یسوع مسیح کیہو جہی ہستی اے؟‏

پاک کلام توں اَسی سکھنے آں کہ یسوع مسیح نے زمین تے آ کے بڑی ودھیا تلیم دِتی، بڑے چنگے چنگے کم کیتے تے بڑیاں شاندار خوبیاں ظاہر کیتیاں۔ ایہناں گلاں تے غور کر کے اَسی یسوع مسیح تے یہوواہ خدا دے ہور وی نیڑے ہو جانے آں۔ ایس سبق چ اَسی یسوع مسیح دِیاں کجھ خوبیاں بارے گل کراں گے تے ویکھاں گے کہ اَسی اوہ خوبیاں اپنی زندگی چ کیویں ظاہر کر سکنے آں۔‏

1.‏ یسوع مسیح کیس لحاظ نال اپنے باپ وانگوں اے؟‏

زمین تے آن توں پہلاں، یسوع نے کروڑاں سال اپنے باپ نال گزارے۔ ایس لئی اوہدی سوچ وی اپنے باپ ورگی اے تے اوہ کم وی اپنے باپ ورگے ای کردا اے۔ (‏یوحنا 5:‏19 نُوں پڑھو۔)‏ ایسے لئی یسوع نے کہیا سی کہ جنہے مینوں ویکھیا اے اوہنے باپ نُوں وی ویکھیا اے۔‏ (‏یوحنا 14:‏9‏)‏ یسوع دِیاں فرق فرق خوبیاں تے غور کر کے اَسی یہوواہ بارے ہور سکھن دے قابل ہنے آں۔ مثال لئی جیویں یسوع لوکاں نال بڑے رحم نال پیش آیا اوہدے توں ظاہر ہویا کہ یہوواہ بڑا رحم‌دل اے تے ساڈی بڑی فکر کردا اے۔‏

2.‏ یسوع نے کیویں ظاہر کیتا کہ اوہ یہوواہ نُوں پیار کردا اے؟‏

یسوع مسیح نے کہیا سی کہ میں اوہی کم کرنا واں جیہڑا باپ کرن لئی کہندا اے تاکہ دُنیا نُوں پتہ لگ جائے کہ میں باپ نُوں پیار کرنا واں۔‏ (‏یوحنا 14:‏31‏)‏ جدوں یسوع مسیح زمین تے سی تے اوہنے فرق فرق طریقیاں نال ظاہر کیتا کہ اوہ اپنے باپ یہوواہ نُوں بوہت پیار کردا اے۔مثال لئی اوہ مشکل توں مشکل حالاتاں چ وی یہوواہ دا وفادار رہیا۔اوہنے لوکاں نُوں یہوواہ بارے بڑے شوق نال دَسیا نالے اوہناں دی مدد کیتی کہ اوہ یہوواہ دے دوست بنن۔—‏یوحنا 14:‏23‏۔‏

3.‏ یسوع نے ایہہ کیویں ظاہر کیتا کہ اوہ لوکاں نُوں پیار کردا اے؟‏

بائبل دَسدی اے کہ یسوع مسیح انساناں نُوں بوہت پیار کردا اے۔‏ (‏امثال 8:‏31)‏ اوہنے فرق فرق طریقیاں نال لوکاں لئی پیار ظاہر کیتا۔ مثال لئی اوہنے لوکاں نُوں حوصلہ، تسلی تے امید دِتی۔اوہ ہمیشاں لوکاں نال بڑے صبر نال پیش آندا سی تے لوکاں چ کوئی فرق نئیں کردا سی۔اوہ ایناں رحم‌دل سی کہ اوہنے لوکاں دی مدد کرن لئی وڈے وڈے معجزے وی کیتے۔ (‏مرقس 1:‏40-‏42‏)‏ اوہنے تے انساناں لئی اپنی جان تک قربان کر دِتی۔ پر یسوع خاص طور تے اوہناں لوکاں نُوں پیار کردا اے جیہڑے اوہدی تلیم تے عمل کر دے نیں۔—‏یوحنا 15:‏13، 14 نُوں پڑھو۔‏

ہور سوچ‌وچار لئی

4.‏ یسوع مسیح اپنے باپ نال بوہت پیار کردا اے

یسوع دی مثال توں اَسی سکھنے آں کہ اَسی خدا لئی پیار کیویں وکھا سکنے آں۔ لُوقا 6:‏12 تے یوحنا 15:‏10؛‏ 17:‏26 نُوں پڑھو۔‏ ہر ایت نُوں پڑھن دے بعد ایس سوال تے گل بات کرو:‏

• اَسی یسوع مسیح وانگوں ایہہ کیویں ظاہر کر سکنے آں کہ اَسی یہوواہ نُوں بوہت پیار کرنے آں؟‏

6.‏ یسوع بوہت ای کُھلے دل والا اے

یسوع امیر تے نئیں سی پر اوہ بوہت ای کُھلے دل والا سی تے اوہنے نصیحت کیتی کہ اَسی وی کُھلے دل نال دُوجیاں دی مدد کرئیے۔ اعمال 20:‏35 نُوں پڑھو تے فیر ایس سوال تے گل بات کرو:‏

• ایس ایت چ یسوع نے خوش رہن بارے کیہہ دَسیا؟‏

ویڈیو چلاؤ تے فیر ایس سوال تے گل بات کرو:‏

ویڈیو :‏ لین نالوں دین وچ بوہتی خوشی مِلدی اے—‏حصہ (‏00:‏4)‏

• بھانویں اَسی امیر آں یاں نئیں اَسی کُھلے دل نال دُوجیاں دی مدد کیویں کر سکنے آں؟‏

کیہہ توانوں پتہ اے؟‏

بائبل سکھاندی اے کہ سانوں یسوع مسیح دے وسیلے نال یہوواہ کولوں دُعا کرنی چاہی دی اے۔ (‏یوحنا 16:‏23، 24 نُوں پڑھو۔)‏ اِنج دُعا کر کے اَسی ایس گل لئی شکر گزاری ظاہر کرنے آں کہ یہوواہ دے دوست بنن چ یسوع مسیح نے ساڈی بڑی مدد کیتی اے۔‏

خلاصہ

یسوع مسیح اپنے باپ یہوواہ نُوں تے سانوں بوہت پیار کردا اے۔اوہ بالکل اپنے باپ ورگا اے۔ایس لئی جِنّاں زیادہ اَسی یسوع بارے سکھنے آں اوناں ای زیادہ اَسی یہوواہ نُوں جانن دے قابل ہنے آں۔‏

دہرائی

• اَسی یسوع مسیح وانگوں ایہہ کیویں ظاہر کر سکنے آں کہ اَسی یہوواہ نُوں بوہت پیار کرنے آں؟‏

• اَسی یسوع مسیح وانگوں ایہہ کیویں ظاہر کر سکنے آں کہ اَسی لوکاں نُوں بوہت پیار کرنے آں؟‏

• یسوع مسیح دی کیہڑی خوبی توانوں سب توں زیادہ پسند اے؟‏

ہور جانن لئی

ایس مضمون چ یسوع دِیاں کجھ خوبیاں تے غور کرو جیہڑیاں اَسی وی ظاہر کر سکنے آں۔‏

یسوع‌مسیح کی طرح ‏.‏ ‏.‏ ‏.‏ (‏یسوع مسیح—‏راستہ،‏ سچائی اور زندگی،‏ صفحہ 317)‏

ایس مضمون چ پڑھو کہ یسوع دے وسیلے دُعا کرنا ضروری کیوں اے۔‏

ہمیں یسوع مسیح کے نام میں کیوں دُعا کرنی چاہیے؟‏ (‏مینارِنگہبانی،‏ 1 اپریل 2008)‏

کیہہ بائبل چ یسوع مسیح دی شکل صورت بارے کجھ دَسیا گیا اے؟‏

یسوع دی شکل صورت کیہو جہی سی؟‏ (‏ویب‌سائٹ تے مضمون)‏

یسوع مسیح عورتاں نال جیس طرحاں پیش آندا سی اوہدے توں اَسی کیہہ سکھنے آں؟‏

عورتیں خدا کے سائے میں (‏مینارِنگہبانی،‏ 1 اکتوبر 2012)‏