سبق نمبر 37
پیسے تے کمکار بارے بائبل دی تلیم
اَج کل بوہت سارے لوک کمکار تے پیسے بارے فکرمند رہندے نیں۔ کیہہ تُسی وی کدی ایہناں بارے فکرمند ہوئے او؟ اپنیاں ضرورتاں پوریاں کرن دے نال نال یہوواہ خدا دی مرضی مطابق عبادت کرنا کدی کدار مشکل ہو جاندا اے۔ پر بائبل چ ایس مسئلے نُوں حل کرن لئی بڑے ودھیا مشورے دِتے گئے نیں۔
1. بائبل چ کمکار بارے کیہہ دَسیا گیا اے؟
خدا چاہندا اے کہ اَسی اپنے کم توں خوشی حاصل کرئیے۔ پاک کلام چ لکھیا اے کہ انسان لئی ایس توں بہتر کجھ نئیں کہ اوہ اپنی ساری محنت توں خوش ہووے۔ (واعظ 2:24) یہوواہ خدا آپ بڑی محنت نال کم کردا اے۔ سانوں وی اوہدے وانگوں محنتی بننا چاہی دا اے۔ اِنج اَسی اوہنوں وی خوش کراں گے تے آپ وی خوش رہواں گے۔
کمکار کرنا ضروری اے۔ پر سانوں اپنی زندگی چ کمکار نُوں خدا دی عبادت نالوں بوہتی اہمیت نئیں دینی چاہی دی۔ (یوحنا 6:27) یہوواہ خدا نے وعدہ کیتا اے کہ جے اَسی اوہدی عبادت نُوں اپنی زندگی چ پہلی تھاں تے رکھاں گے تے اوہ ساڈیاں لوڑاں نُوں ضرور پورا کرے گا۔
2. سانوں پیسے بارے کیہو جیہی سوچ رکھنی چاہی دی اے؟
ایہہ سچ اے کہ بائبل چ پیسے نُوں اِک پناہگاہ کہیا گیا اے۔ (واعظ 7:12) پر بائبل سانوں ایہہ وی دَسدی اے کہ پیسہ سچی خوشی نئیں دے سکدا۔ ایسے لئی سانوں نصیحت کیتی گئی اے کہ اَسی اوہناں چیزاں توں مطمئن رہیے جیہڑیاں ساڈے کول ہے نیں۔ (عبرانیوں 13:5 نُوں پڑھو۔) جے اَسی اوہناں چیزاں توں مطمئن رہواں گے جیہڑیاں ساڈے کول ہے نیں تے فیر سانوں ایہہ فکر نئیں ہوئے گی کہ ساڈے کول ایہہ کیوں نئیں تے اوہ کیوں نئیں۔ نالے اَسی قرضے چُکن توں وی بچاں گے۔ (امثال 22:7) اَسی جُوا کھیڈن توں بچاں گے تے راتوں رات امیر بنن دے خواب وکھان والیاں سکیماں دے دھوکھے چ وی نئیں آواں گے۔
3. اَسی پیسے نُوں کُھلے دل نال کیویں ورت سکنے آں؟
یہوواہ بوہت ای کُھلے دل والا خدا اے۔ سانوں وی اوہدے وانگوں کُھلے دل والے ہونا چاہی دا اے تے اپنیاں چیزاں دُوجیاں نال وَنڈن لئی تیار رہنا چاہی دا اے۔ (1-تیمُتھیُس 6:18) اَسی اپنے پیسے نُوں کُھلے دل نال کیویں ورت سکنے آں؟ اَسی کلیسیا چ عطیات دے سکنے آں تے اپنے پیسیاں نال دُوجیاں دی مدد کر سکنے آں خاص کر کے اپنے ہمایماناں دی۔ یہوواہ ایہہ نئیں ویکھدا کہ اَسی کِنّاں عطیہ دے رہے آں سگوں اوہ ایہہ ویکھدا اے کہ اَسی کیس نیت نال دے رہے آں۔ جدوں اَسی کُھلے دل نال دینے آں تے اَسی آپ وی خوش رہنے آں تے یہوواہ نُوں وی خوش کرنے آں۔—اعمال 20:35 نُوں پڑھو۔
ہور سوچوچار لئی
ویکھو کہ جدوں تُسی کمکار نُوں حدوں ودھ اہمیت نئیں دیندے تے جو کجھ تواڈے کول اے اوہدے توں ای مطمئن رہندے او تے توانوں کیہہ فائدہ ہوندا اے۔
4. اپنا کمکار اِنج کرو کہ یہوواہ دی وڈیائی ہووے
سانوں اپنا کمکار ایس طرحاں کرنا چاہی دا اے جدے توں ظاہر ہووے کہ اَسی یہوواہ دے دوست آں۔ ویڈیو چلاؤ تے فیر ایہناں سوالاں تے گل بات کرو:
ایس ویڈیو چوں تُسی کم بارے جیسن دی سوچ توں تے کم دی تھاں تے اوہدے چنگے چالچلن توں کیہہ سکھیا اے؟
جیسن نے اپنے کم نُوں اوہدی مناسب تھاں تے رکھن لئی کیہہ کیتا؟
کُلسّیوں 3:23، 24 نُوں پڑھو تے فیر ایس سوال تے گل بات کرو:
کمکار بارے مناسب سوچ رکھنا ضروری کیوں اے؟
کمکار کرنا ضروری اے۔ پر سانوں اپنی زندگی چ کمکار نُوں یہوواہ خدا دی عبادت نالوں بوہتی اہمیت نئیں دینی چاہی دی۔
5. جو کجھ ساڈے کول اے اوہدے توں ای مطمئن رہن نال سانوں فائدہ ہوندا اے
بوہت سارے لوک زیادہ توں زیادہ پیسہ کٹھا کرن دی کوشش کردے نیں۔ پر بائبل اِنج کرن توں منع کردی اے۔ 1-تیمُتھیُس 6:6-8 نُوں پڑھو تے فیر ایس سوال تے گل بات کرو:
بائبل سانوں کیہہ صلاح دیندی اے؟
اَسی تھوڑے چ وی گزارہ کر سکنے آں تے خوش رہ سکنے آں۔ ویڈیو چلاؤ تے فیر ایس سوال تے گل بات کرو:
ویڈیو چ وکھائے گئے خانداناں کول اینے پیسے نئیں سن پر فیر وی اوہ خوش کیویں رہندے نیں؟
جے ساڈے کول بوہت کجھ ہے وے پر اَسی ہور زیادہ حاصل کرنا چاہنے آں تے فیر کیہہ ہو سکدا اے؟ یسوع مسیح نے اِک مثال دے ذریعے سمجھایا کہ ایہہ بڑا خطرناک ہو سکدا اے۔ لُوقا 12:15-21 نُوں پڑھو تے فیر ایس سوال تے گل بات کرو:
یسوع نے جیہڑی مثال دِتی اوہدے توں تُسی کیہہ سکھیا اے؟—15 ایت نُوں ویکھو۔
امثال 10:22 تے 1-تیمُتھیُس 6:10 نُوں پڑھو۔ فیر ایہناں سوالاں تے گل بات کرو:
تواڈے خیال چ کیہڑی چیز بوہتی اہم اے، خدا نال دوستی یاں دولت؟ تُسی ایہہ جواب کیوں دِتا اے؟
پیسے دے پچھے بھجن دی وجہ توں توانوں کیہڑیاں مشکلاں دا سامنا ہو سکدا اے؟
6. یہوواہ ساڈیاں ضرورتاں نُوں پورا کرے گا
پیسےدھیلے دی تنگی تے بےروزگاری دی وجہ توں ساڈے ایمان دا اِمتحان ہو سکدا اے۔ ویڈیو چلاؤ تے ویکھو کہ اَسی ایس اِمتحان دا سامنا کیویں کر سکنے آں تے فیر ایہناں سوالاں تے گل بات کرو:
ایس ویڈیو چ جیہڑا بندہ وکھایا گیا اے اوہنوں کیہڑیاں مشکلاں دا سامنا ہویا؟
اوہنے ایہناں دا مقابلہ کرن لئی کیہہ کیتا؟
متی 6:25-34 نُوں پڑھو تے فیر ایس سوال تے گل بات کرو:
یہوواہ نے اوہناں لوکاں نال کیہہ وعدہ کیتا اے جیہڑے اوہنوں اپنی زندگی چ پہلی تھاں تے رکھدے نیں؟
کجھ لوکاں دی رائے: ”مینوں اپنے گھرانے دِیاں ضرورتاں پوریاں کرن لئی سخت محنت کرنی پیندی اے ایس لئی میں ہر ہفتے عبادت تے نئیں جا سکدا۔“
کیہڑیاں ایتاں توں توانوں ایہہ یقین ہوندا اے کہ یہوواہ نُوں اپنی زندگی چ پہلی تھاں تے رکھنا سب توں بہترین فیصلہ اے؟
خلاصہ
کمکار تے پیسہ ضروری اے پر ایہنوں یہوواہ دی خدمت نالوں بوہتی اہمیت نئیں دینی چاہی دی۔
دہرائی
کمکار بارے صحی سوچ رکھن لئی کیہڑی چیز تواڈی مدد کر سکدی اے؟
جو کجھ ساڈے کول اے اوہدے توں ای مطمئن رہن نال سانوں کیہہ فائدہ ہوندا اے؟
تُسی یہوواہ دے ایس وعدے تے بھروسا کیویں ظاہر کر سکدے او کہ اوہ تواڈیاں ضرورتاں نُوں پورا کرے گا؟
ہور جانن لئی
ایس مضمون چ پڑھو کہ کیہہ بائبل دے مطابق پیسہ واقعی ہر بُرائی دی جڑ اے۔
کیہہ پیسہ ہر طرحاں دی بُرائی دی جڑ اے؟ (ویبسائٹ تے مضمون)
ایس مضمون چ پڑھو کہ اَسی اپنے پیسے نال دُوجیاں دی مدد کر کے خدا نُوں کیویں خوش کر سکنے آں۔
پاک کلام چ دُوجیاں نُوں کجھ دین بارے کیہہ دَسیا گیا اے؟ (ویبسائٹ تے مضمون)
ایس مضمون چ پڑھو کہ کیہہ جُوئےبازی بس اِک کھیڈ اے۔
پاک صحیفوں کی روشنی میں—جُوئےبازی (جاگو! اپریل-جون 2015)
ایس مضمون چ ویکھو کہ اِک ایہو جہے بندے نے اپنے آپ نُوں کیویں بدلیا جیہڑا چور تے جُوئےباز سی۔
میرے سر پر تو بس گھوڑوں اور گھوڑوں کی ریس کا جنون سوار تھا (مینارِنگہبانی دامضمون)