کُرنتھیوں دے ناں دُوجا خط
9 مینوں خط لکھ کے توانوں ایہہ دَسن دی ضرورت نئیں اے کہ تُسی مُقدس لوکاں لئی عطیات دَوو 2 کیونکہ مینوں پتہ اے کہ تُسی اوہناں دی مدد کرن لئی تیار او۔ مَیں مقدونیہ دے بھراواں نُوں بڑے مان نال دَسنا واں کہ اخیہ دے بھین بھرا یعنی تُسی اِک سال توں عطیات دین لئی تیار او۔ تواڈے جوش نے مقدونیہ دے بوہت سارے بھین بھراواں نُوں وی جوش نال بھر دِتا اے۔ 3 پر ہُن مَیں بھراواں* نُوں تواڈے کول گھل رہیا واں تاکہ تُسی مدد کرن لئی پوری طرحاں تیار ہو جاؤ تے ایہہ ثابت ہو جائے کہ اَسی اوہناں نُوں تواڈے بارے جیہڑیاں گلاں دَسیاں نیں، اوہ سچ نیں۔ 4 مَیں نئیں چاہندا کہ جدوں مقدونیہ دے بھرا میرے نال آن تے تُسی تیار نہ ہووو۔ اِنج نہ صرف سانوں سگوں توانوں وی شرمندہ ہونا پووے گا کیونکہ اَسی تواڈی بڑی تعریف کیتی اے۔ 5 ایس لئی مَیں ضروری سمجھیا کہ ساڈے آن توں پہلاں کجھ بھراواں نُوں تواڈے کول گھلاں تاکہ اوہ اوہناں عطیات نُوں جمع کر لین جیہڑے تُسی کُھلے دل نال دین دا وعدہ کیتا سی۔ فیر جدوں اَسی اوتھے آواں گے تے ایہہ ثابت ہو جائے گا کہ تُسی ایہہ عطیات مجبوری نال نئیں سگوں خوشی نال دِتے نیں۔
6 یاد رکھو، جیہڑا بندہ کنجوسی نال بیہہ بوندا اے، اوہ تھوڑی فصل وڈھے گا۔ پر جیہڑا بندہ کُھلے دل نال بیہہ بوندا اے، اوہ بوہتی فصل وڈھے گا۔ 7 ہر کوئی اوناں ای کرے جِنّاں اوہنے اپنے دل چ طے کیتا اے نہ کہ بےدلی یاں مجبوری نال کیونکہ خدا خوشی نال دین والے نُوں پسند کردا اے۔
8 ایہہ وی یاد رکھو کہ خدا تواڈے تے ہور وی زیادہ عظیم رحمت کر سکدا اے تاکہ تواڈے کول ہمیشاں اپنی ہر ضرورت نُوں پورا کرن لئی سب کجھ ہووے تے تواڈے کول چنگے کم کرن لئی بوہت کجھ ہووے۔ 9 (جیویں پاک کلام چ لکھیا اے: ”اوہنے* دل کھول کے وَنڈیا اے تے غریباں نُوں دِتا اے۔ اوہدے نیک کماں نُوں ہمیشاں یاد رکھیا جائے گا۔“ 10 خدا جیہڑا کُھلے دل نال کسان نُوں بیہہ تے لوکاں نُوں روٹی دیندا اے، اوہ توانوں وی بون لئی بیہہ دَوے گا سگوں دل کھول کے دَوے گا۔ اوہ توانوں تواڈے نیک کماں دا بوہت سارا پھل دَوے گا۔) 11 خدا تواڈے تے بےشمار برکتاں وَرساندا اے تاکہ تُسی وی ہر موقعے تے دُوجیاں نُوں دل کھول کے دَوو۔ فیر لوک تواڈی مدد لئی خدا دا شکر کرن گے۔ 12 اصل چ دُوجیاں دی مدد کرن دے ایس بندوبست توں نہ صرف مُقدس لوکاں دِیاں ضرورتاں چنگی طرحاں پوریاں ہون گیاں سگوں لوک خدا دا لکھ لکھ شکر وی کرن گے۔ 13 تواڈے عطیات* ایس گل دا ثبوت نیں کہ تُسی مسیح بارے خوشخبری صرف سُناندے ای نئیں سگوں ایہدے مطابق زندگی وی گزاردے او۔ تُسی نہ صرف مُقدس لوکاں نُوں سگوں ساریاں نُوں دل کھول کے دیندے او۔ تواڈے ایہہ سارے کم ویکھ کے اوہ خدا دی وڈیائی کردے نیں۔ 14 اوہ تواڈے لئی دُعا کر کے تواڈے لئی اپنا پیار ظاہر کردے نیں کیونکہ خدا نے دل کھول کے تواڈے اُتے عظیم رحمت کیتی اے۔
15 آؤ، خدا دی اوس انمول نعمت لئی اوہدا شکر کردے رہیے جنہوں لفظاں چ بیان نئیں کیتا جا سکدا۔