تھسلُنیکیوں دے ناں پہلا خط

2 بھراوو، تُسی چنگی طرحاں جان دے او کہ ساڈا تواڈے کول آنا بے‌کار نئیں گیا۔ 2 نالے توانوں پتہ اے کہ فِلپّی چ سانوں بڑا ظلم تے بے‌عزتی سہنی پئی۔ پر فیر وی خدا دی مدد نال اَسی دلیر بنے تے سخت مخالفت دے باوجود*‏ توانوں خدا دی خوش‌خبری سُنائی۔ 3 اَسی توانوں جیہڑی وی نصیحت کرنے آں، اوہدی بنیاد جھوٹھ نئیں اے تے نہ ای اَسی ایہہ غلط ارادے*‏ یاں دھوکھا دین دی نیت نال کرنے آں 4 سگوں خدا نے سانوں خوش‌خبری سُنان دی ذمے‌داری دِتی اے کیونکہ اوہ سانوں ایس لائق سمجھدا اے۔ ایس لئی اَسی جو وی کہنے آں، اوہ انساناں نُوں نئیں سگوں خدا نُوں خوش کرن لئی کہنے آں جیہڑا ویکھدا*‏ اے کہ ساڈے دل چ کیہہ اے۔‏

5 اصل چ تُسی ایہہ گل جان دے او تے خدا وی ایہدا گواہ اے کہ اَسی کدی وی کسے دی چاپلوسی نئیں کیتی تے نہ ای لالچ چ آ کے کسے نُوں دھوکھا دِتا اے۔ 6 اَسی کدی وی ایہہ نئیں چاہیا کہ تُسی یاں کوئی ہور ساڈی واہ واہ کرے۔ جے اَسی چاہندے تے مسیح دے رسول ہون دے ناتے تواڈے تے اپنے خرچیاں دا بوجھ پا سکنے ساں۔ 7 پر ایہدی بجائے اَسی تواڈے نال بڑی نرمی نال پیش آئے بالکل جیویں اِک دودھ پیان والی ماں بڑے پیار نال اپنے بچیاں دی دیکھ‌بھال کردی اے۔ 8 اَسی توانوں دِلوں پیار کرنے آں۔ ایس لئی اَسی نہ صرف توانوں خدا دی خوش‌خبری سُنائی سگوں تواڈے لئی اپنی جان دین لئی وی تیار ہو گئے کیونکہ تُسی ساڈے سچے دوست بن گئے سو۔‏

9 بھراوو، توانوں ضرور یاد ہوئے گا کہ اَسی کِنّی جی‌توڑ محنت کیتی اے۔ جدوں اَسی توانوں خدا دی خوش‌خبری سُنائی تے اَسی دن رات کم کیتا تاکہ اَسی تواڈے وچوں کسے اُتے وی اپنے خرچیاں دا بوجھ نہ پائیے۔ 10 پیارے ہم‌ایمانو، تواڈے نال نال خدا وی ایس گل دا گواہ اے کہ تواڈی مدد کردے ویلے اَسی وفادار، نیک تے بے‌اِلزام ثابت ہوئے۔ 11 توانوں چنگی طرحاں پتہ اے کہ اَسی توانوں ساریاں نُوں نصیحت کیتی، تسلی دِتی تے سمجھایا جیویں اِک پیو اپنے بچیاں نُوں سمجھاندا اے 12 تاکہ تواڈا چال‌چلن خدا دی مرضی مطابق ہوئے جنہے توانوں اپنی بادشاہی چ عزت*‏ دین لئی بلا‌یا اے۔‏

13 ایسے لئی اَسی وار وار خدا دا شکر کرنے آں کیونکہ جدوں توانوں خدا دا کلام سُنایا گیا تے تُسی ایہنوں انساناں دا کلام سمجھ کے نئیں سگوں خدا دا کلام سمجھ کے قبول کیتا۔ ایہہ کلام واقعی خدا وَلّوں اے تے تواڈیاں زندگیاں تے اثر پا رہیا اے۔ 14 بھراوو، تُسی یہودیہ دِیاں کلیسیاواں دے بھین بھراواں دی مثال تے عمل کر رہے او جیہڑے مسیح یسوع نال اِک مُٹھ نیں۔ جیس طرحاں اوہ یہودیاں دے ہتھوں ظلم سہہ رہے نیں، اوسے طرحاں توانوں وی اپنی قوم دے ہتھوں ظلم سہنے پئے نیں۔ 15 یہودیاں نے تے ساڈے مالک یسوع تے نبیاں نُوں وی جانوں مار دِتا تے ساڈے اُتے وی ظلم کیتا۔ نالے اوہ خدا نُوں خوش نئیں کر رہے سگوں اوہ اوس کم*‏ دے خلاف نیں جدے توں ساریاں دا بھلا ہو سکدا اے 16 کیونکہ اوہ سانوں غیریہودی لوکاں چ مُنادی کرن توں روکن دی کوشش کردے نیں تاکہ اوہناں نُوں نجات نہ ملے۔ اِنج اوہ اپنے گُناہواں دا گھڑا بھردے جا رہے نیں۔ پر ہُن اوہ وقت آ گیا اے جدوں خدا اوہناں تے اپنا قہر نازل کرے گا۔‏

17 پر بھراوو، جدوں اَسی تھوڑی دیر لئی تواڈے توں دُور ساں (‏نظراں توں دُور پر دِلاں توں نئیں)‏ تے اَسی تواڈے کول آن دی بڑی کوشش کیتی کیونکہ اَسی توانوں مِلن لئی ترس رہے ساں۔ 18 ایس لئی اَسی تواڈے کول آنا چاہنے ساں۔ (‏مَیں پولُس نے اِک وار نئیں سگوں دو وار تواڈے کول آن دی کوشش کیتی۔)‏ پر شیطان ساڈی راہ چ رُکاوٹ بنیا۔ 19 جدوں ساڈے مالک یسوع دی موجودگی ہوئے گی تے اوہدے حضور ساڈی امید، خوشی یاں تاج جدے تے سانوں بڑا مان اے، کون ہوئے گا؟ کیہہ تُسی نئیں ہووو گے؟ 20 ہاں، ساڈا مان*‏ تے خوشی تُسی ای او۔‏