تُسی اِک چنگا جیون ساتھی کیویں لبھ سکدے او؟‏

1، 2.‏ (‏الف)‏اِک بندے نُوں شادی دے ارادے نال جانن توں پہلاں اِک مسیحی نُوں کیہڑیاں گلاں ذہن چ رکھنیاں چاہی دِیاں نیں؟ (‏ب)‏”‏کسے نُوں شادی دے ارادے نال جانن“‏ دا کیہہ مطلب اے؟ (‏‏”‏اِصطلاح دی وضاحت“‏ نُوں ویکھو۔)‏

کیہہ تُسی شادی کرنا چاہندے او؟ ایہہ سچ اے کہ خوش رہن لئی شادی کرنا ضروری نئیں۔ پر فیر وی کئی مسیحی شادی کرن دی خواہش رکھدے نیں فیر بھانویں اوہ جوان ہون یاں تھوڑی وڈی عمر والے۔ کسے بندے نُوں شادی دے ارادے نال جانن توں پہلاں ایہہ ضروری اے کہ تواڈا رشتہ یہوواہ نال مضبوط ہووے، تُسی جذباتی طور تے مضبوط ہووو تے اِک خاندان دِیاں ضرورتاں پوریاں کرن دے لائق ہووو۔‏a (‏1-‏کُرنتھیوں 7:‏36‏)‏ جے اِنج ہوئے گا تے تُسی اِک کامیاب شادی‌شُدہ زندگی گزار سکو گے۔‏

² پر اِک چنگے جیون ساتھی نُوں لبھنا ہمیشاں اسان نئیں ہوندا۔ (‏اَمثال 31:‏10)‏ تے جے توانوں کوئی پسند آ وی جاوے تے اوہدے نال گل بات شروع کرنا شاید توانوں مشکل لگے۔‏b ایس مضمون چ اَسی غور کراں گے کہ اِک مسیحی چنگا جیون ساتھی کیویں لبھ سکدا اے تے اوہدے نال گل بات کیویں شروع کر سکدا اے۔ اَسی ایہہ وی ویکھاں گے کہ کلیسیا دے دُوجے بھین بھرا اوہناں بھین بھراواں دی مدد کیویں کر سکدے نیں جیہڑے شادی کرنا چاہندے نیں۔‏

تُسی اِک چنگا جیون ساتھی کیویں لبھ سکدے او؟‏

3.‏ جیون ساتھی لبھدے ویلے اِک مسیحی نُوں کیہڑیاں گلاں یاد رکھنیاں چاہی دِیاں نیں؟‏

³ جے تُسی شادی کرنا چاہندے او تے کسے نال گل بات شروع کرن توں پہلاں ای توانوں ایہہ پتہ ہونا چاہی دا اے کہ تُسی اپنے جیون ساتھی چ کیہڑیاں خوبیاں چاہندے او۔ جے توانوں ایہہ پتہ نئیں ہوئے گا تے شاید تُسی کسے ایہو جہے بندے نال گل بات شروع کر لوو جیہڑا تواڈے لئی مناسب نئیں اے یاں کسے ایہو جہے بندے نال گل بات شروع نہ کرو جیہڑا تواڈے لئی مناسب جیون ساتھی ثابت ہو سکدا اے۔ ظاہری جہی گل اے کہ توانوں کسے ایہو جہے بندے نال شادی کرنی چاہی دی اے جیہڑا بپتسمہ‌یافتہ اے۔ (‏1-‏کُرنتھیوں 7:‏39‏)‏ پر ضروری نئیں کہ کوئی وی بپتسمہ‌یافتہ مسیحی تواڈے لئی چنگا جیون ساتھی ثابت ہوئے۔ ایس لئی تُسی اپنے آپ کولوں پچھ سکدے او:‏ ”‏مَیں زندگی چ کیہہ کرنا چاہنا واں؟ میرے جیون ساتھی چ کیہڑیاں خوبیاں ہونیاں چاہی دِیاں نیں؟ کیہہ مَیں حد توں زیادہ توقع تے نئیں کر رہیا؟“‏

4.‏ کجھ بھین بھراواں نے شادی کرن بارے دُعا چ یہوواہ کولوں کیہہ درخاست کیتی؟‏

⁴ جے تُسی شادی کرنا چاہندے او تے یقیناً تُسی ایس بارے دُعا وی کیتی ہوئے گی۔ (‏فِلپّیوں 4:‏6‏)‏ سچ اے کہ یہوواہ نے ایہہ وعدہ نئیں کیتا کہ اوہ توانوں اِک مناسب جیون ساتھی لبھ کے دَوے گا۔ پر اوہ تواڈیاں ضرورتاں تے جذبات دا خیال رکھدا اے تے مناسب جیون ساتھی لبھن چ تواڈی مدد کر سکدا اے۔ ایس لئی دُعا چ یہوواہ نُوں دَسدے رہوو کہ تُسی کیہو جیہا محسوس کردے او تے کیہہ چاہندے او۔ (‏زبور 62:‏8)‏ اوہدے کولوں ایہہ دُعا وی کرو کہ اوہ توانوں صبر تے سمجھ‌داری دَوے۔ (‏یعقوب 1:‏5‏)‏ امریکہ چ رہن والے اِک غیرشادی‌شُدہ بھرا جانc نے دَسیا کہ اوہ کیہڑیاں گلاں بارے دُعا کردا اے۔ اوہنے کہیا:‏ ”‏مَیں یہوواہ نُوں دَسنا واں کہ مَیں اپنے جیون ساتھی چ کیہڑیاں خوبیاں چاہنا واں۔ مَیں ایہہ دُعا وی کرنا واں کہ میری ملاقات کسے ایہو جہی بھین نال ہووے جیہڑی میرے لئی چنگی بیوی ثابت ہو سکدی اے۔ مَیں دُعا کرنا واں کہ مَیں اپنے اندر وی ایہو جہیاں خوبیاں پیدا کر سکاں جیہڑیاں اِک چنگا شوہر بنن لئی ضروری نیں۔“‏ سری‌لنکا چ رہن والی اِک بھین جدا ناں تانیہ اے، اوہ کہندی اے:‏ ”‏جدوں تک مینوں اِک چنگا جیون ساتھی نئیں مِلدا، مَیں یہوواہ کولوں دُعا کرنی آں کہ مَیں اوہدی وفادار تے خوش رہواں۔“‏ بھانویں کہ توانوں اِک چنگا جیون ساتھی چھیتی نئیں مِلدا تے فیر وی یاد رکھو کہ یہوواہ نے وعدہ کیتا اے کہ اوہ تواڈیاں ضرورتاں دا خیال رکھے گا تے ایس گل دا وی خیال رکھے گا کہ تُسی کلّا محسوس نہ کرو۔—‏زبور 55:‏22۔‏

5.‏ غیرشادی‌شُدہ مسیحیاں دی ملاقات ایہو جہے مسیحیاں نال کیویں ہو سکدی اے جیہڑے یہوواہ نُوں پیار کردے نیں؟ (‏1-‏کُرنتھیوں 15:‏58‏)‏ (‏تصویر نُوں وی ویکھو۔)‏

⁵ پاک کلام چ سانوں ہدیت دِتی گئی اے کہ اَسی مالک دی خدمت چ مصروف رہیے۔ ‏(‏1-‏کُرنتھیوں 15:‏58 نُوں پڑھو۔)‏ جے تُسی یہوواہ دی خدمت چ مصروف رہوو گے تے فرق فرق بھین بھراواں نال وقت گزارو گے تے توانوں نہ صرف حوصلہ ملے گا سگوں تُسی ایہو جہے بھین بھراواں نُوں وی مِل سکو گے جیہڑے تواڈے وانگوں یہوواہ دی خدمت نُوں سب توں زیادہ اہمیت دیندے نیں۔ تے جدوں تُسی جی جان نال یہوواہ نُوں خوش کرن دی کوشش کرو گے تے توانوں سچی خوشی وی ملے گی۔‏

6.‏ جیون ساتھی لبھدے ویلے غیرشادی‌شُدہ مسیحیاں نُوں کیہہ یاد رکھنا چاہی دا اے؟‏

⁶ ایس گل دا خیال رکھو کہ جیون ساتھی لبھنا تواڈی زندگی چ سب توں زیادہ اہم نہ ہوئے۔ (‏فِلپّیوں 1:‏10‏)‏ سچی خوشی دا تعلق ایس گل نال نئیں اے کہ تُسی شادی‌شُدہ او یاں غیرشادی‌شُدہ۔ سگوں ایہدا تعلق ایس گل نال اے کہ تواڈا یہوواہ نال رشتہ کِنّاں مضبوط اے۔ (‏متی 5:‏3‏)‏ جدوں تک تواڈی شادی نئیں ہوندی، تُسی زیادہ آزادی نال یہوواہ دی خدمت کر سکدے او۔ (‏1-‏کُرنتھیوں 7:‏32، 33‏)‏ اپنے وقت دا بہترین استمال کرو۔ ذرا امریکہ چ رہن والی بھین جیسیکا دی مثال تے غور کرو۔ جدوں اوہدی شادی ہوئی تے اوہدی عمر تقریباً 40 سال سی۔ بھین جیسیکا کہندی اے:‏ ”‏جدوں میری شادی نئیں وی ہوئی سی، مَیں اوہدوں وی خوش تے مطمئن رہنی ساں کیونکہ مَیں مُنادی دے کم چ مصروف رہنی ساں۔“‏

کسے بندے نُوں پرکھو

7.‏ کسے بندے نُوں ایہہ دَسن توں پہلاں کہ تُسی اوہنوں پسند کردے او، ایہہ کیوں ضروری اے کہ تُسی اوہنوں پرکھو؟ (‏اَمثال 13:‏16)‏

⁷ جے توانوں لگدا اے کہ اِک بندہ تواڈے لئی چنگا جیون ساتھی ثابت ہو سکدا اے تے تُسی کیہہ کر سکدے او؟ کیہہ توانوں فوراً اوہنوں دَس دینا چاہی دا اے کہ تُسی اوہنوں پسند کردے او؟ بائبل چ دَسیا گیا اے کہ اِک سمجھ‌دار بندہ پہلے کسے گل بارے جان دا اے تے فیر کجھ کردا اے۔ ‏(‏اَمثال 13:‏16 نُوں پڑھو۔)‏ ایس لئی جدوں تُسی کسے بندے نُوں پہلاں کجھ چِر لئی پرکھو گے تے فیر اوہنوں دَسو گے کہ تُسی اوہنوں پسند کردے او تے اِنج تُسی ظاہر کرو گے کہ تُسی سمجھ‌دار او۔ ذرا نیدرلینڈز چ رہن والے اِک بھرا ایشوین دی گل تے غور کرو۔ اوہنے کہیا:‏ ”‏کوئی بندہ توانوں بڑی چھیتی پسند وی آ سکدا اے تے ایہہ پسند بڑی چھیتی ختم وی ہو سکدی اے۔ ایس لئی جدوں تُسی کسے نُوں پرکھن لئی کجھ وقت لاؤ گے تے تُسی بس وقتی پسند دی وجہ توں اوہنوں جاننا شروع نئیں کرو گے۔“‏ کسے بندے نُوں پرکھن توں بعد ایہہ وی ہو سکدا اے کہ توانوں محسوس ہوئے کہ اوہ تواڈے لئی چنگا جیون ساتھی ثابت نئیں ہو سکدا۔‏

8.‏ کوئی غیرشادی‌شُدہ بھین بھرا کسے بندے نُوں پرکھن لئی کیہہ کر سکدا اے؟ (‏تصویر نُوں وی ویکھو۔)‏

⁸ تُسی کسے بندے نُوں کیویں پرکھ سکدے او؟ تُسی عبادتاں تے یاں بھین بھراواں نال وقت گزاردے ویلے غور کر سکدے او کہ اوہدے چ کیہڑیاں خوبیاں نیں، اوہدیاں عادتاں کیہو جہیاں نیں، اوہدے دوست کون نیں تے اوہ کیہڑیاں چیزاں بارے گل کردا اے۔ (‏لُوقا 6:‏45‏)‏ کیہہ اوہ زندگی چ اوہی کجھ کرنا چاہندا اے جو تُسی کرنا چاہندے او؟ تُسی اوہدے بارے کلیسیا دے بزرگاں تے اوہناں پُختہ مسیحیاں کولوں پچھ سکدے او جیہڑے اوہنوں چنگی طرحاں جان دے نیں۔ (‏اَمثال 20:‏18)‏ تُسی اوہناں کولوں اوہدیاں خوبیاں تے نیک نامی بارے پچھ سکدے او۔ (‏رُوت 2:‏11)‏ جدوں تُسی اوہنوں پرکھ رہے ہوندے او تے ایس گل دا خیال رکھو کہ اوہنوں عجیب محسوس نہ ہوئے، اوہدے جذبات نُوں ٹھیس نہ پونچے تے اوہنوں ایہہ محسوس نہ ہوئے کہ کوئی اوہدی زندگی چ دخل دے رہیا اے۔‏

9.‏ کسے نال گل بات شروع کرن توں پہلاں توانوں کیہڑی گل دا یقین ہونا چاہی دا اے؟‏

⁹ توانوں کسے نال گل بات شروع کرن توں پہلاں اوہنوں کِنّی دیر تک پرکھنا چاہی دا اے؟ جے تُسی بوہت چھیتی کسے نال گل بات کرنی شروع کر دیندے او تے اوہ سوچے گا کہ تُسی جلدباز او۔ (‏اَمثال 29:‏20)‏ پر جے اگلے بندے نُوں پتہ چل جاندا اے کہ تُسی اوہنوں پسند کردے او پر تُسی اوہدے نال گل کرن چ بوہت دیر لاندے او تے اوہ سوچے گا کہ تُسی فیصلے نئیں کر سکدے۔ (‏واعظ 11:‏4)‏ یاد رکھو کہ کسے نال گل شروع کرن توں پہلاں ایہہ ضروری نئیں کہ توانوں پورا یقین ہوئے کہ تُسی اوہدے نال ای شادی کرو گے۔ ایہدی بجائے توانوں ایس گل دا یقین ہونا چاہی دا اے کہ تُسی شادی کرن لئی تیار او تے اگلا بندہ تواڈے لئی چنگا جیون ساتھی ثابت ہو سکدا اے۔‏

10.‏ جے توانوں لگدا اے کہ کوئی توانوں پسند کردا اے پر تُسی اوہنوں پسند نئیں کردے تے توانوں کیہہ کرنا چاہی دا اے؟‏

¹⁰ جے توانوں لگدا اے کہ کوئی توانوں پسند کردا اے تے تُسی کیہہ کر سکدے او؟ جے تُسی اوہنوں پسند نئیں کردے تے ایہہ گل اپنے کماں توں ظاہر کرو۔ جے تُسی کسے نُوں پسند نئیں کردے تے اوہنوں ایہہ تاثر نہ دَوو کہ تواڈی گل بات شروع ہو سکدی اے۔ جے تُسی ایہو جیہا کوئی تاثر دَوو گے تے ایہہ غلط ہوئے گا۔—‏1-‏کُرنتھیوں 10:‏24؛‏ اِفِسیوں 4:‏25‏۔‏

11.‏ جے تُسی کسے لئی رشتہ لبھ رہے او تے تُسی کیہڑیاں گلاں نُوں ذہن چ رکھ سکدے او؟‏

¹¹ کجھ مُلکاں چ ماں پیو یاں رشتے‌دار اِک بندے لئی رشتہ لبھدے نیں۔ تے کجھ مُلکاں چ گھر والے یاں دوست کسے لئی رشتہ لبھدے نیں۔ ایہدے بعد اوہ کُڑی تے مُنڈے نُوں ملوان دا بندوبست کردے نیں تاکہ اوہ ویکھ سکن کہ کیہہ اوہ آپس چ گل بات شروع کر سکدے نیں۔ جے توانوں کہیا جاندا اے کہ تُسی کسے لئی رشتہ لبھو یاں کسے کُڑی مُنڈے نُوں ملوان دا بندوبست کرو تے توانوں اوہناں دونواں دِیاں ضرورتاں تے پسند ناپسند نُوں ذہن چ رکھنا چاہی دا اے۔ جے توانوں کوئی چنگا رشتہ لبھ جاندا اے تے اوس کُڑی یاں مُنڈے نُوں چنگی طرحاں جانن دی کوشش کرو۔ ویکھو کہ اوہدیاں عادتاں کیہو جہیاں نیں، اوہدے چ کیہڑیاں خوبیاں نیں تے سب توں ودھ کے اوہدا یہوواہ نال رشتہ کیہو جیہا اے۔ ایہہ ویکھنا ضروری نئیں کہ اِک بندہ کِنّاں امیر تے کِنّاں پڑھیا لکھیا اے سگوں زیادہ ضروری ایہہ وے کہ اوہدا یہوواہ نال رشتہ کِنّاں مضبوط اے۔ یاد رکھو کہ ایہہ فیصلہ کُڑی تے مُنڈے دا ہونا چاہی دا اے کہ کیہہ اوہ اِک دُوجے نال شادی کرن گے یاں نئیں۔—‏گلتیوں 6:‏5‏۔‏

گل بات شروع کرنا

12.‏ تُسی کسے بندے نُوں ایہہ کیویں دَس سکدے او کہ تُسی اوہنوں شادی دے ارادے نال ہور جاننا چاہندے او؟‏

¹² جے تُسی کسے نُوں شادی دے ارادے نال ہور زیادہ جاننا چاہندے او تے تُسی ایہہ گل اوہنوں کیویں دَس سکدے او؟‏d تُسی اوہدے نال آمنے سامنے بہہ کے یاں فون تے گل کر سکدے او۔ اوہنوں صاف صاف دَسو کہ تواڈا مقصد شادی کرنا اے ایس لئی تُسی اوہنوں ہور زیادہ جاننا چاہندے او۔ (‏1-‏کُرنتھیوں 14:‏9‏)‏ جے اوہ بندہ سوچن لئی وقت منگدا اے تے اوہدے جواب دا اِنتظار کرو۔ (‏اَمثال 15:‏28)‏ پر جے اوہ تواڈے نال گل بات ودھانا نئیں چاہندا تے اوہدے ایس فیصلے نُوں قبول کرو۔‏

13.‏ جے کوئی توانوں کہندا اے کہ اوہ توانوں پسند کردا اے تے تُسی کیہہ کر سکدے او؟ (‏کُلسّیوں 4:‏6‏)‏

¹³ جے توانوں کوئی کہندا اے کہ اوہ توانوں پسند کردا اے تے تُسی کیہہ کر سکدے او؟ اوس بندے نے بڑی ہمت کر کے تواڈے نال گل کیتی اے ایس لئی غصہ نہ کرو سگوں اوہدے نال احترام نال پیش آؤ۔ ‏(‏کُلسّیوں 4:‏6 نُوں پڑھو۔)‏ جے توانوں تھوڑا وقت چاہی دا اے تے اوہنوں دَسو کہ تُسی اوہنوں سوچ کے جواب دَوو گے۔ پر فیر اوہنوں چھیتی توں چھیتی جواب دین دی کوشش کرو۔ (‏اَمثال 13:‏12)‏ جے تُسی اوہدے نال گل بات شروع نئیں کرنا چاہندے تے اوہنوں ایہہ گل نرمی نال پر صاف صاف دَسو۔ غور کرو کہ آسڑیا چ رہن والے بھرا ہینز نے اِک بھین نُوں کیویں جواب دِتا۔ اوہنے دَسیا:‏ ”‏مَیں اوہنوں اپنا فیصلہ بڑے احترام نال پر صاف صاف دَسیا۔ مَیں اوہنوں ایہہ گل دَسن چ ذرا وی دیر نئیں لائی تاکہ اوہنوں کوئی غلط تاثر نہ ملے۔ بعد چوں وی مَیں بڑا دھیان رکھنا ساں تاکہ اوہنوں کوئی جھوٹھی امید نہ ملے۔“‏ پر جے تُسی کسے بندے نال گل بات ودھانا چاہندے او تے اوہنوں دَسو کہ تواڈے خیال چ ایہہ سب کجھ کیویں ہونا چاہی دا اے تے ایس حوالے نال اوہدی سوچ نُوں وی جانو۔ شاید فرق ثقافت یاں کسے ہور وجہ توں اِک دُوجے نُوں جانن بارے تواڈے دونواں دی سوچ فرق ہو سکدی اے۔‏

دُوجے بھین بھرا غیرشادی‌شُدہ مسیحیاں دی مدد کیویں کر سکدے نیں؟‏

14.‏ اَسی اپنیاں گلاں نال غیرشادی‌شُدہ مسیحیاں دا حوصلہ کیویں ودھا سکنے آں؟‏

¹⁴ اَسی سارے اوہناں مسیحیاں دا حوصلہ کیویں ودھا سکنے آں جیہڑے شادی کرنا چاہندے نیں؟ ایہدا اِک طریقہ ایہہ وے کہ اَسی ایہو جہیاں گلاں نہ کرئیے جنہاں توں اوہناں نُوں دُکھ پونچے۔ (‏اِفِسیوں 4:‏29‏)‏ اَسی اپنے آپ کولوں پچھ سکنے آں:‏ ”‏کیہہ مَیں اوہناں بھین بھراواں نُوں مذاق مذاق چ تنگ کرنا واں جیہڑے شادی کرنا چاہندے نیں؟ جدوں مَیں کسے کنواری بھین تے کنوارے بھرا نُوں گل بات کردے ویکھنا واں تے کیہہ مَیں ایہہ سوچنا واں کہ اوہناں دا چکر چل رہیا اے؟“‏ (‏1-‏تیمُتھیُس 5:‏13‏)‏ ایہدے علاوہ سانوں کدی وی کسے غیرشادی‌شُدہ مسیحی نُوں ایہہ نئیں محسوس کرانا چاہی دا کہ اوہدی زندگی چ کوئی کمی اے۔ بھرا ہینزجدا پہلے وی ذکر ہویا اے، اوہ کہندا اے:‏ ”‏کجھ بھرا مینوں کہندے نیں تُوں شادی کیوں نئیں کر لیندا۔ تیری تے ہُن عمر وی کافی زیادہ ہو گئی اے۔“‏ ایہو جہیاں گلاں توں غیرشادی‌شُدہ بھین بھراواں نُوں محسوس ہوندا اے کہ اوہناں دی کوئی قدر نئیں اے۔ نالے اوہناں تے ایہہ دباؤ وی ودھدا اے کہ اوہناں نُوں شادی کر لینی چاہی دی اے۔ ایہہ کِنّاں اچھا ہوئے گا کہ اَسی غیرشادی‌شُدہ مسیحیاں دی تعریف کرن دے موقعے لبھئے۔—‏1-‏تھسلُنیکیوں 5:‏11‏۔‏

15.‏ (‏الف)‏جے اَسی رشتہ لبھن چ کسے مسیحی دی مدد کرنا چاہنے آں تے سانوں رومیوں 15:‏2 دے مطابق کیہڑی گل نُوں ذہن چ رکھنا چاہی دا اے؟ (‏تصویر نُوں وی ویکھو۔)‏ (‏ب)‏تُسی ویڈیو توں کیہڑیاں گلاں سکھیاں نیں؟‏

¹⁵ کدی کدار شاید ساڈے ذہن چ آئے کہ جے فلانے بھرا دی شادی فلانی بھین نال ہو جائے تے بڑا چنگا ہوئے گا۔ جے ساڈے ذہن چ ایہہ گل آندی اے تے سانوں کیہہ کرنا چاہی دا اے؟ بائبل چ دَسیا گیا اے کہ اَسی دُوجیاں دی مرضی تے خوشی دا خیال رکھئے۔ ‏(‏رومیوں 15:‏2 نُوں پڑھو۔)‏ کجھ مسیحی نئیں چاہندے کہ کوئی بھین بھرا اوہناں نُوں کسے نال ملوائے تے کہوے کہ مینوں لگدا اے کہ ایہہ تواڈے لئی چنگا جیون ساتھی ثابت ہو سکدا اے۔ سانوں اوہناں مسیحیاں دی مرضی دا احترام کرنا چاہی دا اے۔ (‏2-‏تھسلُنیکیوں 3:‏11‏)‏ پر کجھ ہور مسیحیاں نُوں شاید چنگا لگے کہ تُسی اوہناں دی مدد کر رہے او۔ پر سانوں کسے دے کہے بغیر اوہدے ذاتی معاملیاں چ دخل نئیں دینا چاہی دا۔‏e (‏اَمثال 3:‏27)‏ کجھ بھین بھراواں نُوں ایہہ چنگا نئیں لگدا کہ کوئی اوہناں نُوں کلّے کسے نال ملوِائے تے ملاقات دا مقصد وی دَسے۔ جرمنی چ رہن والی اِک غیرشادی‌شُدہ بھین لڈیا کہندی اے:‏ ”‏تُسی جیہڑے بھین بھرا نُوں ملوانا چاہندے او، تُسی اوہناں نال ہور بھین بھراواں نُوں شامل کر سکدے او تاکہ اوہ زیادہ بھین بھراواں چ اِک دُوجے نُوں مِل سکن۔ ایہو جہے موقعے بناؤ جنہاں چ اوہ اِک دُوجے نُوں جان سکن تے فیصلہ اوہناں تے چھڈ دَوو۔“‏

16.‏ غیرشادی‌شُدہ مسیحیاں نُوں کیہہ یاد رکھنا چاہی دا اے؟‏

¹⁶ بھانویں ساڈی شادی ہوئی اے یاں نئیں ہوئی، اَسی سارے خوش تے مطمئن رہ سکنے آں۔ (‏زبور 128:‏1)‏ ایس لئی جے تُسی شادی کرنا چاہندے او پر توانوں حالے تک کوئی چنگا جیون ساتھی نئیں مِلیا تے اپنا دھیان یہوواہ دی خدمت تے رکھو۔ ذرا ملک مکاؤ چ رہن والی اِک بھین دی گل تے غور کرو۔ اوہ کہندی اے:‏ ”‏تُسی جِنّاں وقت نوِیں دُنیا چ اپنے جیون ساتھی نال گزارو گے، اوہدے مقابلے چ اوہ وقت تے کجھ وی نئیں اے جیہڑا ہُن تُسی کلّے گزار رہے او۔ ایس لئی ایس وقت دی قدر کرو تے ایہنوں چنگی طرحاں استمال کرو۔“‏ پر جے توانوں کوئی چنگا بندہ مِل گیا اے تے تُسی اوہدے نال گل بات شروع کر دِتی اے تے فیر تُسی کیہہ کر سکدے او؟ اگلے مضمون چ اَسی ویکھاں گے کہ تُسی کسے نُوں جانن لئی کیہہ کر سکدے او تاکہ تُسی صحی فیصلہ کر سکو۔‏