متی دی اِنجیل

24 جدوں یسوع ہیکل چوں باہر جا رہیا سی تے اوہدے شاگرد اوہدے کول آ کے اوہنوں ہیکل دے فرق فرق حصے وکھان لگ پئے۔ 2 یسوع نے اوہناں نُوں کہیا:‏ ”‏کیہہ تُسی ایہہ سب کجھ ویکھ کے حیران ہو رہے او؟ مَیں توانوں سچ کہنا واں کہ ایہہ سب کجھ ڈھا دِتا جائے گا۔ ایتھے پتھر اُتے پتھر وی باقی نئیں رہوے گا۔“‏

3 فیر جدوں یسوع زیتون دے پہاڑ اُتے کلّا بیٹھا ہویا سی تے اوہدے شاگرد اوہدے کول آئے تے اوہنوں پچھیا:‏ ”‏سانوں دَس کہ ایہہ سب کجھ کدوں ہوئے گا تے تیری موجودگی* تے دُنیا دے آخری زمانے دی نشانی کیہہ ہوئے گی؟“‏

4 یسوع نے اوہناں نُوں کہیا:‏ ”‏خبردار رہوو کہ کوئی توانوں گمراہ نہ کرے 5 کیونکہ میرے ناں توں بوہت سارے اُٹھن گے تے کہن گے:‏ ”‏مَیں مسیح آں“‏ تے بوہت سارے لوکاں نُوں گمراہ کرن گے۔ 6 تُسی لڑائیاں دا رولا تے لڑائیاں دِیاں خبراں سُنو گے۔ پر ویکھو، گھبرا نہ جانا کیونکہ ایہہ سب کجھ ہونا لازمی اے۔ پر اوس ویلے خاتمہ نئیں آئے گا۔‏

7 اِک قوم دُوجی قوم اُتے تے اِک حکومت دُوجی حکومت اُتے حملہ کرے گی۔ تھاں تھاں کال پین گے تے زلزلے آن گے۔ 8 ایہناں ساریاں گلاں توں تکلیفاں* بس شروع ای ہون گیاں۔‏

9 فیر لوک تواڈے اُتے ظلم کرن گے تے توانوں مار دین گے تے میرے ناں دی وجہ توں ساریاں قوماں تواڈے توں نفرت کرن گیاں۔ 10 نالے بوہت سارے لوک ایمان توں پھر جان گے۔ اوہ اِک دُوجے نُوں دھوکھا دین گے تے اِک دُوجے توں نفرت کرن گے۔ 11 بوہت سارے جھوٹھے نبی اُٹھ کھلون گے تے بتھیریاں نُوں گمراہ کرن گے 12 تے بُرائی دے ودھ جان دی وجہ توں زیادہ‌تر لوکاں دی محبت ٹھنڈی پے جائے گی۔ 13 پر جیہڑا آخر تک اپنے ایمان تے ڈٹیا رہوے گا، اوہ نجات پائے گا۔ 14 نالے بادشاہی دی خوش‌خبری دی مُنادی ساری دُنیا چ کیتی جائے گی تاکہ ساریاں قوماں نُوں گواہی ملے فیر خاتمہ آئے گا۔‏

15 ایس لئی جدوں تُسی تباہی مچان والی گندی چیز نُوں جدا ذکر دانی‌ایل نبی نے کیتا سی پاک جگہ تے کھلوتے ویکھو (‏ایس گل نُوں پڑھن والا اپنی سمجھ استمال کرے)‏، 16 تے فیر جیہڑے یہودیہ چ ہون، اوہ پہاڑاں وَل بھج جان۔ 17 جیہڑا آدمی کوٹھے تے ہوئے، اوہ تھلے آ کے کوئی چیز لین لئی اندر نہ جائے 18 تے جیہڑا آدمی کھیت چ ہوئے، اوہ اپنا چوغہ لین لئی واپس اپنے گھر نہ جائے۔ 19 اوس زمانے دِیاں اوہناں عورتاں تے افسوس جیہڑیاں ماں بنن والیاں ہون گیاں تے جیہڑیاں دودھ پیاندیاں ہون گیاں۔ 20 دُعا کردے رہوو کہ توانوں ٹھنڈ دے موسم چ یاں فیر سبت دے دن بھجنا نہ پووے 21 کیونکہ اوہدوں اینی وڈی مصیبت آئے گی جیہڑی دُنیا دے شروع توں لے کے ہُن تک نہ کدی آئی اے تے نہ ای دُبارہ کدی آئے گی۔ 22 اصل چ جے اوس مصیبت دے دن نہ گھٹائے گئے تے کوئی وی نئیں بچے گا۔ پر خدا چُنے ہوئے لوکاں دی خاطر اوہدے دن گھٹائے گا۔‏

23 فیر جے کوئی توانوں کہوے کہ ”‏ویکھو!‏ مسیح ایتھے وے“‏ یاں ”‏اوتھے وے “‏ تے اوہدا یقین نہ کرنا 24 کیونکہ جھوٹھے مسیح تے جھوٹھے نبی اُٹھ کھلون گے تے وڈے وڈے معجزے تے نشانیاں وکھا کے چُنے ہوئے لوکاں نُوں وی گمراہ کرن دی کوشش کرن گے۔ 25 ویکھو!‏ مَیں توانوں پہلاں ای خبردار کر دِتا اے۔ 26 ایس لئی جے لوک توانوں کہن کہ ”‏ویکھو!‏ اوہ ویرانے چ وے“‏ تے اوتھے نہ جانا تے جے اوہ کہن کہ ”‏ویکھو!‏ اوہ اندر والے کمرے چ وے“‏ تے اوہناں دی گل دا یقین نہ کرنا۔ 27 جیس طرحاں بجلی مشرق چ کڑک دی اے تے مغرب تک پورے اسمان تے نظر آندی اے اوسے طرحاں انسان دے بیٹے دی موجودگی* ہوئے گی۔ 28 چیلاں اوتھے ای کٹھیاں ہوندیاں نیں جِتھے لاش پئی ہوندی اے۔‏

29 اوس زمانے دی مصیبت دے فوراً بعد سورج بجھ جائے گا، چن دی روشنی ختم ہو جائے گی، تارے اسمان توں ڈِگ پین گے تے اسمان دِیاں طاقتاں ہلائیاں جان گیاں۔ 30 فیر انسان دے بیٹے دی نشانی اسمان تے نظر آئے گی تے زمین تے ساریاں قوماں دُکھ دے مارے چھاتی پِٹن گیاں تے انسان دے بیٹے نُوں بدّلاں چ بڑی شان تے اِختیار نال آندیاں ویکھن گیاں۔ 31 اوہدوں اوہ نرسنگے دی اُچی آواز نال اپنے فرشتیاں نُوں بھیجے گا تے فرشتے اسمان دے اِک سِرے توں لے کے دُوجے سِرے تک یعنی چارے پاسیوں اوہدے چُنے ہوئے لوکاں نُوں جمع کرن گے۔‏

32 اِنجیر دے درخت دی مثال توں سکھو، جدوں اوہدیاں ٹاہنیاں نرم ہو جاندیاں نیں تے اوہناں تے پتے نِکلن لگ پیندے نیں تے توانوں پتہ چل جاندا اے کہ گرمی دا موسم نیڑے وے۔ 33 ایسے طرحاں جدوں تُسی ایہہ ساریاں گلاں ہوندیاں ویکھو تے سمجھ جانا کہ انسان دا بیٹا* نیڑے آگیا اے سگوں دروازے تے پونچ گیا اے۔ 34 مَیں توانوں سچ کہنا واں کہ ایہہ پُشت اوہدوں تک ختم نئیں ہوئے گی جدوں تک ایہہ ساریاں گلاں پوریاں نہ ہو جان۔ 35 اسمان تے زمین مٹ جان گے پر میریاں گلاں کدی نئیں مِٹن گیاں۔‏

36 اوس دن یاں گھڑی بارے کوئی نئیں جان دا، نہ اسمان دے فرشتے، نہ پُتر سگوں صرف باپ جان دا اے۔ 37 جیویں نوح دے دِناں چ ہویا سی اونویں ای انسان دے بیٹے دی موجودگی دے دوران ہوئے گا 38 کیونکہ طوفان دے آن توں پہلاں لوک کھاندے پیندے، آدمی ویاہ کردے تے عورتاں ویائیاں جاندیاں سن۔ ایہہ سارے کم اوہدوں تک ہوندے رہے جدوں تک نوح کشتی چ نئیں چلا گیا 39 تے لوکاں نے اوہدوں تک کوئی دھیان نہ دِتا جدوں تک اوہ طوفان چ رُڑھ نئیں گئے۔ انسان دے بیٹے دی موجودگی دے دوران وی اِنج ای ہوئے گا۔ 40 اوہدوں دو آدمی کھیت چ ہون گے، اِک نُوں لے لیا جائے گا تے دُوجے نُوں چھڈ دِتا جائے گا۔ 41 دو عورتاں چکی پی رہیاں ہون گیاں، اِک نُوں لے لیا جائے گا تے دُوجی نُوں چھڈ دِتا جائے گا۔ 42 ایس لئی چوکس رہوو کیونکہ توانوں نئیں پتہ کہ تواڈا مالک کیہڑے دن آئے گا۔‏

43 پر اِک گل یاد رکھو، جے گھر دے مالک نُوں پتہ ہوندا کہ چور رات نُوں کیہڑے ویلے آئے گا تے اوہ جاگدا رہندا تے اپنے گھر ڈاکا نہ پین دیندا۔ 44 ایس لئی تُسی وی ہمیشاں تیار رہوو کیونکہ انسان دا بیٹا اوس گھڑی آئے گا جدے بارے تُسی سوچیا وی نئیں ہوئے گا۔‏

45 اوہ وفادار تے سمجھدار غلام اصل چ کون اے جنہوں اوہدے مالک نے اپنے سارے نوکراں چاکراں دا مختار بنایا اے تاکہ اوہ اوہناں نُوں صحی ویلے تے کھانا دَوے؟ 46 خوش اے اوہ غلام جدا مالک آ کے ویکھے کہ اوہ ایہہ کم کر رہیا اے۔ 47 مَیں توانوں سچ کہنا واں کہ اوہ اوس غلام نُوں اپنی ساری جائیداد دا مختار بنا دَوے گا۔‏

48 پر جے کدی اوہ غلام بُرا بن جائے تے ایہہ سوچن لگ پووے کہ ”‏میرا مالک آن چ دیر لا رہیا اے“‏ 49 تے دُوجے غلاماں نُوں مارنا کُٹنا شروع کر دَوے تے شرابیاں نال کھان پین لگ پووے 50 تے اوہدا مالک اوس دن تے اوس گھڑی آئے گا جدے بارے اوہنے سوچیا وی نئیں ہوئے گا 51 تے اوہ اوہنوں بڑی سخت سزا دَوے گا تے اوہدا اوہ حشر کرے گا جیہڑا پاکھنڈی لوکاں دا ہوندا اے۔ فیر اوہ اپنی ماڑی حالت دی وجہ توں روئے گا تے کچیچیاں وَٹے گا۔“‏