تیمُتھیُس دے ناں دُوجا خط
1 مَیں پولُس، خدا دی مرضی نال مسیح یسوع دا رسول آں تاکہ اوس زندگی دے وعدے دا اعلان کراں جیہڑی مسیح یسوع دے ذریعے مِلدی اے۔ 2 میرے پیارے پُتر تیمُتھیُس،
دُعا اے کہ ساڈا باپ خدا تے ساڈا مالک مسیح یسوع تیرے تے مہربانی کرن تے تینوں عظیم رحمت تے سلامتی بخشن۔
3 مَیں اپنے خدا دا شکرگزار آں کہ مَیں اپنے پیو دادیاں وانگوں اوہدی عبادت کرنا واں تے صاف ضمیر نال اِنج کرنا واں۔ مَیں دن رات اِلتجا کردے ویلے تیرا ذکر کرنا کدی وی نئیں بُھلدا۔ 4 جدوں وی مینوں تیرا رونا یاد آندا اے تے میرا بڑا دل کردا اے کہ تینوں ملاں تاکہ مَیں خوشی نال بھر جاواں۔ 5 مینوں تیرا اوہ سچا ایمان یاد اے جیہڑا تیرے توں پہلاں تیری نانی لوئس تے تیری ماں یُونیکے نے ظاہر کیتا سی۔ مینوں یقین اے کہ تُوں حالے وی ایہہ ایمان ظاہر کر رہیا ایں۔
6 ایس لئی مَیں تینوں یاد دَوانا چاہنا واں کہ تُوں خدا وَلّوں ملی اوس نعمت نُوں جوش نال استمال کردا رہ* جیہڑی تینوں اوہدوں ملی سی جدوں مَیں تیرے تے ہتھ رکھے سن۔ 7 خدا نے سانوں جیہڑی پاک روح دِتی اے، اوہ سانوں ڈرپوک نئیں بناندی سگوں ساڈے اندر طاقت، محبت تے سمجھداری پیدا کردی اے۔ 8 ایس لئی ساڈے مالک بارے گواہی دین چ شرمندگی محسوس نہ کر تے نہ ای ایس گلوں شرمندہ ہو کہ مَیں اوہدی خدمت کرن دی وجہ توں قید آں۔ ایہدی بجائے خدا دی طاقت اُتے بھروسا رکھدے ہوئیاں خوشخبری دی خاطر مصیبتاں سہن لئی تیار رہ۔ 9 خدا نے سانوں بچایا اے تے اپنے پاک خادم بنن لئی بلایا اے۔ ایہہ بلاوا سانوں ساڈے کماں دی وجہ توں نئیں ملیا سگوں اوہدی مرضی تے اوس عظیم رحمت دی وجہ توں ملیا اے جیہڑی اوہنے بڑے لمے چِر پہلاں مسیح یسوع دے ذریعے ساڈے تے کیتی سی۔ 10 جدوں مسیح یسوع نجاتدہندہ بن کے آیا تے ایہہ گل ظاہر ہو گئی کہ ساڈے تے عظیم رحمت ہوئی اے۔ اوہنے موت نُوں ختم کر دِتا تے خوشخبری دے ذریعے صاف صاف دَسیا کہ سانوں اوہ زندگی تے جسم کیویں مِل سکدا اے جیہڑا کدی ختم نئیں ہوئے گا۔* 11 ایہی خوشخبری سُنان لئی مینوں مُناد، رسول تے اُستاد چُنیا گیا اے۔
12 ایسے لئی مینوں ظلم سہنا پے رہیا اے۔ پر مَیں ایس گلوں شرمندہ نئیں ہوندا کیونکہ مَیں خدا نُوں جاننا واں تے مینوں اوہدے تے بھروسا اے۔ مینوں پورا یقین اے کہ اوہ طے کیتے ہوئے دن تک اوس امانت* دی حفاظت کرے گا جیہڑی مَیں اوہنوں دِتی اے۔ 13 تُوں اوس صحی* تلیم دے معیار* تے قائم رہ جیہڑی مَیں تینوں دِتی اے تے مسیح دے شاگرد ہون دے ناتے ایمان تے محبت دے مطابق زندگی گزار۔ 14 اوس پاک روح دی مدد نال جیہڑی ساڈے اندر وَسدی اے، ایس شاندار خزانے* دی حفاظت کر۔
15 تُوں جاننا ایں کہ فوگلُس تے ہرموگینس سمیت آسیہ دے صوبے دے سارے بندیاں نے میرا ساتھ چھڈ دِتا اے۔ 16 دُعا اے کہ مالک ساڈے بھرا اُنیسِفرس تے اوہدے گھر والیاں تے مہربانی کرے کیونکہ اوہنے وار وار میرا حوصلہ ودھایا تے اوہ ایس گلوں شرمندہ نئیں ہویا کہ مینوں قید چ زنجیراں نال بنھیا گیا اے۔ 17 ایہدی بجائے جدوں اوہ روم چ سی تے اوہ اوہدوں تک جگہ جگہ پھریا جدوں تک اوہنے مینوں لبھ نئیں لیا۔ 18 دُعا اے کہ عدالت دے دن ساڈا مالک یہوواہ اوہدے تے مہربانی کرے۔ تُوں چنگی طرحاں جاننا ایں کہ اوہنے اِفسس چ میری کِنّی خدمت کیتی سی۔