کُرنتھیوں دے ناں دُوجا خط
2 مَیں فیصلہ کر لیا اے کہ مَیں اگلی وار تواڈے کول آ کے توانوں دُکھی نئیں کراں گا۔ 2 جے مَیں توانوں دُکھی کر دِتا تے مَیں وی دُکھی ہو جاواں گا۔ جے اِنج ہویا تے فیر تواڈے علاوہ مینوں کوئی خوش نئیں کر سکے گا۔ 3 پہلاں مَیں توانوں خط ایس لئی لکھیا سی تاکہ جدوں مَیں آواں تے مَیں تواڈی وجہ توں دُکھی نہ ہوواں سگوں خوش ہوواں کیونکہ مینوں پورا یقین اے کہ جنہاں گلاں توں مینوں خوشی ہوندی اے، اوہناں ای گلاں توں توانوں ساریاں نُوں وی خوشی ہوندی اے۔ 4 توانوں اوہ خط لکھدے ویلے مَیں بڑا دُکھی تے پریشان ساں تے مینوں رونا آ رہیا سی۔ پر مَیں توانوں دُکھی نئیں کرنا چاہنا ساں سگوں مَیں چاہنا ساں کہ تُسی سمجھ جاؤ کہ میرے دل چ تواڈے لئی کِنّی زیادہ محبت اے۔
5 جیس بندے* نے دُکھی کیتا اے، اوہنے صرف مینوں ای نئیں سگوں کسے نہ کسے طرحاں توانوں ساریاں نُوں وی دُکھی کیتا اے۔ پر مَیں ایس معاملے بارے زیادہ سختی نال گل نئیں کرنا چاہندا۔ 6 تُسی* اوہنوں جیہڑی سزا* دِتی اے، اوہ کافی اے۔ 7 ہُن تُسی اوہنوں دِلوں معاف کر دَوو تے اوہنوں تسلی دَوو تاکہ اوہ دُکھ دے بوجھ تھلے دَب نہ جائے۔ 8 ایس لئی مَیں توانوں نصیحت کرنا واں کہ اوہنوں اپنے پیار دا یقین دَواؤ۔ 9 مَیں ایس لئی وی خط لکھیا سی تاکہ مَیں ویکھ سکاں کہ تُسی ہر معاملے چ فرمانبرداری کردے او یاں نئیں۔ 10 جے تُسی کسے نُوں معاف کردے او تے فیر مَیں وی اوہنوں معاف کرنا واں۔ اصل چ مسیح ایس گل دا گواہ اے کہ مَیں جدوں وی کسے دی غلطی معاف کیتی اے تے اوہ تواڈے فائدے لئی کیتی اے۔ 11 دُوجیاں نُوں معاف کرنا ایس لئی ضروری اے تاکہ شیطان ساڈے تے حاوی نہ ہو جائے* کیونکہ اَسی اوہدیاں چالاں* توں بےخبر نئیں آں۔
12 جدوں مَیں مسیح بارے خوشخبری سُنان لئی تروآس پونچیا تے اوتھے مینوں ودھ چڑھ کے مالک دی خدمت کرن دا موقع ملیا۔* 13 پر مَیں بوہت بےچین ساں کیونکہ مَیں اوتھے اپنے بھرا طِطُس نُوں نئیں مِل سکیا۔ ایس لئی مَیں اوتھوں دے بھراواں نُوں خداحافظ کہیا تے مقدونیہ چلا گیا۔
14 خدا دا شکر اے کہ اوہنے مسیح دے نال نال سانوں وی فتح دے جلوس* چ شامل کیتا اے تے ہمیشاں ایس جلوس چ ساڈے اَگے اَگے چلدا اے۔ اوہدا علم اِک ایہو جہی خوشبو اے جیہڑی اوہ ساڈے ذریعے ہر پاسے پھیلاندا اے۔ 15 جدوں اَسی مسیح بارے خوشخبری سُنانے آں تے اَسی خدا دے حضور خوشبو وانگوں ہُنے آں۔ ایہہ خوشبو سارے لوکاں چ پھیلی ہوئی اے فیر بھانویں اوہ نجات دی راہ تے چل رہے ہون یاں تباہی دی راہ تے۔ 16 تباہی دی راہ تے چلن والیاں لئی خوشخبری دا پیغام موت دی بو اے کیونکہ اوہناں دا انجام موت ہوئے گا۔ پر نجات دی راہ تے چلن والیاں لئی ایہہ پیغام زندگی دی خوشبو اے کیونکہ اوہناں دا انعام زندگی ہوئے گا۔ ایہہ پیغام سُنان دے لائق کون اے؟ 17 اَسی آں کیونکہ اَسی خدا دے کلام نُوں کمائی دا ذریعہ نئیں بناندے جیویں کہ بوہت سارے لوک کردے نیں سگوں اَسی مسیح نال مِل کے صافدلی نال خوشخبری سُنانے آں۔اَسی خدا دے حضور ایہہ کم کرنے آں جنہے سانوں گھلیا اے۔