سبق نمبر 09
دُعا دے ذریعے خدا نال اپنی دوستی مضبوط کرو
کیہہ توانوں لگدا اے کہ توانوں ہدیت تے رہنمائی دی لوڑ اے؟ کیہہ تُسی کجھ اہم سوالاں دے جواب حاصل کرنا چاہندے او؟ کیہہ توانوں تسلی تے حوصلے دی لوڑ اے؟ کیہہ تُسی یہوواہ خدا دے نیڑے جانا چاہندے او؟ ایہہ سارے کم دُعا دے ذریعے ہو سکدے نیں۔ پر سانوں کیس طرحاں دُعا کرنی چاہی دی اے؟ کیہہ خدا سارے لوکاں دِیاں دُعاواں سُن دا اے؟ تُسی کیہہ کر سکدے او تاکہ خدا تواڈیاں دُعاواں نُوں سُنے؟ ایس سبق چ اَسی ایہناں گلاں تے غور کراں گے۔
1. سانوں کدے کولوں دُعا کرنی چاہی دی اے تے اَسی کیہڑیاں گلاں بارے دُعا کر سکنے آں؟
یسوع نے سکھایا کہ سانوں صرف اپنے اسمانی باپ یہوواہ کولوں دُعا کرنی چاہی دی اے۔ یسوع آپ وی اوہدے کولوں ای دُعا کردا سی۔ اوہنے آکھیا کہ تُسی اِنج دُعا کریا کرو: اَے اسمانی باپ۔ (متی 6:9) جدوں اَسی یہوواہ کولوں دُعا کرنے آں تے اوہدے نال ساڈی دوستی مضبوط ہوندی اے۔
اَسی کسے وی گل بارے دُعا کر سکنے آں۔ پر جے اَسی چاہنے آں کہ خدا ساڈیاں دُعاواں سُنے تے فیر سانوں اوہدی مرضی مطابق دُعا کرنی چاہی دی اے۔ بائبل چ دَسیا گیا اے کہ اَسی اوہدی مرضی مطابق جو کجھ منگاں گے، اوہ ساڈی سُنے گا۔ (1-یوحنا 5:14) یسوع نے کجھ ایہو جہیاں چیزاں بارے دَسیا سی جنہاں بارے اَسی دُعا کر سکنے آں۔ (متی 6:9-13 نُوں پڑھو۔) سانوں صرف اپنے لئی نئیں سگوں دُوجیاں لئی وی دُعا کرنی چاہی دی اے۔ نالے سانوں دُعا چ خدا دِیاں ساریاں نعمتاں لئی اوہدا شکر وی کرنا چاہی دا اے۔
2. سانوں کیس طرحاں دُعا کرنی چاہی دی اے؟
بائبل چ دَسیا گیا اے کہ اپنے دل دا حال خدا اَگے کھول دَوو۔ (زبور 62:8) ایہدا مطلب ایہہ وے کہ سانوں سچے دل نال دُعا کرنی چاہی دی اے۔ اَسی اُچی آواز چ یاں فیر دل چ دُعا کر سکنے آں۔ اَسی کسے وی وقت تے کسے وی جگہ دُعا کر سکنے آں۔ نالے اَسی بھانویں جیس طرحاں وی دُعا کرئیے، بیٹھ کے، کھلو کے یاں گوڈے ٹیک کے، بس دُعا کرن دے انداز توں یہوواہ لئی عزت ظاہر ہونی چاہی دی اے۔
3. خدا ساڈیاں دُعاواں دا جواب کیویں دیندا اے؟
یہوواہ فرق فرق طریقیاں نال ساڈیاں دُعاواں دا جواب دیندا اے۔ اوہنے سانوں اپنا کلام بائبل دِتا اے جدے توں سانوں ساڈے بوہت سارے سوالاں دے جواب مِلدے نیں۔ خدا دے کلام نُوں پڑھ کے ناسمجھ انسان وی سمجھدار بن سکدا اے۔ (زبور 19:7؛ یعقوب 1:5 نُوں پڑھو۔) خدا سانوں مشکل ویلے چ تسلی تے اِطمینان دیندا اے۔ نالے جدوں سانوں مدد دی لوڑ ہوندی اے تے اوہ ساڈے ہمایماناں دے دل چ ایہہ خواہش پاندا اے کہ اوہ ساڈی مدد کرن۔
ہور سوچوچار لئی
ایس گل تے غور کرو کہ تُسی ایہو جہیاں دُعاواں کیویں کر سکدے او جنہاں توں یہوواہ خوش ہووے۔ ایہہ وی ویکھو کہ توانوں دُعا کرن توں کیہڑے فائدے ہو سکدے نیں۔
4. سانوں کیہہ کرنا چاہی دا اے تاکہ خدا ساڈیاں دُعاواں سُنے؟
جے اَسی چاہنے آں کہ خدا ساڈیاں دُعاواں نُوں سُنے تے فیر سانوں کیہڑیاں گلاں دا دھیان رکھنا چاہی دا اے؟ ویڈیو چلاؤ۔
یہوواہ چاہندا اے کہ اَسی اوہدے کولوں دُعا کرئیے۔ زبور 65:2 نُوں پڑھو تے فیر ایہناں سوالاں تے گل بات کرو:
کیہہ خدا چاہندا اے کہ تُسی اوہدے کولوں دُعا کرو؟ جے ہاں تے کیوں، جے نئیں تے کیوں نئیں؟
جے اَسی چاہنے آں کہ خدا ساڈیاں دُعاواں سُنے تے فیر سانوں اوہدی مرضی تے چلنا چاہی دا اے۔ میکاہ 3:4 تے 1-پطرس 3:12 نُوں پڑھو تے فیر ایس سوال تے گل بات کرو:
سانوں کیس گل دا خیال رکھنا چاہی دا اے تاکہ خدا ساڈیاں دُعاواں نُوں سُنے؟
جنگ دے دوران دونویں فوجاں اپنی اپنی جت لئی خدا کولوں دُعا کردیاں نیں۔ تواڈے خیال چ کیہہ خدا نُوں ایہناں دُعاواں دا جواب دینا چاہی دا اے؟
5. سانوں دُعا چ اپنے دل دا حال دَسنا چاہی دا اے
کجھ لوک رٹیاں ہوئیاں دُعاواں کردے نیں۔ پر کیہہ خدا چاہندا اے کہ اَسی ایہو جہیاں دُعاواں کرئیے؟ متی 6:7 نُوں پڑھو تے فیر ایس سوال تے گل بات کرو:
تُسی کیہہ کر سکدے او تاکہ تُسی بس رٹیاں رٹائیاں دُعاواں نہ کردے رہوو؟
تُسی ہر روز کسے اِک نعمت لئی خدا دا شکر کر سکدے او۔ جے تُسی اِک ہفتے لئی اِنج کرو گے تے تُسی ستَ دِناں چ ستَ فرق فرق گلاں بارے دُعا کر سکو گے۔
جیویں اِک پیو چاہندا اے کہ اوہدا پُتر اوہنوں اپنے دل دی گل دَسے اونویں ای خدا وی چاہندا اے کہ اَسی اوہنوں اپنے دل دی گل دَسیئے۔
6. دُعا خدا وَلّوں اِک تحفہ اے
دُعا سانوں چنگے بھیڑے ویلے حوصلہ کیویں دیندی اے؟ ویڈیو چلاؤ۔
بائبل چ دَسیا گیا اے کہ دُعا کرن نال سانوں اِطمینان تے سکون مِلدا اے۔ فِلپّیوں 4:6، 7 نُوں پڑھو تے فیر ایہناں سوالاں تے گل بات کرو:
بھانویں کہ دُعا کرن نال ساڈیاں مشکلاں ہمیشاں ختم نئیں ہوندیاں پر فیر وی دُعا کرن نال سانوں کیہہ فائدہ ہوندا اے؟
تُسی کیہڑیاں گلاں بارے دُعا کرنا چاہندے او؟
کیہہ توانوں پتہ اے؟
لفظ ”آمین“ دا مطلب اے: اِنج ای ہووے۔ ہزاراں سالاں توں لوک اپنیاں دُعاواں دے آخر چ آمین کہندے آئے نیں۔—1-تواریخ 16:36۔
7. بِلاناغہ دُعا کرو
کدی کدار اَسی اپنے کمکار چ اینے مگن ہو جانے آں کہ دُعا کرنا ای بُھل جانے آں۔ یسوع لئی دُعا کرنا کِنّاں ضروری سی؟ متی 14:23 تے مرقس 1:35 نُوں پڑھو تے فیر ایہناں سوالاں تے گل بات کرو:
یسوع مسیح دُعا کرن لئی وقت کیویں کڈھدا سی؟
تُسی ہر روز دُعا کرن لئی کدوں وقت کڈھ سکدے او؟
کجھ لوکاں دی رائے: ”دُعا کرن دا کوئی فائدہ نئیں کیونکہ کوئی سنن والا تے ہے نئیں۔“
تواڈا کیہہ خیال اے؟
خلاصہ
دلوں دُعا کرن نال اَسی خدا دے ہور نیڑے ہو جانے آں، سانوں اِطمینان تے سکون مِلدا اے تے یہوواہ دی مرضی مطابق چلن دا حوصلہ مِلدا اے۔
دہرائی
سانوں کدے کولوں دُعا کرنی چاہی دی اے؟
سانوں کیس طرحاں دُعا کرنی چاہی دی اے؟
دُعا کرن نال سانوں کیہڑے فائدے ہوندے نیں؟
ہور جانن لئی
ایہناں مضموناں چ دُعا بارے کجھ اہم سوالاں تے غور کرو۔
ایس مضمون چ تُسی پڑھو گے کہ توانوں دُعا کیوں کرنی چاہی دی اے تے تُسی اپنیاں دُعاواں نُوں ہور بہتر کیویں بنا سکدے او؟
ایس مضمون چ ویکھو کہ بائبل دے مطابق سانوں کدے کولوں دُعا کرنی چاہی دی اے۔
کیہہ مینوں مُقدساں کولوں دُعا کرنی چاہی دی اے؟ (ویبسائٹ تے مضمون)
ایس ویڈیو چ ویکھو کہ ایس گل نال کوئی فرق نئیں پیندا کہ اَسی کدوں تے کتھے دُعا کرنے آں۔