تُسی خدا دے دوست بن سکدے او

یہوواہ چاہندا اے کہ تُسی اوہنوں چنگی طرحاں جانو۔ پر اوہ ایہہ کیوں چاہندا اے؟ کیونکہ اوہنوں پتہ اے کہ جدوں تُسی اوہدیاں خوبیاں، اوہدے کماں تے انساناں لئی اوہدے مقصد تے جذباتاں بارے سکھو گے تے تُسی دلوں اوہدے دوست بننا چاہوو گے۔ کیہہ کوئی انسان واقعی خدا دا دوست بن سکدا اے؟ (‏یعقوب 2:‏23 نُوں پڑھو۔)‏ تُسی خدا دے دوست بنن لئی کیہہ کر سکدے او؟ بائبل چ ایہناں سوالاں دے جواب دِتے گئے نیں۔ نالے ایہہ وی دَسیا گیا اے کہ یہوواہ نال دوستی سب توں اہم تے خاص رشتہ اے۔‏

1.‏ یہوواہ توانوں کیہہ کرن دا موقع دے رہیا اے؟‏

یہوواہ سانوں موقع دے رہیا اے کہ اَسی اوہدے نیڑے جائیے تے فیر اوہ وی ساڈے نیڑے آئے گا۔‏ (‏یعقوب 4:‏8‏)‏ ایس گل دا کیہہ مطلب اے؟ ایہہ کہ اَسی اوہدے دوست بنئے۔ بوہت سارے لوکاں نُوں لگدا اے کہ اوہ خدا دے دوست نئیں بن سکدے کیونکہ اوہ اوہنوں ویکھ نئیں سکدے۔ پر خدا نے اپنے کلام بائبل چ اپنے بارے اوہ ساریاں گلاں دَسیاں نیں جیہڑیاں اوہدا دوست بنن لئی جاننا ضروری نیں۔ بھانویں کہ اَسی خدا نُوں کدی نئیں ویکھیا پر جدوں اَسی باقاعدگی نال اوہدا کلام بائبل پڑھاں گے تے اوہدے نال ساڈی دوستی پکی ہوندی جائے گی۔‏

2.‏ کیہہ یہوواہ نالوں چنگا دوست کوئی ہور ہو سکدا اے؟‏

نئیں کیونکہ یہوواہ نالوں بوہتا پیار سانوں کوئی نئیں کر سکدا۔ یہوواہ چاہندا اے کہ تُسی خوش رہوو تے جدوں وی لوڑ پوے اوہدے کولوں مدد منگو۔ تُسی اپنیاں ساریاں پریشانیاں اوہدے تے سُٹ دَوو کیونکہ اوہنوں تواڈی فکر اے۔‏ (‏1-‏پطرس 5:‏7‏)‏ یہوواہ ہمیشاں اپنے دوستاں دی گل سنن تے اوہناں نُوں ہمت تے دلاسہ دین لئی تیار رہندا اے۔—‏زبور 94:‏18، 19 نُوں پڑھو۔‏

3.‏ تُسی خدا دے دوست بنن لئی کیہہ کر سکدے او؟‏

ایہہ سچ اے کہ یہوواہ سارے انساناں نُوں پیار کردا اے پر اوہ دوستی صرف نیک تے سچے لوکاں نال کردا اے۔‏ (‏امثال 3:‏32)‏ یہوواہ چاہندا اے کہ اوہدے دوست اوہ کم کرن جیہڑے اوہنوں پسند نیں تے اوہناں کماں توں دُور رہن جنہاں توں اوہنوں نفرت اے۔ پر کجھ لوکاں نُوں لگدا اے کہ خدا دے حکماں تے چلنا بوہت مشکل اے۔ پر خدا دا دل بوہت وڈا اے۔ اوہ ہر اوس انسان نُوں قبول کردا اے جیہڑا اوہنوں پیار کردا اے تے اوہدی مرضی مطابق چلن دی پوری کوشش کردا اے۔—‏زبور 147:‏11؛‏ اعمال 10:‏34، 35‏۔‏

ہور سوچ‌وچار لئی

4.‏ ابراہام یہوواہ دا دوست سی

بائبل چ ابراہام دی مثال توں سانوں پتہ چلدا اے کہ خدا دے دوستاں چ کیہڑی خوبی ہوندی اے۔ پیدایش 12:‏1-‏4 نُوں پڑھو تے فیر ایہناں سوالاں تے گل بات کرو:‏

• یہوواہ نے ابراہام نُوں کیہہ حکم دِتا؟‏

• یہوواہ نے اوہدے نال کیہہ وعدہ کیتا؟‏

• ابراہام نے یہوواہ دے حکم تے کیویں عمل کیتا؟‏

5.‏ یہوواہ اپنے دوستاں کولوں کیہہ امید کردا اے؟‏

اَسی اپنے دوستاں کولوں کجھ خاص گلاں دی امید رکھنے آں۔‏

• اوہ کیہڑے کم نیں جیہڑے تُسی چاہندے او کہ تواڈے دوست تواڈے لئی کرن؟‏

1-‏یوحنا 5:‏3 نُوں پڑھو تے فیر ایس سوال تے گل بات کرو:‏

• یہوواہ اپنے دوستاں کولوں کیہہ امید کردا اے؟‏

یہوواہ دی مرضی مطابق چلن لئی سانوں اپنی زندگی چ کجھ تبدیلیاں کرنیاں پے سکدیاں نیں۔ یسعیاہ 48:‏17، 18 نُوں پڑھو تے فیر ایس سوال تے گل بات کرو:‏

• یہوواہ اپنے دوستاں نُوں ایہہ کیوں کہندا اے کہ اوہ اپنی زندگی چ تبدیلیاں کرن؟‏

6.‏ یہوواہ اپنے دوستاں دی مدد کیویں کردا اے؟‏

ویڈیو:‏ یہوواہ نے میرے لئی بوہت کجھ کیتا اے (‏20:‏3)‏

• یہوواہ نے ایس عورت دی مدد کیویں کیتی تاکہ اوہ اپنی پریشانی تے ڈر اُتے قابو پا سکے؟‏

یسعیاہ 41:‏10، 13 نُوں پڑھو تے فیر ایہناں سوالاں تے گل بات کرو:‏

• یہوواہ اپنے سارے دوستاں نال کیہہ وعدہ کردا اے؟‏

• کیہہ یہوواہ اِک چنگا دوست ثابت ہو سکدا اے؟ تُسی اِنج کیوں سوچدے او؟‏

7.‏ یہوواہ دا دوست بنن لئی ضروری اے کہ اَسی نہ صرف اوہدے نال گل کرئیے سگوں اوہدی گل سنیے وی

جدوں دوست آپس چ گل بات کردے نیں تے اوہناں دی دوستی ہور پکی ہوندی اے۔ زبور 86:‏6، 11 نُوں پڑھو تے فیر ایہناں سوالاں تے گل بات کرو:‏

• اَسی یہوواہ نال کیویں گل کر سکنے آں؟‏

• یہوواہ ساڈے نال کیویں گل کردا اے؟‏

خلاصہ

یہوواہ تواڈا دوست بننا چاہندا اے۔ اوہ تواڈی مدد کرے گا تاکہ تُسی اوہدے نیڑے جاؤ تے اوہنوں ہور چنگی طرحاں جانو۔‏

دہرائی

• یہوواہ اپنے دوستاں دی مدد کیویں کردا اے؟‏

• یہوواہ اپنے دوستاں نُوں ایہہ کیوں کہندا اے کہ اوہ اپنی زندگی چ تبدیلیاں کرن؟‏

• تواڈے خیال چ کیہہ خدا دا دوست بننا بوہت مشکل اے؟ جے ہاں تے کیوں، جے نئیں تے کیوں نئیں؟‏

ہور جانن لئی

یہوواہ خدا نال دوستی کر کے توانوں کیہہ فائدہ ہوئے گا؟‏

یہوواہ خدا کو جاننے کے فائدے (‏مینارِنگہبانی،‏ 15 فروری 2003)‏

ایس مضمون چ تُسی ویکھو گے کہ یہوواہ دے دوست بنن لئی توانوں کیہہ کرنا چاہی دا اے۔‏

مَیں خدا کا دوست کیسے بن سکتا ہوں؟‏ (‏کوئسچنز ینگ پیپل آسک—‏آنسرز دیٹ ورک،‏ جِلد 2، باب 35)‏

ایس مضمون چ پڑھو کہ اِک عورت نُوں ایہہ کیوں لگدا اے کہ یہوواہ نال دوستی دی وجہ توں اوہدی جان بچ گئی۔‏

مَیں مرنا نہیں چاہتی تھی (‏مینارِنگہبانی،‏ نمبر 1، 2017)‏

ایس آڈیو ریکارڈنگ چ سنو کہ کجھ نوجوان یہوواہ نال اپنی دوستی بارے کیہہ کہندے نیں۔‏

خدا دا دوست بنن دا کیہہ مطلب اے؟‏ (‏46:‏1)‏