اَسی اِک دُوجے لئی اپنی محبت نُوں کیویں قائم رکھ سکنے آں؟‏

1، 2.‏ (‏الف)‏ پولُس رسول نے ایہہ کیوں کہیا کہ محبت سب توں اہم خوبی اے؟ (‏ب)‏ایس مضمون چ اَسی کیہڑے سوالاں تے غور کراں گے؟‏

جدوں پولُس رسول نے ایمان، امید تے محبت بارے گل کیتی تے اوہنے دَسیا کہ محبت ایہناں وچوں سب توں اہم اے۔ (‏1-‏کُرنتھیوں 13:‏13‏)‏ اوہنے اِنج کیوں کہیا؟ کیونکہ مستقبل چ سانوں نوِیں دُنیا بارے خدا دے وعدیاں تے ایمان رکھن دی لوڑ نئیں ہوئے گی تے نہ ای ایہناں دے پورا ہون دی امید کرن دی لوڑ ہوئے گی کیونکہ ایہہ وعدے پورے ہو چُکے ہون گے۔ پر اَسی یہوواہ تے لوکاں نال ہمیشاں محبت کردے رہواں گے تے اوہناں لئی ساڈی محبت ودھدی جائے گی۔‏

² کیونکہ سانوں ہمیشاں محبت ظاہر کرن دی لوڑ ہوئے گی ایس لئی ایس مضمون چ اَسی ایہناں تِن سوالاں تے غور کراں گے:‏ (‏1)‏سانوں اِک دُوجے نال محبت کیوں کرنی چاہی دی اے؟ (‏2)‏اَسی اِک دُوجے لئی محبت کیویں ظاہر کر سکنے آں؟ (‏3)‏اَسی اِک دُوجے لئی اپنی محبت نُوں کیویں قائم رکھ سکنے آں؟‏

سانوں اِک دُوجے نال محبت کیوں کرنی چاہی دی اے؟‏

3.‏ سانوں اِک دُوجے نال محبت کیوں کرنی چاہی دی اے؟‏

³ دُوجیاں نال محبت کرنا ایناں ضروری کیوں اے؟ ایہدی اِک وجہ ایہہ وے کہ ساڈی محبت توں دُوجیاں نُوں پتہ چلدا اے کہ اَسی سچے مسیحی آں۔ یسوع مسیح نے اپنے شاگرداں نُوں کہیا:‏ ”‏جے تواڈے وچ پیار ہوئے گا تے ایہدے توں ای ساریاں نُوں پتہ چلے گا کہ تُسی میرے شاگرد او۔“‏ (‏یوحنا 13:‏35‏)‏ ایہدے علاوہ جدوں اَسی اِک دُوجے نال محبت کرنے آں تے اَسی اِک مُٹھ رہنے آں۔ (‏کُلسّیوں 3:‏14‏)‏ پولُس رسول نے کہیا کہ محبت اِک ایہو جیہا بندھن اے جیہڑا لوکاں نُوں پوری طرحاں اِک مُٹھ کردا اے۔ پر محبت کرن دی اِک ہور وی بڑی اہم وجہ اے۔ ایہدے بارے یوحنا رسول نے اپنے خط چ لکھیا:‏ ”‏سانوں اوہدے وَلّوں ایہہ حکم ملیا اے کہ جیہڑا خدا نال پیار کردا اے اوہ اپنے بھرا نال وی پیار کرے۔“‏ (‏1-‏یوحنا 4:‏21‏)‏ ایہدا مطلب اے کہ جدوں اَسی اِک دُوجے لئی محبت وکھانے آں تے اصل چ اَسی خدا لئی محبت وکھا رہے ہُنے آں۔‏

4، 5.‏ مثال دے کے دَسو کہ دُوجیاں نال محبت کرن دا خدا نال محبت کرن نال کیہہ تعلق اے؟‏

⁴ خدا نال محبت کرن دا بھین بھراواں نال محبت کرن نال کیہہ تعلق اے؟ ایہدے لئی ذرا اِک مثال تے غور کرو۔ جدوں ڈاکٹر ساڈی نبض ویکھدا اے تے اوہ ایس گل دا اندازہ لاندا اے کہ کیہہ ساڈا دل صحی طرحاں کم کر رہیا اے یاں نئیں۔ ایس مثال نُوں اَسی محبت تے کیویں لاگو کر سکنے آں؟‏

⁵ جیویں ڈاکٹر نُوں نبض چیک کرن نال ساڈے دل دا پتہ چلدا اے اونویں ای اَسی دُوجیاں نال جِنّی محبت کرنے آں، اوہدے توں پتہ چلدا اے کہ اَسی خدا نال کِنّی محبت کرنے آں۔ جے اَسی محسوس کرنے آں کہ بھین بھراواں لئی ساڈی محبت گھٹ ہو رہی اے تے ایہدا مطلب اے کہ خدا لئی وی ساڈی محبت گھٹ ہو رہی اے۔ پر جے اَسی بھین بھراواں نال گُوڑھی محبت کرنے آں تے ایہدے توں پتہ چلدا اے کہ اَسی خدا نال وی گُوڑھی محبت کرنے آں۔‏

6.‏ جے بھین بھراواں لئی ساڈی محبت ٹھنڈی پے رہی اے تے ایہہ پریشانی دی گل کیوں اے؟ (‏1-‏یوحنا 4:‏7-‏9،‏ 11‏)‏

⁶ جے بھین بھراواں لئی ساڈی محبت ٹھنڈی پے رہی اے تے ایہہ پریشانی دی گل اے۔ پر کیوں؟ کیونکہ ایہدا مطلب اے کہ اَسی یہوواہ توں وی دُور ہو رہے آں۔ یوحنا رسول نے ایس گل نُوں بڑی چنگی طرحاں واضح کیتا۔ اوہنے کہیا:‏ ”‏جیہڑا اپنے بھرا نال پیار نئیں کردا جنہوں اوہنے ویکھیا اے، اوہ خدا نال وی پیار نئیں کر سکدا جنہوں اوہنے نئیں ویکھیا۔“‏(‏1-‏یوحنا 4:‏20‏)‏ ایہدے توں اَسی کیہہ سکھنے آں؟ اَسی سکھنے آں کہ یہوواہ ساڈے توں اوہدوں ای خوش ہوئے گا جدوں اَسی اِک دُوجے نال محبت کراں گے۔‏‏—‏1-‏یوحنا 4:‏7-‏9،‏ 11 نُوں پڑھو۔‏

اَسی اِک دُوجے لئی محبت کیویں ظاہر کر سکنے آں؟‏

7، 8.‏ اَسی کیہڑے طریقیاں نال اِک دُوجے لئی محبت ظاہر کر سکنے آں؟‏

⁷ خدا دے کلام چ سانوں وار وار ایہہ حکم دِتا گیا اے کہ اَسی ”‏اِک دُوجے نال پیار کریئے۔“‏ (‏یوحنا 15:‏12،‏ 17‏؛ رومیوں 13:‏8؛ 1-‏تھسلُنیکیوں 4:‏9؛‏ 1-‏پطرس 1:‏22؛‏ 1-‏یوحنا 4:‏11‏)‏ پیار اِک ایہو جیہا احساس اے جیہڑا ساڈے دل چ ہوندا اے۔ پر کوئی وی انسان ساڈا دل نئیں ویکھ سکدا۔ تے فیر دُوجیاں نُوں ایہہ کیویں پتہ چلے گا کہ اَسی اوہناں نُوں پیار کرنے آں؟ ساڈیاں گلاں تے ساڈے کماں توں۔‏

⁸ اَسی کئی طریقیاں نال اپنے بھین بھراواں لئی محبت ظاہر کر سکنے آں۔ ایہدے لئی ذرا بائبل دِیاں ایہناں ایتاں تے غور کرو:‏ اِک دُوجے نال سچ بولو۔ (‏زکریاہ 8:‏16)‏ ”‏اِک دُوجے نال صلح صفائی نال رہوو۔“‏ (‏مرقس 9:‏50‏)‏ اِک دُوجے دی عزت کرن چ پہل کرو۔ (‏رومیوں 12:‏10‏)‏ اِک دُوجے نُوں قبول کرو۔ (‏رومیوں 15:‏7‏)‏ اِک دُوجے نُوں معاف کرو۔ (‏کُلسّیوں 3:‏13‏)‏ مشکلاں دا بوجھ چُکن چ اِک دُوجے دی مدد کرو۔ (‏گلتیوں 6:‏2‏)‏ اِک دُوجے نُوں تسلی دیندے رہوو۔ (‏1-‏تھسلُنیکیوں 4:‏18‏)‏ اِک دُوجے دا حوصلہ ودھاندے رہوو۔ (‏1-‏تھسلُنیکیوں 5:‏11‏)‏ اِک دُوجے لئی دُعا کرو۔—‏یعقوب 5:‏16‏۔‏

9.‏ دُوجیاں نُوں تسلی دینا اوہناں لئی محبت ظاہر کرن دا اِک خاص طریقہ کیوں اے؟ (‏تصویر نُوں وی ویکھو۔)‏

⁹ پچھلے پیراگراف چ محبت ظاہر کرن دے جیہڑے طریقیاں بارے دَسیا گیا اے، آؤ اوہناں وچوں اِک تے غور کرنے آں۔ ایہہ اوہ طریقہ اے جیہڑا پولُس رسول نے دَسیا۔ اوہنے کہیا:‏ اِک دُوجے نُوں تسلی دیندے رہوو۔ دُوجیاں نُوں تسلی دینا، اوہناں لئی محبت ظاہر کرن دا اِک خاص طریقہ کیوں اے؟ لفظ ”‏تسلی“‏ لئی پولُس رسول نے جیہڑا لفظ استمال کیتا سی اوہدے مطلب بارے اِک کتاب چ ایہہ دَسیا گیا اے:‏ ”‏جدوں کوئی مشکل چوں لنگھ رہیا ہوئے تے اوہدا حوصلہ ودھان لئی اوہدے نال کھلونا۔“‏جدوں اَسی مشکلاں چ اپنے کسے ہم‌ایمان دا حوصلہ ودھانے آں تے اِنج اَسی اوہدی مدد کر رہے ہُنے آں کہ اوہ ہمیشاں دی زندگی دی راہ تے چلدا رہوے۔ جدوں وی اَسی اپنے کسے بھین بھرا نُوں تسلی دینے آں تے اَسی اوہدے لئی محبت ظاہر کر رہے ہُنے آں۔—‏2-‏کُرنتھیوں 7:‏6، 7،‏ 13‏۔‏

10.‏ ہمدردی تے تسلی دا آپس چ کیہہ تعلق اے؟‏

¹⁰ ہمدردی محسوس کرن تے تسلی دین دا آپس چ گُوڑھا تعلق اے۔ پر کیس لحاظ نال؟ جیہڑے بندے دے دل چ دُوجیاں لئی ہمدردی ہوندی اے، اوہدا دل چاہندا اے کہ اوہ اوہناں نُوں تسلی دَوے تے اوہناں دی تکلیف نُوں دُور کرن دی کوشش کرے۔ ایہدا مطلب اے کہ پہلاں اَسی کسے لئی ہمدردی محسوس کرنے آں تے فیر اوہنوں تسلی دینے آں۔ غور کرو کہ پولُس رسول نے ایہہ کیویں دَسیا کہ یہوواہ ہمدردی دی وجہ توں دُوجیاں نُوں تسلی دیندا اے۔ اوہنے کہیا:‏ یہوواہ عظیم رحمتاں دا باپ اے تے بڑی تسلی دیندا اے۔ (‏2-‏کُرنتھیوں 1:‏3‏)‏ ایس ایت چ لفظ ”‏رحمت“‏ دا مطلب اے ”‏ہمدردی“‏۔ ایس لئی جدوں پولُس نے کہیا کہ یہوواہ عظیم رحمتاں دا باپ اے تے اوہدے کہن دا مطلب سی کہ اوہ لوکاں لئی گُوڑھی ہمدردی رکھدا اے۔ تے ایسے ہمدردی دی وجہ توں اوہ سانوں مصیبتاں چوں لنگھ‌دے ویلے تسلی دیندا اے۔ (‏2-‏کُرنتھیوں 1:‏4‏)‏ جیویں اِک پیاسے نُوں تازہ پانی دے چشمے توں پانی پی کے تازگی مِلدی اے؛ اوسے طرحاں جیہڑے لوک مصیبتاں چوں لنگھ رہے نیں، اوہناں نُوں یہوواہ کولوں تسلی تے تازگی مِلدی اے۔ اَسی یہوواہ وانگوں دُوجیاں لئی ہمدردی کیویں پیدا کر سکنے آں تے اوہناں نُوں تسلی کیویں دے سکنے آں؟ ایہدا اِک طریقہ ایہہ وے کہ اَسی اپنے اندر ایہو جہیاں خوبیاں پیدا کریئے جنہاں دی وجہ توں ساڈے دل چ دُوجیاں لئی ہمدردی پیدا ہوئے تے اَسی اوہناں نُوں تسلی دے سکئے۔ ایہہ کیہڑیاں خوبیاں نیں؟‏

11.‏ کُلسّیوں 3:‏12 تے 1-‏پطرس 3:‏8 دے مطابق سانوں اپنے اندر کیہڑیاں خوبیاں پیدا کرن دی لوڑ اے تاکہ اَسی دُوجیاں لئی محبت ظاہر کریئے تے اوہناں نُوں تسلی دَئیے؟‏

¹¹ کیہڑی چیز ساڈی مدد کرے گی کہ اَسی اپنے بھین بھراواں نال محبت کردے رہیے تے اوہناں نُوں تسلی دیندے رہیے‏؟ ایہدے لئی ضروری اے کہ اَسی اپنے دل چ دُوجیاں لئی احساس، شفقت تے مہربانی پیدا کریئے۔ ‏(‏کُلسّیوں 3:‏12؛‏ 1-‏پطرس 3:‏8 نُوں پڑھو۔)‏ ایہہ خوبیاں ساڈے کم کیویں آن گیاں؟ جدوں ایہہ خوبیاں ساڈی شخصیت دا حصہ بن جان گیاں تے ساڈے اندر ایہہ خواہش پیدا ہوئے گی کہ اَسی اوہناں بھین بھراواں نُوں تسلی دَئیے جیہڑے مصیبتاں چوں لنگھ رہے نیں۔ یسوع مسیح نے وی کجھ ایہو جہی گل دَسی۔ اوہنے کہیا کہ ”‏جیہڑیاں گلاں دل چ ہوندیاں نیں اوہی مونہہ چوں نکلدیاں نیں۔ اِک چنگا انسان اپنے دل دے چنگے خزانے چوں چنگیاں چیزاں کڈھدا اے۔“‏ (‏متی 12:‏34، 35‏)‏ بھین بھراواں نُوں تسلی دینا اوہناں لئی محبت ظاہر کرنا دا اِک بڑا خاص طریقہ اے۔‏

اَسی اِک دُوجے لئی اپنی محبت نُوں کیویں قائم رکھ سکنے آں؟‏

12.‏ (‏الف)‏ سانوں ایس گل دا خیال کیوں رکھنا چاہی دا اے کہ ساڈی محبت ٹھنڈی نہ پے جائے؟ (‏ب)‏ہُن اَسی کیہڑے سوال تے غور کراں گے؟‏

¹² اَسی چاہنے آں کہ اَسی اِک دُوجے نال پیار کردے رہیے۔ (‏1-‏یوحنا 4:‏7‏)‏ پر سانوں ایہہ گل وی یاد رکھنی چاہی دی اے کہ یسوع نے دَسیا سی کہ”‏بتھیرے لوکاں دا پیار ٹھنڈا پے جائے گا۔“‏ (‏متی 24:‏12‏)‏ سچ اے کہ یسوع نے ایہہ نئیں کہیا سی کہ اوہدے بوہت سارے شاگرداں نال وی اِنج ہوئے گا۔ پر فیر وی سانوں ایس گل دا خیال رکھنا چاہی دا اے کہ ساڈے اُتے اوہناں لوکاں دا اثر نہ ہووے جیہڑے دُوجیاں نال محبت نئیں کردے۔ تے فیر آؤ ایس اہم سوال تے غور کرنے آں:‏ اَسی ایس گل دا اندازہ کیویں لا سکنے آں کہ کیہہ اَسی اپنے بھین بھراواں نال گُوڑھی محبت کرنے آں؟‏

13.‏ سانوں ایہہ کیویں پتہ چل سکدا اے کہ اَسی اپنے بھین بھراواں نال کِنّاں پیار کرنے آں؟‏

¹³ اپنی محبت دا جائزہ لین دا اِک طریقہ ایہہ وے کہ اَسی ویکھئے کہ کجھ معاملیاں چ ساڈا رویہ کیہو جیہا ہوندا اے۔ (‏2-‏کُرنتھیوں 8:‏8‏)‏ ایہو جہے اِک معاملے بارے پطرس رسول نے وی دَسیا۔ اوہنے کہیا:‏ سب توں ودھ کے دلوں اِک دُوجے نال محبت کرو کیونکہ محبت بوہت سارے گُناہواں تے پردہ پا دیندی اے۔ (‏1-‏پطرس 4:‏8‏)‏ ایس لئی اَسی کہہ سکنے آں کہ اَسی بھین بھراواں دِیاں غلطیاں تے جیہڑا رویہ ظاہر کرنے آں، اوہدے توں پتہ چلدا اے کہ اَسی اوہناں نال کِنّاں پیار کرنے آں۔‏

14.‏ 1-‏پطرس 4:‏8 دے مطابق سانوں بھین بھراواں نال کیہو جہی محبت کرنی چاہی دی اے؟ مثال دَوو۔‏

¹⁴ آؤ ذرا 1-‏پطرس 4:‏8 تے ہور گہرائی نال سوچ وچار کریئے۔ ایت دے شروع چ دَسیا گیا اے کہ سانوں اِک دُوجے نال گُوڑھی محبت کرن دی لوڑ اے۔ پطرس رسول نے ”‏گُوڑھی“‏ لئی جیہڑا لفظ استمال کیتا سی، اوہدا مطلب اے ”‏کسے چیز نُوں کِھچنا۔“‏ ایت دے دُوجے حصے چ دَسیا گیا اے کہ گُوڑھی محبت کیہہ کردی اے۔ ایہہ بھین بھراواں دے گُناہواں تے پردہ پا دیندی اے۔ تصور کرو کہ تواڈے کول اِک ٹیبل اے جدے تے داغ دھبے تے نشان پئے ہوئے نیں۔ تُسی ایہناں نُوں چھپان لئی اوہدے تے کپڑا پانا چاہندے او۔ تُسی ضرور اوس کپڑے نُوں کھچ کھچ کے پھیلاؤ گے تاکہ ٹیبل دے سارے نشان چھپ جان۔ ایسے طرحاں جے ساڈے دل چ بھین بھراواں لئی محبت ہوئے گی تے اَسی اوہناں دِیاں بس اِک دو غلطیاں تے نئیں سگوں بوہت سارے گُناہواں تے پردہ پا دَواں گے۔‏

15.‏ جے اَسی بھین بھراواں نال گُوڑھی محبت کراں گے تے فیر اَسی کیہہ کر سکاں گے؟ (‏کُلسّیوں 3:‏13‏)‏

¹⁵ سانوں بھین بھراواں نال اینی محبت کرنی چاہی دی اے کہ اَسی اوہناں دِیاں غلطیاں نُوں معاف کر سکئے، فیر بھانویں سانوں اِنج کرن لئی کافی زیادہ کوشش ای کیوں نہ کرنی پووے۔ ‏(‏کُلسّیوں 3:‏13 نُوں پڑھو۔)‏ جدوں اَسی دُوجیاں نُوں معاف کراں گے تے اَسی ثابت کراں گے کہ اَسی اوہناں نال گُوڑھی محبت کرنے آں تے یہوواہ نُوں خوش کرنا چاہنے آں۔ ہور کیہڑی چیز ساڈی مدد کرے گی کہ اَسی اپنے بھین بھراواں دِیاں غلطیاں نُوں در گزر کر سکئے؟‏

16، 17.‏ ہور کیہڑی چیز ساڈی مدد کرے گی کہ اَسی اپنے بھین بھراواں دِیاں غلطیاں نُوں بُھلا سکئے؟ مثال دَوو۔ (‏تصویر نُوں وی ویکھو۔)‏

¹⁶ بھین بھراواں دِیاں خامیاں دی بجائے اوہناں دِیاں خوبیاں تے دھیان دَوو۔ ایہدے لئی ذرا اِک مثال تے غور کرو۔ تصور کرو کہ تُسی کسے موقعے تے کجھ بھین بھراواں نال کٹھے ہوئے او۔ تُسی اوہناں نال بڑا چنگا وقت گزاریا اے تے جاندے ویلے تُسی اوہناں نال اِک تصویر لینا چاہندے او۔ تُسی دو تِن تصویراں لے لیندے او تاکہ جے اِک تصویر صحی نہ آئے تے دُوجی رکھی جا سکے۔ فیر اِک تصویر چ تُسی ویکھدے او کہ اِک بھرا دا چہرہ صحی نئیں آیا۔ تُسی اوس تصویر نال کیہہ کرو گے؟ تُسی اوہنوں ڈیلیٹ کر دَوو گے کیونکہ تواڈے کول ہور دو تصویراں ہے نیں جنہاں چ اوس بھرا سمیت سارے بھین بھرا مسکرا رہے نیں۔‏

¹⁷ بھین بھراواں دِیاں اچھیاں بُریاں گلاں وی تصویراں وانگوں نیں۔ ساڈے کول عام طور تے بھین بھراواں دِیاں چنگیاں یاداں ہوندیاں نیں۔ پر ہو سکدا اے کہ کدی کوئی بھین بھرا سانوں کوئی دل دُکھان والی گل کہہ دَوے۔ اوہدوں سانوں کیہہ کرنا چاہی دا اے؟ سانوں اوس گل نُوں بُھلا دینا چاہی دا اے، بالکل اوسے طرحاں جیویں اَسی کسے تصویر نُوں ڈیلیٹ کر دینے آں۔ (‏امثال 19:‏11؛‏ اِفسیوں 4:‏32‏)‏ اَسی اِک بُری یاد نُوں تے بُھلا ای سکنے آں کیونکہ ساڈے کول اوس بھین بھرا دِیاں بوہت ساریاں چنگیاں یاداں ہے نیں تے ایہہ چنگیاں یاداں ساڈے لئی بوہت خاص نیں۔‏

اَج محبت ظاہر کرنا ایناں ضروری کیوں اے؟‏

18.‏ ایس مضمون چ اَسی محبت بارے کیہڑیاں خاص گلاں سکھیاں نیں؟‏

¹⁸ سانوں اِک دُوجے لئی گُوڑھی محبت نُوں قائم کیوں رکھنا چاہی دا اے؟ جیویں کہ اَسی ایس مضمون چ گل کیتی اے، جدوں اَسی بھین بھراواں لئی محبت ظاہر کرنے آں تے اَسی یہوواہ لئی محبت ظاہر کر رہے ہُنے آں۔ اَسی بھین بھراواں لئی محبت کیویں ظاہر کرسکنے آں؟ ایہدا اِک طریقہ ایہہ وے کہ اَسی اوہناں نُوں تسلی دَئیے۔ جے ساڈے دل چ بھین بھراواں لئی ہمدردی ہوئے گی تے اَسی اوہناں نُوں تسلی دیندے رہواں گے۔ اَسی بھین بھراواں لئی گُوڑھی محبت نُوں کیویں قائم رکھ سکنے آں؟ اوہناں دِیاں غلطیاں نُوں معاف کر کے، فیر بھانویں سانوں اِنج کرنا مشکل ای کیوں نہ لگے۔‏

19.‏ اَج اِک دُوجے لئی محبت ظاہر کرنا ایناں ضروری کیوں اے؟‏

¹⁹ اَج اِک دُوجے لئی محبت ظاہر کرنا ایناں ضروری کیوں اے؟ غور کرو کہ پطرس رسول نے ایہدی کیہہ وجہ دَسی۔ اوہنے کہیا:‏ ساریاں چیزاں دا خاتمہ نیڑے وے ایس لئی .‏ .‏ .‏ اِک دُوجے نال گُوڑھی محبت کرو۔ (‏1-‏پطرس 4:‏7، 8‏)‏ جیویں جیویں ایس دُنیا دا خاتمہ نیڑے آ رہیا اے، اَسی کیس گل دی توقع کر سکنے آں؟ ایس بارے یسوع نے اپنے پیروکاراں نُوں کہیا کہ ”‏میرے ناں دی وجہ توں ساریاں قوماں تواڈے توں نفرت کرن گیاں۔“‏ (‏متی 24:‏9‏)‏ ایس نفرت دا سامنا کرن لئی سانوں اِک مُٹھ رہن دی لوڑ اے۔ جدوں اَسی اِک دُوجے نال محبت کراں گے جیہڑا اِک ایہو جیہا بندھن اے جیہڑا لوکاں نُوں پوری طرحاں اِک مُٹھ کردا اے تے شیطان ساڈا ایکا توڑ نئیں سکے گا۔—‏کُلسّیوں 3:‏14؛‏ فِلپّیوں 2:‏1، 2‏۔‏