بھروسا رکھو کہ یہوواہ تواڈی مدد کرے گا

1، 2.‏ (‏الف)‏ ساڈے حالاتاں تے اوہناں یہودیاں دے حالاتاں چ کیہڑیاں گلاں رلدیاں مِلدیاں نیں جیہڑے بابل توں واپس یروشلیم آئے سن؟ (‏ب)‏یہودیاں نُوں کیہڑیاں مشکلاں دا سامنا ہویا؟ (‏بکس ‏”‏حجی،‏ زکریاہ تے عزرا دے دَور چ ہون والے واقعے‏“‏ نُوں وی ویکھو۔)‏

کیہہ تُسی کدی کدی آن والے وقت بارے پریشان ہوندے او؟ ہو سکدا اے کہ تواڈی نوکری چھٹ گئی اے تے تُسی ایس گل توں پریشان او کہ تُسی اپنے خاندان دِیاں ضرورتاں نُوں کیویں پورا کرو گے۔ یاں فیر ہو سکدا اے کہ تواڈے ملک دے حالات ٹھیک نئیں نیں یاں مُنادی دے کم دی وجہ توں تواڈی مخالفت کیتی جاندی اے۔ ایس لئی شاید توانوں ایس گل دا خوف ہووے کہ کِتے تواڈے خاندان نُوں کوئی نقصان نہ پونچے۔ جے تُسی ایہناں وچوں کسے مشکل دا سامنا کر رہے او تے توانوں ایس بارے سکھ کے بڑا حوصلہ ملے گا کہ جدوں یہودیاں نُوں ایہو جہیاں مشکلاں دا سامنا ہویا تے یہوواہ نے اوہناں دی مدد کیویں کیتی۔‏

² بابل چ رہن والے یہودی کئی سالاں توں اوتھے آرام‌دہ زندگی گزار رہے سن۔ پر اوہ اپنے ملک بارے زیادہ کجھ نئیں جان‌دے سن ایس لئی اوہناں نُوں اپنے ملک واپس جان لئی مضبوط ایمان دی لوڑ سی۔ جدوں اوہ اپنے ملک چلے گئے تے تھوڑے ای چِر بعد اوہناں نُوں پیسے دھیلے دی تنگی دا سامنا ہون لگ پیا، ملک چ حالات خراب ہو گئے تے اوہناں دی مخالفت کیتی گئی۔ ایہناں گلاں دی وجہ توں اوہناں دا دھیان ہیکل نُوں دُبارہ بنان توں ہٹن لگ پیا۔ ایس لئی 520 قبل‌ازمسیح چ یہوواہ نے اپنے دو نبیاں حجی تے زکریاہ نُوں حکم دِتا کہ اوہ لوکاں دا حوصلہ ودھان تاکہ اوہ فیر توں جوش نال ہیکل بنان دا کم شروع کرن۔ (‏حجی 1:‏1؛ زکریاہ 1:‏1)‏ اَسی ویکھاں گے کہ ایہناں نبیاں دے کم دے کِنّے چنگے نتیجے نکلے۔ پر تقریباً 50 سال بعد یہودیاں دا حوصلہ فیر توں ٹُٹ گیا۔ ایس لئی عزرا جیہڑا شریعت دِیاں کاپیاں تیار کردا سی، اوہ بابل توں یروشلیم آیا تاکہ اوہ یہودیاں دا حوصلہ ودھا سکے کہ اوہ یہوواہ دی عبادت نُوں سب توں زیادہ اہمیت دین۔—‏عزرا 7:‏1، 6۔‏

3.‏ ایس مضمون چ اَسی کیہڑے سوالاں تے غور کراں گے؟ (‏امثال 22:‏19)‏

³ حجی تے زکریاہ نبی نے جیہڑیاں پیشین‌گوئیاں کیتیاں، اوہناں توں یہودیاں نُوں ایہہ حوصلہ ملیا کہ اوہ مشکلاں چ یہوواہ تے بھروسا رکھن۔ اوہناں دِیاں پیشین‌گوئیاں توں ساڈا وی بھروسا ودھدا اے کہ بھانویں ساڈی زندگی چ جیہڑیاں وی مشکلاں آ جان، یہوواہ ساڈی مدد کرے گا۔ ‏(‏امثال 22:‏19 نُوں پڑھو۔)‏ ایس مضمون چ اَسی غور کراں گے کہ یہوواہ نے حجی تے زکریاہ دے ذریعے اپنے بندیاں نُوں کیہہ پیغام دِتا۔ نالے اَسی عزرا دی مثال تے وی غور کراں گے۔ اِنج کردے ویلے سانوں ایہناں سوالاں دے جواب مِلن گے:‏ مشکلاں دا اوہناں یہودیاں تے کیہہ اثر ہویا جیہڑے اپنے ملک واپس گئے سن؟ سانوں مشکلاں چ اپنا دھیان یہوواہ دی خدمت تے کیوں رکھنا چاہی دا اے؟ تے اَسی مشکلاں چوں لنگھ‌دے ویلے یہوواہ تے اپنے بھروسے نُوں کیویں ودھا سکنے آں؟‏

مشکلاں دا یہودیاں تے کیہہ اثر ہویا؟‏

4، 5.‏ یہودیاں دا ہیکل بنان دا جوش ٹھنڈا کیوں پے گیا سی؟‏

⁴ جدوں یہودی واپس یروشلیم آئے تے اوہناں نُوں بوہت سارا کم کرنا سی۔ اوہناں نے فوراً یہوواہ لئی اِک قربان‌گاہ بنائی تے ہیکل دی نیہہ پا دِتی۔ (‏عزرا 3:‏1-‏3، 10)‏ پر چھیتی ای اوہناں دا جوش ٹھنڈا پے گیا۔ پر کیوں؟ کیونکہ اوہناں نے ہیکل نُوں بنان توں علاوہ اپنے لئی گھر بنانے سن، کھیتی باڑی کرنی سی تے اپنے خاندان دِیاں کھان پین دِیاں ضرورتاں پوریاں کرنیاں سن۔ (‏عزرا 2:‏68، 70)‏ ایہدے علاوہ اوہناں نُوں اپنے دُشمناں وَلّوں مخالفت دا وی سامنا کرنا پے رہیا سی جیہڑے ہیکل دے کم نُوں روکن لئی منصوبے بنا رہے سن۔—‏عزرا 4:‏1-‏5۔‏

⁵ اوہناں نُوں ملک چ خراب حالات دا سامنا کرنا پے رہیا سی۔ اوہناں دا ملک ہُن فارس دی حکومت دا حصہ سی۔ 530 قبل‌ازمسیح چ فارس دے بادشاہ خورس دے مرن توں بعد اخسویرس بادشاہ بنیا۔ بادشاہ اخسویرس اپنیاں فوجاں نُوں لے کے مصر نُوں فتح کرن لئی نکلیا۔ ایس سفر دے دوران ہو سکدا اے کہ اوہدیاں فوجاں نے یہودیاں نُوں کھانا، پانی تے ٹھہرن لئی تھانواں دا بندوبست کرن لئی کہیا ہووے۔ اِنج یہودیاں دِیاں مشکلاں ودھ گئیاں ہون گیاں۔ ایس توں بعد دارا بادشاہ آیا۔ اوہدے دَور چ لوک بغاوت کر رہے سن تے ملک چ حالات بڑے خراب سن۔ ایس وجہ توں یہودی پریشان ہو گئے ہون گے کہ اوہ اپنے گھر والیاں دِیاں ضرورتاں نُوں کیویں پورا کرن گے۔ ایہناں مشکلاں دی وجہ توں کجھ یہودیاں نے سوچیا ہوئے گا کہ ایہہ یہوواہ دی ہیکل نُوں بنان دا صحی وقت نئیں اے۔—‏حجی 1:‏2۔‏

6.‏ زکریاہ 4:‏6، 7 دے مطابق یہودیاں نُوں ہور کیہڑیاں مشکلاں دا سامنا کرنا پیا تے زکریاہ نے اوہناں نُوں کیہڑی گل دا یقین دَوایا؟‏

⁶ زکریاہ 4:‏6، 7 نُوں پڑھو۔‏ یہودیاں نُوں پیسے دھیلے دی تنگی تے ملک دے خراب حالات دے علاوہ مخالفت دا سامنا وی کرنا پے رہیا سی۔ 522 قبل‌ازمسیح چ اوہناں دے دُشمن ہیکل دی تعمیر تے پابندی لوان چ کامیاب ہو گئے۔ پر زکریاہ نبی نے یہودیاں نُوں یقین دَوایا کہ یہوواہ اپنی طاقت دے ذریعے اوہناں دی راہ چ آن والیاں رُکاوٹاں نُوں ہٹا دَوے گا۔ 520 قبل‌ازمسیح چ دارا بادشاہ نے نہ صرف ہیکل دی تعمیر تے لگی پابندی نُوں ہٹا دِتا سگوں ایس کم لئی یہودیاں نُوں پیسے وی دِتے تے دُوجے طریقیاں نال وی اوہناں دی مدد کیتی۔—‏عزرا 6:‏1، 6-‏10۔‏

7.‏ جدوں یروشلیم واپس آن والے یہودیاں نے یہوواہ دی مرضی نُوں سب توں زیادہ اہمیت دِتی تے اوہناں نُوں کیہڑیاں برکتاں ملیاں؟‏

⁷ یہوواہ نے حجی تے زکریاہ بنی دے ذریعے یہودیاں نال وعدہ کیتا کہ جے اوہ ہیکل دی تعمیر دے کم نُوں سب توں زیادہ اہمیت دین گے تے اوہ اوہناں دی مدد کرے گا۔ (‏حجی 1:‏8، 13، 14؛ زکریاہ 1:‏3، 16)‏ ایس گل توں حوصلہ پا کے یہودیاں نے 520 قبل‌ازمسیح چ فیر توں ہیکل نُوں بنان دا کم شروع کر دِتا تے 5 سال توں وی گھٹ عرصے چ ایہنوں مکمل کر لیا۔ کیونکہ یہودیاں نے مشکلاں دے باوجود یہوواہ دی مرضی نُوں سب توں زیادہ اہمیت دِتی ایس لئی یہوواہ نے وی اوہناں دی مدد کیتی کہ اوہ نہ صرف ہیکل نُوں بنا سکن سگوں اوہدے نیڑے وی رہ سکن۔ ایس وجہ توں یہودی خوشی نال یہوواہ دی عبادت کر سکے۔—‏عزرا 6:‏14-‏16، 22۔‏

اپنا دھیان یہوواہ دی خدمت تے رکھو

8.‏ حجی 2:‏4 توں سانوں ایہہ حوصلہ کیویں مِلدا اے کہ اَسی یہوواہ دی خدمت نُوں سب توں زیادہ اہمیت دَئیے؟ (‏فٹ‌نوٹ نُوں وی ویکھو۔)‏

⁸ اَسی ایس گل نُوں سمجھنے آں کہ جیویں جیویں وڈی مصیبت نیڑے آ رہی اے، منادی کرنا ہور وی ضروری ہوندا جا رہیا اے۔ (‏مرقس 13:‏10‏)‏ پر جدوں سانوں پیسے دھیلے دی تنگی دا سامنا ہوندا اے یاں مُنادی دے کم دی وجہ توں ساڈی مخالفت کیتی جاندی اے تے اوہدوں سانوں اپنا دھیان یہوواہ دی خدمت تے رکھنا مشکل لگ سکدا اے۔ کیہڑی گل توں سانوں مدد مل سکدی اے کہ اَسی خدا دی بادشاہی نُوں سب توں زیادہ اہمیت دَئیے؟ ایس گل تے بھروسا رکھن توں سانوں مدد مل سکدی اے کہ فوجاں دا ربb یہوواہ ساڈے نال اے۔ جے اَسی خدا دی بادشاہی نُوں سب توں زیادہ اہمیت دَواں گے تے اوہ ساڈی مدد کرے گا۔ ایس لئی سانوں ڈرن دی کوئی لوڑ نئیں۔‏‏—‏حجی 2:‏4 نُوں پڑھو۔‏

9، 10.‏ اِک میاں بیوی نے ایہہ کیویں ویکھیا کہ متی 6:‏33 چ لکھی گل بالکل سچ اے؟‏

⁹ ذرا اِک میاں بیوی دی مثال تے غور کرو جنہاں دا ناں اولیگ تے اریناc اے۔ اوہ دونویں پہل‌کار نیں۔ اوہ اِک کلیسیا دی مدد کرن لئی کسے ہور علاقے چ شفٹ ہو گئے۔ پر ایہدے بعد اوہناں دونواں دی نوکری چھٹ گئی کیونکہ اوہناں دے ملک دے حالات بڑے خراب ہو گئے سن۔بھانویں کہ اِک سال تک اوہناں نُوں کوئی نوکری نئیں ملی پر ایس سارے عرصے دے دوران اوہناں نے محسوس کیتا کہ یہوواہ اوہناں دی مدد کردا رہیا اے تے کدی کدار بھین بھراواں نے وی اوہناں دی مدد کیتی۔ اوہ ایس مشکل دا مقابلہ کیویں کر سکے؟ بھرا اولیگ شروع شروع چ بڑا پریشان سی۔ اوہنے دَسیا:‏ ”‏مُنادی چ مصروف رہن نال اَسی اپنا دھیان اوس کم تے رکھ سکے جیہڑا سب توں ضروری اے۔“‏ بھانویں کہ اوہ تے اوہدی بیوی نوکری لبھدے رہے پر ایس عرصے دے دوران اوہناں نے مُنادی کرنا نئیں چھڈیا۔‏

¹⁰ اِک دن جدوں اوہ مُنادی توں گھر واپس آئے تے اوہناں نے ویکھیا کہ اِک بھرا 160 کلومیٹر (‏100 میل)‏ دا سفر کر کے اوہناں لئی راشن دے دو تھیلے لیایا اے۔ بھرا اولیگ نے کہیا:‏ ”‏اوس دن اِک واری فیر اَسی ویکھیا کہ یہوواہ کیویں کلیسیا دے بھین بھراواں دے ذریعے ساڈے لئی فکر وکھا رہیا اے۔ سانوں یقین ہو گیا اے کہ یہوواہ اپنے بندیاں نُوں کدی نئیں بُھلدا، فیر بھانویں حالات جِنّے مرضی خراب ہون۔“‏—‏متی 6:‏33‏۔‏

11.‏ جدوں اَسی اپنا دھیان یہوواہ دی خدمت تے رکھاں گے تے اوہ کیہہ کرے گا؟‏

¹¹ یہوواہ چاہندا اے کہ اَسی اپنا دھیان مُنادی دے کم تے رکھیئے جیہڑا لوکاں دِیاں زندگیاں نُوں بچان والا کم اے۔ جیویں کہ پیراگراف نمبر 7 چ دَسیا گیا، حجی نبی نے یہوواہ دے بندیاں نُوں ہلاشیری دِتی کہ اوہ فیر توں یہوواہ دی عبادت نُوں اہمیت دین۔ یہوواہ نے اوہناں نال وعدہ کیتا سی کہ جے اوہ اِنج کرن گے تے اوہ اوہناں نُوں برکت دَوے گا۔ (‏حجی 2:‏18، 19)‏ اَسی وی ایس گل دا یقین رکھ سکنے آں کہ جدوں اَسی منادی دے کم نُوں سب توں زیادہ اہمیت دَواں گے تے یہوواہ سانوں برکت دَوے گا۔‏

اَسی یہوواہ تے اپنے بھروسے نُوں کیویں ودھا سکنے آں؟‏

12.‏ عزرا تے اوہدے نال واپس آن والے یہودیاں نُوں مضبوط ایمان دی لوڑ کیوں سی؟‏

¹² 468 قبل‌از مسیح چ جدوں یہودیاں دا دُوجا گروہ بابل توں یروشلیم جا رہیا سی تے عزرا وی اوہناں دے نال سی۔ یروشلیم جان لئی اوہناں نُوں مضبوط ایمان دی لوڑ سی کیونکہ اوہناں نُوں خطرناک رستیاں توں سفر کرنا سی تے اوہناں کول بوہت سارا سونا چاندی وی سی جیہڑا ہیکل نُوں بنان لئی ہدیے دے طور تے دِتا گیا سی۔ ایس لئی اوہناں نُوں ڈاکو پین دا خطرہ سی۔ (‏عزرا 7:‏12-‏16؛ 8:‏31)‏ پر چھیتی ای اوہناں نُوں محسوس ہویا کہ یروشلیم چ رہنا وی خطرے توں خالی نئیں اے کیونکہ اوتھے زیادہ آبادی نئیں سی نالے اوہدے دروازے وی ٹُٹے ہوئے سن۔ ایہناں حالاتاں چ عزرا نے یہوواہ اُتے اپنے بھروسے نُوں کیویں ودھایا تے اَسی اوہدے توں کیہہ سکھنے آں؟‏

13.‏ عزرا دا یہوواہ اُتے بھروسا کیویں ودھیا؟ (‏فٹ‌نوٹ نُوں وی ویکھو۔)‏

¹³ عزرا نے ویکھیا سی کہ مشکل حالاتاں چ یہوواہ نے اپنے بندیاں دی مدد کیویں کیتی۔‏ کئی سال پہلاں 484 قبل‌ازمسیح چ بادشاہ اخسویرس نے ایہہ حکم دِتا سی کہ فارس دی حکومت چ رہن والے سارے یہودیاں نُوں قتل کر دِتا جائے۔ عزرا اوس ویلے بابل چ رہندا سی جیہڑا کہ فارس دی حکومت چ شامل سی۔ (‏آستر 3:‏7، 13-‏15)‏ دُوجے یہودیاں وانگوں اوہدی جان وی خطرے چ سی۔ ایس مشکل صورتحال چ ہر صوبے چ رہن والے یہودیاں نے ماتم کیتا تے روزہ رکھیا جدے چ یقیناً اوہناں نے مدد لئی یہوواہ کولوں دُعا کیتی ہوئے گی۔ (‏آستر 4:‏3)‏ ایہدا ایہہ نتیجہ نکلیا کہ یہودیاں دے دُشمن آپ اوس کھڈے چ ڈگ پئے جیہڑا اوہناں نے یہودیاں لئی کھودیا سی۔ (‏آستر 9:‏1، 2)‏ ذرا سوچو کہ اوس ویلے عزرا تے دُوجے لوکاں نُوں کیہو جیہا محسوس ہویا ہوئے گا۔ ایس واقعے دی وجہ توں عزرا آن والیاں مشکلاں لئی تیار ہو گیا ہوئے گا تے ایس گل تے اوہدا بھروسا وی ودھیا ہوئے گا کہ یہوواہ اپنے بندیاں نُوں بچا سکدا اے۔‏d

14.‏ اِک بھین نے جدوں ویکھیا کہ یہوواہ نے مشکل وقت چ اوہدی مدد کیتی تے ایہدے توں اوہنے کیہہ سکھیا؟‏

¹⁴ جدوں وی کسے مشکل چ اَسی ویکھنے آں کہ یہوواہ ساڈی مدد کر رہیا اے تے ساڈا اوہدے تے بھروسا مضبوط ہوندا اے۔ ایس بارے ذرا بھین اینستاسیا دی مثال تے غور کرو جیہڑی مشرقی یورپ چ رہندی اے۔ اوہنے اپنی نوکری ایس لئی چھڈ دِتی تاکہ اوہ سیاسی معاملیاں چ کسے دی طرف‌داری کرن دے خطرے چ نہ پے جائے۔ اوہ کہندی اے:‏ ”‏زندگی چ پہلی واری میرے نال اِنج ہویا کہ میرے کول اِک پیسہ نئیں سی۔ مَیں ایس معاملے بارے یہوواہ کولوں دُعا کیتی تے فیر ویکھیا کہ اوہنے بڑے پیار نال میری دیکھ‌بھال کیتی۔ جے ہُن دُبارہ کدی میری نوکری چھٹ گئی تے مَیں پریشان نئیں ہوواں گی کیونکہ جے میرا اسمانی باپ اَج میرا خیال رکھ سکدا اے تے اوہ کل وی رکھے گا۔“‏

15.‏ کیہڑی چیز نے عزرا دی مدد کیتی کہ اوہ یہوواہ اُتے اپنے بھروسے نُوں قائم رکھے؟ (‏عزرا 7:‏27، 28)‏

¹⁵ عزرا نے محسوس کیتا کہ یہوواہ دا ہتھ اوہدے تے سی۔‏ جدوں عزرا نے ایس گل تے سوچ وچار کیتا ہوئے گا کہ یہوواہ کیویں کیویں اوہدی مدد کردا رہیا اے تے ضرور اوہدا بھروسا یہوواہ اُتے ودھیا ہوئے گا۔ ایہنوں سمجھن لئی ذرا اوہدی کہی ایس گل تے غور کرو:‏ میرے خدا یہوواہ دا ہتھ میرے تے سی۔ ‏(‏عزرا 7:‏27، 28 نُوں پڑھو۔)‏ اوہنے ایسے طرحاں دی گل چھ واری اپنی کتاب چ لکھی۔—‏عزرا 7:‏6، 9؛ 8:‏18، 22، 31۔‏

16.‏ کیہڑی صورتحال چ اَسی یہوواہ دی مدد نُوں محسوس کر سکنے آں؟ (‏تصویر نُوں وی ویکھو۔)‏

¹⁶ جدوں سانوں کسے مشکل دا سامنا کرنا پیندا اے تے یہوواہ ساڈی مدد کر سکدا اے۔ مثال لئی، جدوں اَسی کنونشن تے جان لئی اپنے مالک کولوں چھٹی منگنے آں یاں عبادتاں تے جان لئی اوہدے کولوں وقت منگنے آں تے اِنج سانوں ایہہ ویکھن دا موقع مِلدا اے کہ یہوواہ کیویں ساڈی مدد کر رہیا اے۔ جدوں اَسی ویکھاں گے کہ ایہدے کِنّے چنگے نتیجے نکلے نیں تے ساڈا یہوواہ اُتے بھروسا ودھے گا۔‏

17.‏ عزرا نے مشکلاں چ خاکساری کیویں ظاہر کیتی؟ (‏پہلے صفحے دی تصویر نُوں ویکھو۔)‏

¹⁷ عزرا نے خاکساری نال یہوواہ کولوں مدد منگی۔‏ عزرا جدوں وی اپنیاں ذمے‌داریاں دی وجہ توں فکرمند ہوندا سی تے اوہ خاکساری نال یہوواہ کولوں دُعا کردا سی۔ (‏عزرا 8:‏21-‏23؛ 9:‏3-‏5)‏ ایہہ ویکھ کے دُوجے لوکاں دے دل چ وی ایہہ خواہش پیدا ہوئی کہ اوہ اوہدا ساتھ دین تے اوہدے ورگا ایمان پیدا کرن۔ (‏عزرا 10:‏1-‏4)‏ جدوں وی سانوں ایس گل دی فکر ستاندی اے کہ اَسی اپنے گھر والیاں دِیاں ضرورتاں نُوں کیویں پورا کراں گے یاں اوہناں نُوں خطریاں توں کیویں بچاواں گے تے سانوں پورے ایمان نال یہوواہ کولوں دُعا کرنی چاہی دی اے۔‏

18.‏ یہوواہ تے ساڈا بھروسا کیویں ودھ سکدا اے؟‏

¹⁸ جے اَسی خاکساری نال یہوواہ کولوں دُعا کراں گے تے بھین بھراواں دی مدد نُوں قبول کراں گے تے یہوواہ اُتے ساڈا بھروسا ودھے گا۔بھین ایریکا جدے تِن بچے نیں، اوہنے مشکل حالاتاں دا سامنا کردے ویلے وی یہوواہ اُتے اپنے بھروسے نُوں قائم رکھیا۔ اوہدا اِک بچہ پیدا ہون توں پہلاں ای فوت ہو گیا تے اوہدے تھوڑے عرصے بعد اوہدا شوہر وی فوت ہو گیا۔ اوہنے دَسیا:‏ ”‏سانوں پہلاں توں ای پتہ نئیں چل سکدا کہ یہوواہ ساڈی مدد کیویں کرے گا۔ پر جدوں اوہ ساڈی مدد کردا اے تے ایہو جہے طریقیاں نال کردا اے کہ اَسی حیران رہ جانے آں۔ مَیں ویکھیا اے کہ یہوواہ نے بھین بھراواں دے ذریعے میریاں دُعاواں دا جواب دِتا اے۔اوہ مینوں کوئی ایہو جہی گل کہندے سن یاں میرے لئی کوئی ایہو جیہا کم کر دیندے سن جدے توں مینوں بڑی مدد مِلدی سی۔ جدوں مَیں اوہناں نُوں کُھل کے دسنی آں کہ میری زندگی چ کیہہ کجھ چل رہیا اے تے اوہ ہور زیادہ چنگی طرحاں میری مدد کر پاندے نیں۔“‏

آخر تک یہوواہ تے بھروسا رکھو

19، 20.‏ اَسی اوہناں یہودیاں کولوں کیہہ سکھ سکنے آں جیہڑے یروشلیم واپس نئیں جا سکے سن؟‏

¹⁹ اَسی اوہناں یہودیاں دی مثال توں وی سکھ سکنے آں جیہڑے یروشلیم واپس نئیں جا سکے۔ اوہ شاید ایس لئی واپس نئیں جا سکے سن کیونکہ اوہ وڈیرے ہو چُکے سن، بیمار سن یاں اوہناں دے سر تے اپنے خاندان دِیاں کجھ ذمے‌داریاں سن۔ پر فیر وی اوہناں نے خوشی نال یروشلیم واپس جان والے یہودیاں نُوں پیسے تے چیزاں دِتیاں تاکہ اوہ جا کے ہیکل نُوں بنا سکن۔ (‏عزرا 1:‏5، 6)‏ اِنج لگدا اے کہ یہودیاں دے پہلے گروہ دے یروشلیم آن توں 19 سال بعد وی بابل چ رہن والے یہودی خوشی نال اپنے نذرانے یروشلیم گھلدے سن۔—‏زکریاہ 6:‏10۔‏

²⁰ بھانویں اَسی یہوواہ دی خدمت چ اوناں کجھ نئیں کر رہے جِنّاں اَسی کرنا چاہنے آں تے فیر وی اَسی ایس گل دا یقین رکھ سکنے آں کہ اَسی دل نال یہوواہ دی جِنّی وی خدمت کرنے آں، اوہ اوہدی بڑی قدر کردا اے۔ اَسی ایہہ گل کیویں جاننے آں؟ کیونکہ یہوواہ نے اپنے نبی زکریاہ نُوں کہیا سی کہ اوہ اوس سونے تے چاندی دا اِک تاج بنائے جیہڑا بابل چ رہن والے یہودیاں نے گھلیا سی۔ (‏زکریاہ 6:‏11)‏ ایہہ تاج اوہناں دے خوشی نال دِتے گئے نذرانے دی یادگار سی۔ (‏زکریاہ 6:‏14)‏ ایس لئی اَسی وی یقین رکھ سکنے آں کہ اَسی ایس مشکل دَور چ یہوواہ دی خدمت کرن لئی جو کجھ وی کرنے آں، اوہ اوہنوں کدی نئیں بُھلے گا۔—‏عبرانیوں 6:‏10‏۔‏

21.‏ آن والے وقت چ بھانویں کجھ وی ہو جاوے، اَسی یہوواہ اُتے اپنے بھروسے نُوں کیویں قائم رکھ سکنے آں؟‏

²¹ ایس آخری زمانے چ سانوں مشکلاں دا سامنا ہوندا رہوے گا تے مستقبل چ تے حالات شاید ہور وی وگڑ جان۔ (‏2-‏تیمُتھیُس 3:‏1،‏ 13‏)‏ پر سانوں پریشان ہون دی لوڑ نئیں اے۔ یاد رکھو کہ حجی نبی دے زمانے چ یہوواہ نے اپنے بندیاں نُوں کیہہ کہیا سی:‏ مَیں تواڈے نال آں۔ .‏ .‏ .‏ ہمت نہ ہارو۔ (‏حجی 2:‏4، 5)‏ اَسی وی ایس گل دا یقین رکھ سکنے آں کہ جے اَسی یہوواہ دی خدمت نُوں سب توں زیادہ اہمیت دَواں گے تے اوہ ساڈے نال رہوے گا۔ آن والے وقت چ ساڈے تے بھانویں جیہڑی وی مشکل آ جاوے، جے اَسی حجی تے زکریاہ نبی دے پیغام تے غور کراں گے تے عزرا دی مثال تے عمل کرن دی کوشش کراں گے تے اِنج یہوواہ اُتے ساڈا بھروسا قائم رہوے گا۔‏