کُرنتھیوں دے ناں پہلا خط
6 جدوں تواڈا کسے بھرا نال کوئی جھگڑا ہوندا اے تے تُسی اِنصاف لئی غیرایمان لوکاں دِیاں عدالتاں چ جاندے او۔ تواڈے چ اینی جرأت کیویں آ گئی؟ تُسی اپنے جھگڑیاں نُوں سلجھان لئی کلیسیا چ خدا دے چُنے ہوئے بندیاں کول کیوں نئیں جاندے؟ 2 کیہہ توانوں نئیں پتہ کہ خدا دے چُنے ہوئے بندے ساری دُنیا دی عدالت کرن گے؟ جے تُسی ساری دُنیا دی عدالت کرنی اے تے کیہہ تُسی چھوٹے موٹے مسئلیاں نُوں حل نئیں کر سکدے؟ 3 کیہہ توانوں نئیں پتہ کہ اَسی فرشتیاں دی عدالت کراں گے؟ تے فیر تُسی انساناں دے چھوٹے موٹے مسئلیاں نُوں حل کیوں نئیں کر سکدے؟ 4 جے تواڈے چ کوئی مسئلہ کھڑا ہو وی جاندا اے تے تُسی ایہنوں حل کرن لئی دُنیا دے لوکاں کول کیوں جاندے او؟ 5 مَیں ایہہ گلاں توانوں شرمندہ کرن لئی کہہ رہیا واں۔ کیہہ تواڈے چ اِک وی سمجھدار بھرا نئیں اے جیہڑا تواڈے مسئلیاں نُوں حل کر سکے؟ 6 تواڈے چ تے بھرا ای بھرا نُوں عدالت چ گھسیٹ دا اے تے اوہ وی غیرایمان لوکاں دے سامنے!
7 جے تُسی اِک دُوجے تے مُقدمے چلاندے او تے سمجھو کہ تُسی عدالت چ جان توں پہلاں ای ہار گئے او۔ کیہہ ایہہ بہتر نئیں کہ تُسی نااِنصافی تے نقصان سہہ لوو؟ 8 پر ایہدی بجائے تُسی اپنے ای بھراواں نال نااِنصافی کردے او تے اوہناں نُوں نقصان پونچاندے او۔
9 کیہہ توانوں نئیں پتہ کہ بھیڑے لوک خدا دی بادشاہی چ نئیں جان گے؟* دھوکھا نہ کھاؤ۔ جنسیبدکاری کرن والے، بُتپرست، اپنے جیون ساتھی دے علاوہ کسے ہور نال جنسی تعلق رکھن والے،* مرداں نال جنسیبدکاری کرن والے مرد،* 10 چور، لالچی،شرابی، گالاں کڈھن والے* تے لُٹیرے* خدا دی بادشاہی چ نئیں جان گے۔ 11 تواڈے چوں کجھ لوک پہلاں ایہو جہے ای کم کردے سن۔ پر خدا نے توانوں مالک یسوع مسیح دے ناں توں تے اپنی پاک روح دے ذریعے پاک صاف کیتا اے تے اپنی خدمت لئی چُنیا* تے نیک ٹھہرایا اے۔
12 ساریاں چیزاں میرے لئی جائز نیں پر ساریاں چیزاں فائدےمند نئیں ہوندیاں۔ ساریاں چیزاں میرے لئی جائز نیں پر مَیں کسے چیز* دا غلام نئیں بناں گا۔ 13 کھانا پیٹ لئی اے تے پیٹ کھانے لئی اے۔ پر خدا دونواں نُوں ختم کر دَوے گا۔ جسم جنسیبدکاری لئی نئیں اے سگوں مالک دی خدمت لئی اے تے مالک جسم دی دیکھبھال کردا اے۔* 14 خدا نے مالک نُوں زندہ کیتا تے اوہ اپنی طاقت نال سانوں وی مُردیاں چوں زندہ کرے گا۔
15 کیہہ توانوں نئیں پتہ کہ مسیح تواڈے جسم دا مالک اے؟ تے فیر جو مسیح دا اے،* کیہہ اوہنوں اِک طوائف نال جوڑنا صحی ہوئے گا؟ بالکل نئیں! 16 کیہہ توانوں نئیں پتہ کہ جیہڑا بندہ کسے طوائف نال بدکاری کردا اے، اوہ اوہدے نال اِک جسم ہو جاندا اے؟ کیونکہ خدا نے اپنے کلام چ کہیا اے کہ ”اوہ دونویں اِک جسم ہون گے۔“ 17 پر جیہڑا بندہ مالک نال جُڑ جاندا اے، اوہ اوہدے نال اِک مُٹھ ہو جاندا اے۔ 18 ایس لئی جنسیبدکاری توں دُور بھجو! کسے وی ہور گُناہ دا جسم تے ایناں بھیڑا اثر نئیں ہوندا جِنّاں ایس گُناہ دا ہوندا اے۔ جیہڑا بندہ جنسیبدکاری کردا اے، اوہ اپنے ای جسم دے خلاف گُناہ کردا اے۔ 19 کیہہ توانوں نئیں پتہ کہ تواڈا جسم اوہ ہیکل اے جدے چ خدا دی پاک روح وَسدی اے؟ یاد رکھو، تُسی خدا دے او 20 کیونکہ اوہنے توانوں بوہت وڈی قیمت دے کے خرید لیا اے۔ ایس لئی اپنے جسم نُوں خدا دی وڈیائی کرن لئی استمال کرو۔