یہوواہ تے بھروسے نے مینوں محفوظ رکھیا

یہوواہ تے بھروسا رکھن دی شروعات

مَیں 1948 چ نائیجیریا دے اِک چھوٹے جہے پِنڈ چ پیدا ہویا۔ اوسے دوران میرے چاچے مصطفیٰ تے میرے وڈے بھرا وہابی نے یہوواہ دے گواہواں دے طور تے بپتسمہ لے لیا۔ جدوں مَیں 9 سال دا ساں تے میرے ابو فوت ہو گئے جدی وجہ توں مینوں بڑا دُکھ ہویا۔ میرے بھرا وہابی نے مینوں دَسیا کہ جدوں خدا مُردیاں نُوں زندہ کرے گا تے اَسی اپنے ابو نُوں دُبارہ مل سکاں گے۔ اوہدی ایس گل توں مینوں اینی تسلی ملی کہ مَیں وی بائبل دا مطالعیا کرنا شروع کر دِتا۔ مَیں تے میرے تِن بھراواں نے 1963 چ بپتسمہ لے لیا۔‏

1965 چ مَیں اپنے وڈے بھرا ولسن نال لاگوس چلا گیا تے اوتھے اگبوبی کلیسیا چ پہل‌کاراں نال وقت گزار کے مینوں بڑا چنگا لگدا سی۔ اوہناں دی خوشی تے جوش نُوں ویکھ کے مینوں ایناں حوصلہ ملیا کہ جنوری 1968 چ مَیں وی پہل‌کار بن گیا۔‏

بیت‌ایل چ خدمت کرن والے اِک بھرا البرٹ اولوگبیبی نے نوجواناں نال گل بات کرن لئی اِک خاص بندوبست بنایا۔ اوہدے چ بھرا نے دَسیا کہ نائیجیریا دے شمالی حصے چ خاص پہل‌کاراں دی کِنّی زیادہ لوڑ اے۔ مینوں اَج وی یاد اے کہ اوس بھرا نے کہیا سی:‏”‏تُسی نوجوان او، تُسی اپنا وقت تے طاقت یہوواہ لئی استمال کر سکدے او۔ اوتھے تُسی یہوواہ دی خدمت چ بوہت کجھ کر سکدے او۔“‏ یسعیاہ نبی وانگوں مَیں وی اوتھے جانا چاہنا ساں جتھے یہوواہ مینوں بھیجنا چاہندا سی۔ ایس لئی مَیں خاص پہل‌کار بنن لئی درخاست دے دِتی۔—‏یسعیاہ 6:‏8۔‏

مئی 1968 چ مینوں خاص پہل‌کار دے طور تے شمالی نائیجیریا دے شہر کانو بھیج دِتا گیا۔ ایہہ اوہدوں دی گل اے جدوں نائیجیریا چ جنگ (‏1967-‏1970)‏ چل رہی سی۔ ایس خانہ جنگی دی وجہ توں لوکاں نُوں بڑی تکلیف سہنی پئی تے کئی لوک مارے گئے۔ ایہہ جنگ ودھدے ودھدے نائیجیریا دے مشرقی حصے تک پھیل گئی۔ اِک بھرا میرے لئی بوہت فکرمند سی۔ اوہنے مینوں کہیا کہ مَیں نائیجیریا نہ جاواں۔ پر مَیں اوہنوں کہیا:‏ ”‏شکریہ کہ توانوں میری اینی فکر اے۔جے یہوواہ چاہندا اے کہ مَیں ایس ذمے‌داری نُوں پورا کراں تے یقیناً اوہ میری مدد وی کرے گا۔“‏

جنگ والے علاقے چ وی یہوواہ تے بھروسا

شہر کانو چ حالات بڑے خراب سن۔ جنگ دی وجہ توں شہر تباہ ہو گیا سی۔ مُنادی کردے ویلے اکثر سانوں راہ چ ایہو جہے لوکاں دِیاں لاشاں نظر آندیاں سن جیہڑے جنگ چ مارے گئے سن۔ کانو چ بوہت ساریاں کلیسیاواں سن پر زیادہ‌تر بھین بھرا ایتھوں چلے گئے سن۔ اوتھے صرف 15 مبشر رہ گئے سن تے اوہ وی بڑے ڈرے ہوئے تے بے‌حوصلہ سن۔ جدوں اَسی 6 خاص پہل‌کار اوتھے پونچے تے اوہ بھین بھرا بڑے ای خوش ہوئے۔ اَسی اوہناں دا حوصلہ ودھایا تے اوہناں نُوں بڑا چنگا محسوس ہویا۔ اَسی اوہناں دی مدد کیتی تاکہ اوہ فیر توں عبادت کر سکن تے مُنادی کر سکن۔ نالے برانچ نُوں اپنی مُنادی دی رپورٹ گھل سکن تے کتاباں تے رسالیاں دا آرڈر بھیج سکن۔‏

اَسی خاص پہل‌کاراں نے ہاؤسا زبان سکھنی شروع کیتی۔ ایہدی وجہ توں بوہت سارے لوک ساڈے پیغام نُوں سُنن لگ پئے۔ پر کانو چ جیہڑا مذہب عام سی، اوہدے ممبراں نُوں ساڈیاں گلاں پسند نئیں آندیاں سن ایس لئی سانوں بڑی احتیاط کرنی پیندی سی۔ اِک وار مَیں تے اِک بھرا مُنادی کر رہے ساں تے اِک بندہ چاقو لے کے ساڈا پچھا کرن لگ پیا۔ اَسی بڑی تیز بھجے۔ ایس لئی ساڈی جان بچ گئی۔ ایہو جہے خطریاں دے باوجود یہوواہ نے ساڈی حفاظت کیتی تے مبشراں دی تعداد ودھدی گئی۔ (‏زبور 4:‏8)‏ اَج کانو چ 11 کلیسیاواں نیں جنہاں چ 500 توں زیادہ مبشر خدمت کر رہے نیں۔‏

نائیجر چ مخالفت

سانوں کانو چ آئے حالے کجھ ای وقت ہویا سی کہ اگست 1968 دے آخر چ مینوں تے دو ہور پہل‌کاراں نُوں ملک نائیجر دے سب توں وڈے شہر نیامی گھل دِتا گیا۔ سانوں چھیتی پتا لگ گیا کہ نائیجر جنوبی افریقہ دا سب توں گرم ملک اے۔ گرمی سہن دے نال نال اَسی فرانسیسی زبان وی سکھنی سی جیہڑی ایتھے عام بولی جاندی سی۔ ایہناں مشکلاں دے باوجود اَسی یہوواہ تے بھروسا رکھیا تے ایس شہر دے مبشراں نال مل کے مُنادی کرنی شروع کر دِتی۔ تھوڑے ای عرصے چ نیامی چ جیہڑے لوک پڑھنا لکھنا جان دے سن اوہناں نُوں کتاب ”‏سچائی جو باعثِ‌ابدی زندگی ہے“‏ مل گئی۔ کجھ لوک تے آپ آ کے ساڈے کولوں ایہہ کتاب منگدے سن۔‏

چھیتی ای سانوں محسوس ہو گیا کہ اوتھوں دے سرکاری افسراں نُوں یہوواہ دے گواہ پسند نئیں سن۔ جولائی 1969 چ ایس ملک چ پہلی وار کنونشن ہوئی جدے تے 20 لوک آئے۔ ایس کنونشن تے دو لوکاں دا بپتسمہ وی ہونا سی۔ پر پہلے ای دن اوتھے پولیس آ گئی تے اوہنے پروگرام رکوا دِتا۔ پولیس خاص پہل‌کاراں تے حلقے دے نگہبان نُوں تھانے لے گئی۔ اوہناں نے ساڈے کولوں بڑی پچھ‌گچھ کیتی تے سانوں اگلے دن فیر آن نُوں کہیا۔ اَسی سمجھ گئے کہ پولیس ساڈے لئی مشکل کھڑی کر سکدی اے۔ ایس لئی اَسی بپتسمے دی تقریر لئی کسے دے گھر جمع ہوئے تے مبشراں نُوں دریا چ بپتسمہ دِتا۔‏

کجھ ہفتیاں بعد نائیجر دی حکومت نے سانوں ملک چھڈن لئی کہیا۔ اوہناں نے سانوں صرف 48 گھنٹے دِتے تے جان دا بندوبست اَسی آپ کرنا سی۔ اَسی حکومت دی گل منی تے نائیجیریا برانچ چ چلے گئے۔ اوتھے سانوں نوِیاں ذمے‌داریاں ملیاں۔‏

مینوں خدمت کرن لئی نائیجیریا دے اِک پِنڈ اوریسن بیر گھل دِتا گیا۔ اوتھوں دے مبشراں نال مُنادی دا کم کرنا بڑا ودھیا رہیا۔ پر چھ مہینیاں بعد برانچ نے مینوں کہیا کہ مَیں نائیجر واپس چلا جاواں۔ شروع چ مَیں بڑا حیران تے گھبرایا ہویا ساں۔پر مینوں ایس گل دی بڑی خوشی وی سی کہ مَیں نائیجر دے بھین بھراواں نُوں دُبارہ ملاں گا۔‏

مَیں نیامی واپس گیا۔اوتھے پونچن دے اِک دن بعد مینوں نائیجر دا اِک کاروباری بندہ ملیا جیہڑا پچھان گیا کہ مَیں یہوواہ دا گواہ واں۔ ایس لئی اوہ میرے کولوں بائبل دے کئی سوال پچھن لگ پیا۔ مَیں اوہنوں بائبل کورس کرانا شروع کیتا۔ اوہنے سگریٹ تے حدوں ودھ شراب پینی چھڈ دِتی تے فیر بپتسمہ لے لیا۔ مینوں بھین بھراواں نال مل کے تے نائیجر دے فرق فرق علاقیاں چ خدمت کر کے بڑا مزہ آیا۔ نالے مَیں ویکھیا کہ لوک بائبل دے پیغام نُوں ہولی ہولی قبول کر رہے نیں۔ جدوں مَیں پہلی وار نائیجر آیا ساں تے اوتھے صرف 31 گواہ سن پر جدوں مَیں اوس ملک توں جا رہیا ساں تے اوتھے 69 گواہ بن چُکے سن۔‏

‏”‏سانوں گنی چ مُنادی دے کم بارے زیادہ کجھ نئیں پتہ سی“‏

دسمبر 1977 چ مَیں اِک ٹریننگ لئی فیر نائیجیریا گیا۔ تِن ہفتیاں دی ٹریننگ دے بعد برانچ کمیٹی دے منتظم بھرا میلکم ویگو نے مینوں اوہ خط پڑھن لئی کہیا جیہڑا سیرالیون برانچ وَلّوں آیا سی۔ اوتھوں دے بھراواں نُوں اِک ایہو جہے پہل‌کار بھرا دی ضرورت سی جنہوں انگریزی تے فرانسیسی زبان آندی ہووے تے جیہڑا گنی چ حلقے دے نگہبان دے طور تے خدمت کر سکے۔ بھرا میلکم نے مینوں دسیا کہ مینوں ایہہ ٹریننگ ایسے ذمے‌داری لئی دِتی گئی اے۔ اوہنے صاف صاف دَسیا کہ ایہہ ذمے‌داری نبھانا اسان نئیں اے۔ اوہنے کہیا:‏ ”‏ایس ذمے‌داری نُوں قبول کرن توں پہلاں چنگی طرحاں سوچ لے۔“‏ مَیں فوراً اوہنوں کہیا:‏ ”‏جے یہوواہ مینوں گھل رہیا اے تے مَیں ضرور جاواں گا۔“‏

مَیں سیرالیون گیا تے اوتھوں دی برانچ دے بھراواں نُوں ملیا۔ برانچ کمیٹی دے اِک ممبر نے مینوں کہیا:‏ ”‏سانوں نئیں پتہ کہ گنی چ مُنادی دا کم کیہو جیہا چل رہیا اے۔“‏ بھانویں کہ گنی چ مُنادی دے کم دی نگرانی سیرالیون برانچ کر رہی سی پر جدوں توں اوس ملک دے سیاسی حالات وِگڑے سن، برانچ دے بھراواں لئی بھین بھراواں نال رابطہ کرنا ممکن نئیں سی۔ بھراواں نے کئی وار کسے بھرا نُوں اوتھے گھلن دی کوشش کیتی پر اِنج نئیں ہو سکیا۔ ایس لئی برانچ دے بھراواں نے مینوں کہیا کہ مَیں گنی دے شہر کوناکری جاواں تے حکومت کولوں اوتھے رہن دی اجازت منگاں۔‏

جدوں مَیں کوناکری پونچیا تے مَیں نائیجیریا دی اِم‌بیسی گیا تے اوہدے سفیر نُوں ملیا۔ مَیں اوہنوں دَسیا کہ مَیں گنی چ مُنادی کرنا چاہنا واں۔ پر اوہنے مینوں کہیا کہ ”‏تُوں ایتھوں چلا جا، نئیں تے تینوں گرفتار کر لیا جائے گا یاں فیر ایس توں وی بُرا ہوئے گا۔“‏ اوہنے کہیا:‏ ”‏نائیجیریا واپس چلا جا تے اوتھے مُنادی کر۔“‏ پر مَیں کہیا:‏ ”‏مَیں ایتھے رہنا چاہنا واں۔“‏ ایس لئی اوہنے گنی دے وزیرِ داخلہ نُوں خط لکھیا تاکہ اوہ میری مدد کر سکے۔‏

چھیتی ای مَیں سیرا لیون دی برانچ واپس گیا تے اوتھے بھراواں نُوں دَسیا کہ وزیر داخلہ نے مینوں گنی چ رہن دی اجازت دے دِتی اے۔ جدوں مَیں اوہناں نُوں ایہہ دَسیا کہ ایس پورے معاملے چ یہوواہ نے میری مدد کیویں کیتی اے تے اوہ بڑے خوش ہوئے۔‏

1978 توں 1989 دے دوران مَیں گنی چ حلقے دے نگہبان دے طور تے خدمت کیتی تے کجھ عرصہ لائبیریا چ وی خدمت کیتی۔ شروع شروع چ مَیں بڑا بیمار رہن لگ پیا۔ اِنج اکثر اوہدوں ہوندا سی جدوں مَیں شہروں باہر ہُنا ساں۔ پر بھرا مینوں ہسپتال پونچان دی پوری کوشش کر دے سن۔‏

اِک وار مَیں ملیریا دی وجہ توں بوہت بیمار ہو گیا تے میرے پیٹ چ کیڑے وی پے گئے سن۔ پر مَیں ٹھیک ہو گیا۔ بعد چوں مینوں پتہ لگیا کہ بھراواں نُوں لگ رہیا سی کہ مَیں مرن والا واں۔ ایس لئی اوہ سوچ رہے سن کہ مینوں دفنانا کتھے وے۔ ایہناں مشکلاں دے باوجود مَیں کدی وی اپنی ذمے‌داری نُوں چھڈن بارے نئیں سوچیا۔ مینوں پورا یقین سی کہ اصل چ صرف یہوواہ ای میری حفاظت کر سکدا اے کیونکہ جے مَیں مر وی گیا تے اوہ مینوں دُبارہ زندہ کر دَوے گا۔‏

میاں بیوی دے طور تے یہوواہ تے بھروسا کرنا

1988 چ مَیں ڈورکس ناں دی اِک پہل‌کار نُوں ملیا۔ اوہ یہوواہ نُوں بوہت پیار کردی سی تے بڑی خاکسار سی۔ اَسی شادی کر لئی تے اَسی دونویں مل کے یہوواہ دی خدمت کرن لگ پئے۔ اوہ یہوواہ دی خدمت چ محنت کرن تے قربانیاں دین لئی ہمیشاں تیار رہندی سی۔ اِک کلیسیا توں دُوجی کلیسیا تک جان لئی اَسی اپنا سامان چُک کے تقریباً 25 کلو میٹر (‏15 میل)‏ پیدل ٹُرنے ساں۔ ایس توں دُور دِیاں کلیسیاواں چ جان لئی اَسی راہ چ مِلن والی کسے وی سواری تے بہہ جانے ساں تاکہ خراب سڑکاں تے سفر کر سکئے۔‏

ڈورکس بڑی دلیر سی۔ مثال لئی، کدی کدار سانوں ایہو جہے دریاواں چوں لنگھنا پیندا سی جنہاں چ مگرمچھ ہوندے سن۔ اِک وار اِک جگہ تے پونچن لئی سانوں پنج دناں دا سفر کرنا پیا۔ اوتھے جان لئی سانوں چھوٹی کشتی دے ذریعے دریا پار کرنا سی کیونکہ دریا تے بنیا پل ٹُٹیا ہویا سی۔ جیویں ای ڈورکس کشتی توں اُترن لئی اُٹھی تے اوہ ڈُونگے پانی چ ڈِگ پئی۔ اوس دریا چ مگرمچھ سن تے ساڈے وچوں کسے نُوں وی تیرنا نئیں آندا سی۔ پر خدا دا شکر اے کہ کجھ بندیاں نے ڈورکس نُوں بچا لیا۔ ایس واقعے دی وجہ توں کئی راتاں تے اَسی سو وی نئیں سکے۔ فیر وی اَسی یہوواہ دی خدمت کرن چ لگے رہے۔‏

1992 دے شروع چ سانوں پتا چلیا کہ ڈورکس ماں بنن والی اے۔ ہُن اَسی فیصلہ کرنا سی کہ کیہہ اَسی کُل وقتی طور تے خدمت کراں گے۔ اَسی سوچیا ”‏یہوواہ نے سانوں تحفہ دِتا اے،“‏ ایس لئی اَسی اپنی دھی دا ناں جاہ‌گفٹ رکھیا۔ ساڈی دھی دے پیدا ہون توں چار سال بعد ساڈا پُتر ایرک پیدا ہویا۔ ساڈے دونویں بچے یہوواہ وَلّوں واقعی اِک تحفہ ثابت ہوئے۔ جاہ‌گفٹ نے کجھ عرصہ کوناکری دے ترجمے دے دفتر چ خدمت کیتی تے ایرک کلیسیا چ اِک خادم دے طور تے کم کر رہیا اے۔‏

بھانویں کے ڈورکس خاص پہل‌کار دے طور تے خدمت جاری نہ رکھ سکی پر اوہ ساڈے دونواں بچیاں دی دیکھ‌بھال کرن دے نال نال پہل‌کار دے طور تے خدمت کردی رہی۔ یہوواہ دی مدد نال مَیں خاص پہل‌کار دے طور تے خدمت جاری رکھی۔ جدوں ساڈے بچے وڈے ہو گئے تے ڈورکس نے فیر توں خاص پہل‌کار دے طور تے خدمت شروع کر دِتی۔ ہُن اَسی کوناکری چ مشنری دے طور تے خدمت کر رہے آں۔‏

یہوواہ ای حفاظت کرن والا اے

مَیں ہمیشاں اوتھے گیا جتھے یہوواہ نے مینوں گھلیا۔ مَیں تے میری بیوی نے اکثر ایہہ محسوس کیتا اے کہ یہوواہ ساڈی حفاظت کردا اے تے سانوں برکتاں دیندا اے۔ پیسے یاں چیزاں تے بھروسا کرن دی بجائے یہوواہ تے بھروسا کرن دی وجہ توں اَسی بوہت ساریاں مشکلاں تے پریشانیاں توں بچ گئے آں۔ مَیں تے ڈورکس نے اپنی زندگی دے تجربے توں سکھیا اے کہ اصل چ صرف یہوواہ ای سانوں محفوظ رکھ سکدا اے کیونکہ اوہ ساڈا نجات دین والا خدا اے۔ (‏1-‏تواریخ 16:‏35)‏ مینوں ایس گل تے پورا یقین اے کہ جیہڑے لوک یہوواہ تے بھروسا کر دے نیں، یہوواہ اوہناں دِیاں جاناں نُوں زندگی دی تھیلی چ سانبھ کے رکھے گا۔—‏1-‏سموئیل 25:‏29۔‏