کُرنتھیوں دے ناں دُوجا خط

3 کیہہ سانوں فیر توں دَسن دی ضرورت اے کہ اَسی خدا دا کلام سُنان دے لائق کیوں آں؟ کیہہ دُوجے لوکاں وانگوں اَسی وی توانوں سفارشی خط وکھائیے؟ یاں کیہہ سانوں تواڈے وَلّوں سفارشی خطاں دی ضرورت اے؟ 2 نئیں سگوں تُسی آپ ای ساڈا سفارشی خط او جیہڑا ساڈے دِلاں تے لکھیا ہویا اے تے جنہوں سارے لوک جان دے نیں تے پڑھ وی سکدے نیں۔ 3 ایہہ گل صاف ظاہر اے کہ تُسی مسیح وَلّوں خط او جنہوں اَسی اپنی خدمت دے ذریعے سیاہی نال نئیں سگوں زندہ خدا دی پاک روح نال لکھیا اے تے اوہ وی پتھر دِیاں تختیاں اُتے نئیں سگوں دِلاں اُتے۔‏

4 اَسی خدا دے حضور ایہہ گل پورے یقین نال کہہ سکنے آں کہ اَسی مسیح دی مدد نال اوہدی خدمت کرن دے لائق آں۔ 5 پر اَسی ایہہ نئیں کہندے کہ اَسی اپنے آپ ایس خدمت دے لائق بن گئے آں سگوں خدا نے سانوں ایہدے لائق بنایا اے۔ 6 اوہنے ای سانوں ایس لائق بنایا اے کہ اَسی نویں عہد تے پاک روح دے خادم بنئے نہ کہ پتھر تے لکھی شریعت دے کیونکہ شریعت انسان نُوں موت دی سزا دیندی اے پر پاک روح زندگی دیندی اے۔‏

7 پتھر تے لکھی شریعت جدا انجام موت اے، اینے شان‌دار طریقے نال دِتی گئی سی کہ موسیٰ دا چہرہ چمکن لگ پیا تے اِسرائیلی اوہنوں ویکھ نہ سکے پر اوہ شان ختم ہو جانی سی۔ 8 جے اوہ شریعت اینے شان‌دار طریقے نال دِتی گئی سی تے فیر کیہہ ضروری نئیں سی کہ پاک روح اوس توں وی زیادہ شان‌دار طریقے نال دِتی جائے؟ 9 جے انساناں نُوں قصوروار ٹھہران والی شریعت اینی شان‌دار سی تے فیر سوچو کہ انساناں نُوں نیک ٹھہران دا ذریعہ*‏ اوہدے نالوں وی کِنّاں زیادہ شان‌دار ہوئے گا۔ 10 اصل چ شریعت دی شان ختم کر دِتی گئی اے کیونکہ نویں عہد دی شان اوہدے توں کِتے زیادہ اے۔ 11 جے اوہ شریعت اینے شان‌دار طریقے نال دِتی گئی جنہے ختم ہو جانا سی تے فیر اوس نویں عہد دی شان تے کِتے زیادہ اے جنہے قائم رہنا اے۔‏

12 ایس لئی سانوں یقین اے کہ ساڈی امید ضرور پوری ہوئے گی تے ایہی وجہ اے کہ اَسی دلیری نال گل کرنے آں۔ 13 اَسی موسیٰ وانگوں نئیں کردے جیہڑا کپڑے نال اپنا چہرہ ڈھک لیندا سی تاکہ اِسرائیلی شریعت دی شان نہ ویکھن جیہڑی ختم ہو جانی سی۔ 14 پر اصل چ پردہ اوہناں لوکاں دی عقل تے پیا ہویا سی۔‏*‏ اَج وی اوہناں دی عقل تے پردہ پیا ہویا اے تے اوہ شریعت*‏ دِیاں گلاں نُوں نئیں سمجھ سکدے کیونکہ ایہہ پردہ صرف مسیح دی مدد نال ای ہٹ سکدا اے۔ 15 ہاں، اَج وی جدوں موسیٰ دِیاں کتاباں پڑھیاں جاندیاں نیں تے اوہناں دے دِلاں تے پردہ پیا رہندا اے۔ 16 پر جدوں اِک بندہ یہوواہ*‏ خدا وَل آندا اے تے ایہہ پردہ ہٹا دِتا جاندا اے۔ 17 یہوواہ خدا روح*‏ اے تے جِتھے یہوواہ دی روح ہوندی اے، اوتھے آزادی*‏ ہوندی اے۔ 18 ساڈے چہرے ڈھکے نئیں ہوئے سگوں ایہہ ایہو جہے شیشیاں وانگوں نیں جنہاں توں یہوواہ دی شان جھلک دی اے۔ اِنج اَسی بدل کے اوہدے ورگے بن جانے آں تے ساڈی شان ہور وی ودھدی جاندی اے۔ فیر اَسی بالکل اوسے طرحاں دے بن جانے آں جیس طرحاں دا یہوواہ خدا، جیہڑا اِک روح اے، سانوں بنانا چاہندا اے۔‏*‏