلام دے مطابق ایلیاہ نبی نے خدا کولوں اِلتجا کردے ویلے اِسرائیل دے خلاف کیہہ کہیا سی؟ 3 اوہنے کہیا: ”اَے یہوواہ، اوہناں نے تیرے نبیاں نُوں مار دِتا اے تے تیریاں قربانگاہواں نُوں ڈھا دِتا اے۔ کلّا مَیں ای بچیا واں تے ہُن اوہ میری جان تے پچھے پئے ہوئے نیں۔“ 4 پر خدا نے اوہنوں کہیا: ”حالے وی میرے 7 ہزار بندے ہے نیں جنہاں نے بعل اَگے گوڈے نئیں ٹیکے۔“ 5 اَج وی خدا نے عظیم رحمت کر کے اِسرائیلیاں چوں کجھ لوکاں نُوں چُنیا اے۔ 6 اوہناں لوکاں نُوں عظیم رحمت دی وجہ توں چُنیا گیا اے نہ کہ اوہناں دے کماں دی وجہ توں۔ جے اوہناں نُوں کماں دی وجہ توں چُنیا جاندا تے ایہہ عظیم رحمت نہ ہوندی۔
7 فیر کیہہ کہیے؟ اِسرائیلیاں نے جیس چیز نُوں حاصل کرن لئی پورا زور لایا، اوہ ساریاں نُوں نئیں ملی سگوں کجھ چُنے ہوئے لوکاں نُوں ملی۔ باقی لوکاں نے سُنن توں اِنکار کر دِتا* 8 جیویں کہ پاک کلام چ لکھیا اے: ”خدا نے اوہناں نُوں اَج تک گُوڑھی نیندر سواں کے رکھیا اے تاکہ اوہ اپنیاں اَکھاں نال ویکھ نہ سکن تے اپنے کناں نال سُن نہ سکن۔“ 9 نالے داؤد نے وی کہیا: ”اوہناں دِیاں دعوتاں اوہناں لئی اِک پھندا تے جال بن جان تاکہ اوہناں نُوں ٹھوکر لگے تے سزا ملے۔ 10 اوہناں دِیاں اَکھاں اَگے نھیرا چھا جائے تاکہ اوہناں نُوں نظر نہ آئے تے اوہناں تے ایناں بھار ہوئے کہ اوہناں دی کمر ہمیشاں جُھکی رہوے۔“
11 کیہہ ایہدا مطلب ایہہ وے کہ جدوں اِسرائیلی ٹھوکر کھا کے ڈِگ پئے تے اوہ دُبارہ نئیں اُٹھ سکے؟ بالکل نئیں! پر اوہناں دے ایس غلط قدم* دی وجہ توں دُوجیاں قوماں نُوں نجات پان دا موقع ملیا جنہوں ویکھ کے اِسرائیلی حسد کرن لگ پئے۔ 12 اوہناں دے غلط قدم چُکن دی وجہ توں دُنیا دے لوکاں نُوں برکتاں ملیاں تے چُنے ہوئے* لوکاں چوں اوہناں دی تعداد گھٹن دی وجہ توں دُوجیاں قوماں نُوں ہور برکتاں ملیاں۔ سوچو کہ جدوں چُنے ہوئے لوکاں دی تعداد مکمل ہو جائے گی تے اوہدوں لوکاں نُوں کِنّیاں زیادہ برکتاں مِلن گیاں۔
13 ہُن مَیں تواڈے وچوں غیریہودیاں نال گل کرنا چاہنا واں کیونکہ مینوں رسول بنا کے غیریہودیاں کول گھلیا گیا اے تے مَیں ایس خدمت دی بڑی قدر* کرنا واں۔ 14 مَیں چاہنا واں کہ جدوں میری قوم دے لوک ویکھن کہ توانوں نجات دا پیغام ملیا اے تے اوہناں چ حسد پیدا ہوئے تے اوہناں چوں کجھ نجات پان۔ 15 جدوں خدا نے یہودیاں نُوں چھڈ دِتا تے دُوجیاں قوماں نُوں خدا نال صلح کرن دا موقع ملیا۔ ہُن سوچو کہ جے خدا کجھ یہودیاں نُوں فیر توں قبول کر لوے* تے ایہہ اِنج ہوئے گا جیویں اوہ مُردیاں چوں زندہ ہو گئے نیں۔ 16 ایہدے علاوہ جے آٹے دا اوہ حصہ پاک اے جیہڑا پہلے پھل دے طور تے لیا گیا اے تے فیر باقی سارا آٹا وی پاک اے۔ نالے جے اِک درخت دی جڑ پاک اے تے فیر اوہدیاں ٹاہنیاں وی پاک نیں۔
17 پر درخت دِیاں کجھ ٹاہنیاں نُوں توڑ دِتا گیا تے اوہناں دی جگہ درخت نال توانوں جوڑیا گیا بھانویں کہ تُسی جنگلی زیتون دِیاں ٹاہنیاں سو۔ اِنج باقی ٹاہنیاں وانگوں تُسی وی زیتون دے درخت دی جڑ توں خوراک حاصل کرن لگ پئے تے ودھے پُھلے۔ 18 پر اپنے آپ نُوں اوہناں ٹاہنیاں توں بہتر نہ سمجھو جنہاں نُوں توڑ دِتا گیا اے۔ جے تُسی اِنج سوچدے او تے یاد رکھو کہ تُسی جڑ نُوں نئیں سنبھالیا ہویا سگوں جڑ نے توانوں سنبھالیا ہویا اے۔ 19 تُسی شاید کہوو: ”ٹاہنیاں نُوں تے ایسے لئی توڑیا گیا سی تاکہ مینوں درخت نال جوڑیا جا سکے۔“ 20 ایہہ سچ اے کہ اوہناں نُوں توڑیا گیا کیونکہ اوہ ایمان نئیں رکھدے سن تے تُسی ایس لئی جُڑے ہوئے او کیونکہ تُسی ایمان تے قائم او۔ پر غرور نہ کرو سگوں خدا دا خوف کرو 21 کیونکہ جے خدا اصلی ٹاہنیاں نُوں توڑ سکدا اے تے اوہ جنگلی ٹاہنیاں یعنی توانوں وی توڑ سکدا اے۔ 22 یاد رکھو خدا مہربان وی اے تے سزا وی دیندا اے۔ خدا نے اوہناں نُوں سزا دِتی جنہاں نے ٹھوکر کھادی تے ایمان نئیں لیائے۔ پر خدا نے تواڈے تے مہربانی کیتی۔ جے تُسی اوہدی مہربانی دے لائق رہوو گے تے فیر اوہ تواڈے تے مہربانی کردا رہوے گا۔ پر جے نئیں تے فیر توانوں وی توڑ دِتا جائے گا۔ 23 پر جے یہودی ایمان لیان گے تے اوہناں نُوں درخت نال فیر توں جوڑیا جائے گا کیونکہ خدا اوہناں نُوں فیر توں جوڑ سکدا اے۔ 24 تُسی جنگلی زیتون دِیاں ٹاہنیاں سو۔ پر خدا نے توانوں لاہ کے اوس زیتون دے درخت نال جوڑ دِتا جیہڑا باغ چ ہوندا اے بھانویں کہ عام طور تے اِنج نئیں کیتا جاندا۔ جے خدا ایہہ کر سکدا اے تے اوہ اصلی ٹاہنیاں نُوں زیتون دے درخت نال دُبارہ اسانی نال جوڑ وی سکدا اے۔
25 بھراوو، مَیں چاہنا واں کہ تُسی اپنیاں نظراں چ سمجھدار نہ بنو سگوں ایس مُقدس راز نُوں جان لوو: اِسرائیل دے کجھ لوک اوہدوں تک سُنن توں اِنکار کرن گے* جدوں تک غیریہودیاں دی پوری تعداد جمع نئیں ہو جاندی۔ 26 اِنج سارا اِسرائیل* نجات پائے گا جیویں کہ پاک کلام چ لکھیا اے: ”نجاتدہندہ صِیّون توں آئے گا تے یعقوب دی اولاد نُوں بھیڑے کماں توں موڑے گا۔ 27 جدوں مَیں اوہناں دے گُناہ معاف کراں گا تے اوہدوں مَیں اوہناں نال ایہہ عہد بنھاں گا۔“ 28 ایہہ سچ اے کہ کجھ اِسرائیلیاں نے خوشخبری نُوں قبول نئیں کیتا تے خدا دے دُشمن بن گئے جدے توں توانوں فائدہ ہویا۔ پر خدا نے اوہناں دے پیو دادیاں نال وعدہ کیتا سی۔ ایس لئی اوہنے اوہناں وچوں کجھ نُوں اپنا دوست چُنیا۔ 29 خدا ایس گلوں نئیں پچھتائے گا کہ اوہنے نعمتاں دِتیاں تے چُنے ہوئے لوکاں نُوں بلایا۔ 30 تُسی پہلاں خدا دے نافرمان سو، پر یہودیاں دی نافرمانی دی وجہ توں ہُن تواڈے تے رحم کیتا گیا اے۔ 31 جے خدا نے یہودیاں دی نافرمانی دی وجہ توں تواڈے تے رحم کیتا تے فیر اوہ اوہناں تے وی رحم کر سکدا اے۔ 32 خدا نے سارے لوکاں نُوں نافرمانی دے غلام بنن دِتا تاکہ اوہ ساریاں تے رحم کر سکے۔
33 واہ، خدا دِیاں برکتاں کِنّیاں بےشمار نیں! اوہدے علم تے حکمت دی کوئی حد نئیں۔ اوہدے فیصلیاں نُوں پوری طرحاں سمجھنا کسے دے وَس دی گل نئیں تے نہ ای کوئی اوہدیاں ساریاں راہواں* نُوں جان سکدا اے۔ 34 جیویں کہ پاک کلام چ لکھیا اے: ”کون یہوواہ دی سوچ نُوں جان سکدا اے یاں اوہنوں مشورہ دے سکدا اے؟“ 35 یاں ”کون اے جنہے خدا نُوں کجھ دِتا اے جیہڑا خدا اوہنوں واپس کرے؟“ 36 کیونکہ ساریاں چیزاں اوہدے وَلّوں نیں، اوہدے ذریعے ای وجود چ آئیاں نیں تے اوہدے لئی نیں۔ اوہدی وڈیائی ہمیشاں ہمیشاں تک ہوندی رہوے۔ آمین۔