کُرنتھیوں دے ناں دُوجا خط

1 مَیں پولُس خدا دی مرضی نال مسیح یسوع دا رسول آں تے ایہہ خط ساڈے بھرا تیمُتھیُس نال مِل کے شہر کُرنتھس چ خدا دی کلیسیا دے ناں تے اوہناں سارے مُقدس لوکاں دے ناں لکھ رہیا واں جیہڑے صوبہ اخیہ چ رہندے نیں۔‏

2 دُعا اے کہ ساڈا باپ خدا تے ساڈا مالک یسوع مسیح توانوں عظیم رحمت تے سلامتی بخشن۔‏

3 ساڈے مالک یسوع مسیح دے باپ تے خدا دی وڈیائی ہوئے جیہڑا بڑا ہمدرد تے رحم‌دل باپ اے تے ہر طرحاں دے حالاتاں چ تسلی دین والا خدا اے۔ 4 خدا ساڈیاں ساریاں مصیبتاں چ سانوں تسلی*‏ دیندا اے تاکہ اوس تسلی دے ذریعے اَسی اوہناں لوکاں نُوں تسلی دے سکئے جیہڑے فرق فرق مصیبتاں*‏ چوں لنگھ رہے نیں۔ 5 مسیح دے شاگرد ہون دی وجہ توں ساڈے تے بڑیاں مصیبتاں آندیاں نیں۔ پر مسیح دے ذریعے سانوں بڑی تسلی وی مِلدی اے۔ 6 مصیبتاں*‏ چ خدا سانوں تسلی دیندا اے تاکہ اَسی ایہناں نُوں برداشت کر سکئے۔ ایہہ ویکھ کے توانوں وی تسلی مِلدی اے کہ تُسی وی صبر نال مصیبتاں نُوں برداشت کر سکدے او تے نجات پا سکدے او۔ 7 سانوں پورا یقین اے کہ تُسی وفادار رہوو گے کیونکہ اَسی جاننے آں کہ جیویں تُسی ساڈے وانگوں مصیبتاں دا سامنا کر رہے او، اوسے طرحاں توانوں ساڈے وانگوں تسلی وی ملے گی۔‏

8 بھراوو، اَسی توانوں دَسنا چاہنے آں کہ آسیہ دے صوبے چ سانوں کِنّیاں مشکلاں چوں لنگھنا پیا۔ ساڈے تے ایناں دباؤ سی کہ اوہنوں برداشت کرنا ساڈے وَسوں باہر سی تے ساڈے بچن دی کوئی امید نئیں سی۔ 9 سانوں لگیا کہ سانوں موت دی سزا سُنا دِتی گئی اے۔ ایہہ سب ایس لئی ہویا تاکہ اَسی اپنے آپ تے نئیں سگوں خدا تے بھروسا کریئے جیہڑا مُردیاں نُوں زندہ کردا اے۔ 10 اوہنے سانوں موت دے مُونہہ چوں کڈھیا تے اَگے وی بچائے گا۔ سانوں پورا یقین اے کہ اوہ ہمیشاں سانوں بچائے گا۔ 11 بھراوو، جے تُسی ساڈی مدد کرنا چاہندے او تے خدا کولوں ساڈے لئی اِلتجا کرو تاکہ بوہت سارے لوکاں دِیاں دُعاواں دی وجہ توں خدا ساڈے تے رحم کرے۔ فیر بوہت سارے لوک خدا دا شکر کرن گے کہ اوہنے ساڈی مدد کیتی اے۔‏

12 سانوں ایس گل تے مان اے کہ ساڈا ضمیر صاف اے کیونکہ دُنیا دے لوکاں دے سامنے تے خاص طور تے تواڈے سامنے ساڈا چال‌چلن پاک سی تے اَسی صاف‌دلی نال زندگی گزاری جیویں خدا نے سانوں سکھایا اے۔ اَسی دُنیا دی حکمت تے نئیں سگوں خدا دی عظیم رحمت تے بھروسا کیتا۔ 13 اَسی توانوں اوہی گلاں لکھ رہے آں جنہاں نُوں تُسی اسانی نال پڑھ تے سمجھ سکدے او۔‏*‏ مینوں امید اے کہ تُسی ایہناں گلاں نُوں پوری طرحاں سمجھو گے تے یاد رکھو گے۔ 14 تواڈے وچوں کجھ ایہہ گلاں سمجھ گئے نیں۔ نالے تُسی کسے حد تک ایہہ وی سمجھدے او کہ تُسی ساڈے تے مان کر سکدے او بالکل اونویں ای جیویں اَسی ساڈے مالک یسوع دے دن تواڈے تے مان کراں گے۔‏

15 مینوں تواڈی وفاداری تے بھروسا اے۔ ایس لئی مَیں دُبارہ تواڈے کول آن دا فیصلہ کیتا تاکہ توانوں دُبارہ خوشی ملے۔‏*‏ 16 میرا ارادہ سی کہ مَیں مقدونیہ جاندے ویلے توانوں ملاں تے فیر مقدونیہ توں واپس تواڈے کول آواں۔ نالے مَیں چاہنا ساں کہ جدوں مَیں یہودیہ جان لئی نکلاں تے اوہدوں تُسی تھوڑی دُور تک میرے نال چلو۔ 17 توانوں کیہہ لگدا اے؟ کیہہ مَیں ایہہ ارادہ سوچے سمجھے بغیر کیتا سی؟ کیہہ مَیں اوہناں لوکاں وانگوں آں جیہڑے بھروسے دے لائق نئیں ہوندے؟ اوہ پہلاں تے ”‏ہاں“‏ کہندے نیں پر بعد چوں اوہناں دی ”‏ہاں،“‏ ”‏نہ“‏ بن جاندی اے۔ 18 پر جدوں اَسی ”‏ہاں“‏ کہنے آں تے ایہدا مطلب ”‏نہ“‏ نئیں ہوندا۔ ایس لئی جیویں تُسی خدا تے بھروسا کر سکدے او، اوسے طرحاں تُسی ساڈے تے وی بھروسا کر سکدے او۔ 19 مَیں، سِلوانُس*‏ تے تیمُتھیُس نے توانوں خدا دے پُتر یسوع مسیح بارے خوش‌خبری سُنائی۔ یسوع دی ”‏ہاں،“‏ بعد چ ”‏نہ“‏ نئیں بن دی سگوں اوہدی ”‏ہاں،“‏ ہمیشاں ”‏ہاں“‏ ای رہندی اے 20 کیونکہ خدا نے جِنّے وی وعدے کیتے سن، اوہ سارے یسوع دے ذریعے ”‏ہاں“‏ بن گئے۔‏*‏ ایس لئی اَسی اوہدے ذریعے خدا دے حضور ”‏آمین“‏ کہنے آں جدے نال خدا دی وڈیائی ہوندی اے۔ 21 خدا نے ای سانوں مسح کیتا اے تے ایس گل دی ضمانت دِتی اے کہ تُسی تے اَسی مسیح دے آں۔ 22 اوہنے ساڈے تے اپنی مُہر*‏ وی لائی اے۔ ایہہ مُہر پاک روح اے جیہڑی ساڈے دِلاں چ وَسدی اے۔ نالے ایہہ اوہناں چیزاں دا بیعانہ اے جیہڑیاں سانوں مستقبل چ مِلن گیاں۔‏

23 مَیں خدا دے حضور سچ کہہ رہیا واں کہ جے مَیں کُرنتھس آ کے تواڈی درستی کردا تے تُسی ہور وی دُکھی ہو جاندے۔ ایس لئی مَیں حالے تک نئیں آیا۔ 24 اَسی تواڈے ایمان دے مالک*‏ نئیں آں سگوں اَسی تواڈے نال مِل کے خدمت کرنے آں کیونکہ اَسی چاہنے آں کہ تُسی خوشی نال بھر جاؤ تے اپنے ایمان دی وجہ توں مضبوطی نال کھڑے رہوو۔‏