کُرنتھیوں دے ناں پہلا خط

8 ہُن مَیں اوہناں کھان دِیاں چیزاں*‏ بارے گل کرنا چاہنا واں جیہڑیاں بُتاں اَگے چڑھائیاں جاندیاں نیں۔ ساڈے ساریاں کول ایس معاملے بارے علم ہے وے۔ جے صرف علم ہووے تے غرور پیدا ہوندا اے۔ پر محبت مضبوط بناندی*‏ اے۔ 2 جے اِک بندے نُوں لگدا اے کہ اوہدے کول کسے معاملے بارے بوہتا علم اے تے اصل چ اوہ اوس معاملے نُوں پوری طرحاں نئیں سمجھدا۔ 3 پر جیہڑا بندہ خدا نال محبت کردا اے، خدا اوہنوں جان دا اے۔‏

4 جتھوں تک بُتاں اَگے کھان والیاں چیزاں چڑھان دی گل اے تے سانوں پتہ اے کہ بُت کجھ وی نئیں سگوں صرف اِک ای سچا خدا اے۔ 5 اسمان تے زمین اُتے بوہت ساریاں نُوں خدا منیا جاندا اے تے لوک بتھیریاں نُوں ”‏خدا“‏ تے ”‏مالک“‏ کہندے نیں۔ 6 پر ساڈا اِک ای خدا اے یعنی ساڈا اسمانی باپ جنہے سب کجھ بنایا اے تے جدے لئی اَسی جینے آں۔ نالے ساڈا مالک وی اِکو ای اے یعنی یسوع مسیح جدے ذریعے ساریاں چیزاں بنائیاں گئیاں تے جدے ذریعے سانوں زندگی ملی۔‏

7 پر سارے لوک ایہہ گل نئیں سمجھدے۔ کجھ مسیحی پہلاں بُتاں دی پوجا کردے سن۔ ایس لئی جدوں اوہ کوئی ایہو جہی چیز کھاندے نیں جیہڑی بُتاں اَگے چڑھائی گئی سی تے اوہناں نُوں لگدا اے کہ ایس چیز دا تعلق بُت‌پرستی نال اے۔ ایس وجہ توں اوہناں دا کمزور ضمیر اوہناں نُوں تنگ کردا اے۔ 8 پر کھانا پینا سانوں خدا دے نیڑے نئیں لجاندا۔ جے اَسی کوئی چیز نئیں کھاندے تے سانوں نقصان نئیں ہوئے گا تے جے اَسی کوئی چیز کھانے آں تے سانوں فائدہ نئیں ہوئے گا۔ 9 تواڈے کول فیصلہ کرن دا حق تے ہے وے۔ پر خبردار رہوو کہ ایہدی وجہ توں اوہناں لوکاں نُوں ٹھیس نہ پونچے جنہاں دا ضمیر کمزور اے۔ 10 بھانویں کہ توانوں پتہ اے کہ بُت کجھ وی نئیں پر جے کوئی کمزور ضمیر والا بندہ ویکھے کہ تُسی اِک مندر چ کھانا کھا رہے او تے کیہہ اوہنوں وی اوہ کھانا کھان دی ہلاشیری نئیں ملے گی جیہڑا بُتاں اَگے چڑھایا گیا اے؟ 11 بھانویں کہ توانوں پتہ اے کہ اوہ کھانا کھان چ کوئی حرج نئیں اے پر اِنج تُسی اوس کمزور بندے دا ایمان تباہ کر رہے ہووو گے۔ یاد رکھو کہ اوہ تواڈا بھرا اے جدے لئی مسیح نے جان دِتی اے۔ 12 ایس طرحاں جدوں تُسی اپنے بھراواں دے خلاف گُناہ کردے او تے اوہناں دے کمزور ضمیر نُوں ٹھیس پونچاندے او تے اصل چ تُسی مسیح دے خلاف گُناہ کر رہے ہوندے او۔ 13 ایس لئی جے میرے گوشت کھان نال میرے بھرا دا ایمان کمزور ہو سکدا اے*‏ تے مَیں گوشت کھانا چھڈ دَواں گا۔ مَیں کوئی ایہو جیہا کم نئیں کراں گا جدی وجہ توں میرے بھرا دا ایمان کمزور ہوئے۔‏