تیمُتھیُس دے ناں دُوجا خط

2 ایس لئی میرے پُتر، خدا کولوں طاقت منگدا رہ جیہڑی اوہ مسیح یسوع دی عظیم رحمت دے ذریعے دیندا اے۔ 2 نالے جیہڑیاں گلاں مَیں تینوں سکھائیاں نیں، اوہناں دی سچائی بارے بوہت سارے لوکاں نے گواہی دِتی اے۔ تُوں اوہ گلاں وفادار بھراواں نُوں سکھا تاکہ اَگوں اوہ وی دُوجیاں نُوں چنگی طرحاں تلیم دین دے لائق ہون۔ 3 تُوں مسیح یسوع دا چنگا فوجی ہون دے ناتے مصیبتاں سہن لئی تیار رہ۔ 4 کوئی وی فوجی کاروباری معاملیاں*‏ چ نئیں پیندا*‏ کیونکہ اوہ اوس بندے نُوں خوش کرنا چاہندا اے جنہے اوہنوں بھرتی کیتا اے۔ 5 نالے کسے مقابلے وچ اوسے کھیڈاری نُوں انعام مِلدا اے جیہڑا اصولاں مطابق کھیڈدا اے۔ 6 نالے جیہڑا کسان محنت کردا اے، اوہنوں فصل دا پہلا حصہ مِلدا اے۔ 7 میریاں گلاں تے سوچ‌وچار کردا رہ، فیر مالک تینوں ساریاں گلاں دی سمجھ بخشے گا۔‏

8 یاد رکھ کہ یسوع مسیح مُردیاں چوں جی اُٹھیا تے اوہ داؤد دی نسل چوں سی۔ ایہی اوہ خوش‌خبری اے جدی مَیں مُنادی کرنا واں 9 تے جدی وجہ توں مَیں ظلم سہہ رہیا واں تے اِک مُجرم وانگوں قید آں۔ پر خدا دے کلام نُوں قید نئیں کیتا جا سکدا۔ 10 ایس لئی مَیں خدا دے چُنے ہوئے لوکاں دی خاطر صبر نال سب کجھ سہہ رہیا واں تاکہ اوہ وی مسیح یسوع دے ذریعے نجات تے ابدی شان حاصل کر سکن۔ 11 ایہہ گل سچی اے کہ جے اَسی اوہدے نال مراں گے*‏ تے اَسی اوہدے نال جیاں گے وی۔ 12 جے اَسی صبر نال مصیبتاں سہندے رہواں گے تے اَسی بادشاہواں دے طور تے اوہدے نال حکمرانی کراں گے۔ جے اَسی اوہنوں جانن توں اِنکار کراں گے تے اوہ وی سانوں جانن توں اِنکار کرے گا۔ 13 بھانویں اَسی بے‌وفائی کریئے، پر اوہ وفادار رہوے گا کیونکہ اوہ اپنی گل تے قائم رہندا اے۔‏*‏

14 اوہناں نُوں ایہہ گلاں یاد دَواندا رہ تے خدا دے حضور ہدیت دے*‏ کہ اوہ لفظاں بارے بحث نہ کرن کیونکہ ایہدا کوئی فائدہ نئیں ہوندا سگوں ایہدے توں سُنن والیاں نُوں نقصان*‏ ہوندا اے۔ 15 خدا نُوں خوش کرن دی پوری کوشش کر تے اوہدے حضور اِک ایہو جیہا خادم بن جنہوں اپنے کماں دی وجہ توں شرمندہ نہ ہونا پووے تے جیہڑا سچائی دا کلام چنگی طرحاں سکھاندا تے سمجھاندا ہووے۔ 16 اوہناں فضول گلاں نُوں ردّ کر جنہاں توں خدا دی بدنامی ہوندی اے کیونکہ اوہناں دی وجہ توں لوکاں چ بُرائی ودھے گی۔ 17 اوہ گلاں اِنج پھیلن گیاں جیویں جسم چ زہر*‏ پھیلدا اے۔ ہِمنیُس تے فلیتُس اوہناں لوکاں چوں نیں جیہڑے ایہو جہیاں فضول گلاں پھیلاندے نیں۔ 18 اوہ سچائی دی راہ توں بھٹک گئے نیں تے دُوجیاں دے ایمان نُوں وی تباہ کر رہے نیں کیونکہ اوہ کہندے نیں کہ مُردے زندہ ہو گئے نیں۔ 19 پر ایہدے باوجود خدا نے جیہڑی پکی نِیہہ رکھی اے، اوہ قائم رہندی اے تے ایہدے تے ایہہ مُہر لگی ہوئی اے:‏ ”‏یہوواہ اوہناں نُوں جان دا اے جیہڑے اوہدے اپنے نیں“‏ تے ”‏یہوواہ دا ناں لین والا ہر انسان بُرائی توں دُور رہوے۔“‏

20 اِک وڈے گھر چ صرف سونے تے چاندی دے ای بھانڈے*‏ نئیں ہوندے سگوں لکڑی تے مٹی دے وی ہوندے نیں۔ کجھ بھانڈے خاص کماں لئی استمال ہوندے نیں جد کہ کجھ معمولی کماں لئی۔ 21 جے کوئی اوہناں لوکاں توں دُور رہوے گا جیہڑے معمولی بھانڈیاں ورگے نیں تے اوہ آپ اِک خاص بھانڈے ورگا ہوئے گا۔ اوہ پاک ہوئے گا، اپنے مالک دے کم آئے گا تے ہر چنگے کم لئی تیار ہوئے گا۔ 22 ایس لئی جوانی دِیاں خواہشاں توں دُور بھج تے اپنے اندر نیکی، ایمان، محبت تے صلح نُوں ودھان دی جی‌توڑ کوشش کر۔ نالے اوہناں لوکاں نال چلدا رہ جیہڑے صاف‌دل نال ساڈے مالک دا ناں لیندے نیں۔‏

23 ایہدے علاوہ بے‌وقوف لوکاں نال فضول گلاں تے بحث چ نہ پے کیونکہ ایہدے توں لڑائی جھگڑا ہوندا اے۔ 24 پر مالک دے غلام نُوں لڑائی جھگڑا نئیں کرنا چاہی دا سگوں اوہنوں ساریاں نال نرمی*‏ نال پیش آنا چاہی دا اے، تلیم دین دے لائق ہونا چاہی دا اے تے اوہدوں وی اپنے اُتے قابو رکھنا چاہی دا اے جدوں اوہدے نال بھیڑا سلوک ہوندا اے۔ 25 اوہنوں باغی لوکاں نُوں نرمی نال سکھانا چاہی دا اے۔ ہو سکدا اے کہ خدا اوہناں لوکاں نُوں توبہ کرن دا*‏ موقع دَوے تاکہ اوہ سچائی بارے صحی علم حاصل کرن 26 تے اوہناں نُوں اپنی غلطی دا احساس ہوئے۔ اِنج اوہ اِبلیس دے پھندے چوں نکل سکدے نیں جنہے اوہناں نُوں اپنی مرضی تے چلن لئی پھسایا ہویا اے۔‏