کُرنتھیوں دے ناں دُوجا خط

10 تواڈے وچوں کجھ کہندے نیں کہ ”‏جدوں پولُس ساڈے سامنے ہوندا اے تے اوہ بڑا معمولی جیہا لگدا اے۔ پر جدوں اوہ ساڈے سامنے نئیں ہوندا تے اوہ بڑا دلیر بن دا اے۔“‏ فیر وی مَیں مسیح ورگی نرم‌مزاجی تے مہربانی نال تواڈے کولوں اِلتجا کرنا واں کہ تُسی میریاں گلاں تے عمل کرو۔ 2 مینوں امید اے کہ جدوں مَیں تواڈے کول آواں گا تے مینوں اوہناں لوکاں دے خلاف سخت کاروائی کرن دی لوڑ نئیں پووے گی جنہاں دا خیال اے کہ اَسی دُنیا دے لوکاں وانگوں زندگی گزارنے آں۔ 3 بھانویں کہ اَسی ایس دُنیا چ رہنے آں پر اَسی اوس طریقے نال نئیں لڑدے جیس طریقے نال ایس دُنیا دے لوک لڑدے نیں*‏ 4 کیونکہ اَسی انسانی ہتھیاراں نال نئیں سگوں خدا وَلّوں مِلن والے طاقتور ہتھیاراں نال جنگ کرنے آں تے ایہناں دے ذریعے اَسی ایہو جہیاں چیزاں نُوں وی ڈھا سکنے آں جیہڑیاں بڑی مضبوطی نال قائم نیں۔ 5 ایہناں ہتھیاراں دے ذریعے اَسی ہر طرحاں دی غلط سوچ نُوں تے ہر اوس دیوار نُوں ڈھا دینے آں جیہڑی خدا دے علم دے خلاف کھڑی کیتی گئی اے تے ہر سوچ نُوں قابو کر کے مسیح دے تابع کر دینے آں۔ 6 اَسی اوہناں لوکاں نُوں سزا دَواں گے جیہڑے نافرمان نیں۔ پر ایس توں پہلاں اَسی توانوں موقع دینا چاہنے آں کہ تُسی ثابت کرو کہ تُسی ہر معاملے چ فرمانبردار او۔‏

7 تُسی کسے معاملے بارے پوری طرحاں جانے بغیر*‏ رائے قائم کر لیندے او۔ جے کسے نُوں ایس گل تے مان*‏ اے کہ اوہ مسیح دا خادم اے تے اوہ ایس گل نُوں نہ بُھلے کہ اَسی وی مسیح دے خادم آں۔ 8 مالک نے سانوں اِختیار دِتا اے کہ اَسی تواڈا ایمان مضبوط کریئے نہ کہ ایہنوں کمزور کریئے۔ جے مَیں ایس اِختیار تے بوہتی شیخی ماراں وی تے مَیں غلط نئیں آں۔ 9 مَیں نئیں چاہندا کہ توانوں ایہہ لگے کہ مَیں اپنے خطاں دے ذریعے توانوں ڈرا رہیا واں۔ 10 تواڈے چوں کجھ لوک کہندے نیں کہ ”‏اوہدے خط تے بڑے زبردست تے اثردار ہوندے نیں پر اوہ آپ بڑا معمولی جیہا بندہ اے تے اوہدیاں گلاں*‏ وی بے‌کار ہوندیاں نیں۔“‏ 11 ایہو جہے لوکاں نُوں مَیں دَسنا چاہنا واں کہ جو کجھ اَسی اپنے خطاں چ لکھنے آں، اَسی اوہ کراں گے وی جدوں اَسی تواڈے کول آواں گے۔ 12 اَسی تے اپنے آپ نُوں اوہناں لوکاں دے برابر نئیں سمجھدے*‏ یاں اوہناں نال مقابلہ نئیں کردے جیہڑے اپنیاں تعریفاں کردے نیں۔ جدوں ایہو جہے لوک اپنے آپ نُوں اپنے معیاراں مطابق پَرکھدے نیں تے اپنا مقابلہ اپنے نال ای کردے نیں تے اِنج ظاہر ہوندا اے کہ اوہ بے‌وقوف نیں۔‏

13 پر اَسی اوہناں کماں تے شیخی نئیں ماراں گے جیہڑے اَسی نئیں کیتے سگوں اَسی اوس ذمے‌داری تے شیخی ماراں گے جیہڑی خدا نے سانوں دِتی اے۔ ایہدے چ ایہہ شامل اے کہ اَسی توانوں خوش‌خبری سُنائیے۔ 14 ایس لئی جدوں اَسی تواڈے کول آئے تے اَسی اوہی کم کیتا جیہڑا خدا نے سانوں دِتا سی کیونکہ توانوں سب توں پہلاں مسیح بارے خوش‌خبری اَسی سُنائی سی۔ 15 ایس لئی اَسی اوہناں کماں تے شیخی نئیں ماردے جیہڑے ساڈی ذمے‌داری چ شامل نئیں یعنی جیہڑے کم کسے ہور نے کیتے نیں۔ پر سانوں امید اے کہ جیویں جیویں تواڈا ایمان ودھدا جائے گا، ساڈی اوہ محنت رنگ لیائے گی جیہڑی اَسی اپنی ذمے‌داری نُوں پورا کردے ویلے کیتی سی۔ فیر سانوں ہور وی ذمے‌داریاں مِلن گیاں 16 تے اَسی تواڈے علاقے توں اَگے ہور علاقیاں*‏ چ وی خوش‌خبری سُناواں گے تاکہ اَسی اوہناں کماں تے شیخی نہ ماریئے جنہاں نُوں کرن دی ذمے‌داری دُوجیاں نُوں دِتی گئی اے۔ 17 پاک کلام چ لکھیا اے:‏ ”‏جے کوئی شیخی مارے تے یہوواہ بارے شیخی مارے۔“‏ 18 اصل چ یہوواہ اوس بندے نُوں قبول نئیں کردا جیہڑا اپنی تعریف کردا اے سگوں اوہنوں قبول کردا اے جدی تعریف اوہ آپ کردا اے۔‏