سبق نمبر 01

بائبل پڑھن نال توانوں کیہہ فائدہ ہوئے گا؟‏

چھپیا ہویا ایڈیشن

ہر انسان دے ذہن چ اکثر ایہو جہے سوال آندے نیں کہ ساڈا مستقبل کیہو جیہا ہوئے گا؟ ایس دُنیا چ ایناں دُکھ درد کیوں اے؟ تے انسان مردے کیوں نیں؟ نالے سانوں ایس گل دی فکر وی رہندی اے کہ اَسی گزارہ کیویں کراں گے یاں اَسی اپنی گھریلو زندگی نُوں خوش‌گوار کیویں بنا سکنے آں؟ بائبل چ ایہناں سوالاں دے جواب دِتے گئے نیں نالے ایہدے چ ایہو جہی صلاح وی دِتی گئی اے جدے تے عمل کر کے اَسی اپنی زندگی نُوں ہور سنوار سکنے آں۔ اصل چ بائبل دی تلیم ہر انسان لئی فائدےمند اے۔‏

1.‏ بائبل چ کیہو جہے سوالاں دے جواب دِتے گئے نیں؟‏

بائبل چ کجھ بوہت ای اہم سوالاں دے جواب دِتے گئے نیں جیویں کہ زمین تے زندگی دی شروعات کیویں ہوئی؟ انسان دی زندگی دا مقصد کیہہ اے؟ اَج کل دُنیا چ ایناں دُکھ درد کیوں اے؟ مرن توں بعد انسان نال کیہہ ہوندا اے؟ جے ہر انسان امن تے صلح نال رہنا چاہندا اے تے فیر اینیاں جنگاں کیوں ہوندیاں نیں؟ کیہہ زمین مستقبل چ تباہ ہو جائے گی؟ ایہو جہے سوال پچھنا غلط نئیں اے سگوں بائبل چ دَسیا گیا اے کہ سانوں ایہو جہے سوالاں دے جواب لبھن دی کوشش کرنی چاہی دی اے۔ دُنیا چ لکھاں لوکاں نُوں بائبل چوں ایہناں سوالاں دے جواب جان کے بڑی خوشی ملی اے۔‏

2.‏ بائبل پڑھن نال سانوں کیہہ فائدہ ہوئے گا؟‏

بائبل چ ہر انسان لئی ودھیا صلاح پائی جاندی اے۔ مثال لئی ایہدے چ دَسیا گیا اے کہ گھر دا ماحول خوش‌گوار بنان لئی خاندان دا ہر فرد کیہہ کر سکدا اے۔ ایہدے چ ایہہ وی سمجھایا گیا اے کہ اَسی پریشانیاں نال کیویں نبڑ سکنے آں تے اپنے کم توں خوشی کیویں حاصل کر سکنے آں۔ ایہناں معاملیاں دے علاوہ بائبل زندگی نال جُڑے ہور وی بوہت سارے معاملیاں بارے چنگی صلاح دیندی اے۔ سانوں امید اے کہ جدوں اَسی مِل کے ایس کتاب چوں سکھاں گے تے توانوں ایس گل دا یقین ہو جائے گا کہ بائبل چ لکھی ہر گل واقعی فائدےمند اے۔‏—‏2-‏تیمُتھیُس 3:‏16‏۔‏

ایس کتاب نُوں ایس لئی تیار کیتا گیا اے کہ تُسی ایہدے ذریعے بائبل دی تلیم نُوں ہور چنگی طرحاں سمجھ سکو۔ ایس لئی ہر سبق چ دِتیاں گئیاں ایتاں نُوں پڑھو تاکہ تُسی ویکھ سکو کہ جو کجھ وی تُسی سکھ رہے او، اوہ بالکل صحی اے۔‏

ہور سوچ‌وچار لئی

ایس گل تے غور کرو کہ بائبل پڑھن نال کئی لوکاں نُوں کیہہ فائدہ ہویا اے۔ تُسی کیہہ کر سکدے او تاکہ توانوں بائبل پڑھ کے مزہ آئے؟ تے بائبل دی تلیم نُوں سمجھن لئی کسے کولوں مدد لینا بہتر کیوں ہوئے گا؟‏

3.‏ بائبل ساڈی رہنمائی کردی اے

جیویں اِک ٹارچ سانوں ہنیرے چ صحی راہ وکھاندی اے اونویں ای بائبل سانوں زندگی چ صحی راہ وکھاندی اے۔ ایہدی مدد نال اَسی چنگے فیصلے کر سکنے آں تے ایہہ وی جان سکنے آں کہ اَگے کیہہ کجھ ہوئے گا۔‏

زبور 119:‏105 نُوں پڑھو تے فیر ایہناں سوالاں تے گل‌بات کرو:‏

ایس زبور نُوں لکھن والا بندہ خدا دے کلام بارے کیہہ سوچ رکھدا سی؟‏
خدا دے کلام بارے تواڈی سوچ کیہہ اے؟‏

اِک بندہ شام دے ویلے اِک جھیل دے کنارے جا رہیا اے تے اوہنے راہ ویکھن لئی ٹارچ پھڑی ہوئی اے۔‏

4.‏ سانوں بائبل چوں اپنے سوالاں دے جواب مِل سکدے نیں

بائبل دی تلیم حاصل کرن نال اِک عورت نُوں اوہناں سوالاں دے جواب مِل گئے جیہڑے کئی سالاں توں اوہدے ذہن چ سن۔ ویڈیو چلاؤ تے فیر ایہناں سوالاں تے گل‌بات کرو:‏

ویڈیو:‏ امید دا دامن نہ چھڈو (‏48:‏1)‏

ویڈیو چ جیہڑی عورت وکھائی گئی اے اوہ کیہڑے سوالاں دے جواب لبھ رہی سی؟‏
بائبل دی تلیم حاصل کر کے اوہنوں کیہہ فائدہ ہویا؟‏

اَسی بائبل توں سکھنے آں کہ سوال پچھنا چنگی گل اے۔ متی 7:‏7 نُوں پڑھو تے فیر ایس سوال تے گل‌بات کرو:‏

تواڈے ذہن چ کیہڑے سوال نیں جنہاں دے جواب بائبل چوں مِل سکدے نیں؟‏

5.‏ توانوں بائبل پڑھن دا بوہت مزہ آئے گا

بوہت سارے لوکاں نُوں بائبل پڑھ کے مزہ آندا اے تے ایہدی تلیم توں فائدہ وی ہوندا اے۔ ویڈیو چلاؤ تے فیر ایہناں سوالاں تے گل‌بات کرو:‏

ویڈیو:‏ نوجواناں دی رائے‏—‏بائبل پڑھن بارے (‏05:‏2)‏

ایس ویڈیو چ نوجواناں نے عام کتاباں یاں رسالے وغیرہ پڑھن بارے کیہہ کہیا؟‏
پر اوہناں نُوں بائبل پڑھنا ایناں پسند کیوں اے؟‏

بائبل پڑھن نال سانوں تسلی تے شان‌دار مستقبل دی امید ملے گی۔ رومیوں 15:‏4 نُوں پڑھو تے فیر ایس سوال تے گل‌بات کرو:‏

کیہہ تُسی وی اوہ تسلی تے امید پانا چاہندے او جدا بائبل چ ذکر کیتا گیا اے؟‏

6.‏ بائبل دی تلیم نُوں سمجھن لئی دُوجیاں کولوں مدد لوو

بوہت سارے لوکاں نے ویکھیا اے کہ کلّے بائبل پڑھن نال فائدہ تے ہوندا اے پر دُوجیاں نال مِل کے ایہدے تے گل‌بات کرن نال بوہتا فائدہ ہوندا اے۔ اعمال 8:‏26-‏31 نُوں پڑھو تے فیر ایس سوال تے گل‌بات کرو:‏

اَسی بائبل چ دَسیاں گئیاں گلاں نُوں سمجھن لئی کیہہ کر سکنے آں؟—‏30 تے 31 ایت نُوں ویکھو۔‏

تصویراں:‏ 1.‏ فِلپّس ایتھوپیا دے اِک بندے نُوں پاک کلام چوں اِک پیشین‌گوئی سمجھا رہیا اے۔ 2.‏ یہوواہ دی اِک گواہ اِک عورت تے اوہدے دو بچیاں نال بائبل چوں گل بات کر رہی اے۔‏ — جیویں ایتھوپیا دے اِک بندے نُوں پاک کلام نُوں سمجھن لئی مدد دی ضرورت سی اونویں ای اَج کل بوہت سارے لوکاں نُوں بائبل نُوں سمجھن لئی مدد دی ضرورت اے۔‏

کجھ لوکاں دی رائے:‏‏”‏بائبل پڑھن دا کوئی فائدہ نئیں اے۔“‏

ایس گل بارے تواڈا کیہہ خیال اے؟ تے تُسی اِنج کیوں کہندے او؟‏

خلاصہ

بائبل چ ودھیا صلاح پائی جاندی اے جدے تے عمل کر کے اَسی اپنی زندگی سنوار سکنے آں۔ ایہہ اہم سوالاں دے جواب دیندی اے۔ نالے ایہدے توں سانوں تسلی تے شان‌دار مستقبل دی امید مِلدی اے۔‏