کُرنتھیوں دے ناں پہلا خط
7 ہُن مَیں اوہناں سوالاں دے جواب دینا چاہنا واں جیہڑے تُسی خط لکھ کے مینوں پچھے سن۔ چنگا ہوئے گا کہ اِک آدمی کنوارا رہوے۔ * 2 پر جنسیبدکاری* کرنا بوہت عام ہو گیا اے۔ ایس لئی چنگا اے کہ ہر آدمی دی اپنی بیوی ہوئے تے ہر عورت دا اپنا شوہر ہوئے۔ 3 شوہر اپنی بیوی دا حق پورا کرے* تے بیوی اپنے شوہر دا۔ 4 بیوی دا اپنے جسم تے حق نئیں سگوں اوہدے شوہر دا اے۔ ایسے طرحاں شوہر دا اپنے جسم تے حق نئیں سگوں اوہدی بیوی دا اے۔ 5 اِک دُوجے دا حق ضرور پورا کرو۔ پر جے تُسی کجھ دیر لئی ملاپ نہ کرن دا فیصلہ کردے او تاکہ تُسی دُعا کرن لئی وقت کڈھ سکو تے ایہدے چ دونواں دی رضامندی ہونی چاہی دی اے۔ پر بعد چوں توانوں دونواں نُوں دُبارہ کٹھے ہو جانا چاہی دا اے تاکہ ایہہ نہ ہوئے کہ شیطان توانوں اَزمائے تے تُسی اپنے آپ تے قابو نہ رکھن دی وجہ توں بےوفائی کر بیٹھو۔ 6 میری ایہہ گل کوئی حکم نئیں سگوں مشورہ اے۔* 7 مَیں تے چاہنا واں کہ سارے لوک میرے وانگوں غیرشادیشُدہ رہن۔* پر ساریاں نُوں خدا وَلّوں نعمت* ملی اے، کجھ نُوں شادی کرن دی نعمت تے کجھ نُوں کنوارے رہن دی نعمت۔
8 مَیں غیرشادیشُدہ لوکاں* تے بیوہ عورتاں نُوں کہنا واں کہ بہتر اے کہ اوہ میرے وانگوں غیرشادیشُدہ رہن۔ 9 پر جے اوہ اپنے اُتے قابو نئیں رکھ سکدے تے فیر اوہ شادی کر لین کیونکہ شادی کرنا جنسی خواہشاں دا غلام بنن توں بہتر اے۔*
10 مَیں شادیشُدہ لوکاں نُوں مالک وَلّوں ایہہ ہدیت دینا واں: اِک بیوی اپنے شوہر نُوں چھڈ کے نہ جائے۔ 11 پر جے اوہ اپنے شوہر نُوں چھڈ دیندی اے تے فیر دُوجی شادی نہ کرے سگوں اپنے شوہر نال صلح کر لوے۔ نالے شوہر وی اپنی بیوی نُوں نہ چھڈے۔
12 پر باقی لوکاں نُوں مالک نئیں سگوں مَیں کہنا واں: جے اِک بھرا دی بیوی اوہدی ہمایمان نئیں اے پر اوہدے نال رہن تے راضی اے تے اوہ اپنی بیوی نُوں نہ چھڈے۔ 13 ایسے طرحاں جے اِک بھین دا شوہر اوہدا ہمایمان نئیں اے پر اوہدے نال رہن تے راضی اے تے اوہ اپنے شوہر نُوں نہ چھڈے۔ 14 بھانویں کہ اِک مسیحی دا جیون ساتھی غیرایمان اے پر اوس مسیحی دی وجہ توں اوہناں دا رشتہ خدا دی نظر چ پاک اے۔* جے اِنج نہ ہوندا تے اوہناں دے بچے ناپاک ہوندے پر ہُن اوہ پاک نیں۔ 15 جے غیرایمان جیون ساتھی توانوں چھڈ کے جان دا فیصلہ کردا اے تے اوہنوں جان دَوو۔ جے اِنج ہوندا اے تے اِک مسیحی لئی اوہدے نال رہنا لازمی نئیں اے۔ خدا چاہندا اے کہ تُسی صلحپسند ہووو۔* 16 بیویو تے شوہرو، جے تُسی اپنے غیرایمان جیون ساتھی نال رہوو گے تے کیہہ پتہ اوہ مسیحی بن جائے تے نجات پا لوے۔
17 ہر کوئی اوسے حال چ زندگی گزاردا رہوے جیس حال چ یہوواہ خدا نے اوہنوں بلایا سی۔* ساریاں کلیسیاواں لئی میری ایہی ہدیت اے۔ 18 جے اِک بندے نُوں اوہدوں بلایا گیا* سی جدوں اوہدا ختنہ ہویا سی تے اوہ اوسے طرحاں رہوے تے جے اِک بندے نُوں اوہدوں بلایا گیا سی جدوں اوہدا ختنہ نئیں ہویا سی تے اوہ ختنہ نہ کرائے۔ 19 اہم ایہہ نئیں کہ کسے نے ختنہ کرایا اے یاں نئیں سگوں اہم گل ایہہ وے کہ اِک بندہ خدا دے حکماں تے عمل کرے۔ 20 ہر کوئی اوسے حال چ رہوے جدے چ اوہنوں بلایا گیا سی۔ 21 جے توانوں اوہدوں بلایا گیا سی جدوں تُسی کسے دے غلام سو تے پریشان نہ ہووو۔ پر جے توانوں آزاد ہون دا موقع ملے تے ضرور ہووو۔ 22 جے اِک بندہ اوہدوں غلام سی جدوں مالک نے اوہنوں بلایا سی تے اوہ مالک دا شاگرد بن کے آزاد ہو گیا اے۔ ایسے طرحاں جے اِک بندہ اوہدوں آزاد سی جدوں اوہنوں بلایا گیا سی تے اوہ مسیح دا غلام بن گیا اے۔ 23 توانوں وڈی قیمت دے کے خریدیا گیا اے۔ ایس لئی انساناں دی غلامی کرنا چھڈ دَوو۔ 24 بھراوو، توانوں جیہڑے وی حال چ بلایا گیا سی، تُسی خدا دے حضور اوسے حال چ رہوو۔
25 جتھوں تک کنوارے لوکاں دی گل اے، اوہناں بارے مینوں مالک وَلّوں کوئی ہدیت نئیں ملی۔ پر مالک دا وفادار خادم ہون دے ناتے میرے تے رحم کیتا گیا۔ ایس لئی مَیں دَسنا چاہنا واں کہ 26 مینوں لگدا اے کہ ایس مشکل دَور چ اِک بندے نُوں اوسے حال چ* رہنا چاہی دا اے جدے چ اوہ ہے وے۔ 27 جے تُوں شادیشُدہ ایں تے اپنی بیوی نُوں چھڈن دی کوشش نہ کر۔ جے تُوں غیرشادیشُدہ ایں تے فیر بیوی لبھن دی کوشش نہ کر۔ 28 پر شادی کرنا کوئی گُناہ نئیں اے۔ جے کنوارا بندہ شادی کر وی لیندا اے تے اوہ کوئی گُناہ نئیں کردا۔ پر جیہڑے لوک شادی کردے نیں، اوہناں نُوں مشکلاں دا سامنا کرنا پووے گا تے مَیں توانوں ایہناں مشکلاں توں بچانا چاہنا واں۔
29 بھراوو، مَیں توانوں ایہہ سمجھانا چاہنا واں کہ ہُن تھوڑا ای وقت رہ گیا اے۔ ایس لئی جیس آدمی دی شادی ہوئی اے، اوہ اِنج زندگی گزارے جیویں کہ اوہدی شادی نئیں ہوئی۔ 30 نالے جیہڑے رو رہے نیں، اوہ اوہناں وانگوں ہون جیہڑے نئیں روندے تے جیہڑے خوشی مناندے نیں، اوہ اوہناں وانگوں ہون جیہڑے خوشی نئیں مناندے۔ جیہڑے چیزاں خریددے نیں، اوہ اوہناں وانگوں ہون جنہاں کول کجھ نئیں۔ 31 جیہڑے ایس دُنیا دِیاں چیزاں دا فائدہ چُکدے نیں، اوہ ایس دُنیا دے کماں چ مگن نہ ہو جان کیونکہ دُنیا دے حالات* بدلدے جا رہے نیں۔ 32 مَیں توانوں ایہہ گلاں ایس لئی دَس رہیا واں تاکہ تُسی پریشانیاں توں بچ سکو۔ غیرشادیشُدہ بندے نُوں مالک دے کماں دی فکر رہندی اے کہ اوہ اوہنوں کیویں خوش کرے۔ 33 پر شادیشُدہ بندے نُوں دُنیا دے معاملیاں* دی فکر رہندی اے کیونکہ اوہ اپنی بیوی نُوں خوش کرنا چاہندا اے۔ 34 ایس لئی اوہدا دھیان کسے اِک پاسے نئیں ہوندا۔ ایہدے علاوہ اِک غیرشادیشُدہ عورت تے کنواری عورت نُوں ساڈے مالک دے کماں دی فکر رہندی اے تے اوہ چاہندی اے کہ اوہدا جسم تے سوچ پاک رہوے۔ پر شادیشُدہ عورت نُوں ایس دُنیا دے معاملیاں دی فکر رہندی اے کیونکہ اوہ اپنے شوہر نُوں خوش کرنا چاہندی اے۔ 35 مَیں ایہہ گلاں تواڈے تے پابندی لان لئی نئیں سگوں تواڈے فائدے لئی کہہ رہیا واں۔ مَیں چاہنا واں کہ تُسی صحی کم کرو تے تواڈا پورا دھیان مالک دی خدمت تے رہوے۔
36 جے اِک بندے نُوں لگدا اے کہ اوہ کنوارا نئیں رہ سکدا* تے اوہدی اوہ عمر وی لنگھ گئی اے جدوں جوانی دِیاں خواہشاں زوراں تے ہوندیاں نیں تے اوہ چاہوے تے شادی کر سکدا اے۔ اِنج کر کے اوہ کوئی گُناہ نئیں کرے گا۔ 37 پر شاید اِک بندے نُوں شادی کرن دی ضرورت محسوس نئیں ہوندی۔ جے اوہنے پکا ارادہ کر لیا اے تے اوہ اپنے فیصلے تے قائم اے، نالے اوہ اپنیاں خواہشاں تے وی قابو رکھ سکدا اے تے فیر چنگا اے کہ اوہ شادی نہ کرے۔ 38 جیہڑا بندہ شادی کردا اے، اوہ چنگا فیصلہ کردا اے۔ پر جیہڑا شادی نئیں کردا، اوہ اوس توں وی چنگا فیصلہ کردا اے۔
39 اِک عورت نُوں زندگی بھر اپنے شوہر دا وفادار رہنا چاہی دا اے۔ پر جے اوہدا شوہر مر جائے تے اوہ کسے نال وی شادی کر سکدی اے۔ پر ضروری اے کہ اوہ مالک دا شاگرد ہووے۔ 40 میرے خیال چ جے اوہ شادی نئیں کرے گی تے اوہ زیادہ خوش رہوے گی۔ مَیں ایہہ گلاں ایس لئی کہہ رہیا واں کیونکہ مینوں یقین اے کہ خدا دی پاک روح میری رہنمائی کردی اے۔