کُرنتھیوں دے ناں پہلا خط
3 بھراوو، مَیں تواڈے نال اوس طرحاں گل نئیں کیتی جیویں پاک روح دی رہنمائی چ چلن والے لوکاں نال کیتی جاندی اے سگوں مینوں تواڈے نال اوس طرحاں گل کرنی پئی جیویں جسمانی سوچ رکھن والے لوکاں نال کیتی جاندی اے کیونکہ مسیح بارے تواڈی سمجھ بچیاں ورگی اے۔ 2 مَیں توانوں اوہ تلیم دِتی جیہڑی دودھ ورگی سی کیونکہ تُسی روٹی ورگی تلیم ہضم کرن دے قابل نئیں سو۔ تُسی تے حالے وی ایہنوں ہضم کرن دے قابل نئیں ہوئے 3 کیونکہ تُسی جسمانی سوچ رکھدے او۔ تُسی اِک دُوجے توں سڑدے او تے جھگڑے کردے او جدے توں پتہ چلدا اے کہ تُسی دُنیا دے لوکاں ورگے کم کردے او۔ 4 جدوں تواڈے چوں اِک کہندا اے کہ ”مَیں پولُس دا شاگرد آں،“ تے دُوجا کہندا اے کہ ”مَیں اپلّوس دا شاگرد آں،“ تے کیہہ تواڈے کم دُنیا دے لوکاں ورگے نئیں؟
5 بھلا اپلّوس کون اے؟ تے پولُس کون اے؟ اَسی تے بس خادم آں جیہڑے مالک دا دِتا ہویا کم کرنے آں تے جنہاں دے ذریعے تُسی ایمان لیائے او۔ 6 مَیں بیہہ بویا، اپلّوس نے پانی دِتا پر ایہنوں ودھان والا خدا اے۔ 7 ایس لئی نہ تے بیہہ بون والا اہم اے تے نہ ای پانی دین والا سگوں اہم تے خدا اے جیہڑا ایہنوں ودھاندا اے۔ 8 بیہہ بون والا تے پانی دین والا مِل کے کم کردے نیں* تے ہر اِک نُوں اپنی محنت دا پھل ملے گا 9 کیونکہ اَسی خدا نال مِل کے کم کرنے آں۔ تُسی خدا دا کھیت او جدے تے اوہ محنت کر رہیا اے۔ نالے اوہ عمارت او جنہوں خدا بنا رہیا اے۔
10 خدا نے میرے تے جیہڑی عظیم رحمت کیتی، اوہدے مطابق مَیں قابل مستری وانگوں اِک بنیاد رکھی تے ہُن کوئی ہور ایہدے اُتے عمارت بنا رہیا اے۔ پر ہر بندہ دھیان رکھے کہ اوہ ایس بنیاد اُتے کیہو جہی عمارت بنا رہیا اے 11 کیونکہ خدا نے جیہڑی بنیاد رکھی اے، اوہ یسوع مسیح اے تے کوئی وی بندہ ایہدی جگہ کوئی ہور بنیاد نئیں رکھ سکدا۔ 12 کجھ لوک ایس بنیاد اُتے سونے، چاندی تے قیمتی پتھراں نال عمارت بناندے نیں جد کہ کجھ لکڑی، گھاہ تے تُوڑی استمال کردے نیں۔ 13 پر اِک دن جدوں ہر اِک دے کم نُوں پَرکھیا جائے گا تے اوہدوں پتہ چل جائے گا کہ کنہے کیہو جہی عمارت بنائی اے۔ اوس دن اَگ* دے ذریعے ظاہر ہوئے گا کہ ہر اِک نے کیہو جیہا کم کیتا اے۔ 14 جیس بندے دی عمارت بنیاد تے قائم رہوے گی، اوہنوں اَجر ملے گا۔ 15 پر جیس بندے دی عمارت سڑ جائے گی، اوہنوں نقصان برداشت کرنا پئے گا۔ پر اوہ آپ بچ جائے گا جیویں کہ اوہ اَگ چوں مساں مساں بچیا ہوئے۔
16 کیہہ توانوں نئیں پتہ کہ تُسی خدا دی ہیکل او تے خدا دی روح تواڈے چ وَسدی اے؟ 17 جے کوئی خدا دی ہیکل نُوں تباہ کرے گا تے خدا اوہنوں تباہ کر دَوے گا کیونکہ خدا دی ہیکل پاک اے تے اوہ ہیکل تُسی او۔
18 کوئی وی اپنے آپ نُوں دھوکھا نہ دَوے۔ جے تواڈے چوں کسے نُوں لگدا اے کہ اوہ ایس دُنیا دی نظر چ سمجھدار اے تے اوہ بےوقوف بنے تاکہ اوہ سچ مچ سمجھدار بن سکے۔ 19 اصل چ ایس دُنیا دی حکمت خدا دی نظر چ بےوقوفی اے کیونکہ پاک کلام چ لکھیا اے: ”اوہ سمجھداراں نُوں اوہناں دی اپنی چالاکی چ پھسا دیندا اے۔“ 20 اِک ہور جگہ لکھیا اے: ”یہوواہ جان دا اے کہ سمجھدار بندیاں دی سوچ بےکار اے۔“ 21 ایس لئی کوئی وی بندہ انساناں دی سمجھداری تے شیخی نہ مارے۔ یاد رکھو، سب کجھ تواڈا ای اے 22 فیر بھانویں اوہ پولُس ہوئے، اپلّوس ہوئے یاں پطرس* یاں دُنیا یاں زندگی یاں موت یاں اوہ چیزاں جیہڑیاں اَج ہے نیں یاں اوہ چیزاں جیہڑیاں آن والیاں نیں۔ سب کجھ تواڈا ای اے 23 تے تُسی مسیح دے او تے مسیح خدا دا اے۔