مرن توں بعد انساناں نال کیہہ ہوندا اے؟‏

کیہہ تواڈا کوئی عزیز موت دی وجہ توں تواڈے توں وِچھڑ گیا اے؟ اوس ویلے شاید تُسی سوچیا ہووے:‏ ”‏جدوں انسان مر جاندا اے تے اوہدے نال کیہہ ہوندا اے؟ کیہہ اَسی اپنے اوہناں عزیزاں نُوں فیر کدی مِل سکاں گے جیہڑے فوت ہو گئے نیں؟“‏ ایس سبق تے اگلے سبق چ اَسی ویکھاں گے کہ بائبل ایہناں سوالاں دے تسلی‌بخش جواب دیندی اے۔‏

1.‏ جدوں انسان مر جاندا اے تے اوہدے نال کیہہ ہوندا اے؟‏

یسوع نے کہیا کہ موت گُوڑھی نیندر وانگوں اے۔ گُوڑھی نیندر سُتے ہوئے بندے نُوں پتہ نئیں ہوندا کہ اوہدے آلے دوالے کیہہ ہو رہیا اے۔ پر موت گُوڑھی نیندر وانگوں کیویں ہو سکدی اے؟ اصل چ جدوں کوئی مر جاندا اے تے اوہنوں کوئی تکلیف محسوس نئیں ہوندی۔ جیوندے جی اوہ اپنے دوستاں تے گھر والیاں نال بھانویں جِنّاں وی پیار کردا ہووے، مرن توں بعد اوہ اوہناں نُوں یاد نئیں کر سکدا۔ پاک کلام دے مطابق مُردے کجھ وی نئیں جان دے۔‏‏—‏واعظ 9:‏5 نُوں پڑھو۔‏

2.‏ موت بارے سچائی جان کے سانوں تسلی کیوں مِلدی اے؟‏

بوہت سارے لوک صرف موت توں ای نئیں سگوں مُردیاں توں وی ڈر دے نیں۔ پر بائبل چوں موت بارے سچائی جان کے توانوں بڑی تسلی ملے گی۔ یسوع مسیح نے کہیا سی کہ سچائی توانوں آزاد کرے گی۔‏ (‏یوحنا 8:‏32‏)‏ کجھ مذہب ایہہ تلیم دیندے نیں کہ مرن توں بعد انسان چوں روح نکل کے کسے ہور جہان چ جا کے زندہ رہندی اے۔ پر بائبل ایہہ تلیم نئیں دیندی۔ سچائی ایہہ وے کہ مرن توں بعد انساناں نُوں کوئی تکلیف نئیں سہنی پیندی۔ مُردے نہ تے کجھ جان دے نیں تے نہ ای اوہ سانوں کوئی نقصان پونچا سکدے نیں۔ ایس لئی سانوں نہ تے مُردیاں دی عبادت کرنی چاہی دی اے تے نہ ای اوہناں لئی دُعا کرنی چاہی دی اے۔ سانوں اوہناں نُوں خوش کرن لئی کوئی خاص رسماں وغیرہ ادا کرن دی وی ضرورت نئیں۔‏

کجھ لوک کہندے نیں کہ اوہ مُردیاں نال گل بات کر سکدے نیں۔ پر ایہہ نئیں ہو سکدا کیونکہ اَسی بائبل چوں سکھیا اے کہ مُردے کجھ وی نئیں جان دے۔ ایہو جہے لوکاں نُوں لگدا اے کہ اوہ اپنے مرے ہوئے عزیزاں نال گل کر رہے نیں۔ پر اصل چ اوہ بُرے فرشتیاں نال گل کر رہے ہوندے نیں جیہڑے مرے ہوئے عزیزاں دا رُوپ دھار کے اوہناں نُوں مِلدے نیں۔ اِنج بُرے فرشتے لوکاں نُوں گمراہ کردے نیں۔ پر جدوں اَسی موت بارے سچائی جان جانے آں تے اَسی بُرے فرشتیاں دے ایس دھوکھے توں بچ جانے آں۔ یہوواہ خدا سانوں روحواں نال رابطہ کرن توں منع کردا اے کیونکہ اوہ جان دا اے کہ روحواں دے روپ چ بُرے فرشتے ساڈے نال رابطہ کردے نیں تے اوہ سانوں بوہت نقصان پونچا سکدے نیں۔—‏اِستثنا 18:‏10-‏12 نُوں فٹ‌نوٹ توں پڑھو۔‏a

3.‏ مُردیاں بارے سچائی جانو

مُردیاں بارے پوری دُنیا چ لوکاں دے فرق فرق عقیدے نیں۔ پر سارے عقیدے تے سچ نئیں ہو سکدے۔‏

• تواڈے علاقے چ لوک مُردیاں دی حالت بارے کیہڑے عقیدیاں نُوں من دے نیں؟‏

ویڈیو :‏ مرن توں بعد انساناں نال کیہہ ہوندا اے؟—‏حصہ (‏19:‏1)‏

واعظ 3:‏20 نُوں پڑھو تے فیر ایہناں سوالاں تے گل بات کرو:‏

• ایس ایت دے مطابق مرن توں بعد انساناں نال کیہہ ہوندا اے؟‏

• کیہہ انسان چ کوئی ایہو جہی چیز ہے وے جیہڑی اوہدے مرن توں بعد زندہ رہندی اے؟‏

بائبل چ لعزر دی موت دا ذکر کیتا گیا اے جیہڑا یسوع دا بڑا چنگا دوست سی۔ یوحنا 11:‏11-‏14 نُوں پڑھو تے غور کرو کہ یسوع مسیح نے لعزر دی حالت بارے کیہہ دَسیا۔ تے فیر ایہناں سوالاں تے گل بات کرو:‏

• یسوع نے موت نُوں کدے وانگوں کہیا؟‏

• یسوع دی ایس گل توں سانوں مُردیاں دی حالت بارے کیہہ پتہ چلدا اے؟‏

• بائبل چوں مُردیاں دی حالت بارے سچائی جان کے توانوں کیہو جیہا لگدا اے؟‏

4.‏ موت بارے سچائی جان کے سانوں فائدہ ہوندا اے

موت بارے سچائی جان کے سانوں مُردیاں توں ڈر نئیں لگے گا۔ واعظ 9:‏10 نُوں پڑھو تے فیر ایس سوال تے گل بات کرو:‏

• کیہہ مُردے سانوں نقصان پونچا سکدے نیں؟‏

بائبل چوں سچائی جان کے اَسی بوہت سارے جھوٹھے عقیدیاں توں آزاد ہو جانے آں جیویں کہ مُردیاں دی عبادت کرنا یاں اوہناں نُوں خوش کرن لئی رسماں ادا کرنا وغیرہ۔ یسعیاہ 8:‏19 تے مکاشفہ 4:‏11 نُوں پڑھو تے فیر ایس سوال تے گل بات کرو:‏

• تواڈے خیال چ یہوواہ خدا نُوں کیہو جیہا لگدا اے جدوں کوئی بندہ مُردیاں دی عبادت کر دا اے تے اوہناں کولوں مدد منگدا اے؟‏

5.‏ موت بارے سچائی جان کے سانوں تسلی مِلدی اے

بوہت سارے لوکاں نُوں ایہہ سکھایا جاندا اے کہ مرن توں بعد اوہناں نُوں گُناہواں دی سزا ملے گی۔ پر پاک کلام چوں ایہہ جان کے سانوں بڑی تسلی مِلدی اے کہ مرن توں بعد انساناں نُوں اذیت نئیں دِتی جاندی بھانویں اوہناں نے کِنّے ای بھیڑے کم کیوں نہ کیتے ہون۔ رومیوں 6:‏7 نُوں پڑھو تے فیر ایس سوال تے گل بات کرو:‏

• بائبل چ دَسیا گیا اے کہ موت توں بعد اِک بندے دے گُناہ معاف ہو جاندے نیں۔تے فیر جیہڑے لوک مر گئے نیں کیہہ اوہناں نُوں اپنے گُناہواں دی حالے وی سزا مِل رہی اے؟‏

خدا نُوں چنگی طرحاں جانن توں بعد سانوں ایس گل دا یقین ہو جاندا اے کہ اوہ انساناں نُوں مرن توں بعد عذاب چ پا ای نئیں سکدا۔ اِستثنا 32:‏4 تے 1-‏یوحنا 4:‏8 نُوں پڑھو تے فیر ایہناں سوالاں تے گل بات کرو:‏

• ایہناں ایتاں دے مطابق خدا چ بڑیاں سوہنیاں خوبیاں نیں تے فیر تواڈے خیال چ کیہہ اوہ انساناں نُوں مرن توں بعد تڑپا سکدا اے؟‏

• کیہہ موت بارے سچائی جان کے توانوں تسلی ملی اے؟ کیوں؟‏

خلاصہ

جدوں کوئی انسان مر جاندا اے تے اوہدی زندگی ختم ہو جاندی اے۔ مُردیاں نُوں نہ تے کسے عذاب چ رکھیا جاندا اے تے نہ ای اوہ زندہ لوکاں نُوں کوئی نقصان پونچا سکدے نیں۔‏

دہرائی

• مرن توں بعد انساناں نال کیہہ ہوندا اے؟‏

• موت بارے سچائی جان کے سانوں کیہہ فائدہ ہوندا اے؟‏

• موت بارے سچائی جان کے سانوں تسلی کیویں مِلدی اے؟‏

ہور جانن لئی

ایس مضمون چ پڑھو کہ بائبل چ جیس لفظ دا ترجمہ ”‏جان“‏ کیتا گیا اے اوہدا کیہہ مطلب اے۔‏

جان کیہہ اے؟‏ (‏ویب‌سائٹ تے مضمون)‏

ایس ویڈیو چ ویکھو کہ کیہہ خدا واقعی انساناں نُوں سزا دین لئی اوہناں نُوں دوزخ چ تڑپاندا اے۔‏

کیہہ خدا واقعی بھیڑے لوکاں نُوں دوزخ چ تڑپاندا اے؟‏ (‏07:‏3)‏

ایس مضمون چ پڑھو کہ مُردیاں بارے سچائی جان کے اِک بندے نُوں تسلی کیویں ملی۔‏

مَیں بائبل کے واضح جوابوں سے بڑا متاثر ہوا (‏مینارِنگہبانی دا مضمون)‏