تُسی بائبل پڑھن توں پورا فائدہ کیویں حاصل کر سکدے او؟‏

کیہہ کدی اِنج ہویا اے کہ تُسی کوئی کم شروع کرنا چاہندے سو پر توانوں اوہ بڑا مشکل لگ رہیا سی؟ پر فیر تُسی ایس کم نُوں تھوڑا تھوڑا کرنا شروع کیتا تے اِنج ایہہ تواڈے لئی اسان ہو گیا۔ باقاعدگی نال بائبل پڑھن لئی وی تُسی اِنج ای کر سکدے او۔ شاید تُسی سوچو کہ ”‏بائبل تے اینی وڈی کتاب اے، میں ایہنوں کتھوں پڑھنا شروع کراں؟“‏ ایس سبق چ اَسی کجھ ایہو جہیاں گلاں تے غور کراں گے جنہاں دی مدد نال تُسی بائبل پڑھن توں پورا فائدہ حاصل کر سکو گے۔‏

1.‏ سانوں باقاعدگی نال بائبل کیوں پڑھنی چاہی دی اے؟‏

جیہڑا بندہ روز بائبل یعنی یہوواہ خدا دی شریعت پڑھدا اے اوہنوں خوشی تے کامیابی مِلدی اے۔ (‏زبُور 1:‏1-‏3 نُوں پڑھو۔)‏ کیوں نہ تُسی ہر روز تھوڑی تھوڑی دیر لئی بائبل پڑھنا شروع کرو۔ جِنّاں زیادہ تُسی خدا دے کلام بارے جانو گے اوناں ای ایہنوں پڑھن دا توانوں مزہ آئے گا۔‏

2.‏ اَسی بائبل پڑھن توں پورا فائدہ کیویں حاصل کر سکنے آں؟‏

بائبل پڑھن دا سانوں پورا فائدہ اوہدوں ای ہوئے گا جدوں اَسی ایہنوں پڑھن دے نال نال ایہدے تے سوچ‌وچار وی کراں گے۔ (‏یشوع 1:‏8)‏ بائبل پڑھدے ویلے اپنے آپ کولوں ایہو جہے سوال پچھو:‏ ”‏ایس ایت توں میں یہوواہ خدا بارے کیہہ سکھنا واں؟ میں ایس ایت تے کیویں عمل کر سکنا واں؟ تے میں ایس ایت دے ذریعے دُوجیاں دی مدد کیویں کر سکنا واں؟“‏

3.‏ تُسی بائبل پڑھن لئی وقت کیویں کڈھ سکدے او؟‏

بوہت سارے لوکاں نُوں بائبل پڑھن لئی وقت کڈھنا مشکل لگدا اے۔ کیہہ توانوں وی لگدا اے؟ بائبل چ لکھیا اے کہ سانوں اپنے وقت دا چنگا استمال کرنا چاہی دا اے۔ (‏افسیوں 5:‏16‏)‏ اِنج کرن لئی ضروری اے کہ اَسی ہر روز بائبل پڑھن لئی اِک وقت طے کرئیے۔ کجھ لوک سویرے سویرے اُٹھ کے بائبل پڑھدے نیں، کجھ اپنے کم دی تھاں تے کھانے دے وقفے چ بائبل پڑھدے نیں جد کہ کئی لوکاں نُوں سون توں پہلاں بائبل پڑھنا چنگالگدا اے۔ تُسی بائبل پڑھن لئی وقت کدوں کڈھ سکدے او؟‏

ہور سوچ‌وچار لئی

4.‏ تُسی کیہہ کر سکدے او تاکہ توانوں بائبل پڑھن دا مزہ آئے؟‏

کدی کدار شاید سانوں کوئی نواں کھانا پسند نئیں آندا پر جدوں اَسی اوہنوں کئی وار کھانے آں تے اوہ سانوں مزیدار لگن لگ پیندا اے۔ ایسے طرحاں شاید شروع شروع چ توانوں بائبل پڑھن دا مزہ نہ آئے۔ پر جے تُسی ایہنوں باقاعدگی نال پڑھو گے تے فیر ہولی ہولی توانوں ایہنوں پڑھن دا مزہ آن لگ پئے گا۔ 1-‏پطرس 2:‏2 نُوں پڑھو تے فیر ایس سوال تے گل بات کرو:‏

• کیہہ توانوں لگدا اے کہ ہر روز بائبل پڑھن نال تواڈے دل چ ایہنوں پڑھن دا شوق ودھے گا تے تُسی ایہنوں ہور وی پڑھنا چاہوو گے؟‏

ویڈیو چلاؤ تے ویکھو کہ کجھ لوکاں نُوں بائبل پڑھنا چنگا کیویں لگن لگ پیا تے فیر ایہناں سوالاں تے گل بات کرو:‏

ویڈیو :‏ خدا دے کلام نُوں دلوں پیار کرن والے نوجوان (‏33:‏5)‏

• ایس ویڈیو چ نوجواناں نُوں بائبل پڑھنا کیوں مشکل لگدا سی؟‏

• کیہڑی گل نے باقاعدگی نال بائبل پڑھن چ اوہناں دی مدد کیتی؟‏

• اوہناں نے کیہہ کیتا جدی وجہ توں اوہناں نُوں بائبل پڑھن چ بوہت مزہ آن لگ پیا؟‏

بائبل پڑھن لئی کجھ مشورے:‏

• بائبل دا اِک درست تے اسان ترجمہ استمال کرو۔‏ جے تواڈی زبان چ ‏”‏ترجمہ نئی دُنیا“‏ موجود اے تے اوہنوں استمال کرو۔ نئیں تے کوئی ہور بھروسے‌مند ترجمہ استمال کرو۔‏

• پہلے اوہ کتاباں پڑھو جیہڑیاں توانوں زیادہ پسند نیں۔‏ ہور مشوریاں لئی چارٹ ‏”‏بائبل پڑھنا شروع کرو‏“‏ نُوں ویکھو۔‏

• یاد رکھو کہ تُسی کتھوں تک بائبل نُوں پڑھ لیا اے۔‏ ایہدے لئی ایس کتاب چ دِتے گئے چارٹ ‏”‏بائبل پڑھن لئی میرا شیڈول‏“‏ نُوں استمال کرو۔‏

• ‏”‏جے ڈبلیو لائبریری“‏ ایپ نُوں استمال کرو۔‏ ایہدے ذریعے تُسی بائبل نُوں اپنے فون یاں ٹیبلٹ وغیرہ تے کسے وی جگہ تے پڑھ یاں سُن سکدے او۔‏

• کتابِ‌مُقدس کی تحقیق کے لیے گائیڈ“‏ نُوں استمال کرو۔‏ ایہدے چ نقشے تے چارٹ نیں جنہاں دے ذریعے توانوں بائبل پڑھن دا ہور وی مزہ آئے گا۔‏

5.‏ بائبل کورس دی تیاری کرو

زبور 119:‏34 نُوں پڑھو تے فیر ایس سوال تے گل بات کرو:‏

• بائبل پڑھن یاں بائبل کورس دی تیاری کرن توں پہلاں دُعا کرنا ضروری کیوں اے؟‏

تُسی بائبل کورس توں پورا فائدہ کیویں حاصل کر سکدے او؟ ایس کتاب توں بائبل کورس دی تیاری تھلے دَسے گئے طریقے دےمطابق کرو:‏

1. 1.‏ سبق دے شروع چ دِتے ہوئے پیراگراف پڑھو۔‏

2. 2.‏ سبق چ دِتیاں گیاں ایتاں نُوں پڑھو تے غور کرو کہ ایہناں دا اوس معلومات نال کیہہ تعلق اے جیہڑی سبق چ دِتی گئی اے۔‏

3. 3.‏ اوہناں لفظاں تے جملیاں تے نشان لاؤ جنہاں توں سوالاں دا جواب مِلدا اے۔ اِنج جدوں تُسی بائبل کورس کران والے نال مِل کے سبق تے گل بات کرو گے تے تُسی ایہنوں ہور چنگی طرحاں سمجھ سکو گے۔‏

کیہہ توانوں پتہ اے؟‏

یہوواہ دے گواہ بائبل دے فرق فرق ترجمے استمال کردے آئے نیں۔ پر سانوں ‏”‏کتابِ‌مُقدس​‏—‏⁠ترجمہ نئی دُنیا“‏ سب توں زیادہ پسند اے کیونکہ ایہہ درست تے اسان اے۔ نالے ایہدی سب توں خاص گل ایہہ وے کہ ایہدے چ خدا دا ناں یہوواہ استمال کیتا گیا اے۔ ساڈی ویب‌سائٹ تے ایس مضمون نُوں پڑھو:‏ ‏”‏کیہہ یہوواہ دے گواہواں دی اپنی بائبل اے؟‏‏“‏

خلاصہ

بائبل توں پورا فائدہ حاصل کرن لئی ایہنوں باقاعدگی نال پڑھو، ایہنوں سمجھن لئی دُعا کرو تے ہر وار بائبل کورس کرن توں پہلاں تیاری کرو۔‏

دہرائی

• کیہڑی گل بائبل توں پورا فائدہ حاصل کرن چ تواڈی مدد کر سکدی اے؟‏

• تُسی بائبل پڑھن تے ایہدے تے سوچ وچار کرن لئی کدوں وقت کڈھ سکدے او؟‏

• ایہہ کیوں چنگا ہوئے گا کہ تُسی پہلے توں بائبل کورس دی تیاری کرو؟‏

ہور جانن لئی

ایس مضمون چ دِتے گئے مشوریاں تے غور کرو تاکہ تُسی بائبل توں زیادہ فائدہ حاصل کر سکو۔‏

پاک کلام کو پڑھیں اور فائدہ حاصل کریں (‏مینارِنگہبانی،‏ نمبر 1، 2017)‏

ایس مضمون چ بائبل پڑھن دے تِن طریقیاں تے غور کرو۔‏

بائبل میری مدد کیویں کر سکدی اے؟—‏پہلا حصہ:‏ بائبل پڑھن دا شوق پیدا کرو (‏ویب‌سائٹ تے مضمون)‏

ایس مضمون چ پڑھو کہ اَسی بائبل پڑھن توں خوشی کیویں حاصل کر سکنے آں۔‏

بائبل میری مدد کیویں کر سکدی اے؟—‏دُوجا حصہ:‏ بائبل پڑھائی نُوں دلچسپ بناؤ (‏ویب‌سائٹ تے مضمون)‏

ایس ویڈیو چ کجھ ایہو جہے لوکاں دے مشورے سنو جیہڑے لمے عرصے توں باقاعدگی نال بائبل پڑھ رہے نیں۔‏

زندگی دے کلام نُوں مضبوطی نال پھڑی رکھو (‏06:‏2)‏