عبرانیوں دے ناں خط

10 موسیٰ دی شریعت اصلی چیز نئیں اے سگوں آن والیاں چنگیاں چیزاں دا پرچھاواں اے۔ ایس لئی اوہ خدا دی عبادت کرن والے لوکاں نُوں اوہناں قربانیاں دے ذریعے گُناہ توں کدی وی پاک نئیں کر سکدی جیہڑیاں اوہ*‏ ہر سال وار وار چڑھاندے نیں۔ 2 جے اِنج ہوندا تے قربانیاں چڑھان دا بندوبست ختم ہو جاندا کیونکہ جے خدا دی عبادت کرن والے لوک اوہناں قربانیاں دے ذریعے اِکو وار ہمیشاں لئی پاک ہو جاندے تے فیر اوہناں دا ضمیر اوہناں نُوں احساس نہ دَواندا کہ اوہ گُناہ‌گار نیں۔ 3 اصل چ جدوں لوک ہر سال قربانیاں چڑھاندے نیں تے اوہناں نُوں یاد رہندا اے کہ اوہ گُناہ‌گار نیں 4 کیونکہ بیلاں تے بکریاں دا خون گُناہواں نُوں نئیں مٹا سکدا۔‏

5 ایس لئی جدوں مسیح دُنیا چ آیا تے اوہنے خدا نُوں کہیا:‏ ”‏”‏تینوں قربانیاں تے نذرانے نئیں چاہی دے سن سگوں تُوں میرے لئی اِک جسم تیار کیتا۔ 6 تُوں بھسم ہون والیاں قربانیاں تے گُناہ دِیاں قربانیاں توں خوش نئیں ہویا۔“‏ 7 فیر مَیں کہیا:‏ ”‏اَے خدا، ویکھ مَیں تیری مرضی پوری کرن آیا واں۔ میرے بارے پاک کلام*‏ چ لکھیا اے۔“‏“‏ 8 پہلاں اوہنے کہیا:‏ ”‏ تُوں نذرانے، قربانیاں، بھسم ہون والیاں قربانیاں تے گُناہواں دِیاں قربانیاں توں خوش نئیں ہویا تے نہ ای ایہہ تینوں چاہی دِیاں سن۔“‏ ایہہ قربانیاں شریعت دے مطابق چڑھائیاں جاندیاں سن۔ 9 فیر اوہنے کہیا:‏ ”‏ویکھ، مَیں تیری مرضی پوری کرن آیا واں۔“‏ اوہنے پہلے بندوبست نُوں ختم کر دِتا تاکہ دُوجے بندوبست نُوں قائم کرے۔ 10 خدا دی ایسے ”‏مرضی“‏ مطابق سانوں یسوع مسیح دے ذریعے پاک کیتا گیا جنہے اپنا جسم اِکو وار ہمیشاں لئی قربان کر دِتا۔‏

11 نالے کاہن روز پاک خدمت کرن لئی حاضر ہوندے نیں تے شریعت دے مطابق وار وار اوہ قربانیاں چڑھاندے نیں جیہڑیاں گُناہ نُوں کدی وی پوری طرحاں ختم نئیں کر سکدیاں۔ 12 پر مسیح نے گُناہواں دی معافی لئی اِکو وار ہمیشاں لئی قربانی دِتی تے فیر اسمان تے جاکے خدا دے سجے ہتھ بہہ گیا 13 تے اوس وقت دا اِنتظار کرن لگ پیا جدوں خدا اوہدے دُشمناں نُوں اوہدے پیراں دی چونکی بنا دَوے گا۔ 14 اوہنے اِکو وار قربانی دے کے خدا دے چُنے ہوئے*‏ لوکاں نُوں ہمیشاں لئی گُناہ توں پاک کر دِتا۔ 15 ایہدے علاوہ پاک روح دے ذریعے وی سانوں ایس گل دی گواہی مِلدی اے کیونکہ پاک کلام چ لکھیا اے:‏ 16 ‏”‏یہوواہ نے کہیا:‏ ”‏اوہناں دِناں دے بعد مَیں اوہناں نال ایہہ عہد بنھاں گا:‏ مَیں اپنے حکم اوہناں دے دل چ پاواں گا تے اوہناں دے ذہن تے لکھاں گا۔“‏“‏ 17 نالے ایہہ وی لکھیا اے:‏ ”‏مَیں اوہناں دے گُناہواں تے اوہناں دے بھیڑے کماں نُوں بالکل یاد نئیں کراں گا۔“‏ 18 جدوں گُناہ معاف ہو جاندے نیں تے قربانیاں چڑھان دی کوئی ضرورت نئیں ہوندی۔‏

19 ایس لئی بھراوو، اَسی یسوع دے خون دی وجہ توں اوس راہ تے دلیری نال*‏ ٹُر سکنے آں جیہڑی پاک ترین جگہ تک لجاندی اے۔ 20 یسوع نے پردے دے دُوجے پاسے جا کے اوہ نوِیں راہ*‏ کھولی جیہڑی زندگی وَل لجاندی اے۔ پردے دا اشارہ اوہدے جسم وَل اے۔ 21 ساڈا اعلیٰ کاہن خدا دے گھرانے دا نگران اے۔ 22 ایس لئی آؤ، اَسی سچے دل تے پورے ایمان نال خدا دی عبادت کریئے کیونکہ ساڈے جسماں نُوں صاف پانی نال دھوتا گیا اے تے ساڈے دِلاں نُوں پاک کیتا گیا اے*‏ جدی وجہ توں ساڈا ضمیر سانوں قصوروار نئیں ٹھہراندا۔ 23 آؤ، شک کیتے بغیر ساریاں سامنے اپنی امید دا اعلان کردے رہیے کیونکہ جنہے وعدہ کیتا اے، اوہ وعدے دا پکا*‏ اے۔ 24 نالے آؤ، اَسی اِک دُوجے دا خیال رکھیے تاکہ اَسی اِک دُوجے چ چنگے کم کرن تے محبت ظاہر کرن دا جوش پیدا کر سکئے 25 تے اِک دُوجے نال جمع ہونا*‏ نہ چھڈیئے جیویں کجھ لوکاں دی عادت اے سگوں اِک دُوجے دا حوصلہ ودھاندے رہیے۔ ہُن تے سانوں ایہناں گلاں تے ہور وی زیادہ عمل کرنا چاہی دا اے کیونکہ خدا دا دن نیڑے آ رہیا اے۔‏

26 جے اَسی سچائی بارے صحی علم حاصل کرن دے بعد وی وار وار جان‌بجھ کے گُناہ کردے رہواں گے تے فیر ساڈے گُناہواں لئی ہور کوئی قربانی نئیں دِتی جائے گی*‏ 27 سگوں سانوں خوف نال خدا دی عدالت دا اِنتظار کرنا پووے گا یعنی اوس دن دا جدوں ساڈے تے اوہدے غصے دی اَگ بھڑکے گی جیہڑی اوہدے خلاف جان والے سارے لوکاں نُوں ختم*‏ کر دَوے گی۔ 28 جیہڑا بندہ موسیٰ دی شریعت دے خلاف جاندا اے، اوہدے تے رحم نئیں کیتا جاندا سگوں دو یاں تِن لوکاں دی گواہی دی بِنا تے اوہنوں موت دی سزا دِتی جاندی اے 29 تے فیر سوچو کہ اوہ بندہ کِنّاں زیادہ سزا دے لائق ہوئے گا جنہے خدا دے پُتر نُوں پیراں تھلے مِدیا تے عہد دے اوس خون نُوں معمولی سمجھیا جدے ذریعے اوہ پاک ہویا سی تے پاک روح دے ذریعے مِلن والی عظیم رحمت دی بے‌عزتی کیتی۔ 30 اَسی جاننے آں کہ خدا نے کہیا سی:‏ ”‏بدلہ لینا میرا کم اے۔ مَیں سزا دَواں گا۔“‏ نالے ایہہ وی کہ ”‏یہوواہ اپنے بندیاں دی عدالت کرے گا۔“‏ 31 زندہ خدا دے ہتھوں سزا پانا بڑی خوف‌ناک گل اے۔‏

32 اوہناں دِناں نُوں یاد ر کھو جدوں خدا نے توانوں صحی سمجھ*‏ دِتی تے تُسی تکلیفاں سہہ سہہ کے صبر نال مشکلاں نُوں برداشت کیتا۔ 33 توانوں کدی کدار لوکاں سامنے*‏ بے‌عزت کیتا گیا تے تواڈے تے ظلم کیتا گیا تے کدی کدار تُسی اوہناں لوکاں دا ساتھ دِتا جنہاں نال ایہو جیہا سلوک ہویا۔ 34 تُسی جیلاں چ بند بھراواں لئی ہمدردی وکھائی تے جدوں تواڈیاں چیزاں لُٹیاں گئیاں تے تُسی ایہہ خوشی نال سہہ لیا کیونکہ توانوں پتہ اے کہ توانوں ایہناں چیزاں توں وی کِتے شان‌دار وراثت ملے گی جیہڑی ہمیشاں تک رہوے گی۔‏

35 ایس لئی ہمت نہ ہارو سگوں دلیری نال گل کردے رہوو کیونکہ ایہدا توانوں وڈا اَجر ملے گا۔ 36 خدا دی مرضی تے چلدے رہن لئی توانوں سب کجھ صبر نال برداشت کرن دی لوڑ اے۔ فیر توانوں اوہ چیزاں مِلن گیاں جنہاں دا اوہنے وعدہ کیتا اے۔ 37 پاک کلام دے مطابق ہُن بس ”‏تھوڑی دیر“‏ رہ گئی اے تے ”‏جیہڑا آ رہیا اے، اوہ ضرور پونچ جائے گا تے دیر نئیں کرے گا۔“‏ 38 نالے ایہہ وی لکھیا اے:‏ ”‏پر میرا نیک بندہ اپنے ایمان دی وجہ توں زندہ رہوے گا“‏ تے ”‏جے اوہ ڈر دے مارے پچھے ہٹے گا تے مَیں اوہدے توں خوش نئیں ہوواں گا۔“‏ 39 اَسی پچھے ہٹن والے نئیں آں جیہڑے تباہ ہون گے سگوں اَسی ایمان رکھن والے آں جنہاں دی جان بچ جائے گی۔‏