کُرنتھیوں دے ناں دُوجا خط
8 بھراوو، اَسی توانوں دَسنا چاہنے آں کہ مقدونیہ دِیاں کلیسیاواں نے اوہدوں کیہہ کیتا جدوں خدا نے اوہناں اُتے عظیم رحمت کیتی۔ 2 اوتھوں دے بھین بھرا مصیبتاں تے سخت اَزمیشاں دا سامنا کر رہے سن۔ بھانویں کہ اوہ آپ بوہت غریب نیں پر فیر وی اوہناں نے بڑی خوشی نال دل کھول کے عطیات دِتے۔ 3 مَیں آپ ویکھیا اے کہ جِنّاں اوہ اصل چ دے سکدے سن، اوہناں نے اوس توں وی زیادہ دِتا۔ 4 اوہناں نے آپ آ کے وار وار مِنت کیتی کہ اوہناں نُوں مُقدس لوکاں لئی عطیات دین دا شرف دِتا جائے تاکہ اوہ وی دُوجیاں نال مِل کے مُقدس لوکاں دی خدمت کر سکن۔* 5 اوہناں نے ساڈی امید توں وی ودھ کے کیتا کیونکہ اوہناں نے خدا دی مرضی مطابق پہلاں ای اپنی زندگی مالک دے ناں کر دِتی سی۔ پر فیر اوہ ساڈی خدمت کرن لئی وی تیار ہو گئے۔ 6 ایس لئی اَسی طِطُس نُوں حوصلہ دِتا کہ اوہنے تواڈے عطیات جمع کرن دا جیہڑا کم شروع کیتا سی، اوہنوں پورا وی کرے۔ 7 تُسی ہر معاملے چ بوہت چنگے او یعنی تواڈا ایمان مضبوط اے، تُسی مہارت نال گل کردے او، تواڈے کول علم اے، تُسی ہر کم لگن نال کردے او تے تُسی دُوجیاں نال محبت کردے او جیویں اَسی تواڈے نال کرنے آں۔ ایسے طرحاں تُسی عطیات وی دل کھول کے دَوو۔
8 مَیں توانوں حکم نئیں دے رہیا سگوں مَیں دَسنا چاہنا واں کہ دُوجے کِنّی لگن نال اپنے ہمایماناں دی مدد کر رہے نیں۔ نالے مَیں ویکھنا چاہنا واں کہ تواڈی محبت کِنّی سچی اے۔ 9 تُسی ساڈے مالک یسوع مسیح دی عظیم رحمت بارے جان دے او۔ اوہ امیر سی پر فیر وی تواڈی خاطر اوہ غریب بنیا تاکہ اوہدی غریبی دے ذریعے تُسی امیر بن جاؤ۔
10 اِک سال پہلاں تواڈے اندر نہ صرف عطیات دین دی خواہش سی سگوں تُسی عطیات دینا شروع وی کر دِتا سی۔ ایس لئی مَیں تواڈے ای فائدے لئی مشورہ دینا واں 11 کہ تُسی جیس شوق نال ایس کم نُوں شروع کیتا سی، اوسے شوق نال ایہنوں پورا وی کرو۔ پر تُسی اوناں دَوو، جِنّاں دے سکدے او 12 کیونکہ جیہڑی چیز خوشی نال دِتی جاندی اے، اوہ خدا نُوں زیادہ پسند آندی اے۔ خدا چاہندا اے کہ اَسی اوہ چیز دَئیے جنہوں دینا ساڈے وَس چ وے نہ کہ اوہ چیز جیہڑی ساڈے وَسوں باہر اے۔ 13 ایہہ گل نئیں اے کہ مَیں دُوجیاں دا بھار ہولا کر کے تواڈے تے بھار پانا چاہنا واں 14 سگوں مَیں تے چاہنا واں کہ برابری ہو جائے۔ جیہڑیاں چیزاں تواڈے کول بوہتیاں نیں، اوہناں نال دُوجیاں دی کمی پوری ہوئے تے جیہڑیاں چیزاں دُوجیاں کول بوہتیاں نیں، اوہناں نال تواڈی کمی پوری ہوئے تاکہ برابری ہو جائے۔ 15 جیویں کہ پاک کلام چ لکھیا اے: ”جدے کول زیادہ سی، اوہدے کول بوہت زیادہ نئیں سی تے جدے کول گھٹ سی، اوہدے کول بوہت گھٹ نئیں سی۔“
16 خدا دا شکر اے جنہے طِطُس دے دل چ تواڈے لئی محبت پائی اے۔ اوہ وی ساڈے وانگوں تواڈی بڑی فکر کردا اے 17 کیونکہ اوہ صرف ساڈے کہن تے تواڈے کول نئیں آ رہیا سگوں اوہنوں آپ تواڈے کول آن دا بڑا شوق اے۔ 18 اَسی طِطُس دے نال اوس بھرا نُوں وی گھل رہے آں جدی تعریف ساریاں کلیسیاواں کردیاں نیں کیونکہ اوہ بڑے جوش نال خوشخبری سُناندا اے۔ 19 کلیسیاواں نے اوہنوں چُنیا اے تاکہ اوہ ساڈے نال جائے تے عطیات وَنڈے۔ ایس کم دی وجہ توں مالک دی وڈیائی ہوئے گی تے ایہہ ثابت ہوئے گا کہ اَسی دُوجیاں دی مدد کرن لئی تیار آں۔ 20 اِنج کوئی وی ساڈے تے اِلزام نئیں لا سکے گا کہ اَسی کُھلے دل نال دِتے جان والے عطیات وَنڈن چ ہیرا پھیری کیتی اے۔ 21 اَسی ”صرف یہوواہ دے سامنے ای نئیں سگوں انساناں دے سامنے وی ہر کم ایمانداری نال کرنے آں۔“*
22 ایہدے علاوہ اَسی اوہناں دونواں نال اِک ہور بھرا نُوں وی گھل رہے آں۔ اَسی اوہنوں کئی کماں چ پَرکھ کے ویکھیا اے کہ اوہ محنتی اے۔ ہُن تے اوہ ہور وی محنت نال کم کرے گا کیونکہ اوہنوں تواڈے تے پورا بھروسا اے۔ 23 جے کسے نُوں طِطُس تے کوئی اِعتراض اے تے مَیں دَسنا چاہنا واں کہ اوہ میرا ساتھی* اے تے میرے نال مِل کے تواڈے بھلے لئی کم کردا اے۔ نالے جے کسے نُوں اوہناں دو بھراواں تے کوئی اِعتراض اے تے مَیں دَسنا چاہنا واں کہ اوہناں نُوں کلیسیاواں نے چُن کے گھلیا اے* کیونکہ اوہ مسیح دی وڈیائی کردے نیں۔ 24 ایس لئی اوہناں بھراواں لئی اپنی محبت دا ثبوت دَوو تاکہ کلیسیاواں ویکھ سکن کہ اَسی تواڈے اُتے کیوں مان کرنے آں۔